Jelemíi

7 Xó e Jexóva ɖɔ nú Jelemíi é ɖíe: 2 “Nɔ te ɖo xwé Jexóva tɔn sín hɔntogbó jí, bo jlá wɛn élɔ́ ɖo fínɛ́: ‘Mi mɛ Judáanu e nɔ gbɔn hɔntogbó élɔ́ lɛ́ nu bo ná dó ɖe kɔ́ nú Jexóva lɛ́ é mi, mi bǐ ní ɖótó xó Jexóva tɔn. 3 Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: “Mi húzú walɔ mitɔn lɛ́ kpó nǔwiwa mitɔn lɛ́ kpó, énɛ́ ɔ, un ná jó mi dó bɔ mi ná kpo ɖo nɔtɛn élɔ́ nɔ wɛ. 4 Mi ma ɖeji dó mɛblɛ́blɛ́xó lɛ́ wú, bo ɖɔ xó élɔ́ ó: ‘Sinsɛnxɔ Jexóva tɔn ɖíe,* sinsɛnxɔ Jexóva tɔn, sinsɛnxɔ Jexóva tɔn!’ 5 Ényí mi húzú walɔ mitɔn lɛ́ kpó nǔwiwa mitɔn lɛ́ kpó nǔgbó nǔgbó ɔ, ényí mi jɛ hun dó hwɛjijɔ jí ɖo mɛɖé kpó nɔzo tɔn kpó tɛ́ntin nǔgbó nǔgbó ɔ, 6 ényí mi ma gbídí kɔ nú toɖévomɛnu lɛ́, tɔ́cyɔvǐ lɛ́ kpó asúkúsi lɛ́ kpó ǎ ɔ, ényí mi ma kɔn xomɛvɔ́nɔ sín hun nyi ayǐ ɖo nɔtɛn élɔ́ ǎ ɔ, ényí mi ma xwedó nǔmɛsɛn ɖěvo lɛ́ dó hɛn nǔ gblé dó miɖésúnɔ wú ǎ ɔ, 7 un ná jó mi dó bɔ mi ná kpo ɖo fí élɔ́ nɔ wɛ, ɖo to e un ná tɔ́gbó mitɔn lɛ́ káká sɔ́yi* é mɛ.”’”

8 “Amɔ̌, mi nɔ ɖeji dó mɛblɛ́blɛ́xó lɛ́ wú, é ná hɛn le kwínɖokpó wá ǎ. 9 Mi ka sixú j’ajo, hu mɛ, dó afɔ gbě alǒ ba nyɔ̌nu ɖěvo, xwlé nǔ dó nǔvú jí, sá vɔ̌ nú Baálu, bo xwedó nǔmɛsɛn e mi ma tuun ǎ lɛ́ é, 10 ɛɛn, mi ka sixú ɖo nǔ baɖabaɖa énɛ́ lɛ́ bǐ wa wɛ, bo ná wá nɔ te ɖo nukɔn ce, ɖo xwé élɔ́ e wú nyǐkɔ ce ɖe é gbe, bo ná ɖɔ: ‘È ná hwlɛ́n mǐ gán,’ a? 11 Mi lin ɖɔ xwé élɔ́ e wú nyǐkɔ ce ɖe é húzú ajotɔ́ lɛ́ sín avatɛn wɛ a? Nyiɖésúnɔ mɔ nǔ e wa wɛ mi ɖe lɛ́ é,” wɛ Jexóva ɖɔ.

12 “‘Amɔ̌, mi bo yi nɔtɛn ce ɖo Silóo, fí e un bló bɔ nyǐkɔ ce nɔ jɛ nukɔn é, bo kpɔ́n nǔ e un dósin xá ɛ ɖó nǔnyanyawiwa togun ce Izlayɛ́li tɔn wútu é. 13 É ɖo mɔ̌ có, mi fɔ́n bo ɖo nǔ énɛ́ lɛ́ bǐ wa wɛ,’ wɛ Jexóva ɖɔ, ‘bɔ un ɖɔ xó nú mi azɔn gěgé* có, mi ɖótó ǎ. Un fɔ́n bo ɖo mi ylɔ́ wɛ, amɔ̌, mi sɔ ǎ. 14 Énɛ́ wú ɔ, nǔ e un dósin xá Silóo é wɛ un ná dósin xá xwé élɔ́ e wú nyǐkɔ ce ɖe, bɔ mi ɖo ji ɖe d’é wú wɛ é, bo ná lɛ́ dósin xá nɔtɛn élɔ́ e un ná mi kpó tɔ́gbó mitɔn lɛ́ kpó é. 15 Un ná nya mi dó gbě sín nukún ce mɛ, lěe un nya nɔví mitɔn lɛ́ bǐ, ɛɛn, kúnkan Eflayímu tɔn lɛ́ bǐ dó gbě gbɔn é.’

16 “Hwɛ ɔ, ma xo ɖɛ dó togun élɔ́ tamɛ ó. Ma sú xó, alǒ xo ɖɛ, alǒ sa vo nú mì dó ta yětɔn mɛ ó, ɖó un ná ɖótó we ǎ. 17 A mɔ nǔ e wa wɛ yě ɖe ɖo toxo Judáa tɔn lɛ́ mɛ, bo lɛ́ ɖ’é wú ɖo toxomɛli Jeluzalɛ́mu tɔn lɛ́ jí lɛ́ é ǎ cé? 18 Vǐ súnnu lɛ́ ɖo nakí xo kplé wɛ, tɔ́ lɛ́ ɖo myɔ flɔ́ wɛ, bɔ asi lɛ́ ɖo linfín nya wɛ, bo ná mɔ tɛn dó ɖa wɔ̌xúxú vɔ̌sísá tɔn lɛ́ nú Axɔ́si jǐxwé tɔn,* lobɔ yě ɖo nǔníná vɛ̌ɛn tɔn lɛ́ kɔn nyi ayǐ nú nǔmɛsɛn ɖěvo lɛ́ wɛ, bo ná dó dó xomɛsin nú mì. 19 ‘Amɔ̌, nyɛ wú hɛn nǔ gblé dó* wɛ yě ɖe a?’ wɛ Jexóva ɖɔ. ‘Yěɖésúnɔ wú hɛn nǔ gblé dó wɛ yě ɖe nú winnyá yěɖésúnɔ tɔn ǎ cé?’ 20 Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Un ná gba xomɛsin e jí un ɖe é kpó adǎn e jí un ɖe é kpó kɔn nyi nɔtɛn élɔ́ jí, bo ná gba kɔn nyi gbɛtɔ́ kpó kanlin kpó jí, lobo ná gba kɔn nyi atín e ɖo gle mɛ lɛ́ é kpó sínsɛ́n ayǐkúngban ɔ tɔn kpó jí; é ná ji, bɔ è ná sixú cí ǎ.’

21 “Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Mi ní gɔ́ nǔníná mitɔn e è nɔ dó blěbú tɔn zo lɛ́ é nú vɔ̌sísá mitɔn ɖěvo lɛ́, bo ɖu lan ɔ miɖésúnɔ. 22 Ðó azǎn e gbe un kplá tɔ́gbó mitɔn lɛ́ tɔ́n sín Ejípu é ɔ, un ɖɔ nǔníná e è nɔ dó blěbú tɔn zo lɛ́ é kpó vɔ̌sísá lɛ́ kpó sín xó xá yě, alǒ ɖe gbe tɔn nú yě ǎ. 23 Amɔ̌, un ɖe gbe nú yě ɖɔ: “Mi se tónú nú gbe ce, énɛ́ ɔ, un ná húzú Mawu mitɔn, bɔ mi ná húzú togun ce. Mi ɖó ná ɖi zɔnlin gbɔn ali e sín gbe un ɖe nú mi lɛ́ é bǐ jí, bónú nǔ ní dó sixú nyɔ́ nú mi.”’ 24 Loɔ, yě ɖótó mì, alǒ tɛ́ tó bo se xó ce ǎ; é nyɔ́ wa ɔ, yě wa nǔ sɔgbe xá tuto* yěɖésúnɔ tɔn lɛ́, bo xwedó nǔ e ayi yětɔn nyanya ɔ ɖɔ nú yě é kpó ta syɛ́nsyɛ́n kpó, lobo dó gǔdofɔ, yě yi nukɔn ǎ, 25 sín gbe e gbe tɔ́gbó mitɔn lɛ́ tɔ́n sín Ejípu to mɛ é káká jɛ égbé. Énɛ́ wú ɔ, un nɔ fɔ́n bo nɔ ɖo mɛsɛntɔ́ ce gbeyíɖɔ lɛ́ sɛ́ dó mi wɛ, un nɔ sɛ́ yě dó gbe bǐ gbe, un sɛ́ yě dó azɔn gěgé.* 26 Loɔ, yě gbɛ́ tó ɖó mì, yě tɛ́ tó bo se xó ce ǎ. É nyɔ́ wa ɔ, yě syɛ́n ta,* bo wa nǔ e nylá hú nǔ e tɔ́gbó yětɔn lɛ́ wa é!

27 “A ná ɖɔ xó énɛ́ lɛ́ bǐ nú yě, amɔ̌, yě ná ɖótó we ǎ; a ná ylɔ́ yě, amɔ̌, yě ná sɔ nú we ǎ. 28 Bɔ a ná ɖɔ nú yě ɖɔ: ‘Akɔta e ma se tónú nú Jexóva Mawu yětɔn sín gbe ǎ, bo gbɛ́ ɖɔ émí kún ná se kplɔ́n ó é ɖíe. Gbejíninɔ sín xó ko fó, bɔ è tlɛ sɔ́ nɔ ɖɔ xó tɔn ɖo tɛ́ntin yětɔn ǎ.’*

29 “Kpa ɖa towe e è ma kpa ǎ* é, bo bɛ́ nyi gbě, dǒ gbɛvíhan* ɖo só kpɛví e jí nǔɖé ma ɖe ǎ lɛ́ é jí, ɖó Jexóva gbɛ́ jijimɛ élɔ́ e dó xomɛsin ɖaxó n’i é, bo ná lɛ́ jó è dó. 30 ‘Ðó togun Judáa tɔn wa nǔ e nylá nukún ce mɛ lɛ́ é,’ wɛ Jexóva ɖɔ. ‘Yě lí bǒcyɔ xyɔ́ wǔ yětɔn lɛ́ dó xwé e wú nyǐkɔ ce ɖe é gbe, bo ná mɔ tɛn dó hɛn xwé ɔ blí. 31 Yě sɔ́ nǔ nú nɔtɛn ɖeɖóvo lɛ́ ɖo Tofɛ́ti, ɖo Vǐ súnnu Hinnɔ́ɔ tɔn sín tɔdo* mɛ, bo ná mɔ tɛn dó dó vǐ súnnu yětɔn lɛ́ kpó vǐ nyɔ̌nu yětɔn lɛ́ kpó zo ɖo myɔ mɛ; nǔɖé wɛ bɔ un ɖe gbe tɔn ǎ, é ka tlɛ wá ayi mɛ nú mì kpɔ́n ǎ.’*

32 “‘Énɛ́ wú ɔ, hwe ɔ nu jawě,’ wɛ Jexóva ɖɔ, ‘bɔ è sɔ́ ná nɔ ylɔ́ ɖɔ Tofɛ́ti, alǒ Vǐ súnnu Hinnɔ́ɔ tɔn sín tɔdo* ɖě ǎ. Loɔ, è ná nɔ ylɔ́ ɖɔ tɔdo Mɛhuhu tɔn. Yě ná nɔ ɖi cyɔ dó Tofɛ́ti káká bɔ tɛnmɛ ɖě sɔ́ ná kpo ǎ. 33 Togun élɔ́ sín cyɔ ná húzú nǔɖuɖu nú xɛ e ɖo jǐnukúnsin lɛ́ é kpó kanlin e ɖo ayǐkúngban ɔ jí lɛ́ é kpó, bɔ mɛ ɖěbǔ ná ɖe bo ná nya yě dó zɔ ǎ. 34 Un ná ɖó nǔ agbojlaka ɖúɖú, awǎjijɛ sín xósúsú, asisúnɔ sín gbe kpó yawó sín gbe kpó nu ɖo toxo Judáa tɔn lɛ́ mɛ, bo ná lɛ́ wa mɔ̌ ɖo toxomɛli Jeluzalɛ́mu tɔn lɛ́ jí, ɖó è ná sú to ɔ sín kún dó.’”