Ezekiyɛ́li
19 “A ɖó ná ji gbɛvíhan,* ɖó gǎn Izlayɛ́li tɔn lɛ́ wú 2 bo ɖɔ:
‘Étɛ́ nɔ towe ka nyí ɖ’ayǐ? Kinnikínní asi ɖo kinnikínní lɛ́ tɛ́ntin.
É mlɔ́ ayǐ ɖo kinnikínní wínnyáwínnyá agbɔ̌nnɔ lɛ́* tɛ́ntin, bo kpé nukún dó vǐ tɔn lɛ́ wú.
3 É kpé nukún dó vǐ tɔn lɛ́ ɖokpó wú, bɔ é húzú kinnikínní wínnyáwínnyá agbɔ̌nnɔ ɖé.
Kinnikínní wínnyáwínnyá ɔ kplɔ́n lěe è nɔ tlɛ́n nǔ e è wlí é ɖu gbɔn é,
é tlɛ vúnvún gbɛtɔ́ lɛ́.
4 Akɔta lɛ́ se xó dó wǔ tɔn, bo wlí i dó do yětɔn mɛ,
bo zán klɔcée dó dɔn ɛ yi Ejípu to mɛ.
5 Nɔ ɔ nɔ te, bo wá mɔ ɖɔ nukúnɖíɖó ɖě kún sɔ́ ɖe ɖɔ é ná lɛ́ kɔ wá ó.
Énɛ́ ɔ, é zé vǐ tɔn ɖěvo, bo dé è, bɔ é húzú kinnikínní wínnyáwínnyá agbɔ̌nnɔ ɖé.
6 É lɔ gbɔn kinnikínní lɛ́ tɛ́ntin, bo wá húzú kinnikínní wínnyáwínnyá agbɔ̌nnɔ ɖé.
É kplɔ́n lěe è nɔ tlɛ́n nǔ e è wlí é ɖu gbɔn é, é tlɛ vúnvún gbɛtɔ́ lɛ́.
7 É nya gbě gbɔn atɔxwɛ syɛ́nsyɛ́n yětɔn lɛ́ mɛ, bo gba toxo yětɔn lɛ́,
káká bɔ è sixú se gbe e dó wɛ é ɖe é gbɔn fí bǐ ɖo to e jɛ vɔ̌ é mɛ.
8 Akɔta e gosín xá e lɛ́ lɛ̌ dó è lɛ́ é mɛ lɛ́ é húzú kpan nukɔn ɛ, bo nyi ɖɔ yětɔn dó jǐ tɔn,
lobo wlí i dó do yětɔn mɛ.
9 Yě zán klɔcée dó dɔn ɛ dó aja mɛ, bo kplá ɛ yi jó nú axɔ́sú Babilɔ́nu tɔn.
Yě sú i dó gan ɖo fínɛ́, bónú è ma sɔ́ se gbe tɔn ɖě ɖo Izlayɛ́li sín só lɛ́ jí ó.
10 Nɔ towe cí vǐwuntín ɖɔhun ɖo hun towe mɛ* ɖ’ayǐ, bɔ è tun ɖó tɔ tó.
É ná sínsɛ́n bo zɛ ala gěgé, ɖó sin ɔ sukpɔ́ wú.
11 É ɖó ala* syɛ́nsyɛ́n lɛ́, bɔ è sixú zán yě dó bló gǎnkpo acɛkpatɔ́ lɛ́ tɔn ná.
É su, bo hú ga atín ɖěvo lɛ́,
bɔ é sín jǐyiyi tɔn kpó lěe ama tɔn lɛ́ sukpɔ́ gbɔn é kpó wú, bɔ è nɔ mɔ ɛ sɛ́ dó.
12 Amɔ̌, è hɔn ɖɔ n’i kpó xomɛsin kpó bo zin i dɛ́,
bɔ jɔhɔn zǎnzǎnhwe jí tɔn bló bɔ sínsɛ́n tɔn lɛ́ xú.
È fɛ́n ala tɔn syɛ́nsyɛ́n lɛ́ bɔ yě xú, lobɔ myɔ fyɔ́ yě.
13 Din ɔ, è tun i sɔ́ nyi gbětótló mɛ,
ɖo axéko jí, ɛɛn, ayǐkúngban xúxú jí.
14 Myɔ ɔ vun kan sín ala* tɔn lɛ́ mɛ, bo fyɔ́ alaví tɔn lɛ́ kpó sínsɛ́n tɔn lɛ́ kpó,
bɔ ala syɛ́nsyɛ́n ɖě sɔ́ kpo ǎ, gǎnkpo e ná kp’acɛ é ɖě sɔ́ ɖe ǎ.
“‘Gbɛvíhan ɖé wɛ, bo ná wá húzú gbɛvíhan e mɛ gěgé ná nɔ ji é.’”