Ezekiyɛ́li

14 Bɔ tomɛxó Izlayɛ́li tɔn ɖé lɛ́ wá, bo jínjɔ́n ayǐ ɖo nukɔn ce. 2 Énɛ́ ɔ, Jexóva ɖɔ xó nú mì, bo ɖɔ: 3 “Gbɛtɔ́ví è, súnnu énɛ́ lɛ́ kán ɖ’é jí bo ná xwedó bǒcyɔ xyɔ́ wǔ yětɔn lɛ́,* bɔ yě sɔ́ afɔklɛ́nnú e nɔ dɔn mɛ dó hwɛ mɛ é ɖé ɖó nukɔn nú mɛ lɛ́. Un ná jó yě dó bɔ yě ná kan nǔ byɔ́ mì wɛ a? 4 Din ɔ, ɖɔ xó xá yě bo ɖɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Ényí Izlayɛ́li ví ɖé kán ɖ’é jí bo ná xwedó bǒcyɔ xyɔ́ wǔ tɔn lɛ́, bo nɔ sɔ́ afɔklɛ́nnú e nɔ dɔn mɛ dó hwɛ mɛ é ɖó nukɔn nú mɛ lɛ́, bɔ énɛ́ gúdo ɔ, é wá kan nǔ byɔ́ gbeyíɖɔ ɖé ɔ, nyɛ Jexóva ɔ, un ná zɔn dó bǒcyɔ tɔn tobutóbú e xyɔ́ wǔ lɛ́ é wú dó ná ɛ xósin e jɛxá é. 5 Ðó un ná gba ayi dó nú togun Izlayɛ́li tɔn, ɖó yě mɛ bǐ wɛ jɛ zɔ nú mì, bo jɛ bǒcyɔ xyɔ́ wǔ yětɔn lɛ́ gúdo wútu.”’

6 “Énɛ́ wú ɔ, ɖɔ nú togun Izlayɛ́li tɔn ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Mi lɛ́ kɔ, bo jó bǒcyɔ xyɔ́ wǔ mitɔn lɛ́ dó, lobo dó gǔdo nǔwalɔ mitɔn e xyɔ́ wǔ lɛ́ é bǐ. 7 Ðó ényí Izlayɛ́li ví ɖé, alǒ jǒnɔ e nɔ nɔ Izlayɛ́li é ɖé jɛ zɔ nú mì, bo kán ɖ’é jí bo ná xwedó bǒcyɔ xyɔ́ wǔ tɔn lɛ́, lobo nɔ sɔ́ afɔklɛ́nnú e nɔ dɔn mɛ dó hwɛ mɛ é ɖó nukɔn nú mɛ lɛ́, bɔ énɛ́ gúdo ɔ, é wá kan nǔ byɔ́ gbeyíɖɔ ce ɔ, nyɛ Jexóva ɔ, nyiɖésúnɔ wɛ ná ná ɛ xósin. 8 Un ná húzú kpan nukɔn mɛ énɛ́; un ná bló bɔ é ná nyí wuntun akpágbanúmɛ tɔn ɖé, bo ná nyí lǒdónú, lobɔ un ná ɖe è sín togun ce mɛ; bɔ mi ná wá tuun ɖɔ nyɛ wɛ nyí Jexóva.”’

9 “‘Amɔ̌, ényí è blɛ́ gbeyíɖɔ ɔ bónú é ná xósin ɔ, nyɛ Jexóva wɛ ko blɛ́ gbeyíɖɔ énɛ́. Énɛ́ gúdo ɔ, alɔ ce ná jɛ wǔ tɔn, bɔ un ná sú kún tɔn dó sín togun ce Izlayɛ́li mɛ. 10 Yě ná hɛn nǔ e hwɛ yětɔn ji lɛ́ é sín agban; hwɛ e mɛ e kan nǔ byɔ́ é hu é ná nyí ɖokpó ɔ xá hwɛ e gbeyíɖɔ ɔ hu é, 11 énɛ́ ɔ, togun Izlayɛ́li tɔn sɔ́ ná ɖo flúflú kpé wɛ ɖo zɔ nú mì ɖě ǎ, bɔ yě sɔ́ ná hɛn yěɖée lɛ́ blí gbɔn nǔwanyido yětɔn lɛ́ ɖě gblamɛ ǎ. Yě ná nyí togun ce, bɔ nyɛ ná nyí Mawu yětɔn,’ wɛ Aklúnɔ Nǔbǐwúkpétɔ́ Jexóva ɖɔ.”

12 Bɔ Jexóva lɛ́ ɖɔ xó nú mì, bo ɖɔ: 13 “Gbɛtɔ́ví è, ényí to ɖé hu hwɛ dó mì bo wa nǔ kpó gbejímanɔ kpó ɔ, alɔ ce ná jɛ wǔ tɔn, bɔ un ná sú fí e nǔɖuɖu nɔ gosín wá n’i é dó,* bo ná sɛ́ adɔ dó è, lobo hu gbɛtɔ́ kpó kanlin kpó bǐ sín mɛ.” 14 “‘Ényí súnnu atɔn élɔ́ lɛ́: Nɔwée, Daniyɛ́li kpó Jɔbu kpó ná bo tlɛ ɖo to ɔ mɛ ɔ, yěɖésúnɔ* kɛ́ɖɛ́ jɛ́n yě ná kpé wú bo hwlɛ́n gán ɖó nǔjlɔ́jlɔ́wiwa yětɔn wútu,’ wɛ Aklúnɔ Nǔbǐwúkpétɔ́ Jexóva ɖɔ.”

15 “‘Alǒ è ní ɖɔ ɖɔ un bló bɔ adǎnkanlin lɛ́ gbɔn to ɔ mɛ, bɔ yě bló bɔ mɛ e ɖ’é mɛ lɛ́ é sín kɛ́n ɖe kpo,* bɔ to ɔ húzú gbětótló, bɔ mɛ ɖěbǔ sɔ́ nɔ gbɔn mɛ dín ǎ ɖó gběkanlin lɛ́ wútu. 16 Un ɖo gbɛ jɛ́n wɛ ɔ,’ wɛ Aklúnɔ Nǔbǐwúkpétɔ́ Jexóva ɖɔ, ‘ényí súnnu atɔn énɛ́ lɛ́ ná bo tlɛ ɖo to ɔ mɛ ɔ, yě ná hwlɛ́n vǐ súnnu yětɔn lɛ́, alǒ vǐ nyɔ̌nu yětɔn lɛ́ gán ǎ; yěɖésúnɔ kɛ́ɖɛ́ jɛ́n yě ná hwlɛ́n gán, bɔ to ɔ ná húzú fí e jɛ vɔ̌ é.’”

17 “‘Alǒ è ní ɖɔ ɖɔ un sɛ́ hwǐ dó to énɛ́, bo ɖɔ: “Hwǐ ní gbɔn to ɔ mɛ,” lobɔ un hu gbɛtɔ́ kpó kanlin kpó bǐ sín mɛ; 18 ényí súnnu atɔn énɛ́ lɛ́ ná bo tlɛ ɖo to ɔ mɛ, bɔ un ɖo gbɛ jɛ́n wɛ ɔ,’ wɛ Aklúnɔ Nǔbǐwúkpétɔ́ Jexóva ɖɔ, ‘yě ná hwlɛ́n vǐ súnnu yětɔn lɛ́, alǒ vǐ nyɔ̌nu yětɔn lɛ́ gán ǎ; yěɖésúnɔ kɛ́ɖɛ́ jɛ́n yě ná hwlɛ́n gán.’”

19 “‘Alǒ è ní ɖɔ ɖɔ un sɛ́ jɛmɛjí dó to énɛ́ mɛ, bo húzú adǎn e jí un ɖe é kɔn nyi jǐ tɔn gbɔn hun kinkɔn nyi ayǐ gblamɛ, bo ná dó hu gbɛtɔ́ kpó kanlin kpó sín mɛ; 20 ényí Nɔwée, Daniyɛ́li kpó Jɔbu kpó ná bo tlɛ ɖo to ɔ mɛ, bɔ un ɖo gbɛ jɛ́n wɛ ɔ,’ wɛ Aklúnɔ Nǔbǐwúkpétɔ́ Jexóva ɖɔ, ‘yě ná hwlɛ́n vǐ súnnu yětɔn lɛ́, alǒ vǐ nyɔ̌nu yětɔn lɛ́ gán ǎ; yěɖésúnɔ* kɛ́ɖɛ́ jɛ́n yě ná hwlɛ́n gán ɖó nǔjlɔ́jlɔ́wiwa yětɔn wútu.’”

21 “Ðó nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Mɔ̌ wɛ nǔ ná nyí gbɔn hwenu e un ná sɛ́ tódɔnnúmɛ ce* ɛnɛ lɛ́ (hwǐ, adɔ, adǎnkanlin lɛ́ kpó jɛmɛjí kpó) dó Jeluzalɛ́mu, bo ná hu gbɛtɔ́ kpó kanlin kpó sín mɛ é nɛ́. 22 É ɖo mɔ̌ có, mɛ e kpo ɖo to ɔ mɛ é ɖé lɛ́, káká jɛ vǐ súnnu kpó vǐ nyɔ̌nu kpó bǐ jí, ná xo gló, bɔ è ná ɖe yě tɔ́n sín mɛ. Yě ja mi gɔ́n, bɔ ényí mi mɔ nǔwalɔ yětɔn lɛ́ kpó nǔwiwa yětɔn lɛ́ kpó ɔ, é ɖo wɛn ɖɔ awě e un dɔn wá Jeluzalɛ́mu jí é, ɛɛn, nǔ e un wa xá ɛ lɛ́ é bǐ ná dó gbɔ nú mi.’”

23 “‘Ényí mi mɔ nǔwalɔ yětɔn lɛ́ kpó nǔwiwa yětɔn lɛ́ kpó ɔ, yě ná dó gbɔ nú mi, bɔ mi ná wá tuun ɖɔ é kún nyí yǎyá wú wɛ un wa nǔ e un wa xá ɛ lɛ́ é ó,’ wɛ Aklúnɔ Nǔbǐwúkpétɔ́ Jexóva ɖɔ.”