Ezekiyɛ́li
15 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, nɛ̌ do vǐwuntín sín ala* ka kpɔ́n te hú atín ɖěvo ɖěbǔ tɔn alǒ atín e ɖo zungbó mɛ lɛ́ é sín ala lɛ́ gbɔn? 3 È ka sixú zán kpo tɔn ɖé dó w’azɔ̌ ná a? Alǒ mɛ lɛ́ ka nɔ sɔ́ dó kpa só ná bo ná dó kplá nǔzínzán lɛ́ d’é kɔ a? 4 Éɖíe! Sɔ́ wɛ è nɔ sɔ́ nyi myɔ mɛ bónú myɔ ɔ ná ji, bɔ myɔ ɔ nɔ ji nuvínu tɔn we lɛ́ kɔn afín, bo nɔ fyɔ́ tɛ́ntinmɛ ɔ. É nyí nǔɖéwanú din a? 5 É ná bo tlɛ nyí hwenu e é kpo ɖo bǔte é wɛ ɔ, è sixú zán dó wa nǔtí ǎ. Bɔ étɛ́ wa nú é ka ná nyí hwenu e myɔ ji i kɔn afín, bo fyɔ́ ɛ é lo?”
6 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Lěe vǐwuntín sín kpo ɖe ɖo atín e nɔ nɔ zungbó mɛ lɛ́ é tɛ́ntin, bɔ un bló bɔ é nyí nakí bónú è ná nɔ sɔ́ dó flɔ́ myɔ ná gbɔn é ɔ, mɔ̌ wɛ un ná wa nǔ xá mɛ e nɔ nɔ Jeluzalɛ́mu lɛ́ é gbɔn. 7 Un húzú kpan nukɔn yě. Yě xo gló myɔ, amɔ̌, myɔ ná ji yě kɔn afín. Énɛ́ ɔ, hwenu e un ná húzú kpan nukɔn yě é ɔ, mi ná wá tuun ɖɔ nyɛ wɛ nyí Jexóva.’”
8 “‘Un ná bló bɔ to ɔ ná jɛ vɔ̌, ɖó yě wa nǔ kpó gbejímanɔ kpó,’ wɛ Aklúnɔ Nǔbǐwúkpétɔ́ Jexóva ɖɔ.”