Jelemíi
48 Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ dó Mɔwábu wú é ɖíe:
“Heelú Nɛbo, ɖó è sú kún tɔn dó!
È dó winnyá Kiliyatayímu to ɔ, bo yí.
È dó winnyá bibɛtɛn e ɖo ayijayǐ mɛ é, bo gba hánnyá.
2 È sɔ́ nɔ kpa susu nú Mɔwábu ɖě ǎ.
Kɛntɔ́ lɛ́ blá gbě tɔn ɖo Hɛcibɔ́ni, bo ná zin i dɛ́:
‘Mi wá, mi nú mǐ ní sú kún dó nú akɔta ɔ.’
Madumɛ́ɛ è, hwi lɔ ní cí xwíí,
ɖó hwǐ ɖo gǔdo nú we.
3 È se xósúsú sín Holonayímu,
ɖó kúnsúdónúnǔ kpó nǔgbigba ɖaxó kpó wútu.
4 È sú kún dó nú Mɔwábu.
Vǐ tɔn kpɛví lɛ́ ɖo avǐ ya wɛ.
5 Ée yě ɖo kpó fán wɛ xwe Luxíti sín kpó jí é ɔ, yě ɖo avǐ ya wɛ magbokɔ.
Bɔ ée yě ɖo te jɛ sín Holonayímu wɛ é ɔ, yě ɖo wǔvɛ́ sín xó sú wɛ, ɖó awěxomɛ ɔ wú.
6 Mi hɔn, mi hwlɛ́n gbɛ* mitɔn!
Mi ná cí jenɛvliyéetín ɖo gbětótló mɛ ɖɔhun.
7 Mɔwábu è, ɖó a ɖeji dó azɔ̌ towe lɛ́ kpó nǔ xɔ akwɛ́ towe lɛ́ kpó wú wútu ɔ,
è ná wlí hwi lɔ.
Kemɔ́ci ná yi kannumɔgbénu,
é kpó hunnɔ tɔn lɛ́ kpó, kpódó axɔ́ví tɔn lɛ́ kpán.
8 Kúnsúdónúnǔtɔ́ ɔ ná wá toxo lɛ́ bǐ mɛ,
toxo ɖě ná gán ɖ’é mɛ ǎ.
Tɔdo* ɔ ná sú dó,
bɔ ayǐkúngban jlɔ́jlɔ́ ɔ ná sú dó, lěe Jexóva ɖɔ gbɔn é.
9 Mi sɔ́ wuntun ɖé ɖ’ayǐ nú Mɔwábu,
ɖó hwenu e è ná sú kún tɔn dó é ɔ, mɛ e ɖ’é mɛ lɛ́ é ná hɔn,
toxo tɔn lɛ́ ná húzú nǔ e xyɔ́ wǔ é,
bɔ mɛ ɖěbǔ ná ɖo yě mɛ ǎ.
10 Mɛ e nɔ w’azɔ̌ Jexóva tɔn kpó yamakénúnǔ kpó é ɔ, nu wɛ è dó è!
Mɛ e ma nɔ zán hwǐ tɔn dó hu mɛ ǎ é ɔ, nu wɛ è dó è!
11 Sín wǐnnyáwínnyá mɛ Mɔwábunu lɛ́ tɔn ɔ, yě ɖo xwíí,
vɛ̌ɛn e è jó dó nyi xwaxwá* tɔn jí é ɖɔhun.
È kɔn yě sín zɛ̌n ɖě mɛ dó ɖěvo mɛ ǎ,
yě yi kannumɔgbénu kpɔ́n ǎ.
Nǔ e wú tɔ́n yětɔn ma ɖyɔ́ ǎ,
bɔ wǎn yětɔn ma húzú ǎ é nɛ́.
12 “‘Énɛ́ wú ɔ, hwe ɔ nu jawě,’ wɛ Jexóva ɖɔ, ‘bɔ un ná sɛ́ mɛ dó bɔ è ná sú kún yětɔn dó. Mɛ e un ná sɛ́ dó lɛ́ é ná flí yě xwe, bo ná kɔn yě sín zɛ̌n yětɔn lɛ́ mɛ, lobo ná gba zɛ̌n yětɔn lɛ́ hánnyá. 13 Bɔ winnyá ná hu Mɔwábunu lɛ́ dó Kemɔ́ci wú, lěe winnyá hu togun Izlayɛ́li tɔn dó Betɛ́li e wú yě ɖeji dó é wú gbɔn é.
14 Mi glá káká bo ɖɔ: “Ahwanfuntɔ́ hlɔ̌nhlɔ́nnɔ lɛ́ wɛ nú mǐ, bɔ mǐ ɖo gbesisɔmɛ bo ná fun ahwan.”’
15 ‘È sú kún dó nú Mɔwábu,
è tɔ́n ahwan toxo tɔn lɛ́,
bo hu dɔ̌nkpɛvú tɔn ɖagbe hú gǎn lɛ́,’
nǔ e Axɔ́sú e sín nyǐkɔ nɔ nyí Jexóva ahwankpá lɛ́ tɔn é ɖɔ é nɛ́.
16 Awě e ná xo Mɔwábunu lɛ́ é ná wá malínmálín mɛ,
ayǐjijɛ yětɔn ɖo sisɛkpɔ́ wɛ wunnáwúnná.
17 Mɛ e lɛ́ lɛ̌ dó yě lɛ́ é bǐ ɖó ná se wǔvɛ́ xá yě,
ɛɛn, mɛ e tuun nyǐkɔ yětɔn lɛ́ é bǐ.
Mi ɖɔ nú yě ɖɔ: ‘Kpo syɛ́nsyɛ́n ɔ, ɛɛn, kpo ɖɛkpɛ ɖɛkpɛ ɔ wɛ è wɛ́n lě a?
18 Vǐ nyɔ̌nu e nɔ nɔ Dibɔ́ni é, jɛ te sín susu sín tɛn e mɛ a ɖe é,
bo jínjɔ́n kɔxúmɛyí,*
ɖó mɛ e sú kún dó nú Mɔwábu é wá tɔ́n ahwan we,
bo ná sú nɔtɛn towe e è mɛ ahohó lɛ́ lɛ̌ dó lɛ́ é dó.
19 Hwi mɛ e nɔ nɔ Alowɛ́ɛ é, nɔ te ɖo ali ɔ kpá, bo kpɔ́n nǔ.
Kanbyɔ́ súnnu e ɖo hinhɔn wɛ é kpó nyɔ̌nu e ɖo hinhɔn wɛ é kpó ɖɔ: ‘Étɛ́ ka jɛ?’
20 È dó winnyá Mɔwábu bɔ xɛsi ɖaxó jɛ jǐ tɔn.
Mi dó gbɛvíhan bo sú xó.
Mi jlá ɖo Aanɔ́ni ɖɔ è sú kún dó nú Mɔwábu.
21 “Mawu ɖó hwɛ nú ayǐkúngban jlɔ́jlɔ́ ɔ, é ɖó hwɛ nú Holɔ́ni, Yaxási kpó Mɛfáti kpó. 22 É ɖó hwɛ nú Dibɔ́ni, Nɛbo kpó Bɛti-Diblatayímu kpó. 23 É ɖó hwɛ nú Kiliyatayímu, Bɛti-Gamúlu kpó Bɛti-Mɛwɔ́ni kpó. 24 É ɖó hwɛ nú Keliyɔ́ti kpó Bosla kpó; gɔ́ nú toxo e ɖo Mɔwábu yíkúngban jí lɛ́ é bǐ, ɖěɖěe ɖo zɔga lɛ́ é kpó ɖěɖěe sɛkpɔ́ lɛ́ é kpó.
25 ‘È yí hlɔ̌nhlɔ́n Mɔwábu tɔn sín así tɔn;*
è wɛ́n awa tɔn,’ wɛ Jexóva ɖɔ.
26 ‘Mi ná ɛ ahan bónú é ní nu mú, ɖó é sɔ́ éɖée su ɖo Jexóva nukɔn.
Mɔwábu nɔ blí gbo gbɔn nǔ e é vi é mɛ,
bo húzú nǔ kiko.
27 Nǔ kiko wɛ Izlayɛ́li nyí nú we ǎ cé?
Ajotɔ́ lɛ́ tɛ́ntin wɛ è mɔ ɛ ɖe,
bɔ a ná húnhún ta bo ɖɔ slamɛ wǔ tɔn mɔ̌ a?
28 Mi mɛ e nɔ nɔ Mɔwábu lɛ́ é mi, mi gosín toxo lɛ́ mɛ bo yi nɔ só xomɛ,
mi ní cí ahwannɛ́ e xo adɔ̌ nyi só xomɛ é ɖɔhun.’”
29 “Mǐ se xó dó goyíyí Mɔwábu tɔn wú, é nɔ sɔ́ éɖée su zɛ xwé wú;
mǐ se xó dó mɔ e é nɔ mɔ éɖée é, goyíyí tɔn, éɖée e é nɔ sɔ́ su é kpó go e é nɔ yí zɛ xwé wú é kpó wú.”
30 “‘Un tuun majijɛ tɔn,’ wɛ Jexóva ɖɔ,
‘amɔ̌, xó tófwé e é nɔ ɖɔ lɛ́ é ná ná nǔɖé ǎ.
Yě ná wa nǔtí ǎ.
31 Énɛ́ wú wɛ un ná dó gbɛvíhan dó Mɔwábu jí,
un ná sú xó ɖó Mɔwábu to ɔ bǐ wú,
bo ná ná alě ɖó Kíi-Ɛlɛ́si sín mɛ lɛ́ wú.
32 Vǐwuntín Sibúma tɔn è, un ná ya avǐ dó ta towe mɛ,
bɔ é ná hú ée un ya dó Yazɛ́ɛ tamɛ é.
Ala towe e vun ganjí lɛ́ é d’asá xu ɔ.
Yě yi xu ɔ kɔn, yě yi Yazɛ́ɛ.
Kúnsúdónúnǔtɔ́ ɔ sú kún dó nú
alǔun mɛ sín atínsínsɛ́n towe lɛ́ kpó vǐwun towe e a ya é kpó.
33 È ɖe awǎjijɛ kpó xomɛhunhun kpó sín atínsínsɛ́ngbo ɔ mɛ,
bo lɛ́ ɖe sín Mɔwábu to ɔ mɛ.
Un bló bɔ vɛ̌ɛn sɔ́ ɖo sisa sín vǐwunto mɛ wɛ ǎ.
Mɛ ɖěbǔ ná lɔ́n yi jǐ b’ɛ ná nyí ɖɔ awǎjijɛ sín xó sú wɛ é ɖe ǎ.
Nǔ ɖěvo sín xósúsú jɛ́n é ná nyí.’”
34 “‘È sú xó ɖo Hɛcibɔ́ni, bɔ è se ɖo káká Eleále.
Yě sɔ́ gbe dó jǐ bɔ è se ɖo káká Yaxási,
yě lɛ́ wa mɔ̌ ɖo Sowáa bɔ è se ɖo Holonayímu, bo lɛ́ se ɖo Egláti-Celicíya.
Sin e tlɛ ɖo Nimulímu lɛ́ é ná mɛ.
35 ‘Mɛ e nɔ hɛn nǔníná wá nɔtɛn ɖeɖóvo ɔ é
kpó mɛ e nɔ sá vɔ̌ nú mawu tɔn é kpó ɔ,
un ná bló bɔ yě sɔ́ ná tíin ɖo Mɔwábu ǎ,’ wɛ Jexóva ɖɔ.
36 ‘Énɛ́ wú wɛ un ná wɛn azɔn* ɖo ayi mɛ dó Mɔwábu tamɛ kpete* ɖɔhun,
bo ná wɛn azɔn* ɖo ayi mɛ dó súnnu Kíi-Ɛlɛ́si tɔn lɛ́ tamɛ kpete* ɖɔhun.
Ðó dɔkun e é jɛ é ná sú dó.
37 Ðó mɛ lɛ́ bǐ wɛ xwlɛ́ ta,
bɔ è xwlɛ́ atán lɛ́ bǐ.
Akpa ɖo alɔ lɛ́ bǐ wú,
bɔ ati ɖo alin yětɔn!’”
38 “‘Gbɛvíhan kɛ́ɖɛ́ wɛ è nɔ se
ɖo Mɔwábu sín xɔ lɛ́ bǐ ta
kpó tokplétɛn tɔn lɛ́ bǐ kpó.
Ðó un gba Mɔwábu hánnyá
zɛ̌n e jɛ ado gúdo é ɖɔhun,’ wɛ Jexóva ɖɔ.
39 ‘Xɛsi wɛ jɛ Mɔwábu jí lě a! Gbɛvíhan dó wɛ é ɖe lě a!
Kɔ wɛ Mɔwábu lɛ́ kpó winnyá kpó lě a!
Mɔwábu húzú nǔ kiko,
é húzú xɛsidómɛnú nú mɛ e lɛ́ lɛ̌ dó è lɛ́ é bǐ.’”
40 “Ðó nǔ e Jexóva ɖɔ é ɖíe:
‘Kɛntɔ́ ɔ ná vlɔ́n awa tɔn lɛ́ dó Mɔwábu jí,
lěe hɔ̌n nɔ zɔn wá do gbɔn é ɖɔhun.
41 È ná yí toxo lɛ́,
bo ná yí ahohó tɔn lɛ́.
Ðo azǎn énɛ́ gbe ɔ, ahwanfuntɔ́ Mɔwábu tɔn lɛ́ sín ayi
ná cí nyɔ̌nu e ɖo ajidonu é tɔn ɖɔhun.’”
42 “‘È ná sú kún dó nú Mɔwábu bɔ é sɔ́ ná nyí togun ǎ,
ɖó é sɔ́ éɖée su ɖo Jexóva nukɔn wútu.
43 Hwi mɛ e nɔ nɔ Mɔwábu é,
xɛsi ɖaxó, do kpó fɛ́ca kpó ɖo nukɔn towe,’ wɛ Jexóva ɖɔ.
44 ‘Mɛ ɖěbǔ e ɖo hinhɔn nú adohu adohu wɛ é ná jɛ do mɛ,
bɔ mɛ ɖěbǔ e ɖo do mɛ tɔ́n sín wɛ é ná sɔ́ fɛ́ca.’
‘Ðó un ná dɔn tó nú Mɔwábu ɖo xwe e un sɔ́ é mɛ,’ wɛ Jexóva ɖɔ.
45 ‘Mɛ e hɔn yi yɛtɛn Hɛcibɔ́ni tɔn lɛ́ é ná mɔ alɔdó ǎ.*
Ðó myɔ ná tɔ́n sín Hɛcibɔ́ni,
bɔ myɔɖɛ́ ná tɔ́n sín Sihɔ́ni.
Myɔ ná fyɔ́ Mɔwábunu lɛ́ sín nukɔngɛ́ngɛ́n
bo ná fyɔ́ vǐ dǎkaxotɔ́ lɛ́ sín taká.’
46 ‘Mɔwábu, heelú we!
Kemɔ́ci sín mɛ lɛ́ dɔn.
Ðó è kplá vǐ súnnu towe lɛ́ yi kannumɔgbénu,
bɔ vǐ nyɔ̌nu towe lɛ́ yi kannumɔgbénu.
47 Amɔ̌, un ná xo Mɔwábunu e yi kannumɔgbénu lɛ́ é kplé ɖo azǎn gǔdo gúdo tɔn lɛ́ mɛ,’ wɛ Jexóva ɖɔ.
‘Hwɛ e è ɖɔ dó Mɔwábu é wá vivɔnu.’”