Ezekiyɛ́li
13 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, ɖɔ nǔ e ná jɛ dó gbeyíɖɔ Izlayɛ́li tɔn lɛ́ wú é ɖ’ayǐ, bo ɖɔ nú mɛ ɖěɖěe nɔ dó nǔɖɔɖayǐ yěɖésúnɔ tɔn lɛ́ wá é* ɖɔ: ‘Mi ɖótó xó e Jexóva ɖɔ é. 3 Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Heelú gbeyíɖɔ xlonɔ, éé nɔ xwedó linlin yěɖésúnɔ tɔn, bo ma ka mɔ nǔ ɖě ǎ lɛ́ é! 4 Izlayɛ́li è, gbeyíɖɔ towe lɛ́ wá cí ayǐsájɛ lɛ́ ɖo aglingbigba lɛ́ tɛ́ntin ɖɔhun. 5 Dǒ e è sɔ́ awǐnnya dó mɛ ná lɛ́ é gba ɖo fí ɖé lɛ́, amɔ̌, mi ná vɔ́ yě mɛ nú togun Izlayɛ́li tɔn, bónú Izlayɛ́li ná dó sixú kpo ɖo te bo ná fun ahwan ɖo azǎn Jexóva tɔn gbe ǎ.” 6 “Yědɛɛ lɛ́ mɛ e nɔ ɖɔ: ‘Xó e Jexóva ɖɔ é ɖíe,’ hwenu e Jexóva ɖésúnɔ ma ka sɛ́ yě dó ǎ, bɔ yě nɔ te kpɔ́n ɖɔ xó émítɔn ní jɛnu lɛ́ é ɔ, nǔmimɔ adingban tɔn lɛ́ wɛ yě mɔ, bɔ nǔɖɔɖayǐ yětɔn nyí adingban. 7 Ée un ma ɖɔ nǔɖé ǎ, bɔ mi ka ɖɔ: ‘Xó e Jexóva ɖɔ é ɖíe,’ é ɔ, nǔmimɔ adingban tɔn wɛ mi mɔ bɔ nǔɖɔɖayǐ mitɔn nyí adingban ǎ cé?”’
8 “‘Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: “‘Ðó nǔ e mi ɖɔ lɛ́ é ɔ, adingban wɛ yě nyí, bɔ nǔmimɔ mitɔn lɛ́ nyí adingban wútu ɔ, un ná sí te dó mi jí,’ wɛ Aklúnɔ Nǔbǐwúkpétɔ́ Jexóva ɖɔ.” 9 Alɔ ce ná jɛ gbeyíɖɔ ɖěɖěe nǔmimɔ yětɔn lɛ́ nyí adingban, bɔ nǔɖɔɖayǐ yětɔn lɛ́ nyí nǔvú lɛ́ é wú. Yě ná nɔ mɛ ɖěɖěe kpó nyi kpó vɛ́ lɛ́ é mɛ ǎ; mɔ̌ jɛ́n è ma ka ná wlán nyǐkɔ yětɔn dó togun Izlayɛ́li tɔn sín nyǐkɔwéma mɛ ǎ é nɛ́; yě ka ná lɛ́ kɔ wá Izlayɛ́li sín to ɔ mɛ ǎ. Bɔ mi ná wá tuun ɖɔ nyɛ wɛ nyí Aklúnɔ Nǔbǐwúkpétɔ́ Jexóva. 10 Nǔ énɛ́ lɛ́ bǐ ná jɛ, ɖó yě bló bɔ togun ce zɛ gbě gbɔn ɖiɖɔ ɖɔ: “Fífá tíin!,” hwenu e fífá ɖě ma ka tíin ǎ é gblamɛ. Nú è mɛ dǒ e ma lí dǒ ǎ é dó gbo xɔ mɛ ná ɔ, yě nɔ sá nǔ wěwé dó.’*
11 “Ðɔ nú mɛ ɖěɖěe nɔ sá nǔ wěwé dó wǔtu tɔn lɛ́ é ɖɔ é ná mu. Jǐ ɖaxó ɖé ná ja, kɛ́njí* ná ja, bɔ jɔhɔn syɛ́nsyɛ́n ná mu i. 12 Bɔ hwenu e dǒ ɔ ná mu é ɔ, è ná kanbyɔ́ mi ɖɔ: ‘Fítɛ́ nǔ e mi sá d’é wú é ka ɖe?’
13 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Ðo xomɛsin ɖaxó e jí un ɖe é mɛ ɔ, un ná bló bɔ jɔhɔn syɛ́nsyɛ́n ná nyi. Ðo xomɛsin ce mɛ ɔ, un ná bló bɔ jǐ ɖaxó ɖé ná ja. Bɔ ɖo adǎn kúnsúdónúnǔ tɔn e jí un ɖe é mɛ ɔ, un ná bló bɔ kɛ́njí ná ja. 14 Un ná mu dǒ e mi sá nǔ wěwé dó é bɔ é ná wá kɔ́mɛ, bɔ dodónu tɔn ná jɛ wě. Ényí toxo ɔ j’ayǐ ɔ, mi ná dɔn cí mɛ; bɔ mi ná wá tuun ɖɔ nyɛ wɛ nyí Jexóva.’
15 “‘Hwenu e un ná tún xomɛsin ɖaxó e jí un ɖe é dó dǒ ɔ kpó mɛ ɖěɖěe sá nǔ wěwé dó lɛ́ é kpó jí bǐ mlɛ́mlɛ́ é ɔ, un ná ɖɔ nú mi ɖɔ: “Dǒ ɔ sɔ́ ɖe ǎ, bɔ mɛ ɖěɖěe sá nǔ dó lɛ́ é lɔ sɔ́ ɖe ǎ. 16 Gbeyíɖɔ Izlayɛ́li tɔn lɛ́ sɔ́ ɖe ǎ, yědɛɛ lɛ́ mɛ e nɔ ɖɔ nǔ e ná jɛ dó Jeluzalɛ́mu wú é ɖ’ayǐ, bo nɔ mɔ nǔmimɔ fífá tɔn lɛ́ n’i, hwenu e fífá ɖě ma ka ɖe ǎ lɛ́ é,”’ wɛ Aklúnɔ Nǔbǐwúkpétɔ́ Jexóva ɖɔ.
17 “Gbɛtɔ́ví è, hwɛ ɔ, hǔzú kpan nukɔn togun towe sín vǐ nyɔ̌nu, éé nɔ dó nǔɖɔɖayǐ yěɖésúnɔ tɔn lɛ́ wá lɛ́ é, bo ɖɔ nǔ e ná jɛ dó yě jí é ɖ’ayǐ. 18 Ðɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Heelú nyɔ̌nu ɖěɖěe nɔ tɔ avɔxwɛ lɛ́ nú awa bǐ,* bo nɔ bló tavɔ e ɖó jlɛ̌ alɔkpa bǐ lɛ́ é nú ta lɛ́ bo ná dó sɔ́ gbɛ* mɛ lɛ́ tɔn ɖó axɔ́ nu lɛ́ é! Togun ce sín gbɛ* sɔ́ ɖó axɔ́ nu wɛ mi ɖe, bo ɖo tíntɛ́nkpɔ́n wɛ bo ná nya xɛ ɖo gbɛ* miɖésúnɔ tɔn lɛ́ jí a? 19 Ðó ɔ́ji alɔgogo kpɛɖé kpó wɔ̌xúxú ɖukpo kpɛɖé kpó wútu ɔ, mi nɔ kɔn cí dó wǔ ce ɖo togun ce tɛ́ntin. Gbɔn adingban ɖíɖó nú togun ce e nɔ ɖótó adingban mitɔn lɛ́ é gblamɛ ɔ, mi nɔ hu mɛ* ɖěɖěe ma ɖó ná kú ǎ lɛ́ é, bo nɔ jó mɛ* ɖěɖěe ma ɖó ná nɔ gbɛ ǎ lɛ́ é nyi gbɛ.”’
20 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Nyɔ̌nu lɛ́ è mi, éɖíe, un ɖo nǔ ná wa xá avɔxwɛ mitɔn ɖěɖěe mi nɔ zán dó ɖó mɔ nú mɛ* lɛ́, cí nǔ ɖɔ xɛ wɛ yě nyí ɖɔhun lɛ́ é wɛ. Bɔ un ná vún yě sín awa mitɔn lɛ́, bo ná tún kan nú mɛ ɖěɖěe ɖó mɔ ná wɛ mi ɖe xɛ ɖɔhun lɛ́ é. 21 Un ná vún tavɔ mitɔn lɛ́ bo ná hwlɛ́n togun ce sín alɔ mitɔn mɛ, bɔ yě sɔ́ ná nyí nǔ e mi nɔ nya gbě dó wlí é ɖě ǎ; bɔ mi ná wá tuun ɖɔ nyɛ wɛ nyí Jexóva. 22 Ðó mi sɔ́ nǔvú mitɔn dó dó awakanmɛ kú nú nǔjlɔ́jlɔ́watɔ́, có un ka ɖo wǔvɛ́ ɖó n’i wɛ ǎ, bɔ mi ná hlɔ̌nhlɔ́n nǔnyanyawatɔ́ sín alɔ lɛ́, bónú é ní ma lɛ́ kɔ sín nǔ nyanya e wa wɛ é ɖe é gúdo bo nɔ gbɛ ó. 23 Énɛ́ wú ɔ, nyɔ̌nu lɛ́ è mi, mi sɔ́ ná mɔ nǔmimɔ adingban tɔn lɛ́, alǒ kan amɔɛ ɖě ǎ. Un ná hwlɛ́n togun ce sín alɔ mitɔn mɛ, bɔ mi ná wá tuun ɖɔ nyɛ wɛ nyí Jexóva.’”