Jelemíi
8 “Hwenɛ́nu ɔ,” wɛ Jexóva ɖɔ, “è ná bɛ́ axɔ́sú Judáa tɔn lɛ́ sín xú, axɔ́ví tɔn lɛ́ sín xú, vɔ̌sánúxwlémawutɔ́ lɛ́ sín xú, gbeyíɖɔ lɛ́ sín xú kpó mɛ e nɔ nɔ Jeluzalɛ́mu lɛ́ é sín xú kpó tɔ́n sín yɔdo yětɔn lɛ́ mɛ. 2 È ná tɛ́ yě dó hwesivɔ́, sun kpó ahwankpá jǐxwé tɔn lɛ́ bǐ kpó nukɔn. Nǔ énɛ́ lɛ́ wɛ yě yí wǎn ná, sɛn, xwedó, ba, bo lɛ́ ɖe kɔ́ ná. È ná xo yě kplé ǎ, mɔ̌ jɛ́n è ma ná ɖi yě ǎ é nɛ́. Yě ná cí kanlinmí ɖɔhun ɖo ayǐkúngban ɔ nukúnmɛ.”
3 “Bɔ xwédo nyanya élɔ́ sín mɛ e kpo lɛ́ é ná mɔ ɖɔ kú nyɔ́ hú gbɛ nú émí ɖo fí e un fúnfún yě gbɔn lɛ́ é bǐ,” wɛ Jexóva ahwankpá lɛ́ tɔn ɖɔ.
4 “Bɔ a ɖó ná ɖɔ nú yě ɖɔ: ‘Nǔ e Jexóva ɖɔ é ɖíe:
“Yě ná j’ayǐ, bo ná lɛ́ sí te ǎ cé?
Ényí mɛ ɖokpó lɛ́ kɔ ɔ, mɛ ɖěvo ná lɛ́ kɔ ǎ cé?
5 Étɛ́wú togun élɔ́, ɛɛn, mɛ e nɔ nɔ Jeluzalɛ́mu lɛ́ é ka kpo ɖo nǔ wa wɛ kpó gbejímanɔ kpó?
Yě tɛ́ dó mɛblɛ́blɛ́ wú gbánwúngbánwún;
yě gbɛ́ ɖɔ émí kún ná lɛ́ kɔ ó.
6 Un tɛ́ tó bo kpo ɖo tó ɖó wɛ, amɔ̌, ali e nu yě ɖɔ xó ɖe é sɔgbe ǎ.
Mɛɖé ɖe bɔ nǔ nyanya e é wa é vɛ́ n’i, alǒ kanbyɔ́ ɖɔ: ‘Étɛ́ un ka wa nɛ́?’ a jí ǎ.
Mɛ ɖokpó ɖokpó nɔ lɛ́ kɔ yi nǔ e wa wɛ mɛ bǐ ɖe é kɔn, sɔ́ e zlɔ́n ɖidó ahwangbénu é ɖɔhun.
7 Aɖɔwé e ɖo jǐnukúnsin é tlɛ tuun hwetɔnnu;*
ahwannɛ́, azɔnxɛ kpó títígwetí* kpó nɔ lɛ́ kɔ* ɖo gan yětɔn mɛ.
Amɔ̌, togun ce ɖésúnɔ mɔ nukúnnú jɛ hwɛɖiɖɔ nyɛ Jexóva tɔn mɛ ǎ.”’
8 ‘Nɛ̌ mi ka sixú ɖɔ: “Nǔnywɛ́tɔ́ wɛ nú mǐ, bɔ sɛ́n* Jexóva tɔn ɖo mǐ sí” gbɔn?
Ðó nú è ná ɖɔ ɔ, adingbanɖíɖó* kɛ́ɖɛ́ wú jɛ́n è zán nǔwlánnú* adingban tɔn sɛ́nkplɔ́nmɛtɔ́* lɛ́ tɔn.
9 È dó winnyá nǔnywɛ́tɔ́ lɛ́.
Xɛsi jɛ yě jí, è ná wlí yě.
Éɖíe! Yě gbɛ́ xó Jexóva tɔn,
bɔ nǔnywɛ́ tɛ́ yě ka ɖó lo?
10 Énɛ́ wú ɔ, un ná sɔ́ asi yětɔn lɛ́ jó nú súnnu ɖěvo lɛ́,
bo ná sɔ́ gle yětɔn lɛ́ nú glenɔ ɖěvo lɛ́;
ɖó sín mɛ kpɛví bǐ ɔ jí káká jɛ mɛ ɖaxó bǐ ɔ jí ɔ, yě mɛ ɖokpó ɖokpó nɔ ɖo afu ɖu wɛ;
sín gbeyíɖɔ jí jɛ vɔ̌sánúxwlémawutɔ́ jí ɔ, mɛ ɖokpó ɖokpó nɔ ɖo mɛ xo ɖu wɛ.
11 Yě nɔ tɛ́n kpɔ́n bo ná gbɔ azɔn* nú vǐ nyɔ̌nu togun ce tɔn kpó vɛ̌dónúnǔ kpó,* bo nɔ ɖɔ:
“Fífá tíin! Fífá tíin!”
Fífá ɖě ka ɖe ǎ.
12 Winnyá ka nɔ hu yě ɖó nǔ baɖabaɖa e yě dósin lɛ́ é wú a?
Winnyá ɖě nɔ hu yě ǎ!
Yě tlɛ tuun nǔ e nyí winnyá é ǎ!
Énɛ́ wú ɔ, yě ná j’ayǐ jɛ mɛ e ko j’ayǐ lɛ́ é tɛ́ntin.
Hwenu e un ná dɔn tó nú yě é ɔ, yě ná klɛ́n afɔ,’ wɛ Jexóva ɖɔ.
13 ‘Hwenu e un ná xo yě kplé é ɔ, un ná sú kún dó nú yě,’ wɛ Jexóva ɖɔ.
‘È ná jó vǐwun ɖě dó vǐwuntín jí ǎ, è ka ná jó fígi ɖě dó fígitín jí ǎ.
Bɔ ama lɛ́ ná xú, yě ná hɛn nǔ e un ná yě é bú.’”
14 “Étɛ́wú mǐ ka ɖo ayǐjínjɔ́n ɖo fí?
Mi nú mǐ ní xo mǐɖée kplé, bo byɔ́ toxo e è mɛ ahohó lɛ́ lɛ̌ dó lɛ́ é mɛ, bónú kún mǐtɔn ná sú dó ɖo fínɛ́.
Ðó Jexóva Mawu mǐtɔn ná sú kún mǐtɔn dó,
é nɔ ná mǐ sin e mɛ è dó nǔ é, bónú mǐ ná nu,
ɖó mǐ hu hwɛ dó Jexóva.
15 È ɖo nukún ɖó fífá wɛ, amɔ̌, nǔ ɖagbe ɖě wá ǎ;
è ɖo nukún ɖó azɔn gbigbɔ sín hwenu wɛ, amɔ̌, adohu adohu wɛ tíin!
16 Sín Dan ɔ, è se bɔ kɛntɔ́ ɔ sín sɔ́ lɛ́ ɖo gbigbɔjɛ wɛ voovoo.
Kɛntɔ́ ɔ sín sɔ́ asú lɛ́ sú xó ɔ,
to ɔ bǐ nɔ húnhún.
Yě nɔ byɔ́ to ɔ mɛ, bo nɔ húnhún to ɔ kpó nǔ e ɖ’é mɛ lɛ́ é bǐ kpó,
ɛɛn, toxo ɔ kpó mɛ e ɖ’é mɛ lɛ́ é kpó.”
17 “Ðó din ɔ, un ɖo dan sɛ́ dó tɛ́ntin mitɔn wɛ,
dan aɖǐvɛ́nɔ e è ma sixú hu acɛ ná ǎ lɛ́ é,
bɔ é ɖo wɛn ɖɔ yě ná xú aɖǔ mi,” wɛ Jexóva ɖɔ.
18 Aluwɛ ce sixú vɔ ǎ;
ayi ce ɖo azɔn jɛ wɛ.
19 Vǐ nyɔ̌nu togun ce tɔn
ɖo xó sú dó byɔ́ alɔdó wɛ sín to línlín mɛ:
“Jexóva ɖo Sinyɔ́ɔ ǎ cé?
Axɔ́sú tɔn ɖ’é mɛ ǎ cé?”
“Étɛ́wú yě ka dó xomɛsin nú mì kpó bǒcyɔ kpikpa yětɔn lɛ́ kpó,
ɛɛn, kpó nǔmɛsɛn toɖévomɛ tɔn yětɔn e ma xɔ akwɛ́ ǎ lɛ́ é kpó?”
20 “Nǔkúnyiyahwenu ko wá yi, yǒzohwenu ko wá vivɔnu,
amɔ̌, è ko hwlɛ́n mǐ gán ǎ!”
21 Lanmɛ ce bǐ gba, ɖó vǐ nyɔ̌nu togun ce tɔn sín akpa wú;
wǔ kú mì.
Adohu adohu ɖí bú mì.
22 Balusámu* ɖě ɖo Galádi ǎ cé?
Alǒ azɔngbɔtɔ́* ɖě ɖo fínɛ́ ǎ cé?
Étɛ́wú è ma ka gbɔ azɔn nú vǐ nyɔ̌nu togun ce tɔn ǎ?