Jelemíi
5 Mi flú gbɔn toxomɛli Jeluzalɛ́mu tɔn lɛ́ jí.
Mi kpɔ́n nǔ e lɛ́ lɛ̌ dó mi lɛ́ é kpó sɔxwixwe kpó.
Mi kíjé tokplétɛn tɔn lɛ́, bo kpɔ́n
ɖɔ mi ná mɔ mɛ e nɔ wa nǔ kpó hwɛjijɔ kpó é ɖě,
alǒ mɛ e nɔ ba ná nɔ gbejí é ɖě a jí,
énɛ́ ɔ, un ná sɔ́ hwɛ kɛ toxo ɔ.
2 Ényí yě tlɛ ɖɔ: “Jexóva ɖo gbɛ jɛ́n wɛ ɔ,”
yě ná kpo ɖo nǔ xwlé dó adingban jí wɛ.
3 Jexóva è, gbejíninɔ wɛ nukún towe lɛ́ nɔ ba ǎ cé?
A xo yě, amɔ̌, é ɖɔ nǔtí nú yě ǎ.*
A sú kún dó nú gěgé yětɔn, amɔ̌, yě gbɛ́ ɖɔ émí kún ná se kplɔ́n ó.
Yě bló bɔ nukúnmɛ yětɔn syɛ́n hú awǐnnya,
bɔ yě gbɛ́ ɖɔ émí kún ná lɛ́ kɔ ó.
4 Amɔ̌, un ɖɔ nú nyiɖée ɖɔ: “É ɖo wɛn ɖɔ mɛ e ma tuun nǔ ɖě ǎ lɛ́ é wɛ yě nyí.
Yě nɔ wa nǔ xlonɔ ɖɔhun ɖó yě tuun ali Jexóva tɔn ǎ,
yě tuun hwɛɖiɖɔ Mawu yětɔn tɔn ǎ.
5 Un ná yi súnnu nukúnɖéjí lɛ́ gɔ́n, bo ná ɖɔ xó nú yě,
ɖó yě ɖó ná tuun ali Jexóva tɔn,
hwɛɖiɖɔ Mawu yětɔn tɔn.
Amɔ̌, yě bǐ wɛ́n agbanhɛnkpo ɔ,
bo vúnvún nǔ e nɔ ɖó dogbó nú mɛ lɛ́ é.”*
6 Énɛ́ wɛ zɔ́n bɔ kinnikínní e ɖo zungbó mɛ é ɖo yě jí zun dó wɛ,
bɔ hla e ɖo gbětótló mɛ é kpo ɖo kún yětɔn sú dó wɛ,
lobɔ kpɔ ɖo wunzɛn ɖo toxo yětɔn lɛ́ mɛ.
É nɔ vúnvún mɛ ɖěbǔ e tɔ́n sín yě mɛ é.
Ðó nǔwanyido yětɔn sukpɔ́;
gbejímanɔ núwiwa yětɔn gégé.
7 Nɛ̌ un ka sixú sɔ́ nǔ énɛ́ sín hwɛ kɛ we gbɔn?
Vǐ súnnu towe lɛ́ jó mì dó,
yě nɔ xwlé nǔ gbɔn nǔ e ma nyí Mawu ǎ é gblamɛ.
Un sú hudó yětɔn lɛ́ sín do,
amɔ̌, yě kpo ɖo afɔ dó gbě wɛ,
bo nyi ahwan yi tonyatɔ́ xwé.
8 Yě cí sɔ́ e zɛn nɔ ɖo sísɔ́ wɛ, bɔ asi nɔ ɖo jlǒjló wɛ lɛ́ é ɖɔhun.
Yě mɛ ɖokpó ɖokpó nɔ dó asi wán ɖo súnnu ɖěvo sín asi gúdo.
9 “Un* ɖó ná ylɔ́ yě, bónú yě ná ɖó nǔ énɛ́ lɛ́ sín gbe ǎ cé?” wɛ Jexóva ɖɔ.
“Un ɖó ná ba hlɔn akɔta mɔ̌hun wú ǎ cé?”
10 “Yi vǐwungbo tɔn kɔn, bo hɛn nǔ gblé,
amɔ̌, ma sú kún dó nú nǔ mlɛ́mlɛ́ ó.
Mi sɛ́n ala tɔn e ɖo zǐnzɔ́n wɛ lɛ́ é,
ɖó yě nyí Jexóva tɔn ǎ.
11 Ðó togun Izlayɛ́li tɔn kpó akɔta Judáa tɔn kpó
nɔ gbejí nú mì ɖěbǔ ǎ,” wɛ Jexóva ɖɔ.
12 “Yě gbɛ́ Jexóva, bo kpo ɖo ɖiɖɔ wɛ ɖɔ:
‘É ná wa nǔtí ǎ.*
Awě ɖě ná xo mǐ ǎ;
ahwan ná tɔ́n mǐ ǎ, adɔ ná blá mǐ ǎ.’
13 Xó yǎyá kɛ́ɖɛ́ wɛ gbeyíɖɔ lɛ́ nɔ ɖɔ,
bɔ xó ɔ* ɖo yě mɛ ǎ.
Yě lɔ ní húzú nǔ yǎyá!”
14 Énɛ́ wú ɔ, nǔ e Jexóva Mawu ahwankpá lɛ́ tɔn ɖɔ é ɖíe:
“Ðó súnnu énɛ́ lɛ́ ɖo mɔ̌ ɖɔ wɛ wútu ɔ,
din ɔ, un ɖo xó ce sɔ́ dó húzú myɔ wɛ ɖo nu towe mɛ,
togun élɔ́ wɛ nyí nakí ɔ,
bɔ é ná fyɔ́ yě.”
15 “Togun Izlayɛ́li tɔn è, un ɖo akɔta ɖé kplá sín fí línlín wá wɛ, bɔ é ná tɔ́n ahwan we,” wɛ Jexóva ɖɔ.
“Akɔta e ko tíin sín hwenu línlín ɖíe é ɖé wɛ.
Akɔta hwexónu tɔn ɖé wɛ,
akɔta e sín gbe a ma se ǎ,
bo ma sixú mɔ nukúnnú jɛ xó tɔn lɛ́ mɛ ǎ é ɖé wɛ.
16 Gǎgo* yětɔn cí yɔdo e ɖo nuvo é ɖɔhun;
yě mɛ bǐ wɛ nyí ahwanfuntɔ́.
17 Yě ná vúnvún nǔkún e a ya lɛ́ é kpó wɔ̌xúxú towe kpó.
Yě ná vúnvún vǐ súnnu towe lɛ́ kpó vǐ nyɔ̌nu towe lɛ́ kpó.
Yě ná vúnvún lɛ̌ngbɔ́hwan towe lɛ́ kpó kanlinhwan towe lɛ́ kpó.
Yě ná vúnvún vǐwuntín towe lɛ́ kpó fígitín towe lɛ́ kpó.
Yě ná sɔ́ hwǐ dó sú kún dó nú toxo towe e è mɛ ahohó lɛ́ lɛ̌ dó, bɔ a nɔ ɖeji dó yě wú lɛ́ é.”
18 “Amɔ̌, é tlɛ nyí ɖo azǎn énɛ́ lɛ́ jí ɔ,” wɛ Jexóva ɖɔ, “un ná sú kún dó nú mi mlɛ́mlɛ́ ǎ. 19 Bɔ hwenu e yě ná kanbyɔ́ ɖɔ: ‘Étɛ́wú Jexóva Mawu mǐtɔn ka wa nǔ énɛ́ lɛ́ bǐ xá mǐ?’ é ɔ, mi ɖó ná ná xósin yě, bo ɖɔ: ‘Lěe mi jó mì dó bo sɛn nǔmɛsɛn toɖévomɛ tɔn ɖo to mitɔn mɛ gbɔn é ɔ, mɔ̌ ɖokpó ɔ wɛ mi ná sɛn toɖévomɛnu lɛ́ ɖo to e ma nyí mitɔn ǎ é mɛ gbɔn.’”
20 Mi ɖɔ xó élɔ́ ɖo akɔta Jakɔ́bu tɔn mɛ,
bo jlá ɖo Judáa ɖɔ:
21 “Xlonɔ kpó ayivɔvúnnánɔ lɛ́ kpó è mi,* mi ɖótó xó élɔ́:
Yě ɖó nukún, amɔ̌, yě sixú mɔ nǔ ǎ;
yě ɖó tó, amɔ̌, yě sixú se nǔ ǎ.
22 ‘Mi ná ɖó sísí e gɔ́ngɔ́n é nú mì ǎ cé?’ wɛ Jexóva ɖɔ.
‘Mi ɖó ná sísɔ́ ɖo nukɔn ce ǎ cé?
Nyi wɛ sɔ́ kɔ́ dó ɖó dogbó nú xu,
sɛ́n tɛgbɛ tɔn e é ma sixú d’asá ǎ é wɛ.
aslɔkɛ́ tɔn lɛ́ nɔ ɖo xixo wɛ có, é sixú kpa yě ǎ;
yě nɔ ɖo zǐngídi jí có, yě nɔ sixú zɛ dogbó lɛ́ wú ǎ.
23 Amɔ̌, togun élɔ́ ɖó ta syɛ́nsyɛ́n kpó gǔfínfɔ́n kpó sín ayi;
yě zɛ gbě, bo wlí ali yěɖésúnɔ tɔn.
24 Yě ɖɔ xó élɔ́ dó ayi mɛ ǎ:
“Din ɔ, mǐ ní ɖó sísí e gɔ́ngɔ́n é nú Jexóva Mawu mǐtɔn,
éyɛ́ Mɛ e nɔ ná jǐ mǐ dó hwetɔnnu é,
ɛɛn, zǒjí kpó xwejí kpó bǐ,
éyɛ́ Mɛ e nɔ bló bɔ mǐ nɔ ya nǔkún dó hwetɔnnu é.”
25 Nǔwanyido miɖésúnɔ tɔn lɛ́ wɛ zɔ́n bɔ nǔ énɛ́ lɛ́ ma wá ǎ;
hwɛ miɖésúnɔ tɔn lɛ́ wɛ zɔ́n bɔ mi ba nǔ ɖagbe lɛ́ kpo.
26 Ðó mɛdídá lɛ́ ɖo togun ce tɛ́ntin.
Yě nɔ ɖo nǔ cɔ́ wɛ, xɛwlítɔ́ fɛ yi do ɖɔhun.
Yě ɖó fɛ́ca e nɔ hu nǔ é.
Gbɛtɔ́ lɛ́ wɛ yě wlí.
27 Mɛblɛ́blɛ́ gɔ́ xwé yětɔn lɛ́ gbe,
aja e mɛ xɛ gɔ́ é ɖɔhun.
Nǔ e wú yě ɖó hlɔ̌nhlɔ́n, bo lɛ́ jɛ dɔkun é nɛ́.
28 Yě kló, bo lɛ́ nyɔ́ wǔ;
yě nɔ wa nǔ nyanya gěgé.
Yě nɔ ɖɔ hwɛ jlɔ́jlɔ́ nú tɔ́cyɔvǐ ǎ,
bo nɔ ba le yěɖésúnɔ tɔn;
yě nɔ tɛ hwɛjijɔ wamamɔnɔ.’”
29 “Un ɖó ná ylɔ́ yě, bónú yě ná ɖó nǔ énɛ́ lɛ́ sín gbe ǎ cé?” wɛ Jexóva ɖɔ.
“Un ɖó ná ba hlɔn akɔta mɔ̌hun wú ǎ cé?
30 Nǔ e cí kliwun nú mɛ, bo nyí nǔ baɖabaɖa ɖé é jɛ ɖo to ɔ mɛ:
31 gbeyíɖɔ lɛ́ nɔ ɖó adingban ɖo gbeyíɖɔzɔ́ yětɔn kɔn,
bɔ vɔ̌sánúxwlémawutɔ́ lɛ́ nɔ kpa acɛ gbɔn acɛ yěɖésúnɔ tɔn gblamɛ.
Bɔ togun ce yí wǎn ná ɖó mɔ̌.
Amɔ̌, étɛ́ mi ka ná wa hwenu e vivɔnu ɔ ná wá é?”