Jelemíi
9 Ényí ta ce bǐ ko nyí sin wɛ ɔ,
ényí nukún ce lɛ́ ko nyí jɔtɛn ɖasin tɔn wɛ ɔ,
un ná y’avǐ zǎn kpó kéze kpó,
ɖó togun ce sín mɛ e è hu lɛ́ é wú.
2 Ényí un ko ɖó fí e tomɛyitɔ́ nɔ nɔ ɖo gbětótló mɛ é ɖé wɛ ɔ,
un ná jó togun ce dó, bo ná yi nɔ zɔ tawun dó yě,
ɖó yě mɛ bǐ wɛ nyí afɔdógbětɔ́ alǒ nyɔ̌nuɖěvobatɔ́,
ɛɛn, yě bǐ wɛ nyí gbejímanɔtɔ́.
3 Yě nɔ ɖo gbesisɔmɛ bo ná ɖó adingban gǎ e ɖo tlɔ́tlɔ́ jí é ɖɔhun;
adingban ɖíɖó kpa azinkpo ɖo to ɔ mɛ, é nyí gbejíninɔ ǎ.
“Yě nɔ fɔ́n bo nɔ ɖo nǔ nyanya wa dó nǔ nyanya jí wɛ,
lobo nɔ ɖótó mì ɖěbǔ ǎ,” wɛ Jexóva ɖɔ.
4 “Mi nɔ acéjí dó nɔzo mitɔn lɛ́ wú,
mi ma tlɛ ɖeji dó nɔví mitɔn lɛ́ wú ó.
Ðó nɔví mɛtɔn lɛ́ bǐ wɛ nyí mɛblɛ́tɔ́,
bɔ nɔzo mɛtɔn lɛ́ bǐ nyí jidómɛtɔ́.
5 Mɛ ɖokpó ɖokpó nɔ blɛ́ nɔzo tɔn,
bɔ mɛ ɖěbǔ nɔ ɖɔ nǔgbó ǎ.
Yě kplɔ́n ɖɛ̌ yětɔn bónú é ná nɔ ɖó adingban.
Yě zán yěɖée vún ɖo nǔ e ma sɔgbe ǎ é wiwa mɛ.
6 Mɛblɛ́blɛ́ tɛ́ntin nɔ gbɛ ɖe wɛ a ɖe.
Yě gbɛ́ ɖɔ émí kún ná tuun mì ó, ɖó mɛblɛ́blɛ́ yětɔn wú,” wɛ Jexóva ɖɔ.
7 Énɛ́ wú ɔ, nǔ e Jexóva ahwankpá lɛ́ tɔn ɖɔ é ɖíe:
“Un ná sínsín yě, bo ná tɛ́n yě kpɔ́n,
ɖó nǔ ɖěvo tɛ́ un ka sɔ́ sixú wa nú vǐ nyɔ̌nu togun ce tɔn?
8 Ðɛ̌ yětɔn cí gǎ e nɔ hu mɛ é ɖɔhun, bo nɔ ɖɔ mɛblɛ́blɛ́xó lɛ́.
Mɛɖé nɔ zán nu tɔn dó ɖɔ fífáxó nú nɔzo tɔn,
amɔ̌, ɖo ayi tɔn mɛ ɔ, mɔ ɖó n’i wɛ é ɖe.”
9 “Un ɖó ná ylɔ́ yě, bónú yě ná ɖó nǔ énɛ́ lɛ́ sín gbe ǎ cé?” wɛ Jexóva ɖɔ.
“Un* ɖó ná ba hlɔn akɔta mɔ̌hun wú ǎ cé?
10 Un ná y’avǐ, bo ná alě dó só ɖaxó lɛ́ tamɛ,
un ná dó gbɛvíhan* dó amagbo e ɖo gbětótló mɛ lɛ́ é tamɛ,
ɖó è dó yě zo, bónú mɛ ɖěbǔ ní ma gbɔn yě mɛ dín ó,
lobɔ è se kanlinhwan lɛ́ sín gbe ǎ.
Xɛ e ɖo jǐnukúnsin lɛ́ é kpó kanlin lɛ́ kpó hɔn; yě yi.
11 Un ná bló bɔ Jeluzalɛ́mu ná cí awǐnnya e è xo kplé bɔ é yi jǐ lɛ́ é ɖɔhun, é ná húzú fí e cukú gbě tɔn lɛ́ nɔ nɔ é,
un ná bló bɔ toxo Judáa tɔn lɛ́ ná jɛ vɔ̌, lobɔ mɛ ɖěbǔ ná ɖo yě mɛ ǎ.
12 Mɛ̌ ka nyɔ́nǔi tawun bo ná mɔ nukúnnú jɛ énɛ́ mɛ?
Mɛ̌ Jexóva ka ɖɔ xó ná, bónú mɛ ɔ ná dó sixú jlá?
Étɛ́wú to ɔ sín kún ka sú dó?
Étɛ́wú é ka xú gbětótló ɖɔhun,
bɔ mɛ ɖěbǔ ma ɖo gbingbɔn mɛ dín wɛ ǎ?”
13 Jexóva yí gbe ɖɔ: “Ðó yě gbɛ́ sɛ́n ce e un ná yě é,* bo xwedó ǎ, yě ka lɛ́ se tónú nú gbe ce ǎ. 14 É nyɔ́ wa ɔ, yě xwedó ayi yěɖésúnɔ tɔn lɛ́ kpó ta syɛ́nsyɛ́n kpó, bo xwedó bǒcyɔ Baálu tɔn lɛ́, lěe tɔ́gbó yětɔn lɛ́ kplɔ́n yě ɖɔ yě ní wa gbɔn é. 15 Énɛ́ wú ɔ, nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Un ɖo blǒbló wɛ bɔ togun élɔ́ ná nɔ ɖu vǐvɛ́, un ná bló bɔ yě ná nu sin e mɛ è dó nǔ é. 16 Un ná fúnfún yě gbɔn akɔta e yě kpó tɔ́ yětɔn lɛ́ kpó ma tuun ǎ lɛ́ é mɛ, un ná sɛ́ hwǐ dó yě, káká bɔ kún yětɔn ná sú dó.’
17 Nǔ e Jexóva ahwankpá lɛ́ tɔn ɖɔ é ɖíe:
‘Mi wa nǔ kpó nukúnnúmɔjɛnǔmɛ kpó.
Mi ylɔ́ nyɔ̌nu e nɔ ji gbɛvíhan* lɛ́ é,
mi sɛ́ mɛ dó nyɔ̌nu alɔsekpɛ́nnánɔ lɛ́ gbé mɛ ɖɔ yě ní wá,
18 bónú yě ní dó sixú yá wǔ wá, bo dó gbɛvíhan ɖokpó nú mǐ,
bónú ɖasin ní sa tɔ sín nukún mǐtɔn lɛ́ jí,
lobonú wunda mǐtɔn lɛ́ ní kun sin.
19 Ðó è se gbɛvíhan ɔ sín gbe sín Sinyɔ́ɔ:
“È sú kún mǐtɔn dó mɛ nya!
Winnyá mǐtɔn d’agba mɛ nya!
Ðó mǐ jó to ɔ dó, yě kíjá xwé mǐtɔn lɛ́.”
20 Nyɔ̌nu lɛ́ mi, mi ɖótó xó Jexóva tɔn.
Mi nú xó e tɔ́n sín nu tɔn mɛ é ní byɔ́ tó mitɔn mɛ.
Mi kplɔ́n gbɛvíhan élɔ́ vǐ nyɔ̌nu mitɔn lɛ́,
bo kplɔ́n gbɛvíhan* élɔ́ miɖée lɛ́.
21 Ðó kú gbɔn flɛtɛ́li mǐtɔn lɛ́ nu wá gɔ̌n mǐtɔn;
é byɔ́ atɔxwɛ mǐtɔn syɛ́nsyɛ́n lɛ́ mɛ,
bo ná ɖe vǐ lɛ́ sín toxomɛli lɛ́ jí,
lobo ɖe dɔ̌nkpɛvú lɛ́ sín tokplétɛn lɛ́.’
22 Ðɔ: ‘Nǔ e Jexóva ɖɔ é ɖíe:
“Mɛ lɛ́ ná kú kɔn nyi kɔ́mɛ, bo ná cí kanlinmí ɖɔhun gbɔn gle lɛ́ jí,
yě ná cí nǔkún e è sɛ́n kɔn nyi ayǐ tlóló ɖo nǔkúnyatɔ́ gúdo lɛ́ é ɖɔhun;
mɛ ɖěbǔ ɖe bo ná xo yě kplé ǎ.”’”
23 Nǔ e Jexóva ɖɔ é ɖíe:
“Mɛ e nyí nǔnywɛ́tɔ́ é ní ma gó ɖó nǔnywɛ́ tɔn wú ó;
mɛ e nyí hlɔ̌nhlɔ́nnɔ é ní ma gó ɖó hlɔ̌nhlɔ́n tɔn wú ó;
mɛ e nyí dɔkunnɔ é ní ma gó ɖó dɔkun tɔn lɛ́ wú ó.”
24 “Amɔ̌, mɛ e nɔ gó é ní gó ɖó nǔ élɔ́ wú:
é ní nɔ gó ɖɔ é ɖó nukúnnúmɔjɛnǔmɛ, bo lɛ́ tuun mì,
ɖɔ nyi wɛ nyí Jexóva, Mɛ e nɔ ɖe wǎnyíyí e ma nɔ sɛ do ǎ é, hwɛjijɔ kpó nǔjlɔ́jlɔ́wiwa kpó xlɛ́ ɖo ayǐkúngban ɔ jí é,
ɖó nǔ énɛ́ lɛ́ wɛ nɔ dó xomɛhunhun nú mì,” wɛ Jexóva ɖɔ.
25 “Éɖíe! Hwe ɔ nu jawě,” wɛ Jexóva ɖɔ, “bɔ mɛ e gbo ada, cóbó ma ka gbo ada ǎ lɛ́ é bǐ ná ɖó gbe nú mì. 26 Ejípu, Judáa, Edɔ́mu, Amumɔ́ɔ ví lɛ́, Mɔwábu kpó mɛ ɖěɖěe nɔ xwlɛ́ gekplá yětɔn, bo nɔ nɔ gbětótló mɛ lɛ́ é bǐ kpó ná ɖó gbe nú mì; ɖó akɔta lɛ́ ɖěbǔ gbo ada ǎ, bɔ togun Izlayɛ́li tɔn ɔ bǐ sín ayi wɛ kú atli.”