Ezekiyɛ́li
21 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, lǐlɛ́ kpan nukɔn Jeluzalɛ́mu, bo jlá akpágbanúmɛ sín wɛn dó nɔtɛn ɖeɖóvo lɛ́ wú, lobo ɖɔ nǔ e ná jɛ dó Izlayɛ́li to ɔ wú é ɖ’ayǐ. 3 Ðɔ nú Izlayɛ́li to ɔ ɖɔ: ‘Nǔ e Jexóva ɖɔ é ɖíe: “Un ná húzú kpan nukɔn we, bo ná sún hwǐ ce sín akún mɛ, bo ná hu nǔjlɔ́jlɔ́watɔ́ kpó mɛ nyanya kpó bǐ sín tɛ́ntin towe. 4 Ðó un ná hu nǔjlɔ́jlɔ́watɔ́ kpó mɛ nyanya kpó sín tɛ́ntin towe wútu ɔ, è ná sún hwǐ ce sín akún mɛ dó mɛ* bǐ jí, sín tofɔligbé yi totaligbé. 5 Mɛ bǐ ná wá tuun ɖɔ nyɛ Jexóva ɖésúnɔ wɛ sún hwǐ ce sín akún mɛ. É sɔ́ ná lɛ́ kɔ yi mɛ ǎ.”’
6 “Hwɛ gbɛtɔ́ví è, ɖo azɔn wɛn wɛ, bo* ɖo sísɔ́sísɔ́ wɛ, ɛɛn, wɛn azɔn wǔbláwúblá ɖo nukɔn yětɔn. 7 Ényí yě kanbyɔ́ we ɖɔ: ‘Étɛ́wú a ka ɖo azɔn wɛn wɛ?’ ɔ, a ná ɖɔ: ‘Gbeɖíɖó ɖé wú wɛ.’ Ðó é ná wá dandan, bɔ ayi lɛ́ bǐ ná gba dó ɖó xɛsi wú, alɔ lɛ́ bǐ ná kú yɛ, wǔ ná kú mɛ* bǐ, bɔ koli lɛ́ bǐ ná nɔ kun sin.* ‘Éɖíe! É ná wá dandan, é ná jɛnu,’ wɛ Aklúnɔ Nǔbǐwúkpétɔ́ Jexóva ɖɔ.”
8 Jexóva lɛ́ ɖɔ xó nú mì, bo ɖɔ: 9 “Gbɛtɔ́ví è, ɖɔ nǔ e ná jɛ é ɖ’ayǐ, bo ɖɔ: ‘Nǔ e Jexóva ɖɔ é ɖíe: “Ðɔ: ‘Hwǐ ɖokpó! È gan hwǐ ɖokpó, bo ɖíɖí wǔ ná. 10 È gan hwǐ ɔ bo ná dó hu mɛ tɛ́ kpaɖaɖa; è ɖíɖí wǔ ná bónú é ná nɔ kɔ́n jǐkɛwun ɖɔhun.’”’”
“Mǐ ɖó ná j’awǎ ǎ cé?”
“‘É* ná gbɛ́ vǐ súnnu ceɖésú sín gǎnkpo, lěe é nɔ gbɛ́ atín bǐ gbɔn é ɖɔhun wɛ a?
11 “‘È sɔ́ jó nú è ná ɖíɖí wǔ ná, bónú è ná zán. È gan hwǐ énɛ́, bo ɖíɖí wǔ ná, bo ná sɔ́ dó alɔ mɛ nú mɛhutɔ́ ɖé.
12 “‘Gbɛtɔ́ví è, sú xó bo dó gbɛvíhan, ɖó é ná wá bo ná tɔ́n ahwan togun ce; é ná tɔ́n ahwan gǎn Izlayɛ́li tɔn lɛ́ bǐ. Yědɛɛ lɛ́ kpó togun ce kpó wɛ hwǐ ɔ ná hu. Énɛ́ wú ɔ, xo asá towe dó ná alě. 13 Ðó è ko gbéjé togun ce kpɔ́n; ényí hwǐ ɔ gbɛ́ gǎnkpo ɔ, étɛ́ ka ná jɛ? É* sɔ́ ná tíin ǎ,’ wɛ Aklúnɔ Nǔbǐwúkpétɔ́ Jexóva ɖɔ.
14 “Hwɛ gbɛtɔ́ví è, ɖɔ nǔ e ná jɛ é ɖ’ayǐ, xo alɔ bo ɖɔ: ‘Hwǐ!’ ɖó azɔn atɔn jí. Mɛ e è hu lɛ́ é sín hwǐ wɛ, mɛ e è hu tɛ́ kpaɖaɖa lɛ́ é sín hwǐ wɛ, é lɛ́ lɛ̌ dó yě. 15 Ayi yětɔn lɛ́ ná gba dó ɖó xɛsi wú, bɔ mɛ gěgé ná j’ayǐ ɖo toxo yětɔn sín hɔntogbó lɛ́ ta; un ná sɔ́ hwǐ ɔ dó hu mɛ tɛ́. Ɛɛn, é nɔ kɔ́n jǐkɛwun ɖɔhun, bɔ è ɖíɖí wǔ ná, bónú é ná hu mɛ tɛ́! 16 Sɛ́n nǔ bléwún ɖo ɖisíxwé! Lǐlɛ́ yi amyɔxwé! Yi fí ɖěbǔ e nu towe kpanta é! 17 Un ná lɛ́ xo alɔ, bɔ adǎn e jí un ɖe é ná fá. Nyɛ Jexóva ɖésúnɔ wɛ ɖɔ xó.”
18 Bɔ Jexóva lɛ́ ɖɔ xó nú mì, bo ɖɔ: 19 “Hwɛ gbɛtɔ́ví è, ɖe ali we, bónú axɔ́sú Babilɔ́nu tɔn sín hwǐ ní wá. Ali we lɛ́ ná gosín to ɖokpó ɔ mɛ, bɔ è ɖó ná sɔ́ wuntun* ɖokpó ɖó fí e ali ɔ má ɖe, bo yi toxo we mɛ é. 20 A ɖó ná ɖe ali ɖokpó bónú hwǐ ɔ ná wá xo Hlaba Amumɔ́ɔ ví lɛ́ tɔn, bo ná ɖe ali wegɔ́ ɔ, bónú é ná xo Jeluzalɛ́mu e nyí toxo syɛ́nsyɛ́n é ɖo Judáa. 21 Ðó axɔ́sú Babilɔ́nu tɔn ɔ nɔ te bá kan amɔɛ ɖo ali klán, fí e ali ɔ má ɖó we ɖe é. É húnhún gǎ lɛ́. É kan nǔ byɔ́ bǒcyɔ tɔn lɛ́;* é gbéjé alǐn* kpɔ́n. 22 Nǔ e ɖo ɖisílɔ tɔn mɛ bɔ é ɖo amɔɛ kan ná wɛ é dó gesí Jeluzalɛ́mu, bónú è ní sɔ́ ahwanlyánnú e è nɔ sɔ́ dó gba nǔ lɛ́ é ɖó alɔ jí, ɖe gbe ɖɔ è ní hu mɛ tɛ́, sú ahwanfunfun sín xó, sɔ́ ahwanlyánnú e è nɔ sɔ́ dó gba nǔ lɛ́ é ɖó alɔ jí bá dó gba hɔntogbó lɛ́, tɔ́n ahwan toxo ɔ, mɛ dǒ dó ján go dó è. 23 Amɔ̌, é ná cí amɔɛkinkan adingban tɔn ɖɔhun ɖo mɛ ɖěɖěe* ko xwlé nǔ nú yě lɛ́ é nukúnmɛ. Loɔ, é flín nǔwanyido yětɔn, bo ná wlí yě.
24 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘È flín nǔwanyido mitɔn, ɖó mi bló bɔ sɛ́n e mi gba lɛ́ é jɛ wě, bo lɛ́ bló bɔ è mɔ hwɛhuhu mitɔn lɛ́ ɖo nǔwiwa mitɔn lɛ́ bǐ mɛ wútu. Din e è ko flín mi é ɔ, è ná kplá mi yi gǎnnugǎnnu.’*
25 “Amɔ̌, gǎn nyanya Izlayɛ́li tɔn è, hwi mɛ e gblé wǔ bɔ kú hwɛ́n wǎn dó we é, azǎn towe kpé, hwenu e è ná dɔn tó gǔdo gúdo tɔn ɔ nú we é su. 26 Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Ðe tablá ɔ, bo ɖe axɔ́súgbákún ɔ. Nǔ lɛ́ ná nɔ mɔ̌ sɔ́yi ǎ. Sɔ́ mɛ e ma hwɛ́n nǔɖé ǎ é su, bo sɔ́ mɛ nukúnɖéjí ɔ hwe. 27 Aglingbigba, aglingbigba, aglingbigba wɛ un ná sɔ́ ɛ* dó húzú. Bɔ é sɔ́ ná nyí mɛɖé tɔn ǎ, káká jɛ hwenu e mɛ e ɖó acɛ ɖo sɛ́n linu é ná wá é, bɔ un ná sɔ́ n’i.’
28 “Hwɛ gbɛtɔ́ví è, ɖɔ nǔ e ná jɛ é ɖ’ayǐ, bo ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ dó Amumɔ́ɔ ví lɛ́ kpó mɛzunzun yětɔn kpó wú é ɖíe.’ Ðɔ: ‘Hwǐ ɖokpó! È sún hwǐ ɖokpó bo ná dó hu mɛ tɛ́; è ɖíɖí wǔ ná bónú é ná hu mɛ, bo lɛ́ kɔ́n jǐkɛwun ɖɔhun. 29 Nǔmimɔ adingban tɔn lɛ́ kpó amɔɛkinkan adingban tɔn lɛ́ kpó e kunkplá we lɛ́ é ɖo fínɛ́ có, è ná kplé cyɔ towe lɛ́ nyi mɛ e è hu tɛ́ lɛ́ é jí,* ɛɛn, mɛ nyanya ɖěɖěe sín azǎn kpé lɛ́ é, mɛ ɖěɖěe hwenu e è ná dɔn tó gǔdo gúdo tɔn ɔ nú yě é su é. 30 Lɛ̌ kɔ nú hwǐ ɔ dó akún mɛ. Un ná ɖɔ hwɛ xá we ɖo fí e è dá we ɖe é, ɛɛn, ɖo to e mɛ a jɔ ɖe é. 31 Un ná gba xomɛ e un sin syɛ́nsyɛ́n é kɔn nyi jǐ towe. Un ná fún adǎn e jí un ɖe é sín myɔ dó jǐ towe, bo ná jó we nú alǎnnúwatɔ́ lɛ́, mɛ ɖěɖěe kúnsúdónúnǔ bí alɔ ná lɛ́ é. 32 A ná húzú myɔflɔ́nú; è ná kɔn hun towe kɔn nyi ayǐ ɖo to ɔ mɛ, è sɔ́ ná flín we ɖě ǎ, ɖó nyɛ Jexóva ɖésúnɔ wɛ ɖɔ xó.’”