Jelemíi
49 Nǔ e Jexóva ɖɔ nú Amumɔ́ɔ ví lɛ́ é ɖíe:
“Izlayɛ́li ɖó vǐ ɖě ǎ é?
É ɖó gǔɖutɔ́ ɖě ǎ é?
Étɛ́wú vodún Malukámu ka yí Gadi?
Étɛ́wú mɛsɛntɔ́ tɔn lɛ́ ka nɔ nɔ toxo Izlayɛ́li tɔn lɛ́ mɛ?”
2 “‘Énɛ́ wú ɔ, hwe ɔ nu jawě,’ wɛ Jexóva ɖɔ,
‘bɔ un ná bló bɔ è ná se ahwanfunfun sín xósúsú* ɖo Hlaba Amumɔ́ɔ ví lɛ́ tɔn.
É ná húzú kɔ́ta e jɛ vɔ̌ é,
bɔ è ná dó toxo e ɖo acɛ tɔn mɛ* lɛ́ é zo.’
‘Bɔ Izlayɛ́li ná yí mɛ e yí nǔ tɔn lɛ́ é sín nǔ,’ wɛ Jexóva ɖɔ.
3 Hɛcibɔ́ni è, dǒ gbɛvíhan, ɖó è sú kún dó nú Ayíi!
Toxo e ɖo Hlaba sín acɛ mɛ lɛ́ é mi, mi sú xó.
Mi dó ati.
Mi dó gbɛvíhan bo kán wezun gbɔn kpó e è sɔ́ awǐnnya dó bló lɛ́ é* mɛ,
ɖó vodún Malukámu ná yi kannumɔgbénu,
gɔ́ nú hunnɔ tɔn lɛ́ kpó axɔ́ví tɔn lɛ́ kpó.
4 Hwi ɖyɔ̌vǐ gbejímanɔtɔ́ e nɔ ɖeji dó dɔkun towe lɛ́ wú,
bo nɔ ɖɔ: “Mɛ̌ ka ná tɔ́n ahwan mì?” é ɔ,
étɛ́wú a ka ɖo nugo yí dó tɔdo* lɛ́ wú wɛ,
ɛɛn, dó ayǐkúngban towe e nɔ nyɔ́ nǔ ganjí lɛ́ é wú wɛ?’”
5 “‘Éɖíe, un ná dɔn nǔ e dó xɛsi tawun é ɖé wá jǐ towe
sín mɛ e lɛ́ lɛ̌ dó we lɛ́ é bǐ gɔ́n,’ wɛ Aklúnɔ Nǔbǐwúkpétɔ́ Jexóva ahwankpá lɛ́ tɔn ɖɔ.
‘È ná fúnfún mi kpé gbɔn fí bǐ,
bɔ mɛ ɖěbǔ ná xo mɛ e hɔn lɛ́ é kplé ǎ.’”
6 “‘Amɔ̌, énɛ́ gúdo ɔ, un ná xo Amumɔ́ɔ ví e yi kannumɔgbénu lɛ́ é kplé,’ wɛ Jexóva ɖɔ.”
7 Nǔ e Jexóva ahwankpá lɛ́ tɔn ɖɔ nú Edɔ́mu é ɖíe:
“Nǔnywɛ́ ɖě sɔ́ ɖo Temáni ǎ wɛ a?
Wěɖexámɛ ɖagbe ɖě sɔ́ ɖo mɛ e ɖó nukúnnúmɔjɛnǔmɛ lɛ́ é sí ǎ wɛ a?
Nǔnywɛ́ yětɔn sɔ́ nyɔ́ zán ǎ wɛ a?
8 Mi mɛ e nɔ nɔ Dedáni lɛ́ é mi, mi hɔn, mi lɛ́ kɔ!
Mi yi nɔ tɔdo e gɔ́ngɔ́n lɛ́ é mɛ!
Ðó un ná bló bɔ awě ná xo Esáwu,
hwenu e gan ɔ ná xo bɔ un ná húzú kpan nukɔn ɛ é.
9 Ényí vǐwungbɛtɔ́ lɛ́ byɔ́ toxo towe mɛ ɔ,
yě ná jó ɖé lɛ́ dó, bónú mɛ ɖěvo lɛ́ ní cyán ǎ cé?
Ényí ajotɔ́ lɛ́ wá zǎnmɛ ɔ,
bǎ e mɛ é jló yě ɖó é wɛ yě ná hɛn nǔ gblé yi ɖó.
10 Amɔ̌, un ná ɖe Esáwu nyi mɛ̌.
Un ná kɔ́n sɛ sín fí e é hɔn hwlá cí lɛ́ é,
bónú é ma sɔ́ kpé wú bo nɔ hwlǎhwlá ó.
È ná sú kún dó nú vǐ tɔn lɛ́, nɔví tɔn lɛ́ kpó nɔzo tɔn lɛ́ kpó bǐ,
bɔ é sɔ́ ná tíin ǎ.
11 Jǒ tɔ́cyɔvǐ towe lɛ́ dó,
un ná hɛn yě ɖó gbɛ,
bɔ asúkúsi towe lɛ́ ná ɖeji dó wǔtu ce.”
12 Ðó nǔ e Jexóva ɖɔ é ɖíe: “Ényí é byɔ́ ɖɔ mɛ ɖěɖěe è ma ɖó hwɛ ná ɖɔ yě ná nu kɔ́fu ɔ ǎ lɛ́ é ní nu ɔ, è ná dɔn tó ɖěbǔ nú hwɛ ǎ wɛ a? È ná gɔn tó dɔn nú we ǎ; a ɖó ná nu kɔ́fu ɔ.”
13 “Un xwlé nyiɖée ɖɔ Bosla ná húzú nǔ e xyɔ́ wǔ é, winnyánú, nǔ e sín kún è sú dó é kpó nudó kpó,” wɛ Jexóva ɖɔ. “Bɔ toxo tɔn lɛ́ bǐ ná húzú aglingbigba káká sɔ́yi.”
14 Un se gbeɖíɖó ɖé sín Jexóva gɔ́n,
è sɛ́ mɛɖé dó akɔta lɛ́ mɛ, bɔ é ɖɔ:
“Mi xo miɖée kplé, bo wá tɔ́n ahwan ɛ;*
mi sɔ́ ahwan nú.”
15 “Ðó éɖíe! Un bló bɔ a nyí nǔɖéwanú ǎ ɖo akɔta lɛ́ mɛ,
ɛɛn, mɛ e è gbɛ́ wǎn ná ɖo gbɛtɔ́ lɛ́ mɛ é.
16 Hwi mɛ e nɔ nɔ só xomɛ,
bo nɔ nɔ só e yi jǐ hú gǎn bǐ é jí é,
blǒ e a bló bɔ è nɔ sísɔ́ ɖó wǔ we é flú we,
ɛɛn, go e a nɔ yí é flú we.
A bló adɔ̌ towe ɖó jǐ aga ɖéé hɔ̌n ɖɔhun,
é ɖo mɔ̌ có, un ná dɔn we sín dɔ̌n wá do,” wɛ Jexóva ɖɔ.
17 “Edɔ́mu ɖó ná húzú nǔ e xyɔ́ wǔ é. Mɛ e ná gbɔn fínɛ́ wá yi lɛ́ é bǐ ná sɔ́ nukún e è nɔ sɔ́ dó kpɔ́n nǔ e xyɔ́ wǔ é ná é dó kpɔ́n ɛ, bɔ jɛmɛjí e ná wá jǐ tɔn lɛ́ é ná zɔ́n bɔ é ná húzú nǔ kiko* nú yě.” 18 Jexóva ɖɔ: “Lěe é nyí gbɔn hwenu e è sú kún dó nú Sodɔ́mu, Gomɔ́ɔ kpó toxo e lɛ́ lɛ̌ dó yě lɛ́ é kpó é ɔ, mɛ ɖěbǔ ná nɔ fínɛ́ ǎ, bɔ mɛ ɖěbǔ ná jɛ agban ɖó fínɛ́ ǎ.
19 “Éɖíe! Mɛɖé ná tɔ́n sín zun e dó bo ɖo Judɛ́ɛn tɔ ɔ tó lɛ́ é mɛ kinnikínní ɖɔhun, bo ná wá tɔ́n ahwan amagbo e ɖo ayijayǐ mɛ lɛ́ é. Amɔ̌, un ná bló bɔ yě* ná hɔn sín to yětɔn mɛ ɖo cɛ́jú mɛ. Bɔ un ná sɔ́ mɛ e è sɔ́ é ɖó to ɔ nu. Ðó mɛ̌ ka cí nyɛɖɔhun? Mɛ̌ ka ná dɔn nǔ xá mì? Lɛ̌ngbɔ́nyitɔ́ tɛ́ ka sixú nɔ te nukɔn ce? 20 Énɛ́ wú ɔ, súnnu lɛ́ mi, mi ɖótó gbeta e kɔn Jexóva wá dó Edɔ́mu wú é* kpó nǔ e é lin dó Temáninu lɛ́ wú é kpó:
É ɖo wɛn ɖɔ è ná dɔn lɛ̌ngbɔ́ví e ɖo lɛ̌ngbɔ́kpó ɔ mɛ lɛ́ é yi zɔ.
É ná bló bɔ fí e yě nɔ nɔ é ná jɛ vɔ̌, ɖó nǔ e yě wa é wú.
21 Hwenu e è se ayǐjijɛ yětɔn sín gbe é ɔ, ayǐkúngban ɔ húnhún.
Xósúsú mlí!
È se xósúsú ɔ káká yi Xu Vɔvɔ ɔ kɔn.
22 Éɖíe! É ná nɔ yi jǐ bo ná nɔ zɔn wá do hɔ̌n ɖɔhun,
é ná vlɔ́n awa tɔn lɛ́ dó Bosla jí.
Ðo azǎn énɛ́ gbe ɔ, ahwanfuntɔ́ Edɔ́mu tɔn lɛ́ sín ayi
ná cí nyɔ̌nu e ɖo ajidonu é tɔn ɖɔhun.”
23 Xó e Mawu ɖɔ nú Damási é ɖíe:
“È dó winnyá Hamátinu lɛ́ kpó Aapádunu lɛ́ kpó,
ɖó yě se gbeɖíɖó baɖabaɖa ɖé.
Xɛsi ɖaxó jɛ yě jí.
Adohu adohu ɖo xu ɔ mɛ, bɔ xu ɔ sixú hwíhwɛ́ ǎ.
24 Damási sɔ́ kpankɔ́n ǎ.
É jló ná hɔn, amɔ̌, xɛsi jɛ jǐ tɔn.
Adohu adohu kpó wǔvɛ́ kpó ɖí bú i
nyɔ̌nu e ɖo ajidonu é ɖɔhun.
25 Étɛ́wú è ma ka jó toxo e è nɔ kpa susu ná é,
ɛɛn, toxo awǎjijɛ tɔn ɔ dó ǎ?
26 Ðó dɔ̌nkpɛvú tɔn lɛ́ ná kú ɖo tokplétɛn tɔn lɛ́,
bɔ sɔ́ja tɔn lɛ́ bǐ sín kún ná sú dó ɖo azǎn énɛ́ gbe,” wɛ Jexóva ahwankpá lɛ́ tɔn ɖɔ.
27 “Un ná dó dǒ Damási tɔn ɔ zo,
bɔ ahohó syɛ́nsyɛ́n Bɛni-Hadádi tɔn lɛ́ ná fyɔ́.”
28 Nǔ e Jexóva ɖɔ nú Kedáa kpó axɔ́súɖuto Hasɔ́ɔ tɔn e Babilɔ́nu xɔ́sú Nabukodonɔzɔ́ɔ* gba lɛ́ é kpó é ɖíe:
“Mi sí te, mi yi Kedáa,
bo sú kún dó nú vǐ súnnu Zǎnzǎnhwe jí tɔn lɛ́.
29 È ná bɛ́ goxɔ yětɔn lɛ́ kpó kanlinhwan yětɔn lɛ́ kpó yi,
bo ná bɛ́ goxɔ sín avɔ yětɔn lɛ́ kpó nǔɖókan yětɔn lɛ́ bǐ kpó yi.
È ná bɛ́ lǎkúnmí yětɔn lɛ́ yi,
bo ná sú xó sɛ́ dó yě ɖɔ: ‘Xɛsi gbɔn fí bǐ!’”
30 “Mi mɛ e nɔ nɔ Hasɔ́ɔ lɛ́ é mi, mi hɔn, mi yi fí línlín!
Mi yi nɔ tɔdo e gɔ́ngɔ́n lɛ́ é mɛ,” wɛ Jexóva ɖɔ.
“Ðó Babilɔ́nu xɔ́sú Nabukodonɔzɔ́ɔ* blá gbě mitɔn,
é bló tuto ɖé dó mi wú.”
31 “Mi sí te, mi yi tɔ́n ahwan akɔta e ɖo fífá mɛ,
bo nɔ nɔ ayijayǐ mɛ é!” wɛ Jexóva ɖɔ.
“É ɖó hɔn ɖě alǒ gankpo ɖě ǎ; zɔ wɛ é nɔ nɔ.
32 È ná vɔ lǎkúnmí yětɔn lɛ́,
bo ná bɛ́ kanlin yětɔn tobutóbú lɛ́ yi.
Mɛ ɖěɖěe nɔ xwlɛ́ gekplá yětɔn lɛ́ é ɔ,
un ná fúnfún yě kpé gbɔn fí lɛ́ bǐ,*
bo ná bló bɔ awě ná xo yě sín fí lɛ́ bǐ,” wɛ Jexóva ɖɔ.
33 “Hasɔ́ɔ ná húzú adɔ̌tɛn nú cukú gbě tɔn lɛ́,
bo ná jɛ vɔ̌ káká sɔ́yi.
Mɛ ɖěbǔ ná nɔ fínɛ́ ǎ,
bɔ mɛ ɖěbǔ ná jɛ agban ɖó fínɛ́ ǎ.”
34 Ðo axɔ́súɖuɖu Judáa xɔ́sú Sedesiyási tɔn sín bǐbɛ́mɛ ɔ, Jexóva ɖɔ xó nú gbeyíɖɔ Jelemíi dó Elámu wú; é ɖɔ: 35 “Nǔ e Jexóva ahwankpá lɛ́ tɔn ɖɔ é ɖíe: ‘Un ná wɛ́n gǎ Elámu tɔn, éé nyí hlɔ̌nhlɔ́n yětɔn sín jɔtɛn* é. 36 Un ná bló bɔ jɔhɔn ɛnɛ lɛ́ ná nyi dó Elámu jí sín wɛ̌kɛ́zo ɛnɛ lɛ́ mɛ, bɔ un ná gba ɛ dó gbɔn fí énɛ́ lɛ́ bǐ. Elámunu e fúnfún kpé lɛ́ é ná hán ɖo akɔta ɖěbǔ mɛ ǎ.’”
37 “Un ná bló bɔ ado ná hu Elámunu lɛ́ ɖo kɛntɔ́ yětɔn lɛ́ kpó mɛ e ɖo biba ná hu yě wɛ lɛ́ é kpó nukɔn. Un ná sɔ́ awě dó xo yě ná, un ná sin xomɛ dó yě syɛ́nsyɛ́n,” wɛ Jexóva ɖɔ. “Un ná sɛ́ hwǐ dó yě, káká bɔ kún yětɔn ná sú dó.”
38 “Un ná sɔ́ axɔ́súzinkpo ce jínjɔ́n Elámu, bo ná sú kún dó nú axɔ́sú Elámu tɔn kpó axɔ́ví Elámu tɔn lɛ́ kpó,” wɛ Jexóva ɖɔ.
39 “Amɔ̌, ɖo azǎn gǔdo gúdo tɔn lɛ́ mɛ ɔ, un ná xo Elámunu e yi kannumɔgbénu lɛ́ é kplé,” wɛ Jexóva ɖɔ.