Gbɛvíhan
5 Jexóva è, flín nǔ e gbo mǐ é.
Kpɔ́n lěe wi mǐtɔn kɔ́n gbɔn é.
2 È sɔ́ gǔ mǐtɔn jó nú jǒnɔ lɛ́, bo sɔ́ xwé mǐtɔn lɛ́ jó nú toɖévomɛnu lɛ́.
3 Mǐ húzú tɔ́cyɔvǐ; nɔ mǐtɔn lɛ́ cí asúkúsi lɛ́ ɖɔhun.
4 Axɔ́ wɛ mǐ ɖó ná sú cóbá nu sin mǐɖésúnɔ tɔn; nakí mǐɖésúnɔ tɔn ɔ, xɔ wɛ mǐ ɖó ná lɛ́ xɔ.
5 Mɛ e ɖo gbě mǐtɔn nya wɛ lɛ́ é ɖo gǔdo mǐtɔn tútútú;
nǔ ci kɔ nú mǐ, è ka ná gbɔjɛ ɖě mǐ ǎ.
6 Mǐ tɛ́ alɔ nú Ejípu kpó Asilíi kpó, bo ná dó mɔ nǔɖuɖu e ná kpé mǐ é.
7 Tɔ́gbó mǐtɔn e hu hwɛ lɛ́ é sɔ́ ɖe ǎ, bɔ mǐdɛɛ lɛ́ ka ɖo nǔwanyido yětɔn lɛ́ sín agban hɛn wɛ.
8 Mɛsɛntɔ́ lɛ́ wɛ ɖo acɛ kpa ɖo mǐ nu wɛ din; mɛ ɖě ɖe bo ná yí mǐ sín alɔ yětɔn mɛ ǎ.
9 É sín mɛ e sɔ́ ahwannú bo ɖo gbětótló mɛ lɛ́ é wú, bɔ mǐ nɔ sɔ́ gbɛ* mǐtɔn ɖó axɔ́ nu bo nɔ yi ba nǔɖuɖu wá.
10 Agbaza mǐtɔn wá hun zo myɔkpó ɖɔhun, ɖó lě do adɔ ɔ syɛ́n sɔ é wú.
11 Yě dó winnyá* nyɔ̌nu xwési Sinyɔ́ɔ tɔn lɛ́ kpó ɖyɔ̌vǐ ɖo alɔjí e ɖo toxo Judáa tɔn lɛ́ mɛ lɛ́ é kpó.
12 Yě sin kan dó alɔ nú axɔ́ví lɛ́ bo kplá yě dó nǔ wú; yě ɖó sísí ɖě nú tomɛxó lɛ́ ǎ.
13 Dɔ̌nkpɛvú lɛ́ nɔ ɖíɖá ségban, bɔ súnnuví lɛ́ nɔ klɛ́n afɔ ɖo nakígban glɔ́.
14 Tomɛxó lɛ́ gosín toxo ɔ sín hɔntogbó ta; dɔ̌nkpɛvú lɛ́ ɖó nǔxixo te.
15 Awǎjijɛ bú sín ayi mǐtɔn mɛ; we e ɖú wɛ mǐ ɖe é húzú aluwɛ.
16 Axɔ́súgbákún j’ayǐ sín ta mǐtɔn. Heelú mǐ, ɖó mǐ hu hwɛ!
17 Nǔ énɛ́ wɛ zɔ́n bɔ ayi mǐtɔn jɛ azɔn,
nǔ énɛ́ lɛ́ wú wɛ mǐ ma sɔ́ nɔ mɔ nǔ ganjí ǎ,
18 Sinyɔ́ɔ só e jɛ vɔ̌ é wú wɛ; ayǐsájɛ lɛ́ wɛ nɔ nɔ jí din.
19 Jexóva è, hwɛ ɔ, a jínjɔ́n axɔ́súzinkpo jí káká sɔ́yi.
Axɔ́súzinkpo towe ná nɔ ayǐ sín jijimɛ ɖě jí jɛ ɖěvo jí.
20 Étɛ́wú a ka wɔn mǐ bǐ gbídígbídí, bo jó mǐ dó sín hwenu línlín ɖíe?
21 Jexóva è, kplá mǐ lɛ́ kɔ wá gɔ̌n towe, bónú mǐ ná lɛ́ kɔ wá gɔ̌n towe kpó jlǒ kpó.
Blǒ bónú azǎn mǐtɔn lɛ́ ní lɛ́ cí azǎn ɖ’ayǐ tɔn lɛ́ ɖɔhun.
22 Loɔ, a gbɛ́ mǐ bǐ gbídígbídí.
A kpo ɖo xomɛ sin dó mǐ wɛ syɛ́nsyɛ́n.