Ezekiyɛ́li
27 Jexóva lɛ́ ɖɔ xó nú mì, bo ɖɔ: 2 “Hwɛ gbɛtɔ́ví è, ji gbɛvíhan* ɖé dó Tíi jí, 3 ɖɔ nú Tíi ɖɔ:
‘Hwi mɛ e nɔ nɔ xu sín hɔntogbó lɛ́ ta é,
hwi mɛ e nɔ wa ajɔ̌ xá tɔtɛ́ntinto gěgé sín mɛ lɛ́ é ɔ,
nǔ e Aklúnɔ Nǔbǐwúkpétɔ́ Jexóva ɖɔ é ɖíe:
“Tíi è, a ɖɔ dó hwiɖée wú ɖɔ: ‘Un nyɔ́ ɖɛkpɛ bɔ nǔ bǐ vɔ ɖ’é wú.’
4 Ayǐkúngban towe lɛ́ ɖo xu tɛ́ntin,
bɔ xɔgbátɔ́ towe lɛ́ bló bɔ nǔ bǐ vɔ ɖo ɖɛkpɛ towe wú.
5 Jenɛvliyéetín Seníi tɔn lɛ́ wɛ yě sɔ́ dó bló xwlɛ towe lɛ́ bǐ ná,
bo hɛn sɛ́dlutín ɖé wá sín Libáan, bo ná dó bló asyátín ɖé nú we.
6 Cɛ́nitín Basáni tɔn lɛ́ wɛ yě sɔ́ dó bló zɛn towe lɛ́ ná,
siplɛ́tín wɛ è sɔ́ dó bló tɔjíhún sín awɔnnu towe ná, bo sɔ́ tɔtɛ́ntinto Kitímu tɔn lɛ́ sín ajinakúɖú dó b’acɔ́ ná.
7 Lɛ̌ɛnkanvɔ Ejípu tɔn e ɖó sinmɛ tɛnmɛ tɛnmɛ é wɛ è zán dó bló tɔjíhún sín avɔ towe ná;
atɔ* towe sín yɛxɛ́nú lɛ́ ɔ, kan fɛ́sinnɔ kpó lɛ̌ngbɔ́fúnvɔ vɔvɔ e wi d’é mɛ é kpó, éé gosín tɔtɛ́ntinto Elíca tɔn lɛ́ mɛ lɛ́ é wɛ è dó bló yě.
8 Mɛ e nɔ nɔ Sidɔ́ɔn kpó Aavádi kpó lɛ́ é wɛ nyí zɛnkuntɔ́ towe lɛ́.
Tíi è, súnnu alɔsekpɛ́nnánɔ towe lɛ́ wɛ nɔ w’azɔ̌ ɖo tɔjíhún towe lɛ́ mɛ.
9 Súnnu Gebálu tɔn e mɔ nǔ kpɔ́n* bɔ alɔ lɛ́ se kpɛ́n ná lɛ́ é wɛ nɔ sú ali e ɖo tɔjíhún towe lɛ́ wú lɛ́ é.
Tɔjíhún e ɖo xu jí lɛ́ é bǐ kpó tɔjíhúnkuntɔ́ yětɔn lɛ́ kpó nɔ wá gɔ̌n towe bo ná xɔ nǔ, bo sa nǔ.
10 Súnnu Pɛ́si, Ludi kpó Púti kpó tɔn lɛ́ ɖo ahwankpá towe mɛ, ɛɛn, ahwanfuntɔ́ towe lɛ́ wɛ yě nyí.
Yě nɔ kplá gǎglónú yětɔn lɛ́ kpó gangbákún yětɔn lɛ́ kpó ɖó nǔ kɔ ɖo gɔ̌n towe, bo nɔ bló bɔ a nɔ xɔ susu.
11 Súnnu Aavádi tɔn e ɖo ahwankpá towe mɛ lɛ́ é nɔ nɔ ahohó towe lɛ́ jí lɛ́ lɛ̌ dó,
bɔ súnnu glegbenu lɛ́ nɔ cɔ́ atɔxwɛ towe lɛ́.
Yě nɔ kplá gǎglónú tobotobo lɛ́ ɖó nǔ kɔ gbɔn ahohó towe lɛ́ wú lɛ́ lɛ̌ dó,
bo bló bɔ a nyɔ́ ɖɛkpɛ bɔ nǔ bǐ vɔ ɖ’é wú.
12 “‘“Taasísi nɔ wa ajɔ̌ xá we ɖó dɔkun towe sukpɔ́ wútu. Yě nɔ sɔ́ kpatágan, gan, aflélé kpó sunmí kpó jó nú we bá dó yí ajɔ̌nú towe lɛ́. 13 Yaváni, Tubálu kpó Mɛcɛ́ki kpó nɔ wa ajɔ̌ xá we, bo nɔ sɔ́ kannumɔ lɛ́ kpó nǔ e è sɔ́ ganvɔ dó bló lɛ́ é kpó jó nú we bá dó yí ajɔ̌nú towe lɛ́. 14 Kúnkan Togáama tɔn lɛ́ nɔ sɔ́ sɔ́ lɛ́, ahwansɔ́ lɛ́ kpó sɔ́tócí lɛ́ kpó jó nú we bá dó yí ajɔ̌nú towe lɛ́. 15 Mɛ e nɔ nɔ Dedáni lɛ́ é nɔ wa ajɔ̌ xá we; ajɔ̌tɔ́ lɛ́ nɔ wa ajɔ̌ nú we ɖo tɔtɛ́ntinto gěgé mɛ; yě nɔ sɔ́ ajinakúɖú lɛ́ kpó ebɛ́ni kpó jó dó sú kuzú* we. 16 Edɔ́mu nɔ wa ajɔ̌ xá we ɖó ajɔ̌nú towe lɛ́ sukpɔ́ wútu. Yě nɔ sɔ́ awǐnnya tukwázi, lɛ̌ngbɔ́fúnvɔ vɔvɔ e wi d’é mɛ é, avɔ kíkó e ɖó sinmɛ tɛnmɛ tɛnmɛ é, avɔ ɖagbe ɖagbe, awǐnnya koláyi* lɛ́ kpó awǐnnya hwlibíi lɛ́ kpó jó bá dó yí ajɔ̌nú towe lɛ́.
17 “‘“Judáa kpó Izlayɛ́li to ɔ kpó nɔ wa ajɔ̌ xá we, bo nɔ sɔ́ blěe Mɛníti tɔn, nǔɖuɖu ɖagbe hú gǎn lɛ́, wǐin, ami kpó hinhɔ́n wǎnɖagbenɔ* lɛ́ kpó jó nú we bá dó yí ajɔ̌nú towe lɛ́.
18 “‘“Damási nɔ wa ajɔ̌ xá we ɖó ajɔ̌nú towe lɛ́ kpó dɔkun towe bǐ kpó sukpɔ́ wútu, bo nɔ sɔ́ vɛ̌ɛn Hɛlubɔ́ni tɔn kpó lɛ̌ngbɔ́fúnvɔ Saxáa tɔn* kpó jó nú we. 19 Vedáni kpó Yaváni kpó, éé gosín Wuzálu é nɔ sɔ́ gan e è tun é, kási* kpó fántín wǎnɖagbenɔ kpó jó nú we bá dó yí ajɔ̌nú towe lɛ́. 20 Sɔ́jívɔ tlitli* e jí sɔ́xátɔ́ lɛ́ nɔ jínjɔ́n é sín ajɔ̌ wɛ Dedáni nɔ wa xá we. 21 A yí Alabíinu lɛ́ kpó Kedáa sín gǎn lɛ́ bǐ kpó, bɔ yě nɔ wa azɔ̌ nú we; lɛ̌ngbɔ́, agbo kpó gbagbǎ kpó sín ajɔ̌ wɛ yě nɔ wa. 22 Ajɔ̌tɔ́ Saba tɔn lɛ́ kpó Hlǎama tɔn lɛ́ kpó nɔ wa ajɔ̌ xá we; yě nɔ sɔ́ célu e nyɔ́ hú gǎn lɛ́ é tɛnmɛ tɛnmɛ, awǐnnya xɔ akwɛ́ lɛ́ kpó siká kpó jó bá dó yí ajɔ̌nú towe lɛ́. 23 Haláani, Kannɛ́ɛ, Edɛ́ni, ajɔ̌tɔ́ Saba tɔn lɛ́, Asúu kpó Kilumádi kpó nɔ wa ajɔ̌ xá we. 24 Yě nɔ sa awu ɖɛkpɛ ɖɛkpɛ lɛ́, awu ɖaxó ɖěɖěe è sɔ́ avɔ fɛ́sinnɔ dó bló, lobo kó bɔ yě ɖó sinmɛ tɛnmɛ tɛnmɛ é kpó kɔ́mɛvɔ e ɖó sinmɛ vovo lɛ́ é kpó ɖo axi towe mɛ, bɔ è nɔ sɔ́ kan dó blá nǔ énɛ́ lɛ́ bǐ gbánwúngbánwún.
25 Tɔjíhún Taasísi tɔn lɛ́ nɔ zɔn kpɔ́ bo nɔ wá bɛ́ ajɔ̌nú towe lɛ́,
mɔ̌ mɛ ɔ, a gɔ́, bɔ agban lɛ́ kpɛn we* ɖo xu ɔ tɛ́ntin.
26 Zɛnkuntɔ́ towe lɛ́ kplá we yi xu e nɔ ɖo adǎn jí lɛ́ é jí;
jɔhɔn zǎnzǎnhwe jí tɔn gba we ɖo xu ɔ tɛ́ntin.
27 Dɔkun towe lɛ́, agban towe lɛ́, ajɔ̌nú towe lɛ́, tɔjíhúnkuntɔ́ towe lɛ́, mɛ e nɔ w’azɔ̌ ɖo tɔjíhún towe lɛ́ mɛ lɛ́ é,
mɛ e nɔ sú do e gbɔn tɔjíhún towe lɛ́ wú lɛ́ é, ajɔ̌tɔ́ towe lɛ́ kpó ahwanfuntɔ́ towe lɛ́ bǐ kpó,
ɛɛn, mɛ tobutóbú* e ɖo gɔ̌n towe lɛ́ é bǐ,
ɛɛn, yě bǐ ná syɔ́ ɖo xu ɔ tɛ́ntin gbe e gbe a ná j’ayǐ é.
28 Ényí mɛ e nɔ w’azɔ̌ ɖo tɔjíhún towe lɛ́ mɛ lɛ́ é sú xó ɔ, agě lɛ́ jí ná sísɔ́.
29 Zɛnkuntɔ́ lɛ́, tɔjíhúnkuntɔ́ lɛ́ kpó tɔzɔ́watɔ́ lɛ́ kpó bǐ,
ná jɛ te sín tɔjíhún yětɔn lɛ́ mɛ, bo ná nɔ te ɖo agě jí.
30 Yě ná zé gbe dó jǐ bo ná ya avǐ vívɛ́ vívɛ́ dó ta towe mɛ,
hwenu e yě ná ɖo kɔ́gúdu bɛ́ dó ta wɛ, bo ná ɖo gbo blí gbɔn afín mɛ wɛ é.
31 Yě ná xwlɛ́ ta bo ná sɔ́ ati dó;
yě ná ya avǐ vívɛ́ vívɛ́,* bo dó gbɛvíhan dó jǐ towe.
32 Hwenu e yě ná ɖo alě ná wɛ é ɔ, yě ná dó gbɛvíhan, bo ná ji nǔwamɛhan dó jǐ towe, bo ɖɔ:
‘Mɛ̌ ka cí Tíi e wá cí xwíí ɖo xu tɛ́ntin din é ɖɔhun?
33 Ényí agban towe lɛ́ gosín xu jí wá ɔ, a nɔ sú hudó togun gěgé tɔn sín do.
Dɔkun towe tobutóbú lɛ́ kpó ajɔ̌nú towe tobutóbú lɛ́ kpó dó dɔkun nú axɔ́sú ayǐkúngban ɔ tɔn lɛ́.
34 Din ɔ, a gba dó xu mɛ, ɖo sin e gɔ́ngɔ́n é mɛ,
bɔ ajɔ̌nú towe lɛ́ bǐ kpó mɛ towe lɛ́ bǐ kpó syɔ́ gɔ́ nú hwiɖésúnɔ.
35 Mɛ e nɔ nɔ tɔtɛ́ntinto lɛ́ mɛ lɛ́ é bǐ ná bɔ nukún nyi wǔ we kpó nǔkpácámɛ kpó,
bɔ axɔ́sú yětɔn lɛ́ ná sísɔ́ ɖó xɛsi ɖaxó wú, bɔ è ná mɔ xɛsi ɖo nukún yětɔn ta.
36 Ajɔ̌tɔ́ e ɖo akɔta lɛ́ mɛ lɛ́ é ná kwínkwín ɖó nǔ e jɛ dó jǐ towe lɛ́ é wú.
Vivɔnu towe ná wá ajijimɛ, bo ná dó xɛsi tawun,
bɔ a sɔ́ ná tíin ǎ káká sɔ́yi.’”’”