Ezekiyɛ́li
25 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, lǐlɛ́ kpan nukɔn Amumɔ́ɔ ví lɛ́, bo ɖɔ nǔ e ná jɛ dó yě wú é ɖ’ayǐ. 3 A ɖó ná ɖɔ nú Amumɔ́ɔ ví lɛ́ ɖɔ: ‘Mi ɖótó xó e Aklúnɔ Nǔbǐwúkpétɔ́ Jexóva ɖɔ é. Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Mi ɖɔ ‘acɔnkwín!’ hwenu e è hɛn sinsɛnxɔ ce blí é, hwenu e Izlayɛ́li to ɔ jɛ vɔ̌ é kpó hwenu e akɔta Judáa tɔn yi kannumɔgbénu é kpó, 4 énɛ́ wú ɔ, un ná jó mi nú togun zǎnzǎnhwe jí tɔn ɔ, bɔ mi ná nyí étɔn. Yě ná ɖó gɔnu yětɔn lɛ́* ɖó mi gɔ́n, bo ná ɖó goxɔ yětɔn lɛ́ ɖó tɛ́ntin mitɔn. Yě ná ɖu atínsínsɛ́n mitɔn lɛ́, bo ná nu anɔ̌sin mitɔn lɛ́. 5 Un ná sɔ́ Hlaba dó húzú amagbo nú lǎkúnmí lɛ́, bo ná sɔ́ Amumɔ́ɔ ví lɛ́ sín to dó húzú gbɔjɛtɛn nú lɛ̌ngbɔ́ lɛ́; bɔ mi ná wá tuun ɖɔ nyɛ wɛ nyí Jexóva.”’”
6 “Ðó nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Mi xo asíkpɛ́, bo lɔ́n yi jǐ,* bɔ mi* zán xógbe mɛcáko tɔn syɛ́nsyɛ́n mɔ̌hun lɛ́ dó j’awǎ ɖó ninɔmɛ Izlayɛ́li to ɔ tɔn wú, 7 énɛ́ wú ɔ, alɔ ce ná jɛ mi wú, bɔ un ná jó mi nú akɔta lɛ́ bónú yě ná vɔ mi. Un ná ɖe mi sín togun lɛ́ mɛ, bo ná sú kún dó nú mi sín to lɛ́ mɛ. Un ná sú kún dó nú mi bǐ mlɛ́mlɛ́, bɔ mi ná wá tuun ɖɔ nyɛ wɛ nyí Jexóva.’
8 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Ðó Mɔwábu kpó Seyíi kpó ɖɔ: “Mi kpɔ́n! Akɔta Judáa tɔn cí akɔta ɖě lɛ́ bǐ ɖɔhun,” wútu ɔ, 9 un ná jó toxo e ɖo dogbó Mɔwábu tɔn jí lɛ́ é dó bɔ è ná tɔ́n ahwan yě, ɛɛn, to tɔn sín ɖɛkpɛ* ɔ, énɛ́ wɛ nyí Bɛti-Jesimɔ́ti, Baálu-Mewɔ́ni káká jɛ Kiliyatayímu jí. 10 Un ná jó é kpó Amumɔ́ɔ ví lɛ́ kpó nú togun zǎnzǎnhwe jí tɔn ɔ, bɔ yě ná nyí étɔn, énɛ́ ɔ, è sɔ́ ná flín Amumɔ́ɔ ví lɛ́ ɖo akɔta lɛ́ mɛ ǎ. 11 Un ná wa nǔ xá Mɔwábu sɔgbe xá hwɛ e un ɖó n’i é, bɔ yě ná wá tuun ɖɔ nyɛ wɛ nyí Jexóva.’
12 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Edɔ́mu ba hlɔn akɔta Judáa tɔn wú, mɔ̌ mɛ ɔ, é hu hwɛ ɖaxó ɖó hlɔn e é ba yě wú é wú; 13 énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Alɔ ce ná jɛ Edɔ́mu lɔmɔ̌ wú, bɔ un ná ɖe gbɛtɔ́ kpó kanlinhwan kpó bǐ sín mɛ, bo ná bló bɔ é ná jɛ vɔ̌. Yě ná kú hwǐ kú sín Temáni káká yi Dedáni. 14 ‘Un ná zán togun ce Izlayɛ́li dó ba hlɔn Edɔ́mu wú. Yě ná dɔn xomɛsin ce kpó adǎn e jí un ɖe é kpó wá Edɔ́mu jí, énɛ́ ɔ, Edɔ́mu ná mɔ nǔ e hlɔnbiba ce nyí é,’ wɛ Aklúnɔ Nǔbǐwúkpétɔ́ Jexóva ɖɔ.”’
15 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Ðó Filisitɛ́ɛn lɛ́ gbɛ́ wǎn nú Izlayɛ́li ví lɛ́ bɔ é gbɛ́ gbigbɔ wútu ɔ, yě sɔ́ ayi nyanya* dó ba ali e nu yě ná ba hlɔn yě wú, bo lɛ́ sú kún dó nú yě ɖe é. 16 Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Alɔ ce ná jɛ Filisitɛ́ɛn lɛ́ wú, bɔ un ná hu Kelɛ́tinu lɛ́, bo ná sú kún dó nú mɛ e kpo ɖo mɛ e nɔ nɔ xutó lɛ́ é mɛ lɛ́ é. 17 Un ná sɔ́ tódɔnnúmɛ syɛ́nsyɛ́n lɛ́ dó ba hlɔn yě wú b’ɛ ná vɛ́ jlɛ́, bɔ yě ná wá tuun ɖɔ nyɛ wɛ nyí Jexóva, hwenu e un ná ba hlɔn yě wú é.”’”