Jelemíi
46 Jexóva ɖɔ xó nú gbeyíɖɔ Jelemíi dó akɔta lɛ́ wú. 2 É ɖɔ xó dó Ejípu, ɛɛn, dó Ejípu xɔ́sú Falawɔ́ɔn Nɛko, éé ɖo Efláti tɔ ɔ kpá é sín ahwankpá wú. Babilɔ́nu xɔ́sú Nabukodonɔzɔ́ɔ* ɖu ɖo jǐ tɔn ɖo Kaakemíci, ɖo axɔ́súɖuɖu Judáa xɔ́sú Yexoyakímu Joziyási ví ɔ tɔn sín xwe ɛnɛgɔ́ ɔ mɛ. Xó e é ɖɔ é ɖíe:
3 “Mi sɔ́ gǎglónú mitɔn kpɛví lɛ́ kpó gǎglónú mitɔn ɖaxó lɛ́ kpó ɖó alɔ jí,
mi tɔ́n bá yi fun ahwan.
4 Sɔ́xátɔ́ lɛ́ mi, mi blá akpa nú sɔ́ lɛ́, bo xá sɔ́.
Mi sɔ́ tɛnmɛ mitɔn lɛ́, bo xwe gangbákún mitɔn lɛ́.
Mi gan hwǎn lɛ́, bo dó ahwanwu mitɔn lɛ́.
5 ‘Un mɔ bɔ ahwi xo yě. Étɛ́wú yě ka ɖo mɔ̌?
Yě ɖo gǔdofɔ dó wɛ; è ɖu ɖo ahwanfuntɔ́ yětɔn lɛ́ jí.
Xɛsi jɛ yě jí bɔ yě hɔn, ahwanfuntɔ́ yětɔn lɛ́ kpɔ́n gǔdo ǎ.
Xɛsi gbɔn fí bǐ,’ wɛ Jexóva ɖɔ.
6 ‘Mɛ e afɔ yá ná lɛ́ é sixú hɔn ǎ; ahwanfuntɔ́ lɛ́ sixú gán ɖ’é mɛ ǎ.
Yě klɛ́n afɔ bo j’ayǐ,
ɖo totaligbé ɖo Efláti tɔ ɔ tó.’
7 Mɛ̌ ka nyí mɛ énɛ́ e jawě tɔsisa Nilu ɖɔhun é?
Mɛ̌ ka nyí mɛ énɛ́ e jawě tɔsisa e ɖo adǎn jí lɛ́ é ɖɔhun é?
8 Ejípu wá tɔsisa Nilu ɖɔhun,
ɛɛn, tɔsisa e ɖo adǎn jí lɛ́ é ɖɔhun,
bo ɖɔ: ‘Un ná yi, bo ná ɖí bú ayǐkúngban ɔ.
Un ná sú kún dó nú toxo ɔ kpó mɛ e nɔ nɔ mɛ lɛ́ é kpó.’
9 Sɔ́xátɔ́ lɛ́ mi, mi ɖidó!
Kɛkɛ́víkuntɔ́ lɛ́ mi, mi kun kɛkɛ́ví lɛ́ kpó wezun kpó!
Ahwanfuntɔ́ lɛ́ ní ɖidó,
énɛ́ wɛ nyí Kúcinu kpó Pútinu kpó e nɔ hɛn gǎglónú lɛ́ é,
gɔ́ nú Lǔdinu e nyí gǎdatɔ́ alɔsekpɛ́nnánɔ lɛ́ é.
10 “Aklúnɔ Nǔbǐwúkpétɔ́ Jexóva ahwankpá lɛ́ tɔn sín azǎn wɛ, hlɔnbiba sín azǎn wɛ, bɔ é ná ba hlɔn kɛntɔ́ tɔn lɛ́. Hwǐ ná vúnvún nǔ bɔ é ná jɛmɛ n’i, lobɔ é ná nu hun yětɔn dó gbɔ kɔ e ɖo xúxú i wɛ é, ɖó Aklúnɔ Nǔbǐwúkpétɔ́ Jexóva ahwankpá lɛ́ tɔn ɖo vɔ̌ ɖokpó ná sá wɛ* ɖo to e ɖo Efláti tɔ ɔ tó ɖo totaligbé é mɛ.
11 Ðyɔ̌vǐ ɖo alɔjí Ejípu tɔn è,
yi Galádi, bo yi ba balusámu!*
A zán amasin gěgé dó wǔvɔ́,
ɖó amasin ɖě ɖe bo ná gbɔ azɔn towe ǎ.
12 Akɔta lɛ́ se winnyá e a ɖu é sín xó,
bɔ xósúsú towe kpé to ɔ bǐ mɛ.
Ðó ahwanfuntɔ́ ɖě nɔ gblá gǒ ahwanfuntɔ́ ɖěvo,
bɔ yě mɛ we lɛ́ bǐ nɔ j’ayǐ.”
13 Xó e Jexóva ɖɔ nú gbeyíɖɔ Jelemíi dó Babilɔ́nu xɔ́sú Nabukodonɔzɔ́ɔ e ja, bo ná tɔ́n ahwan Ejípu to ɔ é wú é ɖíe:
14 “Mi ɖɔ ɖo Ejípu, mi jlá ɖo Migidɔ́lu.
Mi jlá ɖo Nɔfu, bo jlá ɖo Tapanɛ́si.
Mi ɖɔ: ‘Mi sɔ́ tɛnmɛ mitɔn lɛ́, bo ɖo gbesisɔmɛ,
ɖó hwǐ ɖokpó ná vúnvún mɛ e lɛ́ lɛ̌ dó mi lɛ́ é bǐ.
15 Étɛ́wú è ka za súnnu hlɔ̌nhlɔ́nnɔ mitɔn lɛ́ síin?
Yě nɔ te ɖo tɛn yětɔn mɛ ǎ,
ɖó Jexóva zin yě dɛ́.
16 Yě mɛ gěgé ɖo afɔ klɛ́n wɛ, bo ɖo ayǐ jɛ wɛ.
Yě ɖo ɖiɖɔ nú yěɖée lɛ́ wɛ ɖɔ:
“Mi sí te! Mi nú mǐ ní lɛ́ kɔ yi togun mǐtɔn kpó to mǐtɔn kpó mɛ,
ɖó hwǐ baɖabaɖa ɔ wú.”’
17 Yě jlá ɖo fínɛ́ ɖɔ:
‘Falawɔ́ɔn Ejípu xɔ́sú ɔ nɔ ɖú zǐngídi dó wǔvɔ́;
é jó ali e hun n’i é* dó b’ɛ gbɔ wǔ tɔn.’
18 ‘Un ɖo gbɛ jɛ́n wɛ ɔ,’ wɛ Axɔ́sú e sín nyǐkɔ nɔ nyí Jexóva ahwankpá lɛ́ tɔn é ɖɔ,
‘é* ná wá Tabɔ́ɔ só ɖɔhun ɖo só lɛ́ tɛ́ntin,
Kaamɛ́li só e ɖo xutó é ɖɔhun.
19 Vǐ nyɔ̌nu e nɔ nɔ Ejípu é,
dǒ agban towe bo ná yi kannumɔgbénu.
20 Ejípu cí nyibúsixwɛ ɖɛkpɛ ɖɛkpɛ ɖé ɖɔhun,
amɔ̌, asɔfin lɛ́ ná gosín totaligbé bo ná tɔ́n ahwan ɛ.
21 Sɔ́ja e é tlɛ yí bɔ yě ɖo tɛ́ntin tɔn lɛ́ é cí nyibúví e dó jǒ lɛ́ é ɖɔhun,
amɔ̌, yě lɔmɔ̌ dó gǔdofɔ, bo hɔn.
Yě sixú nɔ tɛn yětɔn mɛ ǎ,
ɖó azǎn e gbe awě ná xo yě é ko wá,
hwenu e yě ná ɖó gbe é su.’
22 ‘Nǔɖiɖɔ tɔn cí dan ɖo hinhɔn wɛ sín nǔɖiɖɔ ɖɔhun,
ɖó yě fɔ asyɔ́ bo nyi ahwan jɛ gǔdo tɔn,*
súnnu e ɖo atín gbo wɛ* lɛ́ é ɖɔhun.
23 Zungbó tɔn cí nǔ e mɛ è ma sixú byɔ́ ǎ é ɖɔhun có, yě ná gbo atín e ɖ’é mɛ lɛ́ é,’ wɛ Jexóva ɖɔ.
‘Ðó yě sukpɔ́ hú bɔkle lɛ́, è sixú xa yě ǎ.
24 È ná dó winnyá vǐ nyɔ̌nu Ejípu tɔn.
È ná jó è nyi alɔ mɛ nú togun e ɖo totaligbé é.’
25 “Jexóva ahwankpá lɛ́ tɔn, Mawu Izlayɛ́li tɔn ɖɔ: ‘Din ɔ, un ná húzú kpan nukɔn toxo Nɔ́ɔ* tɔn sín vodún Amɔ́ni, bo ná húzú kpan nukɔn Falawɔ́ɔn, Ejípu, vodún Ejípu tɔn lɛ́ kpó axɔ́sú tɔn lɛ́ kpó, ɛɛn, un ná húzú kpan nukɔn Falawɔ́ɔn kpó mɛ e nɔ ɖeji dó wǔ tɔn lɛ́ é bǐ kpó.’
26 “‘Un ná jó yě nyi alɔ mɛ nú mɛ e ɖo biba ná hu yě wɛ lɛ́ é, ɛɛn, nú Babilɔ́nu xɔ́sú Nabukodonɔzɔ́ɔ* kpó mɛsɛntɔ́ tɔn lɛ́ kpó. Amɔ̌, énɛ́ gúdo ɔ, gbɛtɔ́ ná lɛ́ wá nɔ Ejípu to mɛ, lěe é ko nyí gbɔn ɖ’ayǐ é,’ wɛ Jexóva ɖɔ.
27 ‘Hwɛ mɛsɛntɔ́ ce Jakɔ́bu è, ma ɖi xɛsi ó.
Izlayɛ́li è, ma nú ado hu we ó.
Ðó un ná hwlɛ́n we sín fí línlín,
bo ná hwlɛ́n kúnkan towe sín to e mɛ yě ɖo kannumɔgbénu ɖe é.
Jakɔ́bu ná lɛ́ kɔ, bo ná nɔ vivo mɛ, bɔ mɛ ɖěbǔ sɔ́ ná dó tagba n’i ǎ,
lobɔ mɛ ɖěbǔ ná dó xɛsi yě ǎ.
28 Énɛ́ wú ɔ, mɛsɛntɔ́ ce Jakɔ́bu, ma ɖi xɛsi ó,’ wɛ Jexóva ɖɔ, ‘ɖó un ɖo kpɔ́ xá we.
Un ná sú kún dó nú nǔ ɖo akɔta e mɛ un fúnfún we kpé gbɔn lɛ́ é bǐ mɛ,
amɔ̌, hwɛ ɔ, un ná sú kún dó nú we ǎ.
Un ná kplɔ́n we,* lěe é jɛxá gbɔn é,
un ná gɔn tó dɔn nú we ɖo ali ɖěbǔ nu ǎ.’”