Ezekiyɛ́li
24 Ðo xwe tɛ́nnɛgɔ́ ɔ mɛ, ɖo sun wǒgɔ́ ɔ sín azǎn wǒgɔ́ ɔ gbe ɔ, Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, wlǎn azǎn élɔ́,* ɛɛn, azǎn égbé tɔn ɔ ɖ’ayǐ, azǎn égbé tɔn ɔ jí wɛ axɔ́sú Babilɔ́nu tɔn jɛ ahwan tɔ́n Jeluzalɛ́mu jí. 3 Dǒ lǒ* ɖé dó togun gǔfɔ́ntɔ́ ɔ tamɛ, bo ɖɔ dó yě wú ɖɔ:
“‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe:
“Sɔ́ nǔɖazɛ́n* ɔ ɖó ado jí; sɔ́ ɖ’é jí, bo kɔn sin d’é mɛ.
4 Bɛ̌ lan jíjá lɛ́ d’é mɛ, lan jíjá ɖagbe ɖagbe lɛ́ bǐ,
asá ɔ kpó abɔ̌ ɔ kpó; bɛ̌ xú ɖagbe hú gǎn lɛ́ d’é mɛ nú é ní gɔ́.
5 Lɛ̌ngbɔ́ ɖagbe hú gǎn e ɖo lɛ̌ngbɔ́hwan ɔ mɛ lɛ́ é wɛ a ná fɔ; to nakí dó zɛ̌n ɔ glɔ́ lɛ́ lɛ̌ dó.
Fyɛ́ sin lan jíjá lɛ́; nǔ xú e ɖo zɛ̌n ɔ mɛ lɛ́ é ní bí.”’
6 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe:
‘Heelú toxo mɛhutɔ́ ɔ, nǔɖazɛ́n e jɛ ko, bɔ è ma xwlɛ́ kojijɛ ɔ síin ǎ é!
Ðe lan jíjá lɛ́ sín mɛ ɖokpó ɖokpó nú é ní jɛ vɔ̌; ma nyi akɔ dó yě ó.
7 Ðó hun e toxo ɔ kɔn nyi ayǐ é kpo ɖo tɛ́ntin tɔn, awǐnnya e jí nǔɖé ma ɖe ǎ é jí wɛ é kɔn dó.
É kɔn nyi kɔ́mɛ, bo ná dó dɔn kɔ́gúdu nyi jí ǎ.
8 Bo ná dó fɔ́n adǎn ce nyi te nú hwenu e un ná ba hlɔn é ɔ,
un kɔn mɛ e é hu lɛ́ é sín hun kɔn nyi awǐnnya e jí nǔɖé ma ɖe ǎ, bɔ é ɖo kínkɔ́n wɛ é jí,
bónú è ma kpé wú bo cyɔ́n nǔ dó ó.
9 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe:
‘Heelú toxo mɛhutɔ́ ɔ!
Un ná to nakí kplé, bɔ é ná yi jǐ.
10 Xo nakí lɛ́ kplé bo flɔ́ myɔ ɔ,
fyɛ́ sin lan ɔ ganjí, hǔzú lansin ɔ, bo jó xú lɛ́ dó nú yě ní fyɔ́ bǐ.
11 Sɔ́ zɛ̌n vɔ̌tɔ́ ɔ ɖó myɔkán jí nú é ní hun myɔ,
bónú ganvɔ e è sɔ́ dó bló ná é ní hun myɔ, bo myá hɛɛ.
Nǔ kwíji e ɖ’é mɛ é ná sínsín dó xo tɔn mɛ, bɔ ko e é jɛ é ná fyɔ́.
12 É ɖó akpɔ nú mɛ, bo lɛ́ kpé agbɔ̌n mɛ,
ɖó kojijɛ ɔ tlí, bɔ é sixú wá yi ǎ.
Sɔ́ ɛ nyi dó myɔ mɛ kpó kojijɛ tɔn kpó!’
13 “‘Walɔ blíblí towe wɛ hɛn we kwíji. Un tɛ́n kpɔ́n bo ná bló bɔ a ná mɛ́, amɔ̌, nǔɖé ɖe bɔ è ná bló bónú a ná mɛ́ ǎ. A ná mɛ́ káká cóbónú adǎn e jí un ɖe ɖó hwɛ wú é ná ɖe kpo ǎ. 14 Nyɛ Jexóva ɖésúnɔ wɛ ɖɔ xó. É ná wá jɛ. Un ná wa nǔ ma xo nǔ kpɔ́n, é ná byɔ́ lanmɛ nú mì ǎ, é ka ná lɛ́ vɛ́ nú mì ǎ. È ná ɖɔ hwɛ xá we sɔgbe xá nǔwalɔ towe lɛ́ kpó nǔwiwa towe lɛ́ kpó,’ wɛ Aklúnɔ Nǔbǐwúkpétɔ́ Jexóva ɖɔ.”
15 Bɔ Jexóva lɛ́ ɖɔ xó nú mì, bo ɖɔ: 16 “Gbɛtɔ́ví è, un ɖo mɛ e a yí wǎn ná tawun é ná xo yí sín así towe wɛ ajijimɛ. A ɖó ná nɔ aluwɛ mɛ* ǎ; a ka ɖó ná lɛ́ y’avǐ, alǒ kun ɖasin ǎ. 17 Wɛn azɔn dó xomɛ, ma fɔ aluwɛ mɛ ninɔ dó mɛkúkú tamɛ sín yɛsu lɛ́ ó. Sɔ́ tablánú towe dó blá ta, bo dó afɔkpa towe. A ɖó ná cyɔ́n nǔ dó awɔnnufún* ǎ, ma ka lɛ́ ɖu wɔ̌xúxú e mɛ ɖěvo lɛ́ ná hɛn wá nú we é* ó.”
18 Un ɖɔ xó nú togun ɔ ɖo zǎnzǎn, bɔ asi ce kú ɖo gbadanu. Énɛ́ ɔ, ayǐhɔ́ngbe tɔn zǎnzǎn ɔ, un bló lěe è ɖe gbe tɔn nú mì gbɔn é. 19 Togun ɔ nɔ ɖo ɖiɖɔ nú mì wɛ ɖɔ: “A ná ɖɔ lěe nǔ énɛ́ lɛ́ e wa wɛ a ɖe lɛ́ é kan mǐ gbɔn é nú mǐ ǎ cé?” 20 Un yí gbe nú yě ɖɔ: “Jexóva ɖɔ xó nú mì, bo ɖɔ: 21 ‘Ðɔ nú togun Izlayɛ́li tɔn ɖɔ: “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Un ɖo sinsɛnxɔ ce e wú mi nɔ gó ɖó tawun, bɔ é nyí nǔ vívɛ́ nú mi, bɔ ayi mitɔn nɔ ɖ’é wú* é ná hɛn blí wɛ. Vǐ súnnu mitɔn lɛ́ kpó vǐ nyɔ̌nu mitɔn lɛ́ kpó e mi jó dó lɛ́ é ná kú hwǐ kú. 22 Énɛ́ gúdo ɔ, mi ɖó ná wa nǔ nyiɖɔhun. Mi ná cyɔ́n nǔ dó awɔnnufún mitɔn lɛ́ ǎ, mi ka ná lɛ́ ɖu wɔ̌xúxú e mɛ ɖěvo lɛ́ ná hɛn wá nú mi lɛ́ é ǎ. 23 Tablánú mitɔn lɛ́ ná ɖo ta mitɔn, bɔ afɔkpa mitɔn lɛ́ ná ɖo afɔ mitɔn. Mi ná nɔ aluwɛ mɛ, alǒ y’avǐ ǎ. É nyɔ́ wa ɔ, mi ná se wǔvɛ́* ɖó nǔwanyido mitɔn lɛ́ wú, bo ná nɔ kpɔ́n miɖée lɛ́ bo ná nɔ wɛn azɔn. 24 Ezekiyɛ́li húzú wuntun ɖé nú mi. Mi ná bló éɖɔhun pɛ́ɛ́. Hwenu e nǔ énɛ́ ná jɛ é ɔ, mi ná wá tuun ɖɔ nyɛ wɛ nyí Aklúnɔ Nǔbǐwúkpétɔ́ Jexóva.’”’”
25 “Amɔ̌, hwɛ gbɛtɔ́ví è, gbe e gbe un ná yí ahohó yětɔn sín yě sí, énɛ́ wɛ nyí nǔ ɖɛkpɛ ɖɛkpɛ e nɔ dó awǎjijɛ nú yě, bo nyí nǔ vívɛ́ nú yě bɔ ayi* yětɔn nɔ ɖ’é wú é, bo lɛ́ yí vǐ súnnu yětɔn lɛ́ kpó vǐ nyɔ̌nu yětɔn lɛ́ kpó sín yě sí é ɔ, 26 mɛ e ná gán ɖ’é mɛ é ɖé wɛ ná wá ɖó gbe tɔn nú we. 27 Ðo gbe énɛ́ gbe ɔ, a ná hun nu towe bo ná ɖɔ xó nú mɛ e gán ɖ’é mɛ é. A sɔ́ ná nyí ɖɛ̌kúnánɔ ǎ. A ná húzú wuntun ɖé nú yě, bɔ yě ná wá tuun ɖɔ nyɛ wɛ nyí Jexóva.”