Gbɛvíhan
א [Alɛ́fu]
2 Áo! Xomɛ wɛ sin Jexóva, bɔ é bú akpɔ́kpɔ́ dó vǐ nyɔ̌nu Sinyɔ́ɔ tɔn lě a!
É nyi ɖɛkpɛ Izlayɛ́li tɔn sín jǐnukúnsin wá ayǐkúngban jí.
É flín afɔɖótɛn tɔn ɖo xomɛsin tɔn sín azǎn gbe ǎ.
ב [Bɛ̌ti]
2 Jexóva gba nɔtɛn Jakɔ́bu tɔn lɛ́ bǐ; é se wǔvɛ́ ɖěbǔ xá yě ǎ.
É ɖo xomɛsin jí, bo gba vǐ nyɔ̌nu Judáa tɔn sín nɔtɛn e è mɛ ahohó lɛ́ lɛ̌ dó lɛ́ é.
É dɔn axɔ́súɖuto ɔ kpó axɔ́ví tɔn lɛ́ kpó wá do, bo kɔ́n wi yětɔn.
ג [Gimɛ́lu]
3 É sin xomɛ syɛ́nsyɛ́n, bo wɛ́n Izlayɛ́li sín zo lɛ́ bǐ.*
É wún ɖisílɔ tɔn hwenu e kɛntɔ́ ɔ sɛkpɔ́ é,
bo ɖo adǎn jí syɛ́nsyɛ́n dó Jakɔ́bu wú, myɔ e fyɔ́ nǔ e lɛ́ lɛ̌ dó è lɛ́ é bǐ é ɖɔhun.
ד [Dalɛ́ti]
4 É tlɔ́ gǎ tɔn kɛntɔ́ ɖɔhun; ɖisílɔ tɔn ɖo gbesisɔmɛ kúnsúdónúnǔtɔ́ ɖɔhun;
É nɔ ɖo mɛ e sín nǔ nyɔ́ nukún mǐtɔn mɛ lɛ́ é bǐ hu wɛ.
É gba xomɛsin syɛ́nsyɛ́n e jí é ɖe é kɔn nyi vǐ nyɔ̌nu Sinyɔ́ɔ tɔn sín goxɔ mɛ myɔ ɖɔhun.
ה [He]
5 Jexóva wá cí kɛntɔ́ ɖɔhun;
É sú kún dó nú Izlayɛ́li.
É kíjá atɔxwɛ tɔn lɛ́ bǐ;
É sú nɔtɛn tɔn e è mɛ ahohó lɛ́ lɛ̌ dó lɛ́ é bǐ dó.
É bló bɔ aluwɛ kpó gbɛvíhan kpó sukpɔ́ ɖo Judáa.
ו [Wǎwu]
6 É xo dǎka azava tɔn wú, goxɔ e ɖo jikpá mɛ é ɖɔhun.
É ɖó nǔ xwe tɔn nu.
Jexóva bló bɔ è wɔn xwezán kpó gbɔjɛzán kpó ɖo Sinyɔ́ɔ,
É ɖó kɔ ɖě axɔ́sú kpó vɔ̌sánúxwlémawutɔ́ kpó wú ǎ, ɖó xomɛ e sin i syɛ́nsyɛ́n é wú.
ז [Zayínu]
7 Jexóva gbɛ́ vɔ̌sákpe tɔn;
É gbɛ́ wǎn nú xɔ tɔn.
É jó atɔxwɛ syɛ́nsyɛ́n tɔn lɛ́ sín ahohó nyi alɔ mɛ nú kɛntɔ́ ɔ.
Yě sɔ́ gbe dó jǐ ɖo xwé Jexóva tɔn gbe lěe è nɔ wa gbɔn ɖo xwezán gbe é.
ח [Xɛ́ti]
8 Jexóva kán ɖ’é jí bo ná gba vǐ nyɔ̌nu Sinyɔ́ɔ tɔn sín ahohó.
É dlɛ́n nǔjlɛ́kan ɔ.
É gɔn kún sú dó nú nǔ ǎ.
É bló bɔ ahohó kpó dǒ kpó ná alě.
È bló bɔ yě ba gǎn kpo ɖó kpɔ́.
ט [Tɛ́ti]
9 Hɔntogbó tɔn lɛ́ j’ayǐ, bɔ kɔ́ bú bǐ.
É gba hɔnkpo tɔn lɛ́, bo kíjá yě.
Axɔ́sú tɔn kpó axɔ́ví tɔn lɛ́ kpó gba kpé akɔta lɛ́ mɛ.
Sɛ́n* ɖě sɔ́ ɖe ǎ; Jexóva tlɛ sɔ́ nɔ ɖe nǔ ɖě xlɛ́ gbeyíɖɔ toxo ɔ tɔn lɛ́ ɖo nǔmimɔ mɛ ǎ.
י [Yǒdu]
10 Vǐ nyɔ̌nu Sinyɔ́ɔ tɔn sín tomɛxó lɛ́ ɖo ayǐjínjɔ́n ɖo kɔ́mɛ, bo cí xwíí.
Yě dó ati, bo ɖo kɔ́ kɔn dó ta wɛ.
Ðyɔ̌vǐ ɖo alɔjí Jeluzalɛ́mu tɔn lɛ́ xwe agbɔ̌nnusú do.
כ [Káfu]
11 Un y’avǐ káká bɔ nukún ce ɖibla tɔ́n.
Xo ce mɛ* wlú tawun.
Ayi ce gba dó tawun* ɖó togun ce sín vǐ nyɔ̌nu* sín ayǐjijɛ wútu,
ɛɛn, ɖó yɔkpɔ́vú lɛ́ kpó vǐ yɛ̌yɛ́ lɛ́ kpó ɖo nǔ xɛ́ wɛ ɖo tokplétɛn toxo ɔ tɔn lɛ́ wútu.
ל [Lamɛ́di]
12 Yě nɔ ɖo nǔ élɔ́ kanbyɔ́ nɔ yětɔn lɛ́ wɛ: “Fítɛ́ nǔɖuɖu kpó sin kpó* ka ɖe?”
Yě xɛ́ nǔ ɖo toxo ɔ sín tokplétɛn lɛ́, mɛ e gblé wǔ é ɖɔhun,
yě ɖo kúkú wɛ ɖo nɔ yětɔn lɛ́ sín awa mɛ.
מ [Mɛ̌mu]
13 Kpɔ́ndéwú tɛ́ un ka sixú ná we?
Vǐ nyɔ̌nu Jeluzalɛ́mu tɔn è, mɛ̌ wú un ka sixú sɔ́ we jlɛ́ dó?
Ðyɔ̌vǐ ɖo alɔjí Sinyɔ́ɔ tɔn è, étɛ́ wú un ka sixú sɔ́ we jlɛ́ dó dó dó gbɔ nú we?
Ðó akpa towe d’agba xu ɖɔhun. Mɛ̌ ka sixú gbɔ azɔn nú we?
נ [Nǔni]
14 Gbeyíɖɔ towe lɛ́ sín nǔmimɔ ɔ, adingban kpó xó vɔ̌tɔ́ kpó wɛ,
yě ɖe nǔwanyido towe jɛ wě bónú a ní ma yi kannumɔgbénu ó ǎ,
loɔ, nǔmimɔ yětɔn lɛ́ ɔ, adingban wɛ é nɔ nyí, bɔ yě nɔ ɖo mɛblɛ́blɛ́xó lɛ́ ɖɔ nú we wɛ.
ס [Samɛ́ki]
15 Mɛ e ɖo ali ɔ jí gbɔn wɛ lɛ́ é bǐ nɔ xo alɔ dó cá we ko.
É nɔ kpácá yě, bɔ yě nɔ kwínkwín bo nɔ húnhún ta, ɖó vǐ nyɔ̌nu Jeluzalɛ́mu tɔn ɔ wú, bo nɔ ɖɔ:
“Toxo e wú è nɔ ɖɔ dó ɖɔ: ‘É nyɔ́ ɖɛkpɛ bɔ nǔ bǐ vɔ ɖ’é wú, bo nɔ dó awǎjijɛ nú ayǐkúngban ɔ bǐ’ é jɛ́n ɖíe a?”
פ [Pé]
16 Kɛntɔ́ towe lɛ́ bǐ ɖɔ slamɛ wǔ we.
Yě nɔ kwínkwín, bo nɔ ɖu aɖǔkún lobo nɔ ɖɔ: “Mǐ sɔ́ ɛ mì.
Azǎn e nɔ te kpɔ́n wɛ mǐ ɖe é nɛ́! É wá lo, bɔ mǐ mɔ!”
ע [Ayínu]
17 Jexóva wa nǔ e é lin é; é bló bɔ nǔ e é ɖɔ é jɛnu,
ɛɛn, nǔ e sín gbe é ɖe sín hwenu línlín ɖíe é.
É se wǔvɛ́ xá we cóbó sú kún dó nú we ǎ.
É bló bɔ kɛntɔ́ ɔ j’awǎ ɖó nǔ e gbo we é wú; é bló bɔ mɛ e sú kún dó nú we lɛ́ é sín hlɔ̌nhlɔ́n* lɛ́ jɛjí.
צ [Tisádu]
18 Vǐ nyɔ̌nu Sinyɔ́ɔ tɔn sín ahohó è, togun ɔ sú xó sɛ́ dó Jexóva kpó ayi tɔn bǐ kpó.
Ðasin ní sa tɔsisa ɖɔhun zǎn kpó kéze kpó.
Ma gbɔjɛ ó, ma ná gbɔjɛ ɖě nukún towe* ó.
ק [Kɔ́fu]
19 Sí te! Y’avǐ zǎn ɔ bǐ mɛ.
Ðɔ nǔ e ɖo ayi towe mɛ é bǐ nú Jexóva.
Bɛ̌ alɔ towe lɛ́ dó jǐ bo xo ɖɛ sɛ́ dó è, ɖó gbɛ* vǐ towe lɛ́ tɔn wútu,
yě wɛ nɔ ɖo nǔ xɛ́ wɛ ɖo aliklán lɛ́ bǐ ɖó adɔ wútu.
ר [Hlɛ̌ci]
20 Jexóva è, kɛnklɛ́n nyi kɔ kpɔ́n togun towe e a wa nǔ xá syɛ́nsyɛ́n é.
Nyɔ̌nu lɛ́ ná kpo ɖo kúnkan* yěɖésúnɔ tɔn, ɛɛn, vǐ e yěɖésúnɔ ji, bɔ yě ɖo ganjí lɛ́ é ɖu wɛ wɛ a?
È ná hu vɔ̌sánúxwlémawutɔ́ lɛ́ kpó gbeyíɖɔ lɛ́ kpó ɖo xɔ Jexóva tɔn mɛ wɛ a?
ש [Cínu]
21 Dɔ̌nkpɛvú kpó degénɔ kpó sín cyɔ ɖo kɔ́mɛ ɖo ali lɛ́ jí.
È sɔ́ hwǐ dó hu ɖyɔ̌vǐ ɖo alɔjí* ce lɛ́ kpó dɔ̌nkpɛvú ce lɛ́ kpó.
A hu yě ɖo xomɛsinzán towe gbe; a hu yě ma se wǔvɛ́ xá yě.
ת [Táwu]
22 A ylɔ́ adohu adohu sín awa lɛ́ bǐ xwé, cí nǔ ɖɔ gbɛtɔ́ lɛ́ ylɔ́ dó xweɖuɖu domɛ wɛ a ɖe ɖɔhun.
Azǎn e gbe Jexóva ɖo adǎn jí é ɔ, mɛ ɖěbǔ xo gló alǒ gán ǎ;
mɛ ɖěɖěe un ji* bo kpé nukún dó yě wú lɛ́ é ɔ, kɛntɔ́ ce sú kún yětɔn dó.