Ezekiyɛ́li
12 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, togun gǔfɔ́ntɔ́ ɖé mɛ nɔ gbɛ ɖe wɛ a ɖe. Yě ɖó nukún bo ná dó mɔ nǔ, yě ka nɔ mɔ nǔ ǎ, yě ɖó tó bo ná dó se nǔ, yě ka nɔ se nǔ ǎ, ɖó togun gǔfɔ́ntɔ́ ɖé wɛ yě nyí. 3 Amɔ̌, hwɛ gbɛtɔ́ví è, dǒ agban bá yi kannumɔgbénu. Énɛ́ gúdo hǔn, yi kannumɔgbénu ɖo kéze ɖo nukún yětɔn mɛ. Gosín xwé towe gbe, bo yi kannumɔgbénu ɖo fí ɖěvo ɖo nukún yětɔn mɛ. Yě nyí togun gǔfɔ́ntɔ́ ɖé có, vlafo ayi yětɔn sixú mɔ nǔ. 4 Ðe agban e a dó bo ná yi kannumɔgbénu é tɔ́n ɖo kéze ɔ mɛ ɖo nukún yětɔn mɛ. Bɔ ɖo énɛ́ gúdo ɖo gbadanu ɖo nukún yětɔn mɛ ɔ, a ná ɖidó mɛ e è kplá xwe kannumɔgbénu é ɖɔhun.
5 “A ná tɔ́n ali ɖokpó dó dǒ ɔ mɛ ɖo nukún yětɔn mɛ, bo ná bɛ́ agban towe lɛ́ tɔ́n gbɔn fínɛ́. 6 A ná bɛ́ agban towe lɛ́ ɖó abɔ̌ta, bo ná bɛ́ yě tɔ́n ɖo ablu mɛ ɖo nukún yětɔn mɛ. Cyɔ́n nǔ dó nukúnmɛ, énɛ́ ɔ, a ná sixú mɔ kɔ́mɛ ǎ, ɖó un ɖo sísɔ́ we dó bló wuntun ɖé nú togun Izlayɛ́li tɔn wɛ.”
7 Un bló lěe é ɖe gbe tɔn nú mì gbɔn é pɛ́pɛ́pɛ́. Ðo kéze ɔ mɛ ɔ, un ɖe agban ce tɔ́n, agban e è sɔ́ xwe kannumɔgbénu é ɖɔhun, bɔ ɖo gbadanu ɔ, un tɔ́n ali dó dǒ ɔ mɛ kpó alɔ kpó. Bɔ hwenu e ablu dó é ɔ, un bɛ́ agban ce lɛ́ tɔ́n bo bɛ́ yě ɖó abɔ̌ta ɖo nukún yětɔn mɛ.
8 Ayǐhɔ́ngbe tɔn zǎnzǎn ɔ, Jexóva lɛ́ ɖɔ xó nú mì, bo ɖɔ: 9 “Gbɛtɔ́ví è, togun Izlayɛ́li tɔn, togun gǔfɔ́ntɔ́ ɔ kanbyɔ́ we ɖɔ: ‘Étɛ́ wa wɛ a ka ɖe?’ a jí ǎ cé? 10 Ðɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Xó élɔ́ kan gǎn Jeluzalɛ́mu tɔn kpó togun Izlayɛ́li tɔn e ɖo toxo ɔ mɛ lɛ́ é bǐ kpó.”’
11 “Ðɔ nú yě ɖɔ: ‘Un nyí wuntun ɖé nú mi. Lěe un bló gbɔn é ɔ, nǔ e è ná wa nú yě é nɛ́. Yě ná yi kannumɔgbénu, ɛɛn, è ná wlí gantɔ́ yětɔn. 12 Gǎn e ɖo tɛ́ntin yětɔn é ná bɛ́ agban tɔn lɛ́ ɖó abɔ̌ta, bo ná ɖidó ɖo ablu mɛ. É ná tɔ́n ali ɖokpó dó dǒ ɔ mɛ, bo ná bɛ́ agban tɔn lɛ́ tɔ́n gbɔn fínɛ́. É ná cyɔ́n nǔ dó nukúnmɛ, énɛ́ ɔ, é ná sixú mɔ kɔ́mɛ ǎ.’ 13 Un ná nyi ɖɔ ce dó jǐ tɔn, bɔ è ná wlí i dó ɖɔ ce e nɔ wlí nǔ é mɛ. Énɛ́ gúdo ɔ, un ná kplá ɛ yi Babilɔ́nu, Kaludéenu lɛ́ to mɛ, amɔ̌, é ná mɔ to ɔ ǎ; bɔ fínɛ́ wɛ é ná kú ɖe. 14 Bɔ mɛ e lɛ́ lɛ̌ dó è lɛ́ é bǐ, alɔdómɛtɔ́ tɔn lɛ́ kpó sɔ́ja tɔn lɛ́ kpó ɔ, un ná gba yě dó gbɔn awa lɛ́ bǐ xwé; bɔ un ná ɖe hwǐ ɖokpó tɔ́n bo ná jɛ gǔdo yětɔn. 15 Bɔ hwenu e un ná fúnfún yě gbɔn akɔta lɛ́ mɛ, bo ná gba yě dó gbɔn to lɛ́ mɛ é ɔ, yě ná wá tuun ɖɔ nyɛ wɛ nyí Jexóva. 16 Amɔ̌, un ná hwlɛ́n mɛ kléwún ɖé ɖo yě mɛ sín hwǐ, adɔ kpó jɛmɛjí kpó sí, mɔ̌ mɛ ɔ, yě ná kpé wú bo ɖɔ xó dó nǔ e xyɔ́ wǔ bɔ yě wa lɛ́ é bǐ wú ɖo akɔta e mɛ yě ná yi lɛ́ é, bɔ yě ná wá tuun ɖɔ nyɛ wɛ nyí Jexóva.”
17 Jexóva lɛ́ ɖɔ xó nú mì, bo ɖɔ: 18 “Gbɛtɔ́ví è, a ná ɖo sísɔ́sísɔ́ wɛ bo ɖu wɔ̌xúxú towe, bo ná nu sin towe ɖo wǔvɛ́ kpó adohu adohu kpó mɛ. 19 Ðɔ nú mɛ e ɖo to ɔ mɛ lɛ́ é ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ nú mɛ ɖěɖěe nɔ nɔ Jeluzalɛ́mu ɖo Izlayɛ́li to mɛ é ɖíe: “Yě ná ɖu wɔ̌xúxú yětɔn kpó adohu adohu kpó, bo ná nu sin yětɔn kpó xɛsi ɖaxó kpó, ɖó to yětɔn ná jɛ vɔ̌ bǐ mlɛ́mlɛ́, ɖó dǎkaxixo mɛ e nɔ nɔ mɛ lɛ́ é bǐ tɔn wútu. 20 Toxo ɖěɖěe mɛ è nɔ ɖ’ayǐ lɛ́ é ná jɛ vɔ̌, bɔ to ɔ ná húzú gbětótló. Bɔ mi ná wá tuun ɖɔ nyɛ wɛ nyí Jexóva.”’”
21 Jexóva lɛ́ ɖɔ xó nú mì, bo ɖɔ: 22 “Gbɛtɔ́ví è, mi ɖó lǒ ɖé ɖo Izlayɛ́li bɔ é nɔ ɖɔ: ‘Azǎn lɛ́ ɖo wǐwá yi wɛ, amɔ̌, nǔmimɔ ɖě nɔ jɛnu ǎ’ ǎ cé? 23 Énɛ́ wú ɔ, ɖɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Un ná bló bɔ xó énɛ́ ná nɔ te, bɔ mi sɔ́ ná zán dó dó lǒ ɖo Izlayɛ́li ɖě ǎ.”’ Amɔ̌, ɖɔ nú yě ɖɔ: ‘Azǎn lɛ́ sɛkpɔ́, bɔ nǔmimɔ lɛ́ bǐ ná jɛnu.’ 24 Ðó nǔmimɔ adingban tɔn, alǒ amɔɛkinkan mɛklɔ́klɔ́* tɔn ɖě sɔ́ ná ɖo togun Izlayɛ́li tɔn mɛ ǎ. 25 ‘“Ðó nyɛ, Jexóva, ná ɖɔ xó. Xó ɖěbǔ e un ná ɖɔ é ná jɛnu ma gbɔ hwenu. Togun gǔfɔ́ntɔ́ è mi, ɖo hwe mitɔn nu ɔ, un ná ɖɔ xó ɔ, bo ná bló bɔ é ná jɛnu,” wɛ Aklúnɔ Nǔbǐwúkpétɔ́ Jexóva ɖɔ.’”
26 Jexóva lɛ́ ɖɔ xó nú mì, bo ɖɔ: 27 “Gbɛtɔ́ví è, nǔ e togun Izlayɛ́li tɔn ɖo ɖiɖɔ wɛ é ɖíe: ‘É ná lín tawun cóbɔ nǔmimɔ e é mɔ é ná jɛnu, sɔgúdo e lín tawun é wú ɖɔ nǔ ɖ’ayǐ dó wɛ é ɖe.’ 28 Énɛ́ wú ɔ, ɖɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “‘Xó ce lɛ́ kwínɖokpó ná gbɔ hwenu ǎ; nǔ ɖěbǔ e un ɖɔ é ná jɛnu,’ wɛ Aklúnɔ Nǔbǐwúkpétɔ́ Jexóva ɖɔ.”’”