Ezekiyɛ́li

22 Jexóva lɛ́ ɖɔ xó nú mì, bo ɖɔ: 2 “Hwɛ gbɛtɔ́ví è, a ɖo gbesisɔmɛ bo ná ɖɔ hwɛ xá* toxo mɛhutɔ́ ɔ, bo lɛ́ bló bɔ é ná tuun nǔ e xyɔ́ wǔ bɔ é wa lɛ́ é bǐ a? 3 A ɖó ná ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Hwi toxo e mɛ è nɔ kɔn hun kɔn nyi ayǐ ɖe é, hwi toxo e sín hwenu su é, hwi toxo e nɔ bló bǒcyɔ xyɔ́ wǔ lɛ́* dó hɛn hwiɖée blí é, 4 hun e a kɔn nyi ayǐ é zɔ́n bɔ a húzú hwɛhutɔ́, bɔ bǒcyɔ xyɔ́ wǔ towe lɛ́ hɛn we blí. A bló bɔ azǎn towe lɛ́ sín vivɔnu yá wǔ wá, bɔ xwe towe lɛ́ sín vivɔnu wá. Énɛ́ wú wɛ un ná bló bɔ a ná húzú zuntín nú akɔta lɛ́, bɔ to lɛ́ bǐ ná nɔ cá we ko. 5 To e sɛkpɔ́ we lɛ́ é kpó éé ɖo zɔ vwéé dó we lɛ́ é kpó ná nɔ cá we ko, hwi toxo e sín nyǐkɔ blí, bɔ hunnyahunnya gɔ́ é. 6 Kpɔ́n! Gǎn Izlayɛ́li tɔn e ɖo gɔ̌n towe lɛ́ é ɖokpó ɖokpó nɔ zán acɛ e é ɖó é dó kɔn hun kɔn nyi ayǐ. 7 È nɔ hu tɛ́ nú tɔ́ kpó nɔ kpó ɖo gɔ̌n towe. È nɔ xo jǒnɔ e ɖo to ɔ mɛ é ɖu, bo nɔ xo dǎka tɔ́cyɔvǐ* kpó asúkúsi kpó wú.”’”

8 “‘A nɔ sɔ́ fí mímɛ́ ce lɛ́ dó xo kɔ́, bo nɔ ɖu su nú gbɔjɛzán ce lɛ́. 9 Jidómɛtɔ́ e kán ɖ’é jí bo ná nɔ kɔn hun kɔn nyi ayǐ lɛ́ é ɖo gɔ̌n towe. È nɔ ɖu nǔ e è sɔ́ dó sá vɔ̌ nú bǒcyɔ lɛ́ é ɖo só lɛ́ jí ɖo gɔ̌n towe, bo nɔ zán walɔ xyɔ́ wǔ lɛ́ ɖo gɔ̌n towe. 10 Ðo gɔ̌n towe ɔ, è nɔ hɛn tɔ́ mɛtɔn sín adɔ̌zan blí,* bo nɔ hwlɛ́n kan xá nyɔ̌nu e nyí mɛ blíblí ɖó é jɛ glegbe wútu é. 11 Ðo gɔ̌n towe ɔ, súnnu nɔ wa nǔ gblégblé xá nɔzo tɔn sín asi, mɛ ɖěvo nɔ wa nǔ e xyɔ́ wǔ é dó hɛn vǐ éɖésúnɔ tɔn sín asi blí, bɔ mɛ ɖěvo nɔ hwlɛ́n kan xá nɔví nyɔ̌nu tɔn, ɛɛn, tɔ́ tɔn ví nyɔ̌nu. 12 Ðo gɔ̌n towe ɔ, è nɔ yí akwɛ́ bo ná dó kɔn hun kɔn nyi ayǐ. A nɔ yí akwɛ́ví dó akwɛ́ e a nya nú mɛ é jí, alǒ ɖu le ɖ’é jí, lobo nɔ xo nɔzo towe lɛ́ sín akwɛ́ ɖu. Ɛɛn, a wɔn mì bǐ mlɛ́mlɛ́,’ wɛ Aklúnɔ Nǔbǐwúkpétɔ́ Jexóva ɖɔ.

13 “‘Éɖíe! Un xo alɔ, ɖó wǔ xyɔ́ mì ɖó afu e a ɖu é kpó hun e è kɔn nyi ayǐ ɖo gɔ̌n towe lɛ́ é kpó wú. 14 Akɔ́nkpinkpan* towe ka ná kpo ɖo te, bɔ alɔ towe lɛ́ ná kpo ɖo hlɔ̌nhlɔ́n ɖó wɛ ɖo hwenu e un ná wa nǔ xá we é a? Nyɛ Jexóva ɖésúnɔ wɛ ɖɔ xó, bɔ un ná wa nǔ. 15 Un ná gba we dó gbɔn akɔta lɛ́ mɛ, bo ná fúnfún we kpé gbɔn to lɛ́ mɛ, bɔ un ná ɖó nǔ nǔblíblíwiwa towe nu. 16 Bɔ è ná kɔ́n wi nú we ɖo akɔta lɛ́ nukɔn, énɛ́ ɔ, a ná wá tuun ɖɔ nyɛ wɛ nyí Jexóva.’”

17 Bɔ Jexóva lɛ́ ɖɔ xó nú mì, bo ɖɔ: 18 “Gbɛtɔ́ví è, togun Izlayɛ́li tɔn wá cí nǔ kwíji e ma xɔ akwɛ́ ǎ é ɖɔhun nú mì. Yě bǐ wɛ nyí ganvɔ, aflélé, gan kpó sunmí kpó ɖo myɔkpó mɛ. Yě húzú kpatágan sín nǔ kwíji.*

19 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Ðó mi mɛ bǐ wá cí nǔ kwíji e ma xɔ akwɛ́ ǎ é ɖɔhun wútu ɔ, un ɖo mi xo kplé dó Jeluzalɛ́mu toxo ɔ mɛ wɛ. 20 Lěe è nɔ xo kpatágan, ganvɔ, gan, sunmí kpó aflélé kpó kplé dó myɔkpó mɛ, bo ná xo zo dó yě bónú yě ná sínsín gbɔn é ɔ, mɔ̌ wɛ un ná ɖo xomɛsin kpó adǎn kpó jí bo ná xo mi kplé gbɔn, bɔ un ná xo zo dó mi, bo ná bló bɔ mi ná sínsín. 21 Un ná xo mi kplé, bo ná fún adǎn e jí un ɖe é sín myɔ dó mi jí, bɔ mi ná sínsín ɖo toxo ɔ mɛ. 22 Lěe è nɔ sínsín kpatágan ɖo myɔkpó mɛ gbɔn é ɔ, mɔ̌ wɛ è ná sínsín mi lɔ ɖo toxo ɔ mɛ gbɔn; bɔ mi ná wá tuun ɖɔ nyɛ Jexóva ɖésúnɔ wɛ gba adǎn e jí un ɖe é kɔn nyi mi jí.’”

23 Bɔ Jexóva lɛ́ ɖɔ xó nú mì, bo ɖɔ: 24 “Gbɛtɔ́ví è, ɖɔ n’i ɖɔ: ‘To ɖé wɛ a nyí, bɔ ɖo xomɛsin syɛ́nsyɛ́n sín azǎn gbe ɔ, è ná slá wǔ nú we ǎ, jǐ ka ná lɛ́ ja dó jǐ we ǎ. 25 Gbeyíɖɔ tɔn lɛ́ blá gbě ɖo gɔ̌n tɔn, kinnikínní e ɖo gbe dó wɛ, bo ɖo nǔ e é wlí é tlɛ́n ɖu wɛ é ɖɔhun. Yě ɖo mɛ* lɛ́ vún ɖu wɛ. Yě ɖo dɔkun kpó nǔ xɔ akwɛ́ lɛ́ kpó xo yí wɛ. Yě bló bɔ mɛ gěgé húzú asúkúsi ɖo gɔ̌n tɔn. 26 Vɔ̌sánúxwlémawutɔ́ tɔn lɛ́ gba sɛ́n ce, bo nɔ ɖo su ɖu nú fí mímɛ́ ce lɛ́ wɛ. Yě nɔ tuun vogbingbɔn e ɖo nǔ e nyí nǔ mímɛ́ é kpó nǔ e nyí nǔ yǎyá é kpó tɛ́ntin é ǎ. Yě bló bɔ è tuun vogbingbɔn e ɖo nǔ e nyí nǔ blíblí é kpó nǔ e nyí nǔ mímɛ́ é kpó tɛ́ntin é ǎ. Yě gbɛ́ ɖɔ émí kún ná nyi gbɔjɛzán ce lɛ́ ó, bo sɔ́ mì dó xo kɔ́ ɖo tɛ́ntin yětɔn. 27 Axɔ́ví e ɖo tɛ́ntin tɔn lɛ́ é cí hla ɖěɖěe ɖo nǔ e yě wlí é tlɛ́n ɖu wɛ lɛ́ é ɖɔhun; yě nɔ kɔn hun kɔn nyi ayǐ, bo nɔ hu mɛ* bá dó ɖu afu. 28 Gbeyíɖɔ tɔn lɛ́ ka sɔ́ nǔ nyanya e yě nɔ wa lɛ́ é hwlá, lěe è nɔ sá nǔ wěwé dó dǒ zizɛ gbɔn é ɖɔhun. Yě nɔ mɔ nǔmimɔ adingban tɔn lɛ́, bo nɔ ɖó adingban gbɔn amɔɛkinkan gblamɛ, lobo nɔ ɖɔ: “Nǔ e Aklúnɔ Nǔbǐwúkpétɔ́ Jexóva ɖɔ é ɖíe”; nyɛ Jexóva ɖésúnɔ ka ɖɔ xó ɖě ǎ. 29 Mɛ e ɖo to ɔ mɛ lɛ́ é xo mɛ ɖu, bo jɛ ajo, yě xo dǎka gbɛ̌dónánɔ kpó wamamɔnɔ kpó wú; yě xo jǒnɔ e ɖo to ɔ mɛ é ɖu, bo ɖɔ hwɛ jlɔ́jlɔ́ n’i ǎ.’

30 “‘Un ɖo mɛ e ná jlá dǒ e è sɔ́ awǐnnya dó mɛ é ɖó, alǒ nɔ te ɖo nukɔn ce ɖo fí e dǒ ɔ gba ɖe é, dó jɛ hun dó to ɔ jí, bónú è ma sú kún dó ná ó é ba wɛ ɖo yě mɛ, loɔ, un mɔ mɛ ɖěbǔ ǎ. 31 Énɛ́ wú ɔ, un ná gba xomɛsin syɛ́nsyɛ́n e jí un ɖe é kɔn nyi yě jí, bo ná sɔ́ adǎn e jí un ɖe é sín myɔ dó vívá yě. Un ná bló bɔ yě ná se xɔxɔ nǔ e walɔ yětɔn ji lɛ́ é tɔn,’ wɛ Aklúnɔ Nǔbǐwúkpétɔ́ Jexóva ɖɔ.”