Ezekiyɛ́li
11 Énɛ́ ɔ, gbigbɔ ɖé sɔ́ mì bo kplá mì yi hɔntogbó e ɖo zǎnzǎnhwe jí ɖo xwé Jexóva tɔn gbe é kɔn, ɛɛn, hɔntogbó e kpan nukɔn zǎnzǎnhwe jí é. Ðo hɔntogbó ɔ sín alinu fínɛ́ ɔ, un mɔ súnnu 25, bɔ Yaazaníya Azúu ví ɔ kpó Pelatíya Benáya ví ɔ kpó ɖo yě mɛ; axɔ́ví togun ɔ tɔn lɛ́ wɛ yě nyí. 2 Énɛ́ gúdo ɔ, Mawu ɖɔ nú mì ɖɔ: “Gbɛtɔ́ví è, súnnu énɛ́ lɛ́ wɛ nɔ bló tuto nǔ nyanya tɔn bo nɔ ɖe wě nyanya xá mɛ ɖo toxo élɔ́ mɛ.* 3 Yě nɔ ɖɔ: ‘É ma nyí hwe ɔ nu ɖíe bɔ mǐ ná gbá xwé lɛ́ ǎ cé? Toxo ɔ* wɛ nyí nǔɖazɛ́n* ɔ, bɔ mǐ nyí lan ɔ.’
4 “Énɛ́ wú ɔ, ɖɔ nǔ e ná jɛ dó yě wú é ɖ’ayǐ. Gbɛtɔ́ví è, ɖɔ nǔ e ná jɛ é ɖ’ayǐ.”
5 Énɛ́ gúdo ɔ, gbigbɔ Jexóva tɔn wá jǐ ce, bɔ Mawu ɖɔ nú mì ɖɔ: “Ðɔ nú yě ɖɔ: ‘Nǔ e Jexóva ɖɔ é ɖíe: “Togun Izlayɛ́li tɔn è, nǔ e mi ɖɔ é sɔgbe bɔ un tuun nǔ e lin wɛ mi ɖe é.* 6 É sín mi wú bɔ mɛ gěgé kú ɖo toxo élɔ́ mɛ, bɔ mi bló bɔ cyɔ kpé ali tɔn lɛ́ jí.”’” 7 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Cyɔ e mi fúnfún gbɔn toxo ɔ mɛ lɛ́ é wɛ nyí lan ɔ, bɔ toxo ɔ nyí nǔɖazɛ́n ɔ. Amɔ̌, è ná ɖe miɖésúnɔ sín mɛ.’”
8 “‘Mi ɖi xɛsi nú hwǐ, bɔ hwǐ wɛ un ka ná sɛ́ dó mi,’ wɛ Aklúnɔ Nǔbǐwúkpétɔ́ Jexóva ɖɔ. 9 ‘Un ná ɖe mi tɔ́n sín mɛ, bo ná jó mi nyi toɖévomɛnu lɛ́ sín alɔ mɛ, lobo ná wa nǔ xá mi sɔgbe xá hwɛ e un ɖó nú mi é. 10 Mi ná kú hwǐ kú. Un ná ɖɔ hwɛ xá mi ɖo dogbó Izlayɛ́li tɔn kɔn, bɔ mi ná wá tuun ɖɔ nyɛ wɛ nyí Jexóva. 11 Toxo ɔ ná nyí nǔɖazɛ́n nú mi ǎ, mi ka ná nyí lan e ɖ’é mɛ é ǎ. Un ná ɖɔ hwɛ xá mi ɖo dogbó Izlayɛ́li tɔn kɔn, 12 bɔ mi ná wá tuun ɖɔ nyɛ wɛ nyí Jexóva. Ðó mi xwedó gbetakɛ́n ce lɛ́ lobo wa nǔ sɔgbe xá hwɛɖiɖɔ sín gbeta ce lɛ́ ǎ, é nyɔ́ wa ɔ, hwɛɖiɖɔ sín gbeta akɔta e lɛ́ lɛ̌ dó mi lɛ́ é tɔn lɛ́ wɛ mi wa nǔ sɔgbe xá.’”
13 Ée un ɖɔ nǔ e ná jɛ é ɖ’ayǐ fó gúdo tlóló é ɔ, Pelatíya Benáya ví ɔ kú. Bɔ un xwe agbɔ̌nnusú do, bo sú xó tlílí bo ɖɔ: “Áo! Aklúnɔ Nǔbǐwúkpétɔ́ Jexóva! A ná sú kún dó nú Izlayɛ́li sín mɛ e kpo lɛ́ é wɛ a?”
14 Jexóva lɛ́ ɖɔ xó nú mì, bo ɖɔ: 15 “Gbɛtɔ́ví è, mɛ e nɔ nɔ Jeluzalɛ́mu lɛ́ é ɖɔ nú nɔví towe lɛ́, mɛ e ɖo nɔví towe lɛ́ mɛ, bo ɖó acɛ bo ná vɔ́ nǔ xɔ lɛ́ é kpó togun Izlayɛ́li tɔn ɔ blěbú kpó ɖɔ: ‘Mi nɔ zɔ nú Jexóva. Mǐtɔn wɛ nyí to ɔ, è ko ná mǐ bónú é ná nyí nǔɖókan mǐtɔn.’ 16 Énɛ́ wú ɔ, ɖɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Nǔgbó wɛ ɖɔ un ɖe yě síin yi fí e jɛ zɔ tawun ɖo akɔta lɛ́ mɛ é bo lɛ́ gba yě dó gbɔn to lɛ́ mɛ có, zaanɖé din ɔ, un ná húzú sinsɛnxɔ ɖé nú yě ɖo to ɖěɖěe mɛ yě yi lɛ́ é.”’
17 “Énɛ́ wú ɔ, ɖɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Un ná lɛ́ cyán mi sín togun lɛ́ mɛ, bo lɛ́ xo mi kplé sín to ɖěɖěe mɛ è ko gba mi dó gbɔn lɛ́ é, lobo ná ná mi Izlayɛ́li to ɔ. 18 Bɔ yě ná lɛ́ kɔ wá fínɛ́ bo ná ɖe nǔ e xyɔ́ wǔ lɛ́ é kpó nǔvɛ́mɔ lɛ́ kpó bǐ síin. 19 Un ná ná yě ayi e ɖo bǔte é,* bo ná sɔ́ linlin* yɔ̌yɔ́ ɖé dó xomɛ nú yě; un ná ɖe ayi yětɔn e syɛ́n awǐnnya ɖɔhun é sín xomɛ nú yě, bo ná ná yě ayi e bɔ lan ɖɔhun é,* 20 énɛ́ ɔ, yě sixú xwedó gbetakɛ́n ce lɛ́, wa nǔ sɔgbe xá hwɛɖiɖɔ sín gbeta ce lɛ́, bo se tónú ná. Mɔ̌ mɛ ɔ, yě ná nyí togun ce, bɔ nyɛ ná nyí Mawu yětɔn.”’
21 “‘“Amɔ̌, mɛ ɖěɖěe kán ɖ’é jí ɖo ayi mɛ bo ná kpo ɖo nǔvɛ́mɔ yětɔn lɛ́ kpó nǔwalɔ yětɔn e xyɔ́ wǔ lɛ́ é kpó gúdo lɛ́ é ɔ, un ná bló bɔ yě ná se xɔxɔ nǔ e walɔ yětɔn ji lɛ́ é tɔn,” wɛ Aklúnɔ Nǔbǐwúkpétɔ́ Jexóva ɖɔ.’”
22 Din ɔ, celubɛ́ɛn lɛ́ dlɛ́n awa yětɔn lɛ́ dó jǐ; kɛkɛ́fɔ lɛ́ ɖo akpá yětɔn bɔ Mawu Izlayɛ́li tɔn sín susu ɖo aga nú yě. 23 Énɛ́ gúdo ɔ, susu Jexóva tɔn gosín toxo ɔ jí bo yi nɔ te ɖo só e ɖo zǎnzǎnhwe jí nú toxo ɔ é sín tanu. 24 Énɛ́ ɔ, gbigbɔ ɖé zé mì yi jǐ ɖo nǔmimɔ e un mɔ gbɔn gbigbɔ Mawu tɔn gblamɛ é ɖé mɛ, bo kplá mì yi mɛ e ɖo kannumɔgbénu ɖo Kaludée lɛ́ é gɔ́n. Énɛ́ gúdo ɔ, nǔmimɔ e un mɔ é fó. 25 Bɔ un jɛ nǔ e Jexóva ɖe xlɛ́ mì lɛ́ é bǐ ɖɔ nú mɛ e ɖo kannumɔgbénu lɛ́ é jí.