Ezekiyɛ́li
28 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, ɖɔ nú acɛkpatɔ́ Tíi tɔn ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe:
“Ðó a húzú goyítɔ́ ɖo ayi mɛ wútu ɔ, a nɔ ɖo ɖiɖɔ wɛ ɖɔ: ‘Mawu ɖɔhun wɛ un cí.
Un jínjɔ́n axɔ́súzinkpo Mawu tɔn jí ɖo xu tɛ́ntin.’
Amɔ̌, gbɛtɔ́ kpowun wɛ nú we, a nyí Mawu ǎ,
a na bo nɔ lin ɖo ayi towe mɛ ɖɔ émí cí Mawu ɖɔhun ɔ nɛ́.
3 Éɖíe! A nyɔ́nǔi hú Daniyɛ́li wɛ a?
Nǔbúdo ɖěbǔ ɖo hwlǎhwlá dó we ǎ, kabǐ?
4 A bló bɔ nǔnywɛ́ towe kpó nukúnnúmɔjɛnǔmɛ towe kpó dó dɔkun nú we,
bɔ a nɔ ɖo siká kpó kpatágan kpó xo kplé dó dɔkunsɛxwetɛn towe lɛ́ wɛ.
5 Alɔ e se kpɛ́n nú we ɖo ajɔ̌wiwa linu é dó dɔkun ɖaxó nú we,
bɔ a jɛ go yí ɖo ayi mɛ jí ɖó dɔkun towe wútu.”’
6 “‘Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe:
“Ðó a nɔ lin ɖo ayi towe mɛ ɖɔ émí cí Mawu ɖɔhun wútu ɔ,
7 un ná kplá toɖévomɛnu lɛ́ wá, bɔ yě ná tɔ́n ahwan we, ɛɛn, akɔta e nɔ wa alǎnnú hú gǎn ɖo akɔta lɛ́ mɛ é,
bɔ yě ná sún hwǐ yětɔn lɛ́ dó hɛn nǔ ɖɛkpɛ ɖɛkpɛ ɖěɖěe nǔnywɛ́ towe xo kplé lɛ́ é gblé,
bo ná sɔ́ susu ɖaxó e a ɖó é dó xo kɔ́.
8 Yě ná dɔn we nyi dó do* mɛ,
bɔ a ná kú kú baɖabaɖa ɖo xu tɛ́ntin.
9 A ná kpo ɖo ɖiɖɔ wɛ ɖɔ: ‘Mawu ɖɔhun wɛ un cí,’ nú mɛ e ɖo nǎ hu we wɛ é wɛ a?
Ðo mɛ e ɖo sísɔ́ we dó xo kɔ́ wɛ lɛ́ é sín alɔ mɛ ɔ, gbɛtɔ́ yǎyá wɛ a ná nyí, é ná nyí Mawu ǎ.”’
10 ‘A ná kú mɛ e è ma gbo ada ná ǎ lɛ́ é ɖɔhun ɖo toɖévomɛnu lɛ́ lɔ mɛ,
ɖó nyɛɖésúnɔ wɛ ɖɔ xó,’ wɛ Aklúnɔ Nǔbǐwúkpétɔ́ Jexóva ɖɔ.”
11 Bɔ Jexóva lɛ́ ɖɔ xó nú mì, bo ɖɔ: 12 “Gbɛtɔ́ví è, ji gbɛvíhan* ɖé dó axɔ́sú Tíi tɔn tamɛ, bo ɖɔ n’i ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe:
“A nyí nǔ e nǔ bǐ vɔ ɖ’é wú é sín kpɔ́ndéwú,*
nǔnywɛ́ kpé we, bɔ a lɛ́ nyɔ́ ɖɛkpɛ bɔ nǔ bǐ vɔ ɖ’é wú.
13 Edɛ́ni, jikpá Mawu tɔn ɔ mɛ wɛ a ɖe ɖ’ayǐ.
È sɔ́ awǐnnya xɔ akwɛ́ bǐ dó ba acɔ́ nú we:
hwlibíi, topázi, kpó jasipée kpó; klizolíti, onísi kpó jǎdi kpó; safíi, tukwázi kpó emɛlódu kpó;
bɔ nǔ e mɛ è sɔ́ awǐnnya xɔ akwɛ́ énɛ́ lɛ́ ɖokpó ɖokpó slé lɛ́ é kpó nǔ e hɛn yě ɖó te lɛ́ é kpó ɔ, siká wɛ è sɔ́ dó bló.
Gbe e gbe è dá we é wɛ è sɔ́ nǔ nú yě.
14 Un ɖe azɔ̌ nú we, bo sɔ́ we bɔ a nyí celubɛ́ɛn xɛnyaɖomɛjítɔ́.
A ɖo só mímɛ́ Mawu tɔn jí, bo nɔ ɖi zɔnlin gbɔn awǐnnya myɔnɔ lɛ́ tɛ́ntin.
15 Sín gbe e gbe è dá we é ɔ, è mɔ nǔjɛdo ɖě ɖo walɔ towe mɛ ǎ,
káká jɛ hwenu e è wá mɔ nǔagɔwiwa ɖo fɛn towe nu é.
16 Ðó ajɔ̌wiwa towe sukpɔ́ wútu ɔ,
a kpo nú dǎkaxixo, bo jɛ hwɛ hu jí.
Énɛ́ wú ɔ, celubɛ́ɛn xɛnyaɖomɛjítɔ́ è, un ná nya we mɛ blíblí ɖɔhun, sín só Mawu tɔn jí,
dó zɔ nú awǐnnya myɔnɔ lɛ́, lobo ná sú kún dó nú we.
17 A húzú goyítɔ́ ɖo ayi mɛ ɖó ɖɛkpɛ towe wútu.
A sɔ́ nǔnywɛ́ towe dó xo kɔ́ ɖó susu ɖaxó e a ɖó é wú.
Un ná sɔ́ we nyi dó ayǐkúngban jí.
Un ná bló bɔ a ná nyí nǔkpínkpɔ́n nú axɔ́sú lɛ́.
18 Ðó nǔwanyido towe tobutóbú lɛ́ kpó ahizijɔ́ towe lɛ́ kpó wútu ɔ, a sɔ́ nɔtɛn ɖeɖóvo towe lɛ́ xo kɔ́.
Un ná bló bɔ myɔ ɖé ná wlí, bo ná fyɔ́ we.
Un ná bló bɔ a ná ji kɔn afín ɖo ayǐkúngban ɔ jí ɖo mɛ ɖěɖěe ɖo kpínkpɔ́n we wɛ lɛ́ é bǐ nukúnmɛ.
19 Mɛ e tuun we ɖo togun lɛ́ mɛ lɛ́ é bǐ ná kpɔ́n we dáán kpó nǔkpácámɛ kpó.
Vivɔnu towe ná wá ajijimɛ, bo ná dó xɛsi tawun,
bɔ a sɔ́ ná tíin ǎ káká sɔ́yi.”’”
20 Bɔ Jexóva lɛ́ ɖɔ xó nú mì, bo ɖɔ: 21 “Gbɛtɔ́ví è, lǐlɛ́ kpan nukɔn Sidɔ́ɔn, bo ɖɔ nǔ e ná jɛ dó wǔ tɔn é ɖ’ayǐ. 22 A ɖó ná ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe:
“Sidɔ́ɔn è, un ná húzú kpan nukɔn we, bo ná xɔ susu gbɔn jǐ towe;
bɔ hwenu e un ná wa nǔ xá ɛ sɔgbe xá hwɛ e un ɖó n’i é, bo ná ɖe xlɛ́ gbɔn gbla tɔn mɛ ɖɔ mɛ mímɛ́ wɛ un nyí é ɔ, mɛ lɛ́ ná wá tuun ɖɔ nyɛ wɛ nyí Jexóva.
23 Un ná sɛ́ jɛmɛjí dó è, bɔ hun ná sa gbɔn ali tɔn lɛ́ jí.
Hwenu e è ná sɔ́ hwǐ dó jǐ tɔn sín awa lɛ́ bǐ xwé é ɔ, mɛ e è hu lɛ́ é ná j’ayǐ ɖo tɛ́ntin tɔn;
bɔ yě ná wá tuun ɖɔ nyɛ wɛ nyí Jexóva.
24 “‘“Énɛ́ gúdo ɔ, wunkan e nɔ gblé wǔ mɛ lɛ́ é kpó wun e nɔ ɖó wǔvɛ́ nú mɛ lɛ́ é kpó, énɛ́ wɛ nyí mɛ ɖěɖěe nɔ hu tɛ́ nú togun Izlayɛ́li tɔn lɛ́ é, ɖě sɔ́ ná lɛ́ lɛ̌ dó è ǎ; bɔ mɛ lɛ́ ná wá tuun ɖɔ nyɛ wɛ nyí Aklúnɔ Nǔbǐwúkpétɔ́ Jexóva.”’
25 “‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Hwenu e un ná vɔ́ togun Izlayɛ́li tɔn xo kplé sín togun ɖěɖěe mɛ è gba yě dó gbɔn lɛ́ é ɔ, un ná ɖe xlɛ́ ɖo tɛ́ntin yětɔn ɖɔ mɛ mímɛ́ wɛ un nyí ɖo akɔta lɛ́ nukúnmɛ. Bɔ yě ná nɔ to yětɔn mɛ, ɛɛn, to e un ná mɛsɛntɔ́ ce Jakɔ́bu é mɛ. 26 Yě ná nɔ fínɛ́ ɖo ayijayǐ mɛ, yě ná sá xwé, bo ná tun vǐwun, ɛɛn, hwenu e un ná wa nǔ xá mɛ ɖěɖěe lɛ́ lɛ̌ dó yě, bo nɔ hu tɛ́ nú yě lɛ́ é bǐ sɔgbe xá hwɛ e un ɖó nú yě é ɔ, yě ná nɔ ayijayǐ mɛ; bɔ yě ná wá tuun ɖɔ nyɛ wɛ nyí Jexóva Mawu yětɔn.”’”