Ezekiyɛ́li

16 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, blǒ bónú Jeluzalɛ́mu ní tuun nǔ e xyɔ́ wǔ bɔ é wa lɛ́ é. 3 A ɖó ná ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ nú Jeluzalɛ́mu é ɖíe: “Tɔ́gbó towe lɛ́ sín to mɛ kpó fí e è ji we ɖe é kpó ɔ, Kanáanu lɛ́ sín to mɛ wɛ. Amɔlíti wɛ nyí tɔ́ towe, bɔ nɔ towe nyí Hitíti. 4 Ée è ji we é ɔ, ɖo azǎn e gbe è ji we é ɔ, è sɛ́n hɔ̌nkan nú we ǎ, è sɔ́ sin dó lɛ wǔ nú we bónú a mɛ́ ǎ, è gbídí jɛ dó wǔ we ǎ, è ka lɛ́ bú avɔ dó we ǎ. 5 Nǔ towe blá wǔ nú mɛɖé sɔmɔ̌, nú é ná bló nǔ énɛ́ lɛ́ ɖě nú we ǎ. Mɛ ɖěbǔ se wǔvɛ́ xá we ǎ. É nyɔ́ wa ɔ, è nyi we dó gle mɛ, ɖó è gbɛ́ wǎn nú we* ɖo azǎn e gbe è ji we é.

6 “‘“Ée un ɖo wǐwá yi wɛ é ɔ, un mɔ we bɔ a ɖo kúsúkpɔ́ xo wɛ ɖo hun hwiɖésúnɔ tɔn mɛ. Ée un mɔ we ɖo ayǐmlɔ́mlɔ́ ɖo hun ɔ mɛ é ɔ, un ɖɔ: ‘Nɔ gbɛ!’ Ɛɛn, un ɖɔ nú we hwenu e a ɖo ayǐmlɔ́mlɔ́ ɖo fínɛ́, ɖo hun towe mɛ é ɖɔ: ‘Nɔ gbɛ!’ 7 Un bló bɔ a sukpɔ́ tawun, atínví e nɔ tɔ́n kun ɖo gle mɛ lɛ́ é ɖɔhun; a su, bo mɔ lanmɛ, bo lɛ́ dó acɔ́banú ɖagbe hú gǎn lɛ́. Anɔ̌ towe lɛ́ tɔ́n, bɔ ɖa towe su; amɔ̌, a kpo ɖo mɛ̌ jɔgbe.”’

8 “‘Ée un ɖo wǐwá yi wɛ bo mɔ we é ɔ, un ɖó ayi wú ɖɔ a ko ɖó xwe e è nɔ ɖó bo nɔ yí wǎn nú mɛ é. Énɛ́ ɔ, un vlɔ́n awu ce bo cyɔ́n nú we, bo hwlá mɛ̌ nú we, un xwlé nǔ, bo jɛ akɔ ɖé xá we,’ wɛ Aklúnɔ Nǔbǐwúkpétɔ́ Jexóva ɖɔ, ‘bɔ a húzú ce. 9 Gɔ́ ná ɔ, un sɔ́ sin dó lɛ wǔ nú we, un súnsún kanjɔ sín wǔ we, bo sá ami nú we. 10 Énɛ́ gúdo ɔ, un dó awu kíkó ɖé nú we, bo ná anyǔfɔkpa* ɖagbe ɖagbe lɛ́ we, un bú lɛ̌ɛnkanvɔ ɖagbe ɖagbe dó we, bo dó awu axivɛ́nú lɛ́ nú we. 11 Un sɔ́ acɔ́banú lɛ́ dó b’acɔ́ nú we, un dó alɔgan alɔ towe lɛ́, bo dó kɔjɛ́ nú we. 12 Un lɛ́ dó ganví awɔntín nú we, bo dó tógbé nú we, lobo sɔ́ axɔ́súgbákún ɖɛkpɛ ɖɛkpɛ ɖé xwe nú we. 13 A nɔ sɔ́ siká kpó kpatágan kpó dó b’acɔ́; awu e è sɔ́ lɛ̌ɛnkanvɔ ɖagbe ɖagbe dó bló é, awu axivɛ́nú lɛ́ kpó awu e è kó é kpó wɛ a nɔ dó. Linfín ɖagbe ɖagbe, wǐin kpó ami kpó wɛ nyí nǔɖuɖu towe lɛ́; a su, bo nyɔ́ ɖɛkpɛ tawun, bo wá jɛxá bá nyí axɔ́si.’”*

14 “‘Nyǐkɔ towe jɛ gbigba kpé gbɔn akɔta lɛ́ mɛ jí, ɖó ɖɛkpɛ towe wú; a nyɔ́ ɖɛkpɛ bɔ nǔ bǐ vɔ ɖ’é wú, ɖó susu nyiɖésúnɔ tɔn wɛ un sɔ́ ɖó jǐ towe wútu,’ wɛ Aklúnɔ Nǔbǐwúkpétɔ́ Jexóva ɖɔ.”

15 “‘Amɔ̌, a jɛ jiɖe ɖó dó ɖɛkpɛ towe wú jí, bo húzú tonyatɔ́, ɖó nyǐkɔ towe e gba kpé é wú. Mɛ ɖěbǔ ɖo wǐwá yi wɛ ɔ, a nɔ lɛ aga xá ɛ hǒhi tɔn, bɔ ɖɛkpɛ towe nɔ húzú mɛ ɔ tɔn. 16 A sɔ́ awu towe ɖé lɛ́ dó bló nɔtɛn ɖeɖóvo ɖɛkpɛ ɖɛkpɛ lɛ́, bo nɔ nya to ɖo fí énɛ́ lɛ́; nǔ mɔ̌hun lɛ́ ɖó ná jɛ ǎ, nǔ ɖó ná nyí mɔ̌ gbeɖé ǎ. 17 Acɔ́banú* towe ɖɛkpɛ ɖɛkpɛ e è sɔ́ siká kpó kpatágan kpó, ée un ná we lɛ́ é dó bló lɛ́ é ɔ, a lɛ́ sɔ́ dó bló bǒcyɔ súnnu lɛ́, bo nɔ lɛ aga xá yě. 18 Bɔ a sɔ́ awu towe kíkó lɛ́ bo cyɔ́n nú yě,* bo xwlé ami ce kpó zǎlínkpɔ́n ce kpó yě. 19 Wɔ̌xúxú e un ná we, bɔ è sɔ́ linfín ɖagbe ɖagbe, ami kpó wǐin kpó e un ná we ɖɔ hwi ní ɖu é dó ɖa é ɔ, a lɛ́ xwlé yě* vɔ̌sánú wǎnɖagbenɔ* ɖɔhun.* Nǔ e jɛ é pɛ́pɛ́pɛ́ nɛ́,’ wɛ Aklúnɔ Nǔbǐwúkpétɔ́ Jexóva ɖɔ.”

20 “‘A sɔ́ vǐ súnnu towe lɛ́ kpó vǐ nyɔ̌nu towe lɛ́ kpó e a ji nú mì é dó sá vɔ̌ nú bǒcyɔ lɛ́, bónú è ná vún yě ɖu. To e nya wɛ a ɖe sín tɛgbɛ é ko kpé lo ǎ cé? 21 A hu vǐ ce lɛ́, bo xwlé yě vɔ̌sánú ɖɔhun, gbɔn yě dídó zo* gblamɛ. 22 Ée a ɖo nǔwalɔ towe e xyɔ́ wǔ lɛ́ é bǐ wú, bo lɛ́ ɖo to nya wɛ é ɔ, a sɔ́ flín vǔhwenu towe, hwenu e a ɖo mɛ̌ jɔgbe, bo ɖo kúsúkpɔ́ xo wɛ ɖo hun hwiɖésúnɔ tɔn mɛ é ǎ. 23 Heelú! Heelú we, ɖó nǔ nyanya e a wa lɛ́ é bǐ wú,’ wɛ Aklúnɔ Nǔbǐwúkpétɔ́ Jexóva ɖɔ. 24 ‘A mɛ kɔ́ta ɖé nú hwiɖée, bo bló nɔtɛn ɖeɖóvo nú hwiɖée gbɔn tokplétɛn lɛ́ bǐ. 25 A bló nɔtɛn ɖeɖóvo towe lɛ́ ɖó fí e jɛ nukún jí hú gǎn ɖo ali ɖokpó ɖokpó jí é, bo sɔ́ ɖɛkpɛ towe dó húzú nǔ e xyɔ́ wǔ é, gbɔn hwiɖée sísɔ́ jó* nú aligbɔntɔ́ lɛ́ bǐ gblamɛ, bɔ a fɔ́n ɔ, a nɔ ɖo to nya wɛ gbɛmɛ. 26 A lɛ aga xá vǐ súnnu Ejípu tɔn lɛ́, nɔzo towe e xóɖóxámɛ nɔ jló zɛ xwé wú lɛ́ é,* bɔ a dó xomɛsin nú mì gbɔn tonyinya núwiwa maxamaxa towe lɛ́ gblamɛ. 27 Din ɔ, un ná zán alɔ ce hlɔ̌nhlɔ́nnɔ ɔ dó dɔn tó nú we, bo ná ɖe nǔɖuɖu e nɔ wá nú we é kpo, lobo ná jó we nú jlǒ* nyɔ̌nu ɖěɖěe gbɛ́ wǎn nú we lɛ́ é tɔn, ɛɛn, vǐ nyɔ̌nu Filisitɛ́ɛn lɛ́ tɔn ɖěɖěe walɔ blíblí towe lɛ́ cí kliwun ná lɛ́ é.

28 “‘Ðó to e nya wɛ a ɖe é jɛmɛ nú we ǎ wútu ɔ, a lɛ́ yi lɛ aga xá vǐ súnnu Asilíi tɔn lɛ́, amɔ̌, a lɛ aga xá yě có, é sɔ́ lɛ́ jɛmɛ nú we ǎ jɛ́n wɛ. 29 Énɛ́ wú ɔ, a yi nya to d’é jí ɖo ajɔ̌tɔ́ lɛ́ sín to mɛ,* bo lɛ́ lɛ aga xá Kaludéenu lɛ́, nǔ tlɛ nyí mɔ̌ có, é lɛ́ jɛmɛ nú we ǎ. 30 Azɔn jɛ wɛ ayi towe ɖe* tawun,’* wɛ Aklúnɔ Nǔbǐwúkpétɔ́ Jexóva ɖɔ, ‘hwenu e a wa nǔ énɛ́ lɛ́ bǐ, bo zán gbɛ tonyatɔ́ wunhɔ́nmɔ́nɔ ɖé ɖɔhun é! 31 Amɔ̌, hwenu e a mɛ kɔ́ta towe ɖó fí e jɛ nukún jí hú gǎn ɖo ali ɖokpó ɖokpó jí é, bo bló nɔtɛn ɖeɖóvo towe gbɔn tokplétɛn lɛ́ bǐ é ɔ, a wa nǔ tonyatɔ́ ɖɔhun ǎ, ɖó a gbɛ́ axɔ́ ɖěbǔ e è sú we é. 32 Asi afɔdógbětɔ́ e asú tɔn ɖésú ma nɔ jló è ǎ, bɔ jǒnɔ lɛ́ wɛ nɔ jló è é wɛ nú we. 33 Tonyatɔ́ lɛ́ bǐ wɛ mɛ lɛ́ nɔ ná nǔníná, amɔ̌ hwɛ ɔ, hwi wɛ nɔ ná nǔníná mɛ ɖěɖěe yí wǎn nú we ɖésú lɛ́ é bǐ, bɔ a nɔ ná akwɛ́ yě bónú yě ná gosín fí lɛ́ bǐ wá, bónú a ná lɛ aga xá yě. 34 Nyɔ̌nu ɖě lɛ́ e nɔ nya to lɛ́ é sín flíjɛ wɛ nú we. Mɛ ɖě nɔ nya to lěe hwɛ nɔ nya gbɔn é ǎ! Hwɛ wɛ nɔ sú axɔ́ mɛ ɖěvo lɛ́, yě nɔ sú axɔ́ hwɛ ǎ. Lěe hwɛ nɔ bló gbɔn é gbɔn vo.’

35 “Énɛ́ wú ɔ, tonyatɔ́ è, ɖǒtó xó e Jexóva ɖɔ é. 36 Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘A ɖe jlǒ xóɖóxámɛ tɔn e a nɔ ɖó zɛ xwé wú é xlɛ́ vaan, bo lɛ́ ɖe mɛ̌ towe xlɛ́ hwenu e a ɖo aga lɛ xá xɔnnɔ towe lɛ́, gɔ́ nú bǒcyɔ towe nǔvɛ́mɔ e xyɔ́ wǔ* lɛ́ é bǐ wɛ é; a tlɛ lɛ́ xwlé kanjɔ vǐ súnnu towe lɛ́ tɔn bǒcyɔ énɛ́ lɛ́. 37 Énɛ́ wú ɔ, un ɖo xɔnnɔ towe ɖěɖěe a dó vǐví lanmɛ ná lɛ́ é bǐ xo kplé wɛ, ɛɛn, yě mɛ ɖěɖěe a yí wǎn ná lɛ́ é bǐ kpó yě mɛ ɖěɖěe a gbɛ́ wǎn ná lɛ́ é bǐ kpó xo kplé wɛ. Un ná xo yě kplé sín fí lɛ́ bǐ bónú yě ná tɔ́n ahwan we, un ná ɖe mɛ̌ towe xlɛ́ yě, bɔ yě ná mɔ we ɖo mɛ̌ jɔgbe.

38 “‘Un ná dɔn tó nú we bɔ é ná jɛxá tó e è nɔ dɔn nú nyɔ̌nu e nɔ dó afɔ gbě lɛ́ é kpó nyɔ̌nu e nɔ kɔn hun kɔn nyi ayǐ lɛ́ é kpó é, bɔ un ná bló bɔ è ná kɔn hun towe kɔn nyi ayǐ ɖo xomɛsin ɖaxó kpó wǔhwinhwan kpó mɛ. 39 Un ná jó we nyi xɔnnɔ towe lɛ́ sín alɔ mɛ, bɔ yě ná mu kɔ́ta towe lɛ́, lobɔ è ná hɔ́ nɔtɛn ɖeɖóvo towe lɛ́; yě ná ɖe awu sín kɔ nú we, yí acɔ́banú* ɖɛkpɛ ɖɛkpɛ towe lɛ́, lobo jó we nyi mɛ̌ jɔgbe. 40 Yě ná kplá ahwan ɖé wá nú we bɔ é ná tɔ́n ahwan we, yě ná nyi awǐnnya dó we, bo ná sɔ́ hwǐ dó hu we. 41 Yě ná dó xwé towe lɛ́ zo, bo ná wa nǔ xá we sɔgbe xá hwɛ e un ɖó nú we é ɖo nyɔ̌nu gěgé nukúnmɛ; un ná ɖó nǔ tonyinya towe nu, bɔ a sɔ́ ná sú axɔ́ xɔnnɔ towe lɛ́ ɖě ǎ. 42 Un ná bló bɔ xomɛ e un sin dó we syɛ́nsyɛ́n é ná fá, un sɔ́ ná sin xomɛ dó we syɛ́nsyɛ́n ǎ, un ná fá xomɛ, lobɔ nǔɖé sɔ́ ná dó xomɛsin nú mì ǎ.’

43 “‘Ðó a flín vǔhwenu towe ǎ, bo wa nǔ énɛ́ lɛ́ bǐ dó dó xomɛsin nú mì wútu ɔ, un ná bló bɔ a ná se xɔxɔ nǔ e walɔ towe lɛ́ ji lɛ́ é tɔn,’ wɛ Aklúnɔ Nǔbǐwúkpétɔ́ Jexóva ɖɔ, ‘énɛ́ ɔ, a ná jó walɔ blíblí towe kpó nǔwalɔ towe e xyɔ́ wǔ lɛ́ é bǐ kpó dó.

44 “‘Kpɔ́n! Mɛ ɖěbǔ e nɔ dó lǒ é ná dó lǒ élɔ́ dó wǔ we: “Nɔ ɖo mɔ̌, vǐ nyɔ̌nu lɔ ɖo mɔ̌!” 45 Vǐ nyɔ̌nu nɔ towe tɔn wɛ a nyí nǔgbó, éyɛ́ mɛ e gbɛ́ wǎn nú asú tɔn kpó vǐ tɔn lɛ́ kpó é. Bɔ nɔví towe nyɔ̌nu lɛ́ sín nɔví nyɔ̌nu wɛ a nyí nǔgbó, yědɛɛ lɛ́ mɛ e gbɛ́ wǎn nú asú yětɔn lɛ́ kpó vǐ yětɔn lɛ́ kpó é. Nɔ towe nyí Hitíti, bɔ tɔ́ towe nyí Amɔlíti.’”

46 “‘Dadá towe ɔ, Samalíi wɛ, bo nɔ nɔ totaligbé nú we,* é kpó vǐ nyɔ̌nu tɔn lɛ́* kpó, bɔ nɔví nyɔ̌nu towe kpɛví ɔ, Sodɔ́mu wɛ, bo nɔ nɔ tofɔligbé nú we,* é kpó vǐ nyɔ̌nu tɔn lɛ́ kpó. 47 É nyí walɔ yětɔn lɛ́ kpó nǔwalɔ yětɔn e xyɔ́ wǔ lɛ́ é kpó kɛ́ɖɛ́ wɛ a xwedó ǎ, loɔ, ɖo hwenu kléwún ɖé vlamɛ ɔ, walɔ towe lɛ́ nylá hú yědɛɛ lɛ́ tɔn. 48 Un ɖo gbɛ jɛ́n wɛ ɔ,’ wɛ Aklúnɔ Nǔbǐwúkpétɔ́ Jexóva ɖɔ, ‘nɔví nyɔ̌nu towe Sodɔ́mu kpó vǐ nyɔ̌nu tɔn lɛ́ kpó wa nǔ e hwɛ kpó vǐ nyɔ̌nu towe lɛ́ kpó wa é ǎ. 49 Ðǒtó! Nǔ e nɔví nyɔ̌nu towe Sodɔ́mu wa nyi do é ɖíe: Éyɛ́ kpó vǐ nyɔ̌nu tɔn lɛ́ kpó nɔ gó, ɖó nǔɖuɖu kpɔ́ gégé, bo lɛ́ ɖó linkpɔ́n ɖě ǎ; é ɖo mɔ̌ có, yě d’alɔ lelenɔ lɛ́ kpó wamamɔnɔ lɛ́ kpó ǎ. 50 Yě kpo ɖo go yí wɛ, bo kpo ɖo nǔ e xyɔ́ wǔ bɔ yě nɔ wa lɛ́ é wa wɛ ɖo nukún ce mɛ; énɛ́ wú ɔ, un mɔ ɖɔ é ɖo dandan ɖɔ má ɖe yě síin.

51 “‘Samalíi lɔ tlɛ hu hwɛ tobutóbú e a hu lɛ́ é sín wevlɔ́ɖó ǎ. A kpo ɖo blǒbló wɛ bɔ nǔ e xyɔ́ wǔ bɔ a nɔ wa lɛ́ é sukpɔ́ hú yědɛɛ lɛ́ tɔn, káká bɔ é cí ɖɔ nɔví nyɔ̌nu towe lɛ́ nyí hwɛjijɔnɔ wɛ ɖɔhun, ɖó nǔ e xyɔ́ wǔ bɔ a nɔ wa lɛ́ é bǐ wútu. 52 Din ɔ, a ɖó ná hɛn winnyá towe sín agban, ɖó a ba hwɛjijɔ nú nɔví nyɔ̌nu towe lɛ́ sín walɔ* wútu. Ðó a hu hwɛ, bo wa nǔ gblégblé hú gǎn yědɛɛ lɛ́ wútu ɔ, yě nyí hwɛjijɔnɔ hú we. Énɛ́ wú ɔ, din ɔ, winnyá ní hu we, bónú è ní ɖe we kpo, ɖó a bló bɔ é cí ɖɔ nɔví nyɔ̌nu towe lɛ́ nyí hwɛjijɔnɔ wɛ ɖɔhun.’

53 “‘Bɔ un ná xo kannumɔ yětɔn lɛ́ kplé, ɛɛn, kannumɔ Sodɔ́mu kpó vǐ nyɔ̌nu tɔn lɛ́ kpó tɔn lɛ́, gɔ́ nú kannumɔ Samalíi kpó vǐ nyɔ̌nu tɔn lɛ́ kpó tɔn lɛ́; gɔ́ ná ɔ, un ná xo kannumɔ towe lɛ́ kpó kannumɔ yětɔn lɛ́ kpó kplé, 54 bónú a ná hɛn winnyá towe sín agban, bɔ winnyá ná hu we, ɖó nǔ e a wa bo dó gbɔ nú yě é wútu. 55 Nɔví nyɔ̌nu towe Sodɔ́mu kpó vǐ nyɔ̌nu tɔn lɛ́ kpó ná jɛ lěe yě ko ɖe gbɔn ɖ’ayǐ é, nɔví nyɔ̌nu towe Samalíi kpó vǐ nyɔ̌nu tɔn lɛ́ kpó ná jɛ lěe yě ko ɖe gbɔn ɖ’ayǐ é, bɔ hwi kpó vǐ nyɔ̌nu towe lɛ́ kpó ɔ, mi ná jɛ lěe mi ko ɖe gbɔn ɖ’ayǐ é. 56 Hwenu e a ɖo go yí wɛ é ɔ, a mɔ ɖɔ nɔví nyɔ̌nu towe Sodɔ́mu kún jɛxá bónú a ná ylɔ́ nyǐ tɔn ó, 57 cóbɔ è wá ɖe nǔnyanyawiwa hwiɖésúnɔ tɔn lɛ́ gba. Din ɔ, vǐ nyɔ̌nu Silíi tɔn lɛ́ kpó mɛ e ɖo xá tɔn mɛ lɛ́ é kpó nɔ zun we, bɔ vǐ nyɔ̌nu Filisitɛ́ɛn lɛ́ tɔn lɛ́, yě mɛ ɖěɖěe lɛ́ lɛ̌ dó we lɛ́ é bǐ nɔ hu tɛ́ nú we. 58 A ná se xɔxɔ nǔ e walɔ blíblí towe kpó nǔwalɔ towe e xyɔ́ wǔ lɛ́ é kpó ji lɛ́ é tɔn,’ wɛ Jexóva ɖɔ.”

59 “Ðó nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Din ɔ, un ná wa nǔ xá we lěe a wa gbɔn é, ɖó a sɔ́ nǔ e a xwlé é dó xo kɔ́ ná gbɔn akɔ ce gbigba gblamɛ. 60 Amɔ̌ nyɛ ɔ, un ná flín akɔ e un jɛ xá we, hwenu e a ɖo wǐnnyáwínnyá mɛ é, bɔ un ná jɛ akɔ e ná nɔ ayǐ káká sɔ́yi é ɖé xá we. 61 Hwenu e a ná dó doo nú nɔví nyɔ̌nu towe lɛ́, ɛɛn, dadá towe lɛ́ kpó nɔví nyɔ̌nu towe kpɛví lɛ́ kpó é ɔ, a ná flín walɔ towe bɔ winnyá ná hu we, un ná ná yě we bɔ yě ná nyí vǐ nyɔ̌nu towe lɛ́, amɔ̌, é nyí ɖó akɔjijɛ towe wú ǎ.’

62 “‘Nyiɖésúnɔ ná jɛ akɔ xá we, bɔ a ná wá tuun ɖɔ nyɛ wɛ nyí Jexóva. 63 Énɛ́ ɔ, a ná flín nǔ e a wa, có un sɔ́ hwɛ kɛ we* lɛ́ é bǐ, bɔ winnyá ná hu we ɖésú dó nu kikɛ wú, ɖó winnyá e a ɖu é wú,’ wɛ Aklúnɔ Nǔbǐwúkpétɔ́ Jexóva ɖɔ.”