Gbɛvíhan
א [Alɛ́fu]
4 Áo! Siká e nɔ kɔ́n é, siká ɖagbe ɖagbe ɔ wɛ wá kú awi lě a!
Awǐnnya mímɛ́ lɛ́ wɛ fúnfún kpé gbɔn aliklán lɛ́ bǐ* lě a!
ב [Bɛ̌ti]
2 Vǐ vívɛ́ Sinyɔ́ɔ tɔn e xɔ akwɛ́ siká akú ɖɔhun ɖ’ayǐ lɛ́ é,
wɛ è nɔ kpɔ́n dó mɔ kozɛ́n,
éé nyí zɛ̌nmɛtɔ́ sín alɔ núwiwa é ná lě a!
ג [Gimɛ́lu]
3 Cukú gbě tɔn lɛ́ tlɛ nɔ ná anɔ̌ vǐ yětɔn lɛ́,
amɔ̌, vǐ nyɔ̌nu togun ce tɔn húzú dǎkaxotɔ́ gowungo gbětótló mɛ tɔn lɛ́ ɖɔhun.
ד [Dalɛ́ti]
4 Vǐ yɛ̌yɛ́ sín ɖɛ̌ nɔ tɛ́ dó ɖɛ̌xwɛ wú ɖó kɔxúmɛ wútu.
Vǐ lɛ́ nɔ ɖo nǔɖuɖu byɔ́ wɛ, mɛɖé ka nɔ ná yě ǎ.
ה [He]
5 Mɛ ɖěɖěe ko nɔ ɖu nǔɖuɖu ɖagbe ɖagbe ɖ’ayǐ lɛ́ é ɖo ayǐmlɔ́mlɔ́ ɖo ali lɛ́ jí bo ɖo xovɛ́.
Mɛ ɖěɖěe è sɔ́ avɔ axivɛ́nú* dó kplɔ́n lɛ́ é ko mlɔ́ afín mɛ.
ו [Wǎwu]
6 Tó e è dɔn nú vǐ nyɔ̌nu togun ce tɔn é hú gǎn tó e è dɔn nú Sodɔ́mu é;*
è sú kún éyɛ́tɔn dó ɖo nukúnxwixwe ɖokpó mɛ, bɔ mɛ ɖě ɖe bo d’alɔ ɛ ǎ.
ז [Zayínu]
7 Mɛ tɔn e nyí nazilíi lɛ́ é mɛ́ hú laglási linfín, bo wé hú anɔ̌sin.
Yě myá hú awǐnnya koláyi; yě nɔ ɖo kínkɔ́n wɛ awǐnnya safíi ɖɔhun.
ח [Xɛ́ti]
8 Yě wá wi hú akán;
è sɔ́ nɔ tuun yě ɖo ali lɛ́ jí ǎ.
Lanti e cyɔ́n xú yětɔn lɛ́ é wló; é wá cí kpo xúxú ɖɔhun.
ט [Tɛ́ti]
9 È kú hwǐ kú ɔ, é kpɔ́n te hú è kú adɔ kú,
ɛɛn, é kpɔ́n te hú è xú gǒ, bɔ hwǐ xo mɛ zlɛ́ ɖó è ba nǔɖuɖu kpo wútu.
י [Yǒdu]
10 Nyɔ̌nu e nɔ se wǔvɛ́ xá mɛ lɛ́ é sɔ́ alɔ yětɔn dó ɖa vǐ yěɖésúnɔ tɔn lɛ́ ná.
Vǐ lɛ́ húzú aluwɛ sín nǔɖuɖu nú yě hwenu e è sú kún dó nú vǐ nyɔ̌nu togun ce tɔn é.
כ [Káfu]
11 Jexóva ɖe adǎn e jí é ɖe é xlɛ́;
é ɖe xomɛsin syɛ́nsyɛ́n e jí é ɖe é xlɛ́.
É flɔ́ myɔ ɖokpó ɖo Sinyɔ́ɔ, bɔ myɔ ɔ fyɔ́ dodónu Sinyɔ́ɔ tɔn lɛ́.
ל [Lamɛ́di]
12 Axɔ́sú ayǐkúngban ɔ tɔn lɛ́ kpó mɛ e nɔ nɔ ayǐkúngban ɔ jí lɛ́ é kpó ɖě ɖi ɖɔ
kúnsúdónúnǔtɔ́ ɔ kpó kɛntɔ́ ɔ kpó ná gbɔn hɔntogbó Jeluzalɛ́mu tɔn lɛ́ nu byɔ́ mɛ ǎ.
מ [Mɛ̌mu]
13 Nǔ nyí mɔ̌ ɖó hwɛ e gbeyíɖɔ tɔn lɛ́ hu lɛ́ é kpó nǔ e vɔ̌sánúxwlémawutɔ́ tɔn lɛ́ wa nyi do lɛ́ é kpó wútu;
yě mɛ énɛ́ lɛ́ wɛ kɔn nǔjlɔ́jlɔ́watɔ́ lɛ́ sín hun kɔn nyi ayǐ ɖo toxo ɔ mɛ.
נ [Nǔni]
14 Yě dlá avi gbɔn ali lɛ́ jí nukúntɔ́nnɔ ɖɔhun.
Yě húzú mɛ blíblí ɖó hun* wútu,
é sín énɛ́ wú bɔ mɛ ɖěbǔ sixú ɖ’alɔ awu yětɔn lɛ́ wú ǎ.
ס [Samɛ́ki]
15 Yě sú xó sɛ́ dó yě ɖɔ: “Mi ɖidó! Mɛ blíblí è mì! Mi ɖidó! Mi ɖidó! Mi ma ɖ’alɔ mǐ wú ó!”
Ðó yě sɔ́ ɖó xɔ ɖo ta ǎ, bo nɔ ɖo flúflú kpé wɛ.
Mɛ lɛ́ ɖɔ ɖo akɔta lɛ́ mɛ ɖɔ: “Yě sixú nɔ fí xá mǐ ǎ.*
פ [Pé]
16 Jexóva ɖésúnɔ wɛ fúnfún yě kpé;
é sɔ́ ná nyɔ́ xomɛ dó yě wú ǎ.
Gbɛtɔ́ lɛ́ ná ɖó sísí ɖě nú vɔ̌sánúxwlémawutɔ́ lɛ́ ǎ, mɔ̌ jɛ́n yě ma ná ké ya ɖě nú tomɛxó lɛ́ ǎ é nɛ́.”
ע [Ayínu]
17 Nukún mǐtɔn bó, ɖó mǐ ɖó nukún alɔdómɛtɔ́ dó wǔvɔ́.
Mǐ fɔ́n bo ɖo nukún ɖó alɔdó wɛ sín akɔta e ma sixú hwlɛ́n mǐ ǎ é gɔ́n.
צ [Tisádu]
18 Yě nya gbě mǐtɔn gbɔn fí bǐ káká bɔ mǐ sɔ́ sixú ɖi zɔnlin gbɔn tokplétɛn mǐtɔn lɛ́ ǎ.
Vivɔnu mǐtɔn ko sɛkpɔ́; azǎn mǐtɔn lɛ́ ko vɔ, ɖó vivɔnu mǐtɔn ko wá.
ק [Kɔ́fu]
19 Mɛ e ɖo gbě mǐtɔn nya wɛ lɛ́ é yá afɔ hú lěe hɔ̌n e ɖo jǐnukúnsin lɛ́ é nɔ yi gbɔn é.
Yě nya mǐ gbɔn só lɛ́ jí; yě tɔ wu nú mǐ ɖo gbětótló mɛ.
ר [Hlɛ̌ci]
20 Yě wlí mɛ e Jexóva sɔ́ bɔ é nyí funfún e ɖo awɔntín mǐtɔn mɛ é ɖo do yětɔn ɖaxó ɔ mɛ,
ɛɛn, mɛ e wú mǐ nɔ ɖɔ xó élɔ́ dó é: “Mǐ ná nɔ yɛtɛn tɔn ɖo akɔta lɛ́ tɛ́ntin.”
ש [Sínu]
21 Vǐ nyɔ̌nu Edɔ́mu tɔn è, hwi mɛ e nɔ nɔ Wúsi to mɛ é, j’awǎ bo ɖú agbojlaka.
Amɔ̌, è ná sɔ́ kɔ́fu ɔ nú hwi lɔ, bɔ a ná nu mú bo ná jɛ mɛ̌.
ת [Táwu]
22 Vǐ nyɔ̌nu Sinyɔ́ɔ tɔn è, tó e è dɔn nú we ɖó nǔwanyido towe wútu é wá vivɔnu.
É sɔ́ ná kplá we yi kannumɔgbénu ɖě ǎ.
Amɔ̌, vǐ nyɔ̌nu Edɔ́mu tɔn è, é ná dɔn tó nú we, ɖó nǔwanyido towe wú.
É ná ɖe hwɛ e a hu lɛ́ é gba.