Jelemíi
43 Ée Jelemíi ɖɔ xó énɛ́ lɛ́ e Jexóva Mawu yětɔn ɖɔ lɛ́ é bǐ nú togun ɔ blěbú, ɛɛn, xó e Jexóva Mawu yětɔn sɛ́ ɛ dó ɖɔ é ní ɖɔ nú yě é bǐ fó é ɔ, 2 Azalíya Hocáya ví ɔ, Yoxanáni Kaléa ví ɔ kpó súnnu goyítɔ́ lɛ́ bǐ kpó ɖɔ nú Jelemíi ɖɔ: “Adingban ɖó wɛ a ɖe! Jexóva Mawu mǐtɔn sɛ́ we dó ɖɔ a ní ɖɔ nú mǐ ɖɔ: ‘Mi ma yi Ejípu, bo nɔ dɔ̌n ó’ ɖě ǎ. 3 Balúki Nɛlíya ví ɔ wɛ ɖo sísɛ́ sísɛ́ we wɛ bónú a ná jó mǐ nú Kaludéenu lɛ́, bɔ yě ná hu mǐ, alǒ kplá mǐ yi kannumɔgbénu ɖo Babilɔ́nu.”
4 Énɛ́ ɔ, Yoxanáni Kaléa ví ɔ kpó ahwangán lɛ́ bǐ kpó, gɔ́ nú togun ɔ bǐ se tónú nú ɖɔ e Jexóva ɖɔ ɖɔ yě ní cí Judáa to mɛ é ǎ. 5 Énɛ́ ɔ, Yoxanáni Kaléa ví ɔ kpó ahwangán lɛ́ bǐ kpó kplá mɛ e kpo ɖo Judáa lɛ́ é bǐ, ɛɛn, mɛ ɖěɖěe lɛ́ kɔ sín akɔta e mɛ è gba yě dó gbɔn lɛ́ é bǐ mɛ, bo wá cí Judáa to mɛ lɛ́ é bǐ dó yěɖée jí. 6 Yě kplá súnnu, nyɔ̌nu, vǐ, axɔ́sú ɔ sín vǐ nyɔ̌nu lɛ́ kpó mɛ* e sɔ́ja e nɔ cɔ́ axɔ́sú ɔ lɛ́ é sín gǎn Nɛbuzaladáni jó dó alɔ mɛ nú Gedalíya Axikámu ví, Cafáni vívú ɔ lɛ́ é bǐ kpó, káká jɛ gbeyíɖɔ Jelemíi kpó Balúki Nɛlíya ví ɔ kpó jí. 7 Yě yi Ejípu to mɛ, ɖó yě se tónú nú Jexóva ǎ, bo yi káká Tapanɛ́si wútu.
8 Énɛ́ gúdo ɔ, Jexóva ɖɔ xó nú Jelemíi ɖo Tapanɛ́si, bo ɖɔ: 9 “Bɛ̌ awǐnnya, bo bú kɔ́ nyinya dó yě dó sɔ́ yě hwlá, ɖo kpekán e è sɔ́ blǐki dó mɛ é jí ɖo Jwifu lɛ́ nukúnmɛ; kpekán ɔ ɖo hɔnmɛ Falawɔ́ɔn tɔn sín alihɛ́nnu ɖo Tapanɛ́si. 10 Énɛ́ gúdo hǔn, ɖɔ nú yě ɖɔ: ‘Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: “Un ɖo wɛn sɛ́ dó mɛsɛntɔ́ ce Nabukodonɔzɔ́ɔ* Babilɔ́nu xɔ́sú ɔ wɛ; un ná sɔ́ axɔ́súzinkpo tɔn ɖó awǐnnya e un sɔ́ hwlá lɛ́ é jí, bɔ é ná vlɔ́n axɔ́sú sín goxɔ tɔn nyi awǐnnya énɛ́ lɛ́ jí. 11 Bɔ é ná wá, bo ná tɔ́n ahwan Ejípu to ɔ. Jɛmɛjí e nɔ hu mɛ é ná hu mɛɖé lɛ́, mɛɖé lɛ́ ná yi kannumɔgbénu, bɔ mɛɖé lɛ́ ná kú hwǐ kú. 12 Bɔ un ná sí myɔ mawu Ejípu tɔn lɛ́ sín xwé* lɛ́ mɛ, bɔ axɔ́sú énɛ́ ná dó yě zo, bo ná bɛ́ yě yi kannumɔgbénu. Lěe awu sinsin dó alin nɔ bɔ wǔ nú lɛ̌ngbɔ́nyitɔ́ gbɔn é ɔ, mɔ̌ wɛ é ná yí Ejípu to ɔ bǐ gbɔn, lobo ná gosín fínɛ́ faa.* 13 É ná gba dotín Bɛti-Cɛmɛ́ci* tɔn lɛ́ hánnyá ɖo Ejípu to mɛ bo ná dó mawu Ejípu tɔn lɛ́ sín xwé* lɛ́ zo.”’”