Ezekiyɛ́li
2 Énɛ́ gúdo ɔ, é ɖɔ nú mì ɖɔ: “Gbɛtɔ́ví* è, sí te bo nɔ te afɔ towe lɛ́ jí, bónú má ɖɔ xó xá we.” 2 Hwenu e é ɖo xó ɖɔ nú mì wɛ é ɔ, gbigbɔ Mawu tɔn wá jǐ ce, bo bló bɔ un sí te bo nɔ te afɔ ce lɛ́ jí, mɔ̌ mɛ ɔ, un ná kpé wú bo ɖótó Mɛ e ɖo xó ɖɔ nú mì wɛ é.
3 Énɛ́ ɔ, é ɖɔ nú mì ɖɔ: “Gbɛtɔ́ví è, un ɖo sísɛ́ we dó togun Izlayɛ́li tɔn ɔ gɔ́n wɛ, dó akɔta gǔfɔ́ntɔ́ e fɔ́n gǔ dó jǐ ce lɛ́ é gɔ́n wɛ. Yě kpó tɔ́gbó yětɔn lɛ́ kpó gba sɛ́n ce lɛ́ káká jɛ égbé. 4 Un ɖo sísɛ́ we dó togun e nyí gǔfɔ́ntɔ́,* bo lɛ́ ɖó ayi syɛ́nsyɛ́n é gɔ́n wɛ, bɔ a ɖó ná ɖɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe.’ 5 Amɔ̌, yědɛɛ lɛ́ ɔ, ényí yě ɖótó, alǒ gbɛ́ ɖɔ émí kún ná ɖótó ó, ɖó togun gǔfɔ́ntɔ́ wɛ yě nyí wútu ɔ, yě ná tuun nǔgbó ɖɔ gbeyíɖɔ ɖé nɔ tɛ́ntin émítɔn.
6 “Nǔgbó wɛ ɖɔ wun kpó wunkan kpó wɛ lɛ́ lɛ̌ dó we,* bɔ a ɖo hɔnkéklě lɛ́ tɛ́ntin, amɔ̌, hwi gbɛtɔ́ví è, ma ɖi xɛsi nú yě ó, ma ka ɖi xɛsi nú xó yětɔn lɛ́ ó. Xó yětɔn lɛ́ ní ma dó xɛsi we ó, lěe nukúnmɛ yětɔn lɛ́ cí é ní ma ka hu ado nú we ó, ɖó togun gǔfɔ́ntɔ́ wɛ yě nyí. 7 A ɖó ná ɖɔ xó ce lɛ́ nú yě, yě ɖótó, alǒ gbɔ ɔ nɛ́, ɖó togun gǔfɔ́ntɔ́ wɛ yě nyí.
8 “Amɔ̌, hwi gbɛtɔ́ví è, ɖǒtó nǔ e ɖɔ nú we wɛ un ɖe é. Ma húzú gǔfɔ́ntɔ́ togun énɛ́ ɖɔhun ó. Kɛ nu towe bo ɖu nǔ e ná we wɛ un ɖe é.”
9 Ée un kpɔ́n é ɔ, un mɔ bɔ mɛɖé dlɛ́n alɔ dó mì, bɔ un mɔ wěma mlámlá e jí è wlán nǔ dó é ɖ’é mɛ. 10 Ée é vlɔ́n ɛ ɖo nukɔn ce é ɔ, nǔwlánwlán ɖ’é jí ɖo nukɔn kpó gǔdo kpó bǐ. Gbɛvíhan, aluwɛ kpó alěníná kpó wɛ è wlán d’é jí.