Jelemíi
6 Vǐ súnnu Bɛnjamɛ́ɛ tɔn lɛ́ mi, mi ba bibɛtɛn dó zɔ nú Jeluzalɛ́mu.
Mi kwín lanzo ɖo Tekówa;
mi tá wuntun myɔnɔ ɖé dó Bɛti-Hakɛlɛ́mu jí!
Ðó awěxomɛ ɖé gosín totaligbé jawě, ɛɛn, adla ɖaxó ɖé wɛ.
2 Vǐ nyɔ̌nu Sinyɔ́ɔ tɔn cí nyɔ̌nu ɖɛkpɛ ɖɛkpɛ e è bóɖó é ɖɔhun.
3 Lɛ̌ngbɔ́nyitɔ́ lɛ́ kpó lɛ̌ngbɔ́hwan yětɔn lɛ́ kpó ná wá.
Yě ná gbá goxɔ yětɔn lɛ́ lɛ́ lɛ̌ dó è bǐ,
yě mɛ ɖokpó ɖokpó ná nɔ ná ama lɛ̌ngbɔ́hwan e wú kpé nukún dó wɛ yě ɖe é.
4 “Mi sɔ́ nǔ* bo ná dó fun ahwan xá ɛ!
Mi sí te, mi nú mǐ ní tɔ́n ahwan ɛ ɖo hwemɛ cíɖíɖí!”
“Heelú mǐ, ɖó hwe ɖo xɔ yi wɛ,
bɔ ablu ɖo dǐdó wɛ!”
5 “Mi sí te, mi nú mǐ ní tɔ́n ahwan ɛ ɖo zǎnmɛ,
bo gba atɔxwɛ tɔn syɛ́nsyɛ́n lɛ́.”
6 Ðó nǔ e Jexóva ahwankpá lɛ́ tɔn ɖɔ é ɖíe:
“Mi gbo atín, bo sɔ́ nǔ nú nǔ e è ná zán dó ján go dó Jeluzalɛ́mu lɛ́ é.
Toxo e ɖó ná ɖó gbe é wɛ n’i;
kɔgbídínúmɛ kɛ́ɖɛ́ wɛ ɖo to ɔ mɛ.
7 Lěe dotɔ nɔ nyí jɔtɛn sin fífá tɔn gbɔn é ɔ,
mɔ̌ ɖokpó ɔ wɛ toxo élɔ́ nyí jɔtɛn nǔnyanyawiwa tɔn gbɔn.
È nɔ se dǎkaxixo kpó kúnsúdónúnǔ kpó sín xó ɖo toxo ɔ mɛ;
azɔn kpó jɛmɛjí kpó ɖo nukɔn ce hwebǐnu.
8 Jeluzalɛ́mu è, ɖǒtó akpágbanúmɛ ce, é ma nyí mɔ̌ ǎ ɔ, un ná lɛ́ kɔ sín gǔdo towe lěe è nɔ lɛ́ kɔ sín nǔ e xyɔ́ wǔ é gúdo gbɔn é ɖɔhun;
un ná bló bɔ a ná jɛ vɔ̌, bo ná nyí to e mɛ mɛ ɖěbǔ ma ɖe ǎ é.”
9 Nǔ e Jexóva ahwankpá lɛ́ tɔn ɖɔ é ɖíe:
“Yě ná cyán Izlayɛ́li sín mɛ e kpo lɛ́ é tɛ́nwín lɛnwín, lěe è nɔ gbɛ vǐwun gǔdo gúdo tɔn lɛ́ ɖo vǐwuntín jí gbɔn é ɖɔhun.
Lɛ̌ vɔ́ hɛn alɔ gbɔn jí, mɛ e ɖo vǐwun gbɛ sín vǐwuntín jí wɛ é ɖɔhun.”
10 “Mɛ̌ un ka ná ɖɔ xó ná? Mɛ̌ un ka ná gb’akpá ná?
Mɛ̌ ka ná ɖótó?
Éɖíe! Tó yětɔn sú,* bɔ yě nɔ kpé wú bo tɛ́ tó ǎ.
Éɖíe! Xó Jexóva tɔn húzú nǔ e yě gbɛ́ wǎn ná é;
yě nɔ mɔ awǎjijɛ ɖě ɖ’é mɛ ǎ.
11 Énɛ́ wú ɔ, xomɛ e Jexóva sin dó yě é gɔ́ xo ce mɛ,
bɔ hinhɛn tɔn ci kɔ nú mì.”
“Gba kɔn nyi vǐ e ɖo toxomɛli jí é jí,
bo gba kɔn nyi gbɛ̌ta dɔ̌nkpɛvú e kplé ɖó kpɔ́ lɛ́ é tɔn lɛ́ jí.
È ná wlí yě bǐ, súnnu kpó asi tɔn kpó,
mɛxómɔ kpó degénɔ kpikpoe* kpó.
12 È ná bɛ́ xwé yětɔn lɛ́ jó nú mɛ ɖěvo lɛ́,
gɔ́ nú gle yětɔn lɛ́ kpó asi yětɔn lɛ́ kpó.
Ðó alɔ ce ná jɛ to ɔ mɛ nu lɛ́ wú,” wɛ Jexóva ɖɔ.
13 Ðó sín mɛ kpɛví bǐ ɔ jí káká jɛ mɛ ɖaxó bǐ ɔ jí ɔ, yě mɛ ɖokpó ɖokpó nɔ ɖo afu ɖu wɛ;
sín gbeyíɖɔ jí jɛ vɔ̌sánúxwlémawutɔ́ jí ɔ, mɛ ɖokpó ɖokpó nɔ ɖo mɛ xo ɖu wɛ.
14 Yě nɔ tɛ́n kpɔ́n bo ná gbɔ azɔn* nú togun ce kpó vɛ̌dónúnǔ kpó,* bo nɔ ɖɔ:
‘Fífá tíin! Fífá tíin!’
Fífá ɖě ka ɖe ǎ.
15 Winnyá ka nɔ hu yě ɖó nǔ baɖabaɖa e yě dósin lɛ́ é wú a?
Winnyá ɖě nɔ hu yě ǎ!
Yě tlɛ tuun nǔ e nyí winnyá é ǎ!
Énɛ́ wú ɔ, yě ná j’ayǐ jɛ mɛ e ko j’ayǐ lɛ́ é tɛ́ntin.
Hwenu e un ná dɔn tó nú yě é ɔ, yě ná klɛ́n afɔ,” wɛ Jexóva ɖɔ.
16 Nǔ e Jexóva ɖɔ é ɖíe:
“Mi nɔ te ɖo alikpléhɔ̌nkantɛn lɛ́, bo kpɔ́n.
Mi kan nǔ byɔ́ dó ali xóxó lɛ́ wú,
mi kan fí e ali ɖagbe ɔ ɖe é byɔ́, bo ɖi zɔnlin gbɔn jí,
bá mɔ gbɔjɛ.”
Loɔ, yě nɔ ɖɔ: “Mǐ ná ɖi zɔnlin gbɔn jí ǎ.”
17 “Un sɔ́ mɛcɔ́tɔ́ lɛ́ bɔ yě ɖɔ:
‘Mi ɖó ayi lanzo ɔ sín nǔɖiɖɔ wú!’”
Loɔ, yě ɖɔ: “Mǐ ná ɖó ayi wú ǎ.”
18 “Énɛ́ wú ɔ, akɔta lɛ́ mi, mi ɖótó!
Mɛ e ɖo togun ɔ mɛ lɛ́ é ní tuun
nǔ e ná jɛ dó yě jí é.
19 Ayǐkúngban è, ɖǒtó!
Un ná sɔ́ awě dó xo togun élɔ́,
bɔ é ná nyí sínsɛ́n e tuto yěɖésúnɔ tɔn ná é,
ɖó yě wɔn ya nú xó ce lɛ́,
bo xo sɛ́n* ce nyi kɛ́n.”
20 “Zǎlínkpɔ́n wěwé e a nɔ hɛn sín Saba é
kpó fántín wǎnɖagbenɔ e a nɔ hɛn sín to línlín mɛ é kpó nɔ ɖɔ nǔɖé nú mì wɛ a vɛdó a?
Un nɔ yí nǔníná mitɔn e è nɔ dó blěbú tɔn zo lɛ́ é ǎ,
vɔ̌sísá mitɔn lɛ́ nɔ nyɔ́ nukún ce mɛ ǎ.”
21 Énɛ́ wú ɔ, nǔ e Jexóva ɖɔ é ɖíe:
“Un ɖo afɔklɛ́nnú lɛ́ sɔ́ ɖó nukɔn nú togun élɔ́ wɛ,
bɔ yě ná klɛ́n afɔ dó yě wú,
tɔ́ kpó vǐ súnnu kpó bǐ,
nɔzo kpó hǎgbɛ́ tɔn kpó,
bɔ yě bǐ sín kún ná sú dó.”
22 Nǔ e Jexóva ɖɔ é ɖíe:
“Togun ɖé gosín to e ɖo totaligbé é mɛ jawě,
akɔta ɖaxó ɖé ná fɔ́n sín fí e jɛ zɔ hú gǎn ɖo ayǐkúngban ɔ jí lɛ́ é.
23 Yě ná fɔ gǎ kpó hwǎn kpó.
Alǎnnúwatɔ́ wɛ nú yě, yě ná kú nǔbláwǔ ɖě nú mɛ ǎ.
Xósúsú yětɔn ná cí xu ɖo adǎn jí ɖɔhun,
bɔ yě lɛ́ xá sɔ́.
Vǐ nyɔ̌nu Sinyɔ́ɔ tɔn è, yě to yěɖée lɛ́ cí nǔ ɖɔ ahwanfuntɔ́ ɖokpó wɛ yě nyí ɖɔhun, bo ná fun ahwan xá we.”
24 Mǐ se gbe e è ɖó d’é wú é.
25 Mi ma tɔ́n yi gle mɛ ó,
mi ma ɖi zɔnlin gbɔn ali jí ó,
ɖó kɛntɔ́ ɔ hɛn hwǐ;
xɛsi kpé fí bǐ.
26 Vǐ nyɔ̌nu togun ce tɔn è,
dǒ ati, bo blí gbo gbɔn afín mɛ.
Nɔ aluwɛ mɛ, bo dó gbɛvíhan syɛ́nsyɛ́n mɛ e vǐ súnnu ɖokpó e é ɖó é kú dó é ɖɔhun,
ɖó kúnsúdónúnǔtɔ́ ɔ ná zɔn mǐ jí ajijimɛ.
27 “Un sɔ́ we* dó ɖó gankɔntɔ́ ɖo togun ce tɛ́ntin,
énɛ́ wɛ nyí, mɛ e nɔ ba do nú nǔ céɖécéɖé é;
a ɖó ná ɖó ayi nǔ wú, bo gbéjé nǔwalɔ yětɔn kpɔ́n.
28 Súnnu e nɔ syɛ́n ta tawun lɛ́ é wɛ yě bǐ nyí,
yě nɔ ɖo yiyi wɛ, bo nɔ ɖo jidómɛxó lɛ́ ɖɔ wɛ.
Yě cí ganvɔ kpó gan kpó ɖɔhun;
yě mɛ bǐ wɛ nyí mɛ gblégblé.
29 È ko fyɔ́ wɔ̌hún lɛ́,
sunmí wɛ nɔ tɔ́n sín myɔ yětɔn mɛ.
È fɔ́n bo ɖo zo xo dó wɛ syɛ́nsyɛ́n, amɔ̌, é ná nǔɖé ǎ,
ɖó è ɖe mɛ nyanya lɛ́ síin ǎ wútu.
30 É ɖo wɛn ɖɔ kpatágan e è gbɛ́ é wɛ mɛ lɛ́ ná nɔ ylɔ́ yě ɖɔ,
ɖó Jexóva ko gbɛ́ yě wútu.”