Jelemíi

44 Xó e Mawu ɖɔ gbɔn Jelemíi jí nú Jwifu e nɔ nɔ Ejípu to mɛ lɛ́ é bǐ, yě mɛ ɖěɖěe nɔ nɔ Migidɔ́lu, Tapanɛ́si, Nɔfu* kpó Patlɔ́si yíkúngban jí kpó lɛ́ é ɖíe: 2 “Xó e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Mi mɔ awě e un sɔ́ dó xo Jeluzalɛ́mu kpó toxo Judáa tɔn lɛ́ bǐ kpó lɛ́ é bǐ. Égbé din ɔ, toxo énɛ́ lɛ́ bǐ wɛ kíjá bɔ mɛ ɖěbǔ ɖo yě mɛ ǎ. 3 Nǔ nyanya e yě wa dó dó xomɛsin nú mì lɛ́ é wɛ zɔ́n; é wɛ nyí ɖɔ yě sá vɔ̌ nú mawu ɖěvo e yě ma tuun ǎ, bɔ midɛɛ lɛ́ kpó tɔ́gbó mitɔn lɛ́ kpó ma tuun ǎ lɛ́ é, bo sɛn yě. 4 Un nɔ sɛ́ mɛsɛntɔ́ ce gbeyíɖɔ lɛ́ bǐ dó mi, un sɛ́ yě dó mi azɔn gěgé,* bo ɖɔ: “Mi kɛnklɛ́n, mi ma dó nǔ baɖabaɖa énɛ́ e un gbɛ́ wǎn ná é sin ó.” 5 Amɔ̌, yě ɖótó alǒ tɛ́ tó ǎ, yě lɛ́ kɔ sín nǔnyanyawiwa yětɔn gúdo ǎ, bo kpo ɖo vɔ̌ sá nú mawu ɖěvo lɛ́ wɛ. 6 Énɛ́ wú ɔ, un ɖe adǎn e jí un ɖe syɛ́nsyɛ́n é kpó xomɛ e sin mì syɛ́nsyɛ́n é kpó xlɛ́ ɖo toxo Judáa tɔn lɛ́ mɛ, bo lɛ́ wa mɔ̌ ɖo toxomɛli Jeluzalɛ́mu tɔn lɛ́ jí; fí énɛ́ lɛ́ bǐ wɛ kíjá bo jɛ vɔ̌ lěe yě ɖe gbɔn égbé din é.’

7 “Din ɔ, nǔ e Jexóva Mawu ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Étɛ́wú miɖésúnɔ* ka ná zɔ́n bɔ awě ɖaxó ná xo mi, bɔ súnnu, nyɔ̌nu, yɔkpɔ́vú kpó vǐ yɛ̌yɛ́ kpó sín kún ná sú dó ɖo Judáa, bɔ mɛ ɖěbǔ sɔ́ ná kpo ǎ? 8 Étɛ́wú mi ka ná sá vɔ̌ nú mawu ɖěvo lɛ́ ɖo Ejípu to mɛ fí e mi yi ninɔ gbé é dó dó xomɛsin nú mì? Kún mitɔn ná sú dó, bɔ mi ná húzú nudó kpó winnyánú kpó ɖo akɔta lɛ́ bǐ tɛ́ntin ɖo ayǐkúngban ɔ jí. 9 Nǔ nyanya e tɔ́gbó mitɔn lɛ́, axɔ́sú Judáa tɔn lɛ́, asi yětɔn lɛ́, miɖésúnɔ kpó asi mitɔn lɛ́ kpó wa ɖo Judáa yíkúngban jí, bo lɛ́ wa ɖo toxomɛli Jeluzalɛ́mu tɔn lɛ́ jí lɛ́ é ɔ, mi wɔn wɛ a? 10 Káká jɛ égbé ɔ, yě sɔ́ yěɖée hwe ǎ, yě ka lɛ́ ɖó sísí e gɔ́ngɔ́n é nú mì ǎ. Gɔ́ ná ɔ, yě se tónú nú sɛ́n kpó gbetakɛ́n kpó e un ná mi kpó tɔ́gbó mitɔn lɛ́ kpó lɛ́ é ǎ.’

11 “Énɛ́ wú ɔ, nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Un kán ɖ’é jí bo ná sɔ́ awě dó xo mi, bo ná sú kún dó nú togun Judáa tɔn ɔ bǐ. 12 Mɛ e kpo ɖo Judáa, bo kán ɖ’é jí bo ná yi nɔ Ejípu to mɛ lɛ́ é bǐ ɔ, un ná kplá yě yi dɔ̌n, bɔ yě mɛ bǐ ná kú jɛ Ejípu to mɛ. Yě ná kú hwǐ kú, alǒ adɔ kú, ɛɛn, sín mɛ kpɛví bǐ ɔ jí káká jɛ mɛ ɖaxó bǐ ɔ jí ɔ, yě ná kú hwǐ kú, alǒ adɔ kú. Bɔ yě ná húzú nudó, nǔ kiko, nǔ e xyɔ́ wǔ é kpó winnyánú kpó. 13 Un ná dɔn tó nú mɛ e nɔ nɔ Ejípu to mɛ lɛ́ é, lěe un dɔn tó nú mɛ e nɔ nɔ Jeluzalɛ́mu lɛ́ é, gbɔn hwǐ, adɔ kpó jɛmɛjí* kpó gblamɛ gbɔn é. 14 Mɛ e kpo ɖo Judáa bo yi Ejípu to mɛ nɔ gbé lɛ́ é ɖě ná xo gló, alǒ gán bo ná lɛ́ kɔ wá Judáa yíkúngban jí ǎ. Yě ná ba ná lɛ́ kɔ wá bo ná nɔ fínɛ́, amɔ̌, yě ná lɛ́ kɔ ǎ. Mɛ e xo gló lɛ́ é kpɛɖé jɛ́n ná kpé wú.’”

15 Súnnu e tuun ɖɔ asi émítɔn lɛ́ nɔ sá vɔ̌ nú mawu ɖěvo lɛ́ é bǐ kpó asi yětɔn e ɖo te ɖo fínɛ́ bo nyí gbɛ̌ta ɖaxó ɖé lɛ́ é bǐ kpó, gɔ́ nú mɛ e nɔ nɔ Ejípu to mɛ ɖo Patlɔ́si lɛ́ é bǐ yí gbe nú Jelemíi ɖɔ: 16 “Mǐ ná ɖótó xó e a ɖɔ nú mǐ ɖo Jexóva nyíkɔ mɛ é ǎ. 17 É nyɔ́ wa ɔ, mǐ ná wa nǔ e nu mǐtɔn lɛ́ ɖɔ lɛ́ é bǐ jɛ́n wɛ, bo ná sá vɔ̌ nú Axɔ́si jǐxwé tɔn* ɔ, lobo ná kɔn nǔníná vɛ̌ɛn tɔn lɛ́ kɔn nyi ayǐ n’i, lěe mǐdɛɛ lɛ́, tɔ́gbó mǐtɔn lɛ́, axɔ́sú mǐtɔn lɛ́ kpó axɔ́ví mǐtɔn lɛ́ kpó wa gbɔn ɖo toxo Judáa tɔn lɛ́ mɛ kpó toxomɛli Jeluzalɛ́mu tɔn lɛ́ jí kpó, hwenu e mǐ ɖu wɔ̌xúxú b’ɛ jɛmɛ nú mǐ, bɔ mǐ jɛ dɔkun, lobɔ awě ɖěbǔ ma xo mǐ ǎ é ɖɔhun. 18 Sín hwenu e mǐ ɖó vɔ̌ sísá nú Axɔ́si jǐxwé tɔn* ɔ te, bo ma sɔ́ nɔ kɔn nǔníná vɛ̌ɛn tɔn ɖě kɔn nyi ayǐ n’i ǎ é ɔ, mǐ sɔ́ ɖó nǔ ɖě ǎ, bɔ hwǐ kpó adɔ kpó sú kún mǐtɔn dó.”

19 Nyɔ̌nu lɛ́ ɖɔ gɔ́ ná ɖɔ: “Hwenu e mǐ nɔ ɖo vɔ̌ sá nú Axɔ́si jǐxwé tɔn* ɔ wɛ, bo nɔ ɖo nǔníná vɛ̌ɛn tɔn lɛ́ kɔn nyi ayǐ n’i wɛ é ɔ, asú mǐtɔn lɛ́ mɛvo wɛ mǐ nɔ ɖa wɔ̌xúxú vɔ̌sísá tɔn, éé cí axɔ́si ɔ ɖɔhun lɛ́ é bo nɔ kɔn nǔníná vɛ̌ɛn tɔn lɛ́ kɔn nyi ayǐ n’i a?”

20 Énɛ́ ɔ, Jelemíi ɖɔ nú togun ɔ bǐ, nú súnnu lɛ́ kpó asi yětɔn lɛ́ kpó, gɔ́ nú mɛ e ɖo xó ɖɔ n’i wɛ lɛ́ é bǐ ɖɔ: 21 “Vɔ̌ e midɛɛ lɛ́, tɔ́gbó mitɔn lɛ́, axɔ́sú mitɔn lɛ́, axɔ́ví mitɔn lɛ́ kpó mɛ e ɖo to ɔ mɛ lɛ́ é kpó sá ɖo toxo Judáa tɔn lɛ́ mɛ kpó toxomɛli Jeluzalɛ́mu tɔn lɛ́ jí kpó lɛ́ é ɔ, Jexóva flín bo ɖó ayi wú! 22 Wǎgbɔ tɔn ɔ, Jexóva sɔ́ dɛ ɖo nǔnyanyawiwa mitɔn lɛ́ kpó nǔ baɖabaɖa e mi dó sin lɛ́ é kpó nu ɖě ǎ, bɔ to mitɔn húzú nɔtɛn e jɛ vɔ̌ é, nǔ e xyɔ́ wǔ é kpó nudó kpó bɔ mɛ ɖě sɔ́ ɖ’é mɛ ǎ, lěe é ɖe gbɔn égbé din é. 23 Ényí awě énɛ́ lɛ́ ɖo mi xo wɛ égbé ɔ, vɔ̌ énɛ́ lɛ́ e mi sá é kpó hwɛ e mi hu dó Jexóva é kpó wútu wɛ, ɛɛn, mi se tónú nú Jexóva ǎ, mi nyi sɛ́n tɔn ǎ, mi xwedó gbetakɛ́n tɔn lɛ́ ǎ, mi lɛ́ ké ya nú nǔflínmɛ tɔn lɛ́ ǎ.”

24 Jelemíi gbɛ kan d’é nu bo ɖɔ nú togun ɔ bǐ kpó nyɔ̌nu lɛ́ bǐ kpó ɖɔ: “Judáanu e ɖo Ejípu to mɛ lɛ́ é mi, mi bǐ ní ɖótó xó Jexóva tɔn. 25 Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Nǔ e mi kpó asi mitɔn lɛ́ kpó ɖɔ kpó nu mitɔn kpó lɛ́ é ɔ, mi wa kpó alɔ mitɔn lɛ́ kpó, ɖó mi ɖɔ: “Mǐ ná ɖe akpá e mǐ dó ɖɔ mǐ ná sá vɔ̌ nú Axɔ́si jǐxwé tɔn* ɔ, bo ná kɔn nǔníná vɛ̌ɛn tɔn lɛ́ kɔn nyi ayǐ n’i é jɛ́n wɛ.” Nyɔ̌nu lɛ́ mi, é ɖo wɛn ɖɔ mi ná ɖe akpá e mi dó lɛ́ é bo ná bló nǔ e mi ɖɔ lɛ́ é.’

26 Énɛ́ wú ɔ, Judáanu e nɔ nɔ Ejípu to mɛ lɛ́ é mi, mi bǐ ní ɖótó xó élɔ́ e Jexóva ɖɔ é: ‘“Un xwlé nyǐkɔ ce ɖaxó ɔ nú mi,” wɛ Jexóva ɖɔ, “súnnu Judáa tɔn e ɖo Ejípu to mɛ é ɖě sɔ́ ná xwlé nyǐkɔ ce bo ná ɖɔ: ‘Aklúnɔ Nǔbǐwúkpétɔ́ Jexóva ɖo gbɛ jɛ́n wɛ ɔ’ ɖě ǎ. 27 Din ɔ, un ɖo gbesisɔmɛ bo ná sɔ́ awě dó xo yě, é nyí nǔ ɖagbe ǎ; súnnu Judáa tɔn e ɖo Ejípu to mɛ lɛ́ é bǐ ná kú hwǐ kú alǒ adɔ kú, káká bɔ yě ɖě sɔ́ ná tíin ǎ. 28 Mɛ kpɛɖé jɛ́n ná xo gló hwǐ ɔ, bo ná lɛ́ kɔ sín Ejípu to mɛ wá Judáa yíkúngban jí. Énɛ́ ɔ, mɛ e kpo ɖo Judáa bo wá Ejípu to mɛ bo ná nɔ fínɛ́ lɛ́ é ná tuun mɛ e sín xó jɛnu ɖo nyɛtɔn kpó yědɛɛ lɛ́ tɔn kpó mɛ é!”’”

29 “‘Wuntun e ná xlɛ́ mi ɖɔ un ná dɔn tó nú mi ɖo nɔtɛn élɔ́, bɔ akpá e un dó ɖɔ un ná sɔ́ awě dó xo mi é ná jɛnu jɛ́n wɛ é ɖíe,’ wɛ Jexóva ɖɔ. 30 ‘Nǔ e Jexóva ɖɔ é ɖíe: “Un ɖo Ejípu xɔ́sú Falawɔ́ɔn Hofla jó dó nyi kɛntɔ́ tɔn lɛ́ kpó mɛ e ɖo biba ná hu i wɛ lɛ́ é kpó sín alɔ mɛ wɛ, lěe un jó Judáa xɔ́sú Sedesiyási dó nyi Babilɔ́nu xɔ́sú Nabukodonɔzɔ́ɔ,* éé nyí kɛntɔ́ tɔn bo ɖo biba ná hu i wɛ é sín alɔ mɛ gbɔn é ɖɔhun.”’”