Gbɛvíhan
א [Alɛ́fu]
3 Nyɛ wɛ nyí mɛ e mɔ mɛ ɖěɖěe ɖo wǔvɛ́ se wɛ syɛ́nsyɛ́n ɖó xomɛsin tɔn sín kpo wútu é.
2 É nya mì tɔ́n bo bló bɔ un ɖi zɔnlin ɖo ablu mɛ, é nyí ɖo wěziza nu ǎ.
3 Ayǐhɔ́ngbe ayǐhɔ́ngbe ɔ, alɔ tɔn jɛ wǔ ce azɔn gěgé.
ב [Bɛ̌ti]
4 É bló bɔ un xú gǒ bǐ;
é gba xú ce lɛ́.
5 É ján go dó mì; é bló bɔ aɖǐvɛ́ syɛ́nsyɛ́n kpó wǔvɛ́ kpó lɛ́ lɛ̌ dó mì.
6 É sɔ́ mì jínjɔ́n nɔtɛn e ɖo ablu mɛ lɛ́ é gǎnnugǎnnu, bɔ un cí mɛ e ko kú bɔ é lín lɛ́ é ɖɔhun.
ג [Gimɛ́lu]
7 É mɛ ahohó lɛ́ lɛ̌ dó mì, bɔ un sixú hɔn ǎ;
é sɔ́ ganvɔwlɔ kpinkpɛn dó blá mì.
8 Hwenu e un sú xó vɛ́návɛ́ná bo byɔ́ alɔdó é ɔ, é ɖe kɔ dó* ɖɛ ce.
9 É zán awǐnnya kpikpa lɛ́ dó sú ali ce lɛ́;
é bló bɔ ali ce lɛ́ gɔ́ndɔ́n.
ד [Dalɛ́ti]
10 É nɔ te bo ná tɔ wu nú mì lɔnmɔ ɖɔhun, ɛɛn, kinnikínní e ɖo hwlǎhwlá é ɖɔhun.
11 É ɖe mì sín ali lɛ́ jí gǎnnugǎnnu bo vúnvún mì;*
é bló bɔ un jɛ nyiɖokpó.
12 É tlɔ́ gǎ tɔn, bo dlɛ́n dó jǐ ce.
ה [He]
13 É da gǎ* e ɖo gǎgo* tɔn mɛ lɛ́ é dó xo ayi ce lɛ́ zlɛ́.
14 Un húzú nǔ kiko nú mɛ lɛ́ bǐ, bo húzú han ɖo nu yětɔn hwebǐnu.
15 É ná nǔɖuɖu e vɛ́ é mì bɔ un ɖu gɔ́ xo, bo kpé vǐvɛ́ nú mì bɔ un nu gɔ́ xo.
ו [Wǎwu]
16 É zán kɛ́n dó fɛ́n aɖǔ mì;
é blí gbo nú mì gbɔn afín mɛ.
17 A tɛ fífá mì;* un wɔn nǔ e nyí nǔ ɖagbe é.
18 Énɛ́ wú ɔ, un ɖɔ: “Ðɛkpɛ ce cá, un sɔ́ nɔ ɖó nukún nǔɖé sín Jexóva gɔ́n ǎ.”
ז [Zayínu]
19 Flín wǔvɛ́ syɛ́nsyɛ́n e mɛ un ɖe é bo lɛ́ flín ɖɔ un kún ɖó xɔ ɖo ta ó, flín vǐvɛ́ ɔ kpó aɖǐvɛ́ syɛ́nsyɛ́n ɔ kpó.
20 É ɖo wɛn ɖɔ a* ná flín; a ná fɛ yi do, bo ná d’alɔ mì.
21 Un tuun mɔ̌, énɛ́ wú wɛ un ná nɔ te kpɔ́n we.
ח [Xɛ́ti]
22 Wǎnyíyí Jexóva tɔn e ma nɔ sɛ do ǎ é wǔtu wɛ mǐ ma dɔn ǎ,
ɖó nǔbláwǔkúnúmɛ tɔn nɔ vɔ gbeɖé ǎ.
23 Zǎnzǎn tɛgbɛ ɔ, nǔbláwǔkúnúmɛ tɔn nɔ húzú yɔ̌yɔ́; gbejíninɔ towe túnflá.
24 “Jexóva wɛ nyí mǐmá ce,” wɛ un* ɖɔ, “énɛ́ wú wɛ un ná nɔ te kpɔ́n ɛ.”
ט [Tɛ́ti]
25 Jexóva nɔ nyɔ́ xomɛ dó mɛ e nɔ ɖó nukún i é wú, ɛɛn, dó mɛ* e fɔ́n bo ɖo biba ɛ wɛ é wú.
26 É nyɔ́ ɖɔ è ní nɔ xwíí* bo nɔ te kpɔ́n hwlɛngán Jexóva tɔn.
27 É nyɔ́ ɖɔ gbɛtɔ́ ní hɛn agban kpinkpɛn ɖo wǐnnyáwínnyá mɛ tɔn.
י [Yǒdu]
28 Ényí Mawu ɖíɖá ɛ agban énɛ́ hǔn, é ní jínjɔ́n ayǐ éɖokpónɔ bo cí xwíí.
29 É ní dó nu do bo ɖe kɔ́; nukúnɖíɖó sixú lɛ́ kpo.
30 É ní lílɛ́ tókpánu tɔn nú mɛ e ɖo tómɛ xo n’i wɛ é; é ní yí gbe bónú è ní zun i gba dó.
כ [Káfu]
31 Ðó Jexóva ná gbɛ́ mǐ káká sɔ́yi ǎ.
32 É bló bɔ mǐ ɖo alě ná wɛ có, é ná lɛ́ kú nǔbláwǔ nú mǐ ɖó wǎnyíyí tɔn e ma nɔ sɛ do ǎ bo túnflá é wútu.
33 Ðó é nɔ ba ná bló bɔ gbɛtɔ́ lɛ́ ná se wǔvɛ́ alǒ ná alě ǎ.
ל [Lamɛ́di]
34 Ényí è ná sɔ́ afɔ dó gbídí gantɔ́ e ɖo ayǐkúngban ɔ jí lɛ́ é ná ɔ,
35 ényí è ná tɛ hwɛjijɔ gbɛtɔ́ ɖo Ajalɔ̌nlɔn nukɔn ɔ,
36 ényí è ná táfú gbɛtɔ́ ɖo hwɛ nukɔn ɔ,
Jexóva nɔ yí gbe nú nǔ mɔ̌hun lɛ́ ǎ.
מ [Mɛ̌mu]
37 Énɛ́ wú ɔ, ényí Jexóva ma ɖe gbe tɔn ǎ ɔ, mɛ̌ ka sixú ɖɔ xó b’ɛ ná jɛnu lo?
38 Nǔ nyanya kpó nǔ ɖagbe kpó nɔ tɔ́n sín
Ajalɔ̌nlɔn ɔ sín nu mɛ zɛ̌ɛ́n ǎ.
39 Étɛ́wú gbɛtɔ́ ka ná húnhún nǔ ɖɔ dó nǔ e hwɛ tɔn ji lɛ́ é wú?
נ [Nǔni]
40 Mi nú mǐ ní gbéjé ali mǐtɔn lɛ́ kpɔ́n bo ba do ná, mi nú mǐ ní lɛ́ kɔ wá Jexóva gɔ́n.
41 Mi nú mǐ ní bɛ́ alɔ mǐtɔn lɛ́ dó jǐ, bo sa vo nú Mawu ɖo jǐxwé kpó ayi mǐtɔn bǐ kpó:
42 “Mǐ gba sɛ́n bo fɔ́n gǔ, bɔ a sɔ́ hwɛ kɛ mǐ ǎ.
ס [Samɛ́ki]
43 Kpó xomɛsin syɛ́nsyɛ́n kpó ɔ, a bló bɔ mǐ sɔ́ sixú nɔ sɛkpɔ́ we ǎ;
a jɛ gǔdo mǐtɔn bo hu mǐ tɛ́, a se wǔvɛ́ xá mǐ ǎ.
44 A sɔ́ akpɔ́kpɔ́ dó sú ali e wá gɔ̌n towe é, bɔ ɖɛ mǐtɔn sixú gbɔn mɛ dín ǎ.
45 A bló bɔ mǐ húzú nǔ kwíji kpó zunkɔ́ kpó ɖo togun lɛ́ tɛ́ntin.”
פ [Pé]
46 Kɛntɔ́ mǐtɔn lɛ́ bǐ nɔ ɖɔ slamɛ mǐ wú.
47 Xɛsi kpó fɛ́ca lɛ́ kpó wɛ húzú mǐmá mǐtɔn, è vɔ mǐ bo sú kún mǐtɔn dó.
48 Ðasin nɔ sa tɔ sín nukún ce lɛ́ jí, ɖó vǐ nyɔ̌nu togun ce tɔn sín kún e è sú dó é wútu.
ע [Ayínu]
49 Nukún ce lɛ́ nɔ ɖo ɖasin ja wɛ kpowun magbokɔ,
50 káká bɔ Jexóva kpɔ́n do bo mɔ sín jǐxwé.
51 Nǔ e nukún ce lɛ́ mɔ é zɔ́n bɔ un* ɖo alě ná wɛ ɖó vǐ nyɔ̌nu toxo ce tɔn lɛ́ bǐ wútu.
צ [Tisádu]
52 Kɛntɔ́ ce lɛ́ nɔ yǎyá bo jɛ gbě ce mɛ, è ɖo xɛ nya wɛ ɖɔhun.
53 Yě ɖó nǔ gbɛ ce nu ɖo do mɛ; yě nɔ fɔ́n bo nɔ ɖo awǐnnya nyi dó mì wɛ.
54 Sin ɖi káká bo cyɔ́n ta ce, bɔ un ɖɔ: “Gbɛ ce vɔ!”
ק [Kɔ́fu]
55 Jexóva è, un sú xó ylɔ́ nyǐkɔ towe sín do gɔngɔn mɛ.
56 Ðǒtó gbe ce, ma sú tó towe dó xó e sú wɛ un ɖe dó byɔ́ alɔdó kpó vivo kpó é ó.
57 A sɛkpɔ́ mì hwenu e un ylɔ́ we é. A ɖɔ: “Ma ɖi xɛsi ó.”
ר [Hlɛ̌ci]
58 Jexóva è, a jɛ hun dó jǐ ce, a vɔ́ gbɛ ce xɔ.
59 Jexóva è, a mɔ agɔ e è jɛ dó mì é, kɛnklɛ́n ɖɔ hwɛ jlɔ́jlɔ́ nú mì.
60 A mɔ hlɔn e yě ba lɛ́ é bǐ, bo lɛ́ mɔ gbě ce e yě blá lɛ́ é bǐ.
ש [Sínu] alǒ [Cínu]
61 Jexóva è, a se slamɛɖiɖɔ yětɔn lɛ́, ɛɛn, gbě ce e yě blá lɛ́ é bǐ,
62 a se xó e nɔ tɔ́n sín kɛntɔ́ ce lɛ́ sín nu mɛ lɛ́ é kpó nǔ e húnhún ɖɔ dó wǔtu ce wɛ yě nɔ ɖe hwebǐnu é kpó.
63 Kɛnklɛ́n kpɔ́n yě; yě ɖo ayǐjínjɔ́n oo, yě ɖo te oo, yě nɔ cá nú mì ɖo han yětɔn lɛ́ mɛ!
ת [Táwu]
64 Jexóva è, a ná sú axɔ́ yě sɔgbe xá nǔ e yě wa lɛ́ é.
65 A ná bló bɔ ayi yětɔn ná syɛ́n; nu e a ná dó yě é nɛ́.
66 Jexóva è, xomɛsin e jí a ɖe é ná zɔ́n bɔ a ná nya gbě yětɔn bo ná sú kún yětɔn dó sín ayǐkúngban ɔ jí.