Ezekiyɛ́li
1 Ðo xwe 30gɔ́ ɔ mɛ, ɖo sun ɛnɛgɔ́ ɔ sín azǎn atɔ́ɔ́ngɔ́ ɔ gbe, hwenu e un ɖo togun e ɖo kannumɔgbénu é tɛ́ntin ɖo tɔsisa Kebáa tó é ɔ, jǐnukúnsin hun, bɔ un jɛ nǔmimɔ Mawu tɔn lɛ́ mɔ jí. 2 Ðo sun ɔ sín azǎn atɔ́ɔ́ngɔ́ ɔ gbe, énɛ́ wɛ nyí ɖo kannumɔgbénu yiyi axɔ́sú Yexoyakíni tɔn sín xwe atɔ́ɔ́ngɔ́ ɔ mɛ ɔ, 3 Jexóva ɖɔ xó nú nyɛ Ezekiyɛ́li,* vɔ̌sánúxwlémawutɔ́ Buzi sín vǐ súnnu ɖo tɔsisa Kebáa tó, ɖo Kaludéenu lɛ́ sín to mɛ. Hlɔ̌nhlɔ́n* Jexóva tɔn wá jǐ ce ɖo fínɛ́.
4 Ée un ɖo kpínkpɔ́n wɛ é ɔ, un mɔ bɔ jɔhɔn syɛ́nsyɛ́n ɖé nyi sín totaligbé jawě, bɔ un lɛ́ mɔ akpɔ́kpɔ́ ɖaxó ɖé kpó myɔ e ɖo mlamla bló wɛ é kpó,* bɔ wěziza hɔ́n lɛ́ lɛ̌ dó yě. Nǔɖé ɖo myɔ ɔ tɛ́ntin, bo cí gan e nɔ kɔ́n é* ɖé ɖɔhun. 5 Nǔ nǔɖogbɛ ɖɔhun ɛnɛ ɖo myɔ ɔ tɛ́ntin, bɔ yě mɛ ɖokpó ɖokpó cí gbɛtɔ́ ɖɔhun. 6 Yě mɛ ɖokpó ɖokpó ɖó nukúnmɛ ɛnɛ, bo lɛ́ ɖó awa ɛnɛ. 7 Afɔ yětɔn lɛ́ jlɔ́, bɔ afɔkpákpá yětɔn lɛ́ cí nyibúví sín afɔ ɖɔhun, bo ɖo kínkɔ́n wɛ ganvɔ e è ɖíɖí wǔ ná é ɖɔhun. 8 Yě ɖó gbɛtɔ́ sín alɔ ɖo awa yětɔn lɛ́ glɔ́ ɖo akpáxwé ɛnɛ lɛ́ bǐ, bɔ yě mɛ ɛnɛ lɛ́ ɖokpó ɖokpó ɖó nukúnmɛ ɛnɛ, bo lɛ́ ɖó awa ɛnɛ. 9 Awa yětɔn lɛ́ ɖě nɔ sɔ́ ɖě. Ényí nǔɖogbɛ lɛ́ ɖo yiyi wɛ ɔ, yě nɔ lílɛ́ ǎ, yě mɛ ɖokpó ɖokpó nɔ yi fí e yě kpanta é tlélé.
10 Lěe nukúnmɛ yětɔn lɛ́ cí é ɖíe: yě mɛ ɛnɛ lɛ́ ɖokpó ɖokpó ɖó gbɛtɔ́ sín nukúnmɛ, bɔ kinnikínní sín nukúnmɛ ɖo ɖisíxwé ná, bɔ nyibú sín nukúnmɛ ɖo amyɔxwé ná, lobɔ yě mɛ ɛnɛ lɛ́ ɖokpó ɖokpó ɖó hɔ̌n sín nukúnmɛ. 11 Lěe nukúnmɛ yětɔn lɛ́ cí é nɛ́. Awa yětɔn lɛ́ ɖo vlɔ̌nvlɔ́n kpanta jǐ. Yě mɛ ɖokpó ɖokpó ɖó awa we bɔ awa lɛ́ nɔ sɔ́ yěɖée, bo lɛ́ ɖó awa we bɔ yě cyɔ́n agbaza yětɔn.
12 Yě mɛ ɖokpó ɖokpó nɔ yi fí e yě kpanta é tlélé, yi fí ɖěbǔ e gbigbɔ ɔ sísɛ́ yě ɖɔ yě ní yi é. Nú yě ɖo yiyi wɛ ɔ, yě nɔ lílɛ́ ǎ. 13 Nǔɖogbɛ lɛ́ cí myɔkán e ɖo jiji wɛ lɛ́ é ɖɔhun, bɔ nǔ e cí zohwín ɖo jiji wɛ hɛhɛ ɖɔhun é ɖé ɖo gǔdo kpó nukɔn kpó yi wɛ ɖo nǔɖogbɛ lɛ́ tɛ́ntin, bɔ jǐ ɖo wun kɛ wɛ mlamla sín myɔ ɔ mɛ. 14 Ényí nǔɖogbɛ lɛ́ ɖo yiyi wɛ, bo ɖo wǐwá wɛ ɔ, tɛnsisɛ yětɔn nɔ cí jǐkɛwun ɖɔhun.
15 Ée un ɖo nǔɖogbɛ lɛ́ kpɔ́n wɛ é ɔ, un mɔ kɛkɛ́fɔ ɖokpó ɖo ayǐkúngban jí ɖo nǔɖogbɛ e ɖó nukúnmɛ ɛnɛ lɛ́ é ɖokpó ɖokpó kpá. 16 Kɛkɛ́fɔ lɛ́ nɔ kɔ́n awǐnnya klizolíti wɛ è sɔ́ dó bló yě ɖɔhun, bɔ yě mɛ ɛnɛ lɛ́ ɖi yěɖée lɛ́. Lěe yě cí é kpó lěe è bló yě gbɔn é kpó cí kɛkɛ́fɔ ɖě ɖo ɖě mɛ* wɛ ɖɔhun. 17 Nú yě sɛ tɛn ɔ, yě sixú yi awa ɛnɛ lɛ́ ɖěbǔ xwé ma lílɛ́ hwenu e yě ɖo yiyi wɛ é. 18 Kɛkɛ́fɔ lɛ́ sín hlǔu yi jǐ sɔmɔ̌ bɔ jǐyiyi yětɔn jí wǔ, bɔ nukún kpé kɛkɛ́fɔ ɛnɛ lɛ́ bǐ sín hlǔu lɛ́ wú lɛ́ lɛ̌ dó. 19 Nǔɖogbɛ lɛ́ sɛ tɛn hweɖébǔnu ɔ, kɛkɛ́fɔ lɛ́ lɔ nɔ sɛ tɛn xwedó yě, bɔ ényí nǔɖogbɛ lɛ́ sí te sín kɔ́mɛ ɔ, kɛkɛ́fɔ lɛ́ lɔ nɔ sí te. 20 Yě nɔ yi fí e gbigbɔ ɔ sísɛ́ yě ɖɔ yě ní yi é, ɛɛn, fí ɖěbǔ e gbigbɔ ɔ yi é. Kɛkɛ́fɔ lɛ́ nɔ sí te zɛ̌ɛ́n xá yě, ɖó gbigbɔ e ɖo azɔ̌ wa wɛ ɖo nǔɖogbɛ lɛ́ mɛ é* wɛ lɛ́ ɖo kɛkɛ́fɔ lɛ́ mɛ. 21 Ényí nǔɖogbɛ lɛ́ sɛ tɛn ɔ, kɛkɛ́fɔ lɛ́ nɔ sɛ tɛn; bɔ ényí nǔɖogbɛ lɛ́ nɔ te ɔ, kɛkɛ́fɔ lɛ́ nɔ nɔ te; bɔ ényí nǔɖogbɛ lɛ́ sí te sín kɔ́mɛ ɔ, kɛkɛ́fɔ lɛ́ nɔ sí te zɛ̌ɛ́n xá yě, ɖó gbigbɔ e ɖo azɔ̌ wa wɛ ɖo nǔɖogbɛ lɛ́ mɛ é wɛ lɛ́ ɖo kɛkɛ́fɔ lɛ́ mɛ.
22 Nǔ gblogblo ɖé ɖo nǔɖogbɛ lɛ́ sín tanu, bo ɖo kínkɔ́n wɛ laglási ɖɔhun, bo jí wǔ, bo ɖo vlɔ̌nvlɔ́n ɖo ta yětɔn nu. 23 Awa lɛ́ ɖo jlɔ̌jlɔ́ jí* ɖěbɔdóɖěwú ɖo nǔ gblogblo ɔ glɔ́. Yě mɛ ɖokpó ɖokpó ɖó awa we bo ná sɔ́ dó cyɔ́n wǔtu yětɔn sín akpáxwé ɖokpó, bo lɛ́ ɖó awa we bo ná sɔ́ dó cyɔ́n wǔtu yětɔn sín akpáxwé wegɔ́ ɔ. 24 Ée un se awa yětɔn lɛ́ sín gbe é ɔ, é cí sin e ɖo sisa wɛ kpó zǐngídi kpó é sín gbe ɖɔhun, bo cí Nǔbǐwúkpétɔ́ ɔ sín gbe ɖɔhun. Ényí nǔɖogbɛ lɛ́ ɖo tɛn sɛ wɛ ɔ, é nɔ cí ahwankpá ɖé sín zǐngídi ɖɔhun. Ényí yě nɔ te ɔ, yě nɔ bɔ awa yětɔn lɛ́ dó.
25 Gbe ɖé ɖi sín nǔ gblogblo e ɖo nǔɖogbɛ lɛ́ tanu é sín aga. (Ényí yě nɔ te ɔ, yě nɔ bɔ awa yětɔn lɛ́ dó.) 26 Nǔɖé cí awǐnnya safíi ɖɔhun, bo lɛ́ cí axɔ́súzinkpo ɖé ɖɔhun ɖo nǔ gblogblo e ɖo nǔɖogbɛ lɛ́ tanu é sín aga. Mɛɖé ɖo ayǐjínjɔ́n ɖo axɔ́súzinkpo ɔ jí ɖo aga, bo cí gbɛtɔ́ ɖɔhun. 27 Bɛ́ sín fí e cí alin tɔn mɛ ɖɔhun é káká yi aga ɔ, un mɔ nǔɖé ɖo kínkɔ́n wɛ gan e nɔ kɔ́n é ɖɔhun, bo cí myɔ e ɖo jiji wɛ é ɖɔhun; bɔ bɛ́ sín alin tɔn káká yi do ɔ, un mɔ nǔɖé bɔ é cí myɔ ɖɔhun. Wěziza ɖo kínkɔ́n lɛ́ lɛ̌ dó è wɛ, 28 bo cí nyǐ ɖi ɖo akpɔ́kpɔ́ mɛ hwenu e jǐ ɖo jija wɛ é ɖɔhun. Lěe wěziza e lɛ́ lɛ̌ dó è, bo ɖo kínkɔ́n wɛ é cí é nɛ́. É cí susu Jexóva tɔn ɖɔhun. Ée un mɔ é ɔ, un xwe agbɔ̌nnusú do, bɔ un jɛ mɛɖé sín gbe se jí, bɔ é ɖo xó ɖɔ wɛ.