Ezekiyɛ́li

18 Jexóva lɛ́ ɖɔ xó nú mì, bo ɖɔ: 2 “Lǒ élɔ́ e mi nɔ dó ɖo Izlayɛ́li to mɛ ɖɔ: ‘Tɔ́ lɛ́ ɖu vǐwun xɛ́lú, bɔ vǐ lɛ́ sín aɖǔ wɛ ka jí’ é ɔ, étɛ́ ka nyí tínmɛ tɔn?

3 “‘Ényí un ɖo gbɛ jɛ́n wɛ ɔ,’ wɛ Aklúnɔ Nǔbǐwúkpétɔ́ Jexóva ɖɔ, ‘mi ná ɖó xó énɛ́ vívɔ́ ɖɔ te ɖo Izlayɛ́li. 4 Éɖíe! Lǐndɔ̌n* lɛ́ bǐ ɔ, ce wɛ yě nyí. Lǐndɔ̌n tɔ́ ɔ tɔn ɔ, ce wɛ, lǐndɔ̌n vǐ ɔ lɔ tɔn ɔ, ce wɛ. Lǐndɔ̌n* e hu hwɛ é wɛ ná kú.

5 “‘È ní ɖɔ ɖɔ mɛɖé nyí nǔjlɔ́jlɔ́watɔ́, bo nɔ wa nǔ ɖó sɛ́nxwi jí, bo nɔ lɛ́ wa nǔ e sɔgbe é. 6 É nɔ ɖu nǔ e è sɔ́ dó sá vɔ̌ nú bǒcyɔ lɛ́ é ɖo só lɛ́ jí ǎ; é nɔ sɔ́ nukúnɖíɖó tɔn ɖó togun Izlayɛ́li tɔn sín bǒcyɔ xyɔ́ wǔ* lɛ́ jí ǎ; é nɔ dó afɔ gbě nú nɔzo tɔn sín asi,* alǒ ɖóxó xá nyɔ̌nu e ɖo gǒdó mɛ é ǎ; 7 é nɔ xo dǎka mɛɖé wú ǎ, é nyɔ́ wa ɔ, é nɔ lɛ́ kɔ nú nǔ e é yí ɖó gbanu ɖo axɔ́ɖutɔ́ ɖé sí é n’i; é nɔ fin mɛɖé nú ǎ, loɔ, é nɔ ná nǔɖuɖu tɔn mɛ e xovɛ́ sin é, bo nɔ cyɔ́n avɔ nú mɛ e ɖo mɛ̌ é; 8 é nɔ yí akwɛ́ví ɖo mɛ e é nya akwɛ́ ná lɛ́ é sí, alǒ ɖu le ɖo yě jí ǎ, loɔ, é nɔ nyi alɔ nú nǔagɔwiwa; ényí mɛ we kpé nǔ ɔ, é nɔ ɖɔ hwɛ jlɔ́jlɔ́ nú yě; 9 bɔ é nɔ xwedó gbetakɛ́n ce lɛ́, bo nɔ wa nǔ sɔgbe xá hwɛɖiɖɔ sín gbeta ce lɛ́, bo ná dó wa nǔ kpó gbejíninɔ kpó. Mɛ mɔ̌hun ɔ, nǔjlɔ́jlɔ́watɔ́ wɛ n’i, bɔ é ɖo wɛn ɖɔ é ná nɔ gbɛ,’ wɛ Aklúnɔ Nǔbǐwúkpétɔ́ Jexóva ɖɔ.

10 “‘Amɔ̌, è ní ɖɔ ɖɔ é ji vǐ súnnu ɖokpó bɔ é nyí ajotɔ́, alǒ mɛhutɔ́,* alǒ nɔ wa nǔ mɔ̌hun ɖěvo ɖěbǔ 11 (có tɔ́ ɔ wa nǔ énɛ́ lɛ́ ɖě ǎ), é nɔ ɖu nǔ e è sɔ́ dó sá vɔ̌ nú bǒcyɔ lɛ́ é ɖo só lɛ́ jí, é nɔ dó afɔ gbě nú nɔzo tɔn sín asi,* 12 é nɔ xo dǎka gbɛ̌dónánɔ kpó wamamɔnɔ kpó wú, é nɔ fin nǔ, é nɔ lɛ́ kɔ nú nǔ e é yí ɖó gbanu lɛ́ é ǎ, é nɔ sɔ́ nukúnɖíɖó tɔn ɖó bǒcyɔ xyɔ́ wǔ lɛ́ jí, é nɔ ɖ’alɔ ɖo nǔwalɔ e xyɔ́ wǔ lɛ́ é mɛ, 13 é nɔ ɖu le ɖo mɛ e é nya akwɛ́ ná lɛ́ é jí, bo nɔ yí akwɛ́ví ɖo yě sí, énɛ́ wú ɔ, vǐ énɛ́ ná nɔ gbɛ ǎ. Ðó nǔ énɛ́ lɛ́ e xyɔ́ wǔ bɔ é wa lɛ́ é bǐ wútu ɔ, é ɖo wɛn ɖɔ, è ná hu i. Hun tɔn ná nɔ kɔ nú éɖésúnɔ.

14 “‘Amɔ̌, è ní ɖɔ ɖɔ tɔ́ ɖé ɖó vǐ súnnu ɖé, bɔ é mɔ hwɛ e tɔ́ ɔ hu lɛ́ é bǐ; é mɔ yě có, é wa nǔ mɔ̌hun lɛ́ ǎ. 15 É nɔ ɖu nǔ e è sɔ́ dó sá vɔ̌ nú bǒcyɔ lɛ́ é ɖo só lɛ́ jí ǎ; é nɔ sɔ́ nukúnɖíɖó tɔn ɖó togun Izlayɛ́li tɔn sín bǒcyɔ xyɔ́ wǔ lɛ́ jí ǎ; é nɔ dó afɔ gbě nú nɔzo tɔn sín asi ǎ;* 16 é nɔ xo dǎka mɛɖé wú ǎ; é nɔ klá jɛ nǔ e è sɔ́ ɖó gbanu é nu ǎ; é nɔ fin nǔ ɖěbǔ ǎ; é nɔ ná nǔɖuɖu tɔn mɛ e xovɛ́ sin é, bo nɔ cyɔ́n avɔ nú mɛ e ɖo mɛ̌ é; 17 é nɔ nyi alɔ nú acɛ gannaganna kpa nú wamamɔnɔ; é nɔ ɖu le ɖo mɛ e é nya akwɛ́ ná lɛ́ é jí, alǒ yí akwɛ́ví ɖo yě sí ǎ; é nɔ wa nǔ sɔgbe xá hwɛɖiɖɔ sín gbeta ce lɛ́; bo nɔ nyi gbetakɛ́n ce lɛ́. Nya énɛ́ ná kú ɖó tɔ́ tɔn sín nǔwanyido wú ǎ. É ɖo wɛn ɖɔ é ná nɔ gbɛ. 18 Amɔ̌, ɖó tɔ́ tɔn hízí mɛ, j’ajo dó nɔví tɔn, bo wa nǔ nyanya ɖo togun tɔn tɛ́ntin wútu ɔ, é ná kú ɖó nǔwanyido tɔn wú.

19 “‘Loɔ, mi ná ɖɔ: “Étɛ́wú vǐ ɔ ma hɛn nǔ e tɔ́ tɔn sín nǔwanyido ji lɛ́ é sín agban ǎ?” Ðó vǐ ɔ wa nǔ e sɔgbe é, nǔ jlɔ́jlɔ́, xwedó gbetakɛ́n ce lɛ́ bǐ bo lɛ́ nyi yě wútu ɔ, é ɖo wɛn ɖɔ é ná nɔ gbɛ. 20 Lǐndɔ̌n* e hu hwɛ é wɛ ná kú. Vǐ ná hɛn hwɛgban ɖě ɖó tɔ́ tɔn sín nǔwanyido wú ǎ, tɔ́ lɔ ka ná hɛn hwɛgban ɖě ɖó vǐ tɔn sín nǔwanyido wú ǎ. Nǔjlɔ́jlɔ́watɔ́ ɔ, nǔjlɔ́jlɔ́wiwa éɖésúnɔ tɔn wú wɛ è ná kpɔ́n dó dó ɖɔ hwɛ xá ɛ, nǔnyanyawatɔ́ ɔ, nǔnyanyawiwa éɖésúnɔ tɔn wú wɛ è ná kpɔ́n dó dó ɖɔ hwɛ xá ɛ.

21 “‘Din ɔ, ényí mɛ e nɔ wa nǔ nyanya é ɖé lɛ́ kɔ sín hwɛ e é hu lɛ́ é bǐ gúdo, bo nɔ xwedó gbetakɛ́n ce lɛ́, lobo nɔ wa nǔ e sɔgbe é, gɔ́ nú nǔ jlɔ́jlɔ́ ɔ, é ɖo wɛn ɖɔ é ná nɔ gbɛ. É ná kú ǎ. 22 Hwɛ e é hu lɛ́ é ɔ, è ná xa ɖě dó kɔ n’i ǎ.* É ná nɔ gbɛ ɖó é wa nǔ jlɔ́jlɔ́ wútu.’

23 “‘Mɛ nyanya sín kú nɔ víví nú mì cɛ́nnyícɛ́nnyí ɖé wɛ a?’ wɛ Aklúnɔ Nǔbǐwúkpétɔ́ Jexóva ɖɔ. ‘É ma nyí ba wɛ un nɔ ba ɖɔ é ní lɛ́ kɔ sín ali tɔn lɛ́ jí bá nɔ gbɛ ǎ cé?’

24 “‘Amɔ̌, ényí nǔjlɔ́jlɔ́watɔ́ jó nǔjlɔ́jlɔ́wiwa tɔn dó bo nɔ wa nǔ nyanya,* ɛɛn, nǔ e xyɔ́ wǔ bɔ nǔnyanyawatɔ́ nɔ wa lɛ́ é bǐ ɔ, é ná nɔ gbɛ wɛ a? È sɔ́ ná flín nǔ jlɔ́jlɔ́ e é wa lɛ́ é ɖě ǎ, ɖó gbejímanɔ tɔn kpó hwɛ e é hu é kpó wútu ɔ, é ná kú.

25 “‘Loɔ, mi ná ɖɔ: “Ali Jexóva tɔn jlɔ́ ǎ.” Togun Izlayɛ́li tɔn è mi, mi kɛnklɛ́n ɖótó! Ali ce wɛ ma jlɔ́ ǎ a? Kabǐ ali midɛɛ lɛ́ tɔn lɛ́ wɛ ma jlɔ́ ǎ?

26 “‘Ényí nǔjlɔ́jlɔ́watɔ́ jó nǔjlɔ́jlɔ́wiwa tɔn dó bo nɔ wa nǔ nyanya, lobo kú ɖó énɛ́ wú ɔ, nǔwanyido éɖésúnɔ tɔn wú wɛ kú tɔn sín nɛ́.

27 “‘Gɔ́ ná ɔ, ényí mɛ e nɔ wa nǔ nyanya é ɖé lɛ́ kɔ sín nǔ nyanya e é wa é gúdo, bo jɛ nǔ e sɔgbe é, gɔ́ nú nǔ jlɔ́jlɔ́ wa jí ɔ, é ná hwlɛ́n gbɛ* éɖésúnɔ tɔn gán. 28 Ényí é ɖó ayi hwɛ e é hu lɛ́ é bǐ wú, bo lɛ́ kɔ sín yě gúdo ɔ, é ɖo wɛn ɖɔ é ná nɔ gbɛ. É ná kú ǎ.

29 “‘Amɔ̌, togun Izlayɛ́li tɔn ná ɖɔ: “Ali Jexóva tɔn jlɔ́ ǎ.” Togun Izlayɛ́li tɔn è mi, ali ce lɛ́ jɛ́n ma jlɔ́ ǎ dóó a? Kabǐ ali midɛɛ lɛ́ tɔn lɛ́ wɛ ma jlɔ́ ǎ?’

30 “‘Énɛ́ wú ɔ, togun Izlayɛ́li tɔn è mi, un ná ɖɔ hwɛ xá mɛ ɖokpó ɖokpó sɔgbe xá nǔwiwa tɔn lɛ́,’ wɛ Aklúnɔ Nǔbǐwúkpétɔ́ Jexóva ɖɔ. ‘Mi lɛ́ kɔ, ɛɛn, mi lɛ́ kɔ bǐ mlɛ́mlɛ́ sín hwɛ mitɔn lɛ́ bǐ gúdo, énɛ́ ɔ, yě sɔ́ ná nyí afɔklɛ́nnú e nɔ dɔn mɛ dó hwɛhuhu mɛ é nú mi ǎ. 31 Mi jó hwɛ e mi hu lɛ́ é bǐ dó, bo sɔ́ nǔ nú ayi yɔ̌yɔ́ ɖé kpó linlin yɔ̌yɔ́ ɖé kpó, ɖó togun Izlayɛ́li tɔn è mi, étɛ́wú mi ka ná kú?’

32 “‘Mɛ ɖěbǔ sín kú nɔ víví nú mì cɛ́nnyícɛ́nnyí ɖé ǎ,’ wɛ Aklúnɔ Nǔbǐwúkpétɔ́ Jexóva ɖɔ. ‘Énɛ́ wú ɔ, mi lɛ́ kɔ, bá nɔ gbɛ.’”