Jelemíi
4 “Izlayɛ́li è, ényí a lɛ́ kɔ ɔ,” wɛ Jexóva ɖɔ,
“ényí a lɛ́ kɔ wá gɔ̌n ce,
bo ɖe bǒcyɔ xyɔ́ wǔ towe lɛ́ sín nukɔn ce ɔ,
a ná nɔ hɔn gbɔn gbějá gbějá ǎ.
2 Ényí a xwlé nǔ
nǔgbó nǔgbó tɔn kpó hwɛjijɔ kpó, kpódó nǔjlɔ́jlɔ́wiwa kpán, bo ɖɔ: ‘Jexóva ɖo gbɛ jɛ́n wɛ ɔ,’
énɛ́ ɔ, akɔta lɛ́ ná mɔ nyɔ̌ná gbɔn gbla tɔn mɛ,
bɔ yě ná gó ɖo éyɛ́ mɛ.”
3 Ðó nǔ e Jexóva ɖɔ nú súnnu Judáa tɔn lɛ́ kpó Jeluzalɛ́mu kpó é ɖíe:
“Mi lɛ ayǐkúngban e sixú nyɔ́ jinukún é,
mi ma nɔ ɖo nǔ dó dó wunkan lɛ́ mɛ wɛ ó.
4 Súnnu Judáa tɔn lɛ́ kpó Jeluzalɛ́munu lɛ́ kpó è mi,
mi gbo ada nú miɖée ɖo Jexóva nukɔn,
mi gbo ada nú ayi mitɔn lɛ́,
é ma nyí mɔ̌ ǎ ɔ, xomɛsin ce ná xɔ myɔ ɖɔhun,
é ná ji bɔ mɛ e ná cí é ná hán,
ɖó nǔ nyanya e mi wa lɛ́ é wú.”
5 Mi ɖɔ ɖo Judáa, bo jlá ɖo Jeluzalɛ́mu.
Mi sú xó bo kwín lanzo gbɔn to ɔ bǐ mɛ.
Mi sú xó syɛ́nsyɛ́n bo ɖɔ: “Mi xo miɖée kplé,
bónú mǐ ní hɔn yi toxo e è mɛ ahohó lɛ́ lɛ̌ dó lɛ́ é mɛ.
6 Mi sɔ́ wuntun* ɖé dó jǐ kpanta Sinyɔ́ɔ.
Mi ba bibɛtɛn, mi ma cí xwíí ó,”
ɖó un ɖo awěxomɛ sɛ́ dó sín totaligbé wɛ, ɛɛn, awěxomɛ ɖaxó ɖé.
7 Mɛ e nɔ sú kún dó nú akɔta lɛ́ é tɔ́n,
é tɔ́n kinnikínní tɔ́n sín zun mɛ ɖɔhun.
É tɔ́n sín nɔtɛn tɔn, bo ná bló bɔ to towe ná húzú nǔ e xyɔ́ wǔ é.
È ná gba toxo towe lɛ́ bɔ mɛ ɖě sɔ́ ná nɔ mɛ ǎ.
8 Énɛ́ wú ɔ, mi sɔ́ ati dó,
mi nɔ aluwɛ mɛ,* bo dó gbɛvíhan,
ɖó xomɛ e Jexóva sin dó mǐ syɛ́nsyɛ́n é ko vɔ ǎ.
9 “Ðo azǎn énɛ́ gbe ɔ,” wɛ Jexóva ɖɔ, “axɔ́sú ɔ ná kpan akɔ́n ǎ,*
axɔ́ví lɛ́ lɔ ná kpan akɔ́n ǎ;*
vɔ̌sánúxwlémawutɔ́ lɛ́ sín hǔn ná zɛ, é ná kpácá gbeyíɖɔ lɛ́.”
10 Énɛ́ ɔ, un ɖɔ: “Áo, Aklúnɔ Nǔbǐwúkpétɔ́ Jexóva! A blɛ́ togun élɔ́ kpó Jeluzalɛ́mu kpó, bo ɖɔ: ‘Mi ná ɖó fífá,’ hwǐ ɖíe ka ɖo kɔ mǐtɔn è.”
11 Ðo hwe énɛ́ nu ɔ, è ná ɖɔ nú togun élɔ́ kpó Jeluzalɛ́mu kpó ɖɔ:
“Jɔhɔn e nɔ mɛ mɛ é ná nyi sín só kpɛví kpɛví gbětótló mɛ tɔn e jí nǔɖé ma ɖe ǎ lɛ́ é jí,
bo ná nyi dó togun ce sín vǐ nyɔ̌nu* jí;
jɔhɔn énɛ́ ná nyi bo ná fún nǔ, alǒ klɔ́ nǔ wɛ ǎ.
12 Nyɛ wɛ ná ɖe gbe bɔ jɔhɔn ɔ ná nyi kpó hlɔ̌nhlɔ́n ɖaxó kpó sín fí énɛ́ lɛ́.
Din ɔ, un ná ɖɔ hwɛ dó yě.
13 Éɖíe! Kɛntɔ́ ná wá jǐ wɛ wu ɖɔhun,
kɛkɛ́ví tɔn lɛ́ cí axásáxásá jɔhɔn syɛ́nsyɛ́n ɖɔhun.
Sɔ́ tɔn lɛ́ nɔ kán wezun hú hɔ̌n.
Heelú mǐ, ɖó gbɛ mǐtɔn vɔ!
14 Jeluzalɛ́mu è, ɖe nǔnyanyawiwa sín ayi towe mɛ, bónú è ná hwlɛ́n we.
Káká jɛ hwetɛ́nu a ka ná ɖó linlin nyanya lɛ́ yi jɛ?
15 Ðó gbe ɖé ɖɔ nǔ e jɛ lɛ́ é sín Dan,
bo jlá adla ɔ sín Eflayímu sín sókan lɛ́ mɛ.
16 Ðǒ gbe tɔn, ɛɛn, ɖǒ gbe tɔn nú akɔta lɛ́;
jlǎ Jeluzalɛ́mu.”
“Nǔcɔ́tɔ́ lɛ́* ɖo to línlín ɖé mɛ gosín wá wɛ,
yě ná zé gbe dó jǐ dó toxo Judáa tɔn lɛ́ jí.
17 Yě tɔ́n ahwan ɛ gbɔn awa lɛ́ bǐ xwé, glecɔ́tɔ́ lɛ́ ɖɔhun,
ɖó é fɔ́n gǔ dó jǐ ce,” wɛ Jexóva ɖɔ.
18 “Ali e hwiɖésúnɔ mlɛ́ lɛ́ é ɔ, a ná sún sin tɔn, bɔ nǔ e a wa lɛ́ é ɔ, a ná sún sin tɔn.
Awě e xo we é vɛ́ mɛ nya,
ɖó é hun káká yi ayi towe mɛ!”
19 Un ɖo wǔvɛ́ se wɛ mɛ nya,* un ɖo wǔvɛ́ se wɛ mɛ nya!
Un ɖo wǔvɛ́ ɖaxó se wɛ ɖo ayi ce mɛ.*
Hǔn ce ɖo xixo wɛ.
20 È ɖó gbe ɖɔ adla ɖo ayǐ jɛ wɛ ɖěbɔdóɖěwú,
ɖó to ɔ blěbú wɛ è sú kún dó ná.
Goxɔ nyiɖésúnɔ tɔn lɛ́ kíjá ɖo ajijimɛ,
ɛɛn, goxɔ ce sín avɔ lɛ́ ɖo nukúnxwixwe ɖokpó mɛ.
21 Káká jɛ hwetɛ́nu un ka ná ɖo wuntun* ɔ mɔ wɛ?
Káká jɛ hwetɛ́nu un ka ná ɖo lanzo ɔ sín nǔɖiɖɔ se wɛ?
22 “Ðó togun ce jɔ xlo;
yě nɔ ké ya ɖěbǔ nú mì ǎ.
Yě gú, bo ɖó nukúnnúmɔjɛnǔmɛ ɖě ǎ.
Yě nɔ bí* tawun ɖo nǔnyanyawiwa mɛ,
amɔ̌, yě nɔ tuun lěe yě ná wa nǔ ɖagbe gbɔn é ǎ.”
23 Un mɔ to ɔ, bɔ é jɛ vɔ̌, bo ɖo séé.
Un kpɔ́n jǐnukúnsin bɔ wěziza tɔn sɔ́ ɖe ǎ.
24 Un mɔ só ɖaxó lɛ́ bɔ yě ɖo dǐndán wɛ,
lobɔ só kpɛví lɛ́ ɖo hunhún húnhún wɛ.
25 Un kpɔ́n fí bǐ lɛ́ lɛ̌ dó, bo mɔ mɛ ɖě ǎ,
xɛ e ɖo jǐnukúnsin lɛ́ é bǐ hɔn yi.
26 Un mɔ bɔ atínsínsɛ́ngbo ɔ húzú gbětótló,
bɔ è hánnyá toxo tɔn lɛ́ bǐ.
Jexóva wú wɛ nǔ nyí mɔ̌,
ɖó xomɛ e sin i syɛ́nsyɛ́n é wútu.
27 Ðó nǔ e Jexóva ɖɔ é ɖíe: “To ɔ blěbú ná jɛ vɔ̌,
amɔ̌, un ná sú kún dó n’i bǐ mlɛ́mlɛ́ ǎ.
28 Ðó hwɛjijɔ énɛ́ wú ɔ, to ɔ ná nɔ aluwɛ mɛ,
bɔ jǐnukúnsin ná dó ablu.
Ðó un ko ɖɔ xó, ɛɛn, un ko wá gbeta ɔ kɔn wútu wɛ,
bɔ un ná húzú linlin ce ǎ,* mɔ̌ jɛ́n un ma ná lɛ́ kɔ sín gúdo ǎ é nɛ́.
29 Ée mɛ e ɖo toxo ɔ mɛ lɛ́ é se sɔ́xátɔ́ lɛ́ kpó gǎdatɔ́ lɛ́ kpó sín zǐngídi é ɔ,
yě mɛ bǐ hɔn.
Yě byɔ́ zun lɛ́ mɛ,
bo fán só lɛ́.
Toxo lɛ́ bǐ wɛ è jó dó,
bɔ mɛ ɖěbǔ sɔ́ nɔ nɔ yě mɛ ǎ.”
30 Din e è gba we hánnyá é ɔ, étɛ́ a ka ná wa?
Avɔ vɔvɔ cɛ́cɛ́ wɛ a nɔ dó ɖ’ayǐ,
bo nɔ sɔ́ sikánú lɛ́ dó ba acɔ́,
lobo nɔ va nǔ wiwi dó nukún, bónú nukún towe lɛ́ ní dó kló.
Amɔ̌, a ba acɔ́ dó wǔvɔ́,
ɖó mɛ e nɔ ɖó jlǒ xóɖóxámɛ tɔn syɛ́nsyɛ́n nú we lɛ́ é ko gbɛ́ we;
kú towe ba wɛ yě ɖe din.
31 Ðó un se gbe ɖé bɔ é cí nyɔ̌nu e ɖo azɔn jɛ wɛ é sín gbe ɖɔhun,
wǔvɛ́ e mɔ wɛ é ɖe é cí nyɔ̌nu e ɖo nukɔnví tɔn ji wɛ é tɔn ɖɔhun,
vǐ nyɔ̌nu Sinyɔ́ɔ tɔn e nɔ ɖo azɔn wɛn wɛ é sín gbe wɛ.
É dlɛ́n alɔ tɔn lɛ́, bo ɖɔ:
“Heelú mì, ɖó é sín mɛhutɔ́ lɛ́ wú bɔ agbɔ̌n kpé mì!”