Gbɛvíhan
א [Alɛ́fu]*
1 Áo! Jeluzalɛ́mu toxo e mɛ gbɛtɔ́ gɔ́ ɖ’ayǐ é wɛ wá jɛ vɔ̌ lě a!
Toxo énɛ́ e mɛ gbɛtɔ́ sukpɔ́ ɖe tawun ɖo akɔta lɛ́ tɛ́ntin é wɛ wá cí asúkúsi ɖɔhun lě a!
Toxo énɛ́ e nyí axɔ́ví ɖo tokpɔn lɛ́ tɛ́ntin* ɖ’ayǐ é wɛ è ɖó azɔ̌ syɛ́nsyɛ́n kɔ jí ná lě a!
ב [Bɛ̌ti]
2 Zǎnmɛ ɔ, é nɔ ɖo avǐ ya wɛ gbɛmɛ, bɔ ɖasin nɔ sa tɔ gbɔn klɛ̌n tɔn lɛ́ jí.
Xɔnnɔ tɔn lɛ́ ɖě ɖo fínɛ́ bo ná dó gbɔ n’i ǎ.
Hǎgbɛ́ éɖésúnɔ tɔn lɛ́ bǐ wɛ flú i; yě húzú kɛntɔ́ tɔn lɛ́.
ג [Gimɛ́lu]
3 Judáa yi kannumɔgbénu, é ɖo wǔvɛ́ se wɛ syɛ́nsyɛ́n bɔ è lɛ́ hɛn gbɔ̌gúngún kangúngún tɔn.
Akɔta lɛ́ tɛ́ntin jɛ́n é ɖó ná nɔ; é mɔ gbɔjɛtɛn ɖě ǎ.
Mɛ e nɔ dó ya n’i lɛ́ é bǐ kpé wǔ tɔn hwenu e é ɖo wǔvɛ́ syɛ́nsyɛ́n mɛ é.
ד [Dalɛ́ti]
4 Ali e yi Sinyɔ́ɔ lɛ́ é ɖo aluwɛ mɛ, ɖó mɛ ɖěbǔ ɖo xwe ɔ domɛ wá wɛ ǎ.
Hɔntogbó tɔn lɛ́ bǐ kíjá; vɔ̌sánúxwlémawutɔ́ tɔn lɛ́ ɖo azɔn wɛn wɛ.
Ðyɔ̌vǐ ɖo alɔjí* tɔn lɛ́ ɖo alě ná wɛ, bɔ é ɖo wǔvɛ́ se wɛ syɛ́nsyɛ́n.
ה [He]
5 Mɛ e ɖo kún tɔn sú dó wɛ lɛ́ é wɛ nyí gǎn* tɔn din; kɛntɔ́ tɔn lɛ́ ɖo vivo mɛ.
Jexóva bló bɔ é ɖo alě ná wɛ, ɖó sɛ́n tobutóbú e é gba lɛ́ é wútu.
Kɛntɔ́ ɔ kplá vǐ tɔn lɛ́ yi kannumɔgbénu.
ו [Wǎwu]
6 Vǐ nyɔ̌nu Sinyɔ́ɔ tɔn sɔ́ ɖó susu ɖě ǎ.
Axɔ́ví tɔn lɛ́ cí zungbɔ́ e ma mɔ amagbo ɖě ǎ lɛ́ é ɖɔhun,
nǔ ci kɔ nú yě bɔ yě ɖo zɔnlin ɖi wɛ ɖo mɛ e ɖo gbě yětɔn nya wɛ é nukɔn.
ז [Zayínu]
7 Hwenu e Jeluzalɛ́mu ɖo wǔvɛ́ syɛ́nsyɛ́n mɛ, bo ma sɔ́ ɖó xwé ǎ é ɔ,
é flín nǔ xɔ akwɛ́ ɖěɖěe é ko ɖó ɖ’ayǐ xóxó lɛ́ é bǐ.
Hwenu e togun tɔn j’ayǐ jɛ kɛntɔ́ lɔ mɛ, bɔ é ma ɖó alɔdómɛtɔ́ ɖě ǎ é ɔ,
kɛntɔ́ lɛ́ mɔ ɛ bo ko è,* ɖó kún tɔn e sú dó é wú.
ח [Xɛ́ti]
8 Jeluzalɛ́mu hu hwɛ sukpɔ́.
Énɛ́ wú wɛ é húzú nǔ e xyɔ́ wǔ é.
Mɛ e nɔ wlí yɛ̌yi n’i ɖ’ayǐ lɛ́ é bǐ wɛ gbɛ́ wǎn n’i din, ɖó yě ko mɔ mɛ̌ tɔn.
É nɔ wɛn azɔn; é lɛ́ kɔ ɖidó kpó winnyá kpó.
ט [Tɛ́ti]
9 Nǔ blíblí e é wa lɛ́ é ɖo awu tɔn mɛ.
É lin tamɛ kpɔ́n dó sɔgúdo tɔn wú ǎ.
Ayǐjijɛ tɔn zɛ hǔn; mɛ ɖě ɖe bo ná dó gbɔ n’i ǎ.
Jexóva è, kpɔ́n wǔvɛ́ syɛ́nsyɛ́n e mɛ un ɖe é, ɖó kɛntɔ́ ɔ ɖo éɖée sɔ́ su wɛ.
י [Yǒdu]
10 Kɛntɔ́ ɔ ɖ’alɔ dɔkun Jeluzalɛ́mu tɔn lɛ́ bǐ jí.
Jeluzalɛ́mu mɔ bɔ akɔta lɛ́ byɔ́ sinsɛnxɔ ɔ mɛ,
akɔta ɖěɖěe a ɖe gbe ɖɔ yě kún ɖó ná byɔ́ togun towe mɛ ó lɛ́ é.
כ [Káfu]
11 Togun ɔ bǐ ɖo azɔn wɛn wɛ; yě ɖo nǔɖuɖu ba wɛ.
Yě sɔ́ nǔ xɔ akwɛ́ yětɔn lɛ́ jó bo ná dó mɔ nǔ ɖu; yě ní vɛ́ ko nɔ gbɛ kpowun.
Jexóva è, kpɔ́n, un wá cí nyɔ̌nu e ma ɖó ta ɖé ǎ é ɖɔhun.
ל [Lamɛ́di]
12 Mi mɛ e ɖo ali ɔ gbɔn wɛ lɛ́ é mi, wǔvɛ́ e mɔ wɛ un ɖe é ɖɔ nǔɖé nú mi ǎ cé?
Mi kpɔ́n!
Wǔvɛ́ ɖě sɔ́ cí wǔvɛ́ e è dó dɔn tó nú mì ná é,
ɛɛn, ée Jexóva bló bɔ un se, hwenu e é ɖo xomɛsin jí syɛ́nsyɛ́n é ɖɔhun wɛ a?
מ [Mɛ̌mu]
13 É sɛ́ myɔ dó xú ce lɛ́ mɛ sín aga, bo ɖu ɖo ɖokpó ɖokpó jí.
É ɖó mɔ nú* afɔ ce lɛ́; é hɛn mì gǎnnugǎnnu bɔ un dó gǔdofɔ.
É bló bɔ un cí nyɔ̌nu e ɖo éɖokpónɔ é ɖɔhun.
Un nɔ ɖo azɔn jɛ wɛ hwebǐnu.
נ [Nǔni]
14 É blá sɛ́n e un gba lɛ́ é bɔ yě cí agbanhɛnkpo ɖɔhun, é sɔ́ alɔ tɔn dó sin yě ɖó kpɔ́.
É sɔ́ yě ɖó kɔ nú mì, bɔ hlɔ̌nhlɔ́n ce vɔ.
Jexóva sɔ́ mì dó alɔ mɛ nú mɛ ɖěɖěe wú un ma sixú kpé ǎ lɛ́ é.
ס [Samɛ́ki]
15 Jexóva ko nya súnnu hlɔ̌nhlɔ́nnɔ e ɖo gɔ̌n ce lɛ́ é bǐ dó gbě.
É kplé ahwanfuntɔ́ lɛ́ dó wǔ ce, bo ná dó nyínyɛ́ dɔ̌nkpɛvú ce lɛ́.
Jexóva gbídí ɖyɔ̌vǐ ɖo alɔjí Judáa tɔn ɖó afɔ wú ɖo vǐwunto mɛ.
ע [Ayínu]
16 Nǔ énɛ́ lɛ́ wú wɛ un ɖo avǐ ya wɛ; ɖasin ɖo sisa sín nukún ce lɛ́ jí wɛ.
Ðó mɛ e sixú dó gbɔ nú mì alǒ fá kɔ nú mì* lɛ́ é bǐ wɛ lín dó mì.
Vǐ súnnu ce lɛ́ ɖó nukúnɖíɖó ɖě ǎ, ɖó kɛntɔ́ ɔ ɖu ɖ’é jí wútu.
פ [Pé]
17 Sinyɔ́ɔ kɛ awa tɔn lɛ́; é ka ɖó mɛ ɖě bɔ é ná dó gbɔ n’i ǎ.
Jexóva ɖe gbe nú kɛntɔ́ Jakɔ́bu tɔn e lɛ́ lɛ̌ dó è lɛ́ é bǐ ɖɔ yě ní sí te dó jǐ tɔn.
Jeluzalɛ́mu húzú nǔ e xyɔ́ wǔ é nú yě.
צ [Tisádu]
18 Jexóva nyí nǔjlɔ́jlɔ́watɔ́, ɖó gbeɖiɖe tɔn lɛ́* jí wɛ un fɔ́n gǔ dó.
Togun lɛ́ mi, mi bǐ ní ɖótó, bo kpɔ́n wǔvɛ́ e se wɛ un ɖe é.
Ðyɔ̌vǐ ɖo alɔjí* ce lɛ́ kpó dɔ̌nkpɛvú ce lɛ́ kpó yi kannumɔgbénu.
ק [Kɔ́fu]
19 Un ylɔ́ xɔnnɔ ce lɛ́, amɔ̌, yě flú mì.
Vɔ̌sánúxwlémawutɔ́ ce lɛ́ kpó tomɛxó ce lɛ́ kpó dɔn ɖo toxo ɔ mɛ,
hwenu e yě ɖo nǔɖuɖu ba wɛ bo ná dó nɔ gbɛ é.
ר [Hlɛ̌ci]
20 Jexóva è, kpɔ́n, un ɖo wǔvɛ́ ɖaxó mɛ.
Xo ce mɛ* wlú tawun.
Ayi ce fan, ɖó un fɔ́n gǔ bǐ mlɛ́mlɛ́ wútu.
Hwǐ ɖo mɛ hu wɛ ɖo kɔ́xo; gbɛtɔ́ ka lɛ́ ɖo kúkú wɛ ɖo xwé ɔ gbe.
ש [Cínu]
21 Mɛ lɛ́ se azɔn e wɛn wɛ un ɖe é; mɛ ɖěbǔ ka ɖe bo ná dó gbɔ nú mì ǎ.
Kɛntɔ́ ce lɛ́ bǐ se awě e xo mì é.
Yě ɖo awǎ jɛ wɛ, ɖó hwi wɛ bló bɔ é xo mì.
Amɔ̌, a ná bló bɔ azǎn e xó a ɖɔ é ná wá; hwe énɛ́ nu ɔ, yě ná cí nyɛɖɔhun.
ת [Táwu]
22 Nǔnyanyawiwa yětɔn lɛ́ bǐ ní jɛ wě ɖo nukɔn towe, bónú a ní wa nǔ xá yě syɛ́nsyɛ́n,
lěe a wa nǔ xá mì syɛ́nsyɛ́n ɖó sɛ́n e un gba lɛ́ é bǐ wú gbɔn é.
Ðó azɔnwinwɛn ce sukpɔ́, bɔ ayi ce ɖo azɔn jɛ wɛ.