Ezekiyɛ́li
17 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, nyi nǔbasɔ́ ɖokpó dó togun Izlayɛ́li tɔn, bo lɛ́ dó lǒ ɖokpó nú yě. 3 A ɖó ná ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Hɔ̌n ɖaxó e awa tɔn lɛ́ d’agba, bɔ awafún tɔn lɛ́ ɖi ga bo dó, bɔ fún tɔn lɛ́ ɖó sinmɛ tɛnmɛ tɛnmɛ é wá Libáan, bo zunfán sɛ́dlutín ɔ sín ɖavínu. 4 É wɛ́n nufɛ́nu tɔn e ɖo aga bǐ é, bo zé è yi ajɔ̌tɔ́ lɛ́ sín to mɛ,* lobo tun i nyi ajɔ̌tɔ́ lɛ́ sín toxo ɖokpó mɛ. 5 Énɛ́ gúdo ɔ, é zé jinukún to ɔ mɛ tɔn ɖě, bo dó ɖó gle e mɛ ji nɔ jɛ ɖe é ɖé mɛ. É tun nyi fí e sin sukpɔ́ ɖe é kpá, bónú é ná su sólutín ɖé ɖɔhun. 6 Énɛ́ ɔ, é tɔ́n kun, bo húzú vǐwuntín e vun dó do é, ama tɔn lɛ́ kpanta xomɛ, bɔ ɖɔ tɔn lɛ́ ɖo susu wɛ ɖo glɔ̌ tɔn. Mɔ̌ mɛ ɔ, é húzú vǐwuntín, bo vun, lobo zɛ ala.
7 “‘“Hɔ̌n ɖěvo wá, bo ɖó awa ɖaxó kpó awafún gblogblo lɛ́ kpó. Vǐwuntín énɛ́ nyi ɖɔ tɔn lɛ́ kpó nukúnkɛn kpó tunta gɔ̌n tɔn, yi zɔ nú ayǐ e jí è tun i nyi é, bɔ é vun ama tɔn lɛ́ tunta gɔ̌n tɔn, bónú é ná dó hú sin n’i. 8 È ko tun i nyi ayǐkúngban ɖagbe jí ɖo fí e sin sukpɔ́ ɖe é kpá, bónú é ná zɛ ala, ná sínsɛ́n, bo húzú vǐwuntín aditi.”’
9 “Ðɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “É ka ná su a? Mɛɖé ná hu ɖɔ tɔn lɛ́, bónú sínsɛ́n tɔn lɛ́ ná nyɔ, lobɔ kun tɔn lɛ́ ná fyɔ́ ǎ cé? É ná xú káká bɔ è ná ɖó hudó alɔ hlɔ̌nhlɔ́nnɔ ɖé tɔn, alǒ mɛ gěgé tɔn cóbó ná hɔn ɛ ǎ. 10 È hɔn ɛ bo yi tun có, é ka ná su a? Hwenu e jɔhɔn zǎnzǎnhwe jí tɔn ná nyi dó jǐ tɔn é ɔ, é ná xú bǐ mlɛ́mlɛ́ ǎ cé? É ná xú ɖo ayǐ e jí é tɔ́n kun ɖe é.”’”
11 Jexóva lɛ́ ɖɔ xó nú mì, bo ɖɔ: 12 “Kɛnklɛ́n ɖɔ xó élɔ́ nú togun gǔfɔ́ntɔ́ ɔ: ‘Mi ko tuun tínmɛ nǔ énɛ́ lɛ́ tɔn ǎ cé?’ Lɛ̌ ɖɔ: ‘Éɖíe! Axɔ́sú Babilɔ́nu tɔn wá Jeluzalɛ́mu, bo bɛ́ axɔ́sú tɔn kpó axɔ́ví tɔn lɛ́ kpó, lobo kplá yě yi Babilɔ́nu. 13 Gɔ́ ná ɔ, é sɔ́ mɛ e jɔ ɖo axɔ́sú kún mɛ é ɖokpó, bo jɛ akɔ xá ɛ, bo byɔ́ ɛ ɖɔ é ní xwlé nǔ. Énɛ́ gúdo ɔ, é ɖe súnnu nukúnɖéjí to ɔ tɔn lɛ́ síin, 14 mɔ̌ mɛ ɔ, axɔ́súɖuto ɔ ná vɔ́ da, bo sɔ́ ná kpé wú bo ɖó hlɔ̌nhlɔ́n ǎ, bɔ ényí é kpo ɖo gbejí nú akɔjijɛ ɔ ɔ jɛ́n axɔ́súɖuto ɔ ná kpo ɖo te. 15 Amɔ̌, wǎgbɔ tɔn ɔ, axɔ́sú* ɔ fɔ́n gǔ dó jǐ tɔn,* bo sɛ́ wɛndótɔ́ tɔn lɛ́ dó Ejípu bo ná dó mɔ sɔ́ kpó ahwankpá wɔ̌búwɔ́bú kpó sín dɔ̌n. É ka ná kpa ɛ a? Mɛ e nɔ wa nǔ énɛ́ lɛ́ é ka ná xo gló tódɔnnúmɛ a? É ka sixú gba akɔjijɛ ɔ, bo ná gán ɖ’é mɛ a?’
16 “‘“Un ɖo gbɛ jɛ́n wɛ ɔ,” wɛ Aklúnɔ Nǔbǐwúkpétɔ́ Jexóva ɖɔ, “é ná kú ɖo Babilɔ́nu, fí e axɔ́sú* e sɔ́ ɛ* axɔ́sú é nɔ nɔ é, mɛ énɛ́ e nǔ e é xwlé n’i é ɔ, é sɔ́ xo kɔ́, bo gba akɔ e é jɛ xá ɛ é. 17 Hwenu e è ná mɛ ahohó lɛ́ lɛ̌ dó we dó ján go dó we, bo ná mɛ dǒ lɛ́ lɛ̌ dó we dó ján go dó we, bo ná dó sú kún dó nú mɛ* gěgé é ɔ, Falawɔ́ɔn sín ahwankpá ɖaxó ɔ kpó sɔ́ja tɔn wɔ̌búwɔ́bú lɛ́ kpó ná sixú d’alɔ ɖěbǔ we ɖo ahwan ɔ mɛ ǎ. 18 É sɔ́ nǔ e é xwlé é dó xo kɔ́, bo gba akɔjijɛ ɔ. É dó akpá* có, é ka wa nǔ énɛ́ lɛ́ bǐ; é ná gán ɖ’é mɛ ǎ.”’
19 “‘Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Ðó é sɔ́ nǔ e é xwlé nú mì é xo kɔ́, bo gba akɔjijɛ ce wútu ɔ, ényí un ɖo gbɛ jɛ́n wɛ ɔ, un ná dɔn nǔ e é ji lɛ́ é wá jǐ tɔn. 20 Un ná nyi ɖɔ ce dó jǐ tɔn, bɔ è ná wlí i dó ɖɔ ce e nɔ wlí nǔ é mɛ. Un ná kplá ɛ yi Babilɔ́nu, bo ná ɖɔ hwɛ xá ɛ ɖo fínɛ́, ɖó gbejí e é ma nɔ nú mì ǎ é wú. 21 Sɔ́ja tɔn e ɖo hinhɔn gbɔn gbějá gbějá wɛ lɛ́ é bǐ ná kú hwǐ kú, bɔ mɛ ɖěɖěe kpo lɛ́ é ɔ, è ná gba yě dó gbɔn awa lɛ́ bǐ xwé.* Énɛ́ ɔ, mi ná wá tuun ɖɔ nyɛ Jexóva ɖésúnɔ wɛ ɖɔ xó.”’
22 “‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Un ná ɖe ala ɖé sín sɛ́dlutín ɖaxó ɔ sín ɖavínu, bo ná tun. Un ná wɛ́n alaví bibɔ ɖé sín alaví tɔn lɛ́ sín ɖavínu, bɔ nyiɖésúnɔ ná tun i nyi só ɖaxó e yi jǐ tawun é ɖé jí. 23 Un ná tun nyi só Izlayɛ́li tɔn e yi jǐ tawun é ɖé jí; ala tɔn lɛ́ ná su, bɔ é ná ná sínsɛ́n, bo ná húzú sɛ́dlutín aditi. Bɔ xɛ alɔkpa alɔkpa lɛ́ bǐ ná nɔ asá tɔn mɛ, bo ná nɔ ama tɔn lɛ́ sín yɛtɛn. 24 Bɔ atín e ɖo gle mɛ lɛ́ é bǐ ná wá tuun ɖɔ nyɛ Jexóva ɔ, un zin atín e yi jǐ tawun é dɛ́, bo sɔ́ atín e ɖo do é su; un bló bɔ atín e ɖo mǔ é xú, bɔ atín xúxú gba sɛ́. Nyɛ Jexóva ɖésúnɔ wɛ ɖɔ xó, bo bló.”’”