Ezekiyɛ́li

23 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, nyɔ̌nu we tíin, bɔ nɔ ɖokpó ɔ sín vǐ wɛ nú yě. 3 Yě húzú tonyatɔ́ ɖo Ejípu; sín wǐnnyáwínnyá mɛ wɛ yě jɛ to nya jí. È fyɔ́n anɔ̌ yětɔn lɛ́ ɖo fínɛ́, bo lílí alɔ gbɔn akɔ́nnu yětɔn lɛ́, hwenu e yě kpo ɖo alɔjí é. 4 Mɛxó ɔ nɔ nyí Oxóla,* bɔ mɛ kpɛví ɔ nɔ nyí Oxolíba.* Yě húzú ce, bo ji vǐ súnnu lɛ́ kpó vǐ nyɔ̌nu lɛ́ kpó. Oxóla nɔ te nú Samalíi, bɔ Oxolíba nɔ te nú Jeluzalɛ́mu.

5 “Oxóla jɛ to nya jí, hwenu e é kpo ɖo ce nyí wɛ é. É ɖó jlǒ xóɖóxámɛ tɔn syɛ́nsyɛ́n nú xɔnnɔ tɔn e yí wǎn n’i ɖésú lɛ́ é, ɛɛn, nɔzo tɔn Asilíinu lɛ́. 6 Tokpɔngán e nɔ dó awu fɛ́sinnɔ lɛ́ é kpó gǎnbɔdógǎnwú lɛ́ kpó wɛ nú yě, dɔ̌nkpɛvú ɖɛkpɛ ɖɛkpɛ e nɔ xá sɔ́ lɛ́ é wɛ nú yě bǐ. 7 É nɔ lɛ aga xá vǐ súnnu Asilíi tɔn nukúnɖéjí hú gǎn lɛ́, bo sɔ́ bǒcyɔ xyɔ́ wǔ* mɛ ɖěɖěe é nɔ ɖó jlǒ xóɖóxámɛ tɔn syɛ́nsyɛ́n ná lɛ́ é tɔn lɛ́ dó hɛn éɖée blí. 8 É jó to e é nya ɖo Ejípu é dó ǎ, ɖó hwenu e é ɖo wǐnnyáwínnyá mɛ é ɔ, yě ɖóxó xá ɛ, bo lílí alɔ gbɔn akɔ́nnu tɔn hwenu e é ɖo alɔjí é, lobo sɔ́ ɛ dó gbɔ jlǒ xóɖóxámɛ tɔn syɛ́nsyɛ́n* yětɔn ná. 9 Énɛ́ wú ɔ, un jó è nú xɔnnɔ tɔn e yí wǎn n’i ɖésú lɛ́ é, ɛɛn, vǐ súnnu Asilíi tɔn ɖěɖěe é ɖó jlǒ xóɖóxámɛ tɔn syɛ́nsyɛ́n ná lɛ́ é. 10 Yě ɖe è nyi mɛ̌, bo wlí vǐ súnnu tɔn lɛ́ kpó vǐ nyɔ̌nu tɔn lɛ́ kpó, lobo sɔ́ hwǐ dó hu éɖésúnɔ. É húzú mɛ nukúnɖéjí ɖo ali nyanya nu ɖo nyɔ̌nu lɛ́ mɛ, bɔ yě* dɔn tó n’i.

11 “Ée nɔví nyɔ̌nu tɔn Oxolíba mɔ nǔ énɛ́ lɛ́ é ɔ, jlǒ xóɖóxámɛ tɔn syɛ́nsyɛ́n e é ɖó é tlɛ lɛ́ tlɛ́n asá d’é jí, bɔ tonyinya éyɛ́tɔn lɛ́ nylá hú nɔví nyɔ̌nu tɔn tɔn. 12 É ɖó jlǒ xóɖóxámɛ tɔn syɛ́nsyɛ́n nú nɔzo tɔn, vǐ súnnu Asilíi tɔn lɛ́, ɛɛn, tokpɔngán kpó gǎnbɔdógǎnwú kpó, ɖěɖěe nɔ dó awu ɖɛkpɛ ɖɛkpɛ lɛ́, bo nɔ lɛ́ xá sɔ́ lɛ́ é; dɔ̌nkpɛvú ɖɛkpɛ ɖɛkpɛ lɛ́ wɛ nú yě bǐ. 13 Ée é hɛn éɖée blí é ɔ, un mɔ ɖɔ yě mɛ we lɛ́ bǐ wɛ mlɛ́ ali ɖokpó ɔ. 14 Amɔ̌, to e nya wɛ éyɛ́ ɖe é nɔ lɛ́ ɖo jijɛjí wɛ. É mɔ súnnu e è ɖe dó dǒ mɛ lɛ́ é, ɛɛn, ɖiɖe Kaludéenu lɛ́ tɔn e è ɖe dó dǒ mɛ bo sá nǔ vɔvɔ dó lɛ́ é, 15 bɔ yě sin gǒjíblánú dó alin, tablá gaga ɖo ta nú yě, bɔ yě cí ahwanfuntɔ́ lɛ́ ɖɔhun; yě bǐ nɔ te nú Babilɔ́nunu lɛ́, bɔ è ji yě ɖo Kaludéenu lɛ́ sín to mɛ. 16 Ée é mɔ yě tlóló é ɔ, é jɛ jlǒ xóɖóxámɛ tɔn syɛ́nsyɛ́n ɖó nú yě jí, bo sɛ́ wɛndótɔ́ lɛ́ dó yě ɖo Kaludée. 17 Énɛ́ ɔ, vǐ súnnu Babilɔ́nu tɔn lɛ́ nɔ wá zan tɔn e jí é nɔ ɖóxó xá mɛ ɖe é jí, bɔ yě sɔ́ jlǒ xóɖóxámɛ tɔn syɛ́nsyɛ́n* yětɔn dó hɛn ɛ blí. Ée yě hɛn ɛ blí gúdo é ɔ, é* lɛ́ kɔ sín yě gúdo ɖó yě xyɔ́ wǔ n’i.

18 “Ée é nya to kpó wunhínhɔ́n kpó, bo xlɛ́ mɛ̌ éɖésúnɔ tɔn é ɔ, un lɛ́ kɔ sín gǔdo tɔn ɖó é xyɔ́ wǔ nú mì wútu, lěe un* lɛ́ kɔ sín nɔví nyɔ̌nu tɔn gúdo ɖó é xyɔ́ wǔ nú mì wútu gbɔn é ɖɔhun. 19 É fɔ́n ɔ, é nɔ ɖo to nya d’é jí wɛ, bɔ énɛ́ nɔ flín i wǐnnyáwínnyá hwenu tɔn, hwenu e é nya to ɖo Ejípu to mɛ é. 20 É ɖó jlǒ xóɖóxámɛ tɔn syɛ́nsyɛ́n nú yě, lěe xɔnnɔ súnnu ɖěɖěe sín súnnuxwé cí tócí tɔn, alǒ sɔ́ tɔn ɖɔhun lɛ́ é tɔn lɛ́ nɔ ɖó jlǒ xóɖóxámɛ tɔn syɛ́nsyɛ́n nú yě gbɔn é. 21 Walɔ blíblí e a zán ɖo wǐnnyáwínnyá mɛ ɖo Ejípu, hwenu e è lílí alɔ gbɔn akɔ́nnu towe, ɛɛn, wǐnnyáwínnyá mɛ sín anɔ̌ towe lɛ́ wú é, nɔ lɛ́ jló we vɛ́návɛ́ná.

22 “Énɛ́ wú ɔ, Oxolíba, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Un ná fɔ́n xɔnnɔ towe ɖěɖěe gúdo a* lɛ́ kɔ sín ɖó yě xyɔ́ wǔ nú we wútu lɛ́ é dó jǐ we, bo ná kplá yě sín awa lɛ́ bǐ xwé bɔ yě ná tɔ́n ahwan we, 23 ɛɛn, vǐ súnnu Babilɔ́nu tɔn lɛ́ kpó Kaludéenu lɛ́ bǐ kpó, Pekɔ́dinu lɛ́, Coanu lɛ́ kpó Koanu lɛ́ kpó, gɔ́ nú vǐ súnnu Asilíi tɔn lɛ́ bǐ. Dɔ̌nkpɛvú ɖɛkpɛ ɖɛkpɛ lɛ́ wɛ nú yě bǐ, tokpɔngán lɛ́ kpó gǎnbɔdógǎnwú lɛ́ kpó, ahwanfuntɔ́ lɛ́ kpó mɛ e è xwe sɔ bo cyán lɛ́ é* kpó; yě bǐ wɛ nɔ xá sɔ́. 24 Yě ná sɔ́ ahwankɛkɛ́ e ɖo nǔ ɖɔ wɛ lɛ́ é, kɛkɛ́fɔ lɛ́, ahwanfuntɔ́ wɔ̌búwɔ́bú lɛ́, gǎglónú ɖaxó kpó gǎglónú kpɛví* kpó, gɔ́ nú gangbákún dó tɔ́n ahwan we. Yě ná sí ahwan te lɛ́ lɛ̌ dó we; un ná ná gbe yě bɔ yě ná ɖɔ hwɛ, ɛɛn, yě ná ɖɔ hwɛ xá we lěe é jló yě gbɔn é. 25 Un ná ɖe xomɛsin syɛ́nsyɛ́n e jí un ɖe é xlɛ́ we, bɔ yě ná sɔ́ adǎn e jí yě ɖe é dó wa nǔ xá we. Yě ná kpa awɔntín towe kpó tó towe lɛ́ kpó síin, bɔ mɛ ɖěɖěe ná kpo nú we lɛ́ é ná kú hwǐ kú. Yě ná bɛ́ vǐ súnnu towe lɛ́ kpó vǐ nyɔ̌nu towe lɛ́ kpó yi, bɔ è ná sɔ́ myɔ dó fyɔ́ mɛ e ná kpo nú we lɛ́ é. 26 Yě ná ɖe awu towe lɛ́ sín kɔ nú we, bo ná xo acɔ́banú* ɖɛkpɛ ɖɛkpɛ towe lɛ́ yí. 27 Un ná ɖó nǔ walɔ blíblí towe, gɔ́ nú tonyinya towe, éé bɛ́ ɖo Ejípu to mɛ é nu. A sɔ́ ná kpɔ́n yě ɖě ǎ, a ka sɔ́ ná flín Ejípu ɖě ǎ.’

28 “Ðó nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Un ɖo nǎ jó we nú mɛ ɖěɖěe a gbɛ́ wǎn ná lɛ́ é wɛ, ɛɛn, mɛ ɖěɖěe gúdo a* lɛ́ kɔ sín, ɖó yě xyɔ́ wǔ nú we wútu lɛ́ é. 29 Yě ná wa nǔ xá we kpó wǎngbɛ́númɛ kpó, bo ná bɛ́ nǔ e a jɛ tagba bo ɖó lɛ́ é bǐ, bo ná jó we nyi mɛ̌ jɔgbe. È ná ɖe mɛ̌ towe e a nɔ sɔ́ dó lɛ aga b’ɛ hu winnyá é, nǔblíblíwiwa towe kpó tonyinya towe kpó nyi wě. 30 È ná wa nǔ énɛ́ xá we ɖó a kán wezun jɛ akɔta lɛ́ gúdo, lěe tonyatɔ́ ɖé nɔ bló gbɔn é ɖɔhun, ɖó a sɔ́ bǒcyɔ xyɔ́ wǔ yětɔn lɛ́ dó hɛn hwiɖée blí. 31 Ali e nɔví nyɔ̌nu towe mlɛ́ é wɛ hwi lɔ mlɛ́, énɛ́ wú ɔ, un ná sɔ́ kɔ́fu tɔn dó alɔ towe mɛ.’

32 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe:

“Ðó nyɛɖésúnɔ wɛ ɖɔ xó,” wɛ Aklúnɔ Nǔbǐwúkpétɔ́ Jexóva ɖɔ.’

35 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Ðó a wɔn mì, bo lɛ́ dó vɛ̌ nú mì bǐ mlɛ́mlɛ́* wútu ɔ, a ná hɛn nǔ e walɔ blíblí towe kpó tonyinya núwiwa towe lɛ́ kpó ji lɛ́ é sín agban.’”

36 Énɛ́ gúdo ɔ, Jexóva ɖɔ nú mì ɖɔ: “Gbɛtɔ́ví è, a ka ná ɖɔ hwɛ xá Oxóla kpó Oxolíba kpó, bo lɛ́ kɛ nu dó nǔ e xyɔ́ wǔ bɔ yě wa lɛ́ é wú nú yě a? 37 Yě dó afɔ gbě,* bɔ kanjɔ lɛ́ ɖo alɔ yětɔn. Yě dó afɔ gbě gbɔn bǒcyɔ xyɔ́ wǔ yětɔn lɛ́ sinsɛn gblamɛ, énɛ́ kɛ́ɖɛ́ ka wɛ ǎ, vǐ yětɔn e yě ji nú mì lɛ́ é ɔ, yě lɛ́ dó yě zo,* bɔ yě nyí nǔɖuɖu nú bǒcyɔ yětɔn lɛ́. 38 Gɔ́ ná ɔ, nǔ e yě wa nú mì é ɖíe: yě hɛn sinsɛnxɔ ce blí ɖo gbe énɛ́ gbe, bo lɛ́ ɖu su nú gbɔjɛzán ce lɛ́. 39 Ée yě hu vǐ yětɔn lɛ́ dó sá vɔ̌ nú bǒcyɔ xyɔ́ wǔ yětɔn lɛ́ gúdo é ɔ, yě wá sinsɛnxɔ ce mɛ bo ná dó hɛn blí ɖo gbe énɛ́ gbe ɖokpó ɔ. Nǔ e yě wa ɖo xwé ceɖésú gbe é nɛ́. 40 Yě tlɛ sɛ́ wɛndótɔ́ ɖé dó súnnu lɛ́ bónú yě ná gosín fí línlín wá. Ée yě jawě é ɔ, hwɛ Oxolíba ɔ, a lɛ wǔ, bo sá nǔ dó nukúnmɛ, lobo sɔ́ acɔ́ɖónú lɛ́ dó ba acɔ́ nú hwiɖée. 41 A jínjɔ́n zinkpo gǎnjɛmɛ ɖagbe ɖagbe ɖé mɛ, bo sɔ́ távo ɖokpó ɖó nukɔn tɔn, lobo sɔ́ zǎlínkpɔ́n ce kpó ami ce kpó ɖó távo ɔ ta. 42 Súnnu e ayi mɛ vo ná lɛ́ é sín ahwan ɖé ɖo fínɛ́ bɔ è se gbe yětɔn, bɔ ahannumúnɔ e è kplá sín gbětótló mɛ é ɖé lɛ́ ɖo yě mɛ. Yě dó alɔgan alɔ nú nyɔ̌nu lɛ́, bo xwe jɛ̌gbákún ɖɛkpɛ ɖɛkpɛ lɛ́ nú yě.

43 “Énɛ́ gúdo ɔ, un ɖɔ dó éyɛ́ mɛ e ko dó afɔ gbě káká bo vɔ gǎn bǐ é wú ɖɔ: ‘Din ɔ, é ná kpo ɖo to e nya wɛ é ɖe é wú.’ 44 Énɛ́ wú ɔ, yě kpo ɖo gɔ̌n tɔn yi wɛ, lěe è nɔ yi tonyatɔ́ ɖé gɔ́n gbɔn é ɖɔhun. Lěe yě yi Oxóla kpó Oxolíba kpó, nyɔ̌nu énɛ́ lɛ́ e ɖó walɔ blíblí lɛ́ é gɔ́n gbɔn é nɛ́. 45 Amɔ̌, súnnu nǔjlɔ́jlɔ́watɔ́ lɛ́ ná ɖɔ hwɛ xá ɛ* lěe é jɛxá gbɔn é, ɖó afɔ e é dó gbě é kpó hun e é kɔn nyi ayǐ é kpó wú; ɖó afɔdógbětɔ́ wɛ nú yě, bɔ kanjɔ lɛ́ ɖo alɔ yětɔn.

46 “Ðó nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘È ná kplá ahwankpá ɖé wá bɔ é ná tɔ́n ahwan yě, bo ná bló bɔ yě ná húzú nǔ e xyɔ́ wǔ é, lobo ná vɔ nǔɖókan yětɔn lɛ́. 47 Ahwankpá ɔ ná nyi hwǎn dó yě, bo ná sɔ́ hwǐ dó já yě. Yě ná hu vǐ súnnu yětɔn lɛ́ kpó vǐ nyɔ̌nu yětɔn lɛ́ kpó, bo ná dó xwé yětɔn lɛ́ zo. 48 Un ná ɖó nǔ walɔ blíblí e ɖo to ɔ mɛ é nu bɔ é ná kplɔ́n nǔ nyɔ̌nu lɛ́ bǐ, énɛ́ ɔ, yě ná ɖó walɔ blíblí miɖɔhun ǎ. 49 Nǔ e walɔ blíblí mitɔn kpó hwɛ e mi hu gbɔn bǒcyɔ xyɔ́ wǔ mitɔn lɛ́ sinsɛn gblamɛ lɛ́ é kpó ji lɛ́ é ɔ, yě ná bló bɔ mi ná se xɔxɔ tɔn; bɔ mi ná wá tuun ɖɔ nyɛ wɛ nyí Aklúnɔ Nǔbǐwúkpétɔ́ Jexóva.’”