Jelemíi

42 Énɛ́ ɔ, ahwangán lɛ́ bǐ, gɔ́ nú Yoxanáni Kaléa ví ɔ, Yezaníya Hocáya ví ɔ kpó togun ɔ bǐ kpó, sín mɛ kpɛví bǐ ɔ jí káká jɛ mɛ ɖaxó bǐ ɔ jí sɛkpɔ́, 2 bo ɖɔ nú gbeyíɖɔ Jelemíi ɖɔ: “Kɛnklɛ́n, ɖǒtó vosisa mǐtɔn, bo xo ɖɛ sɛ́ dó Jexóva Mawu towe dó ta mǐtɔn mɛ, bo lɛ́ xo ɖɛ dó mɛ e kpo lɛ́ é bǐ tamɛ, ɖó mǐ mɛ kpɛɖé jɛ́n kpo, lěe mɔ gbɔn wɛ a ɖe é. 3 Jexóva Mawu towe ní ɖɔ ali e mǐ ɖó ná mlɛ́ é kpó nǔ e mǐ ɖó ná wa é kpó nú mǐ.”

4 Gbeyíɖɔ Jelemíi yí gbe nú yě ɖɔ: “Un se xó mitɔn, un ná xo ɖɛ sɛ́ dó Jexóva Mawu mitɔn sɔgbe xá nǔ e mi byɔ́ é; bɔ xó e Jexóva ná ɖɔ lɛ́ é bǐ ɔ, un ná wá ɖɔ nú mi. Un ná hwlá xó ɖě dó mi ǎ.”

5 Yě yí gbe nú Jelemíi ɖɔ: “Ényí mǐ ma wa nǔ e Jexóva Mawu towe ɖe gbe tɔn nú mǐ gbɔn jǐ towe lɛ́ é pɛ́pɛ́pɛ́ ǎ hǔn, Jexóva ní nyí kúnnuɖetɔ́ nǔgbó kpó gbejínɔtɔ́ kpó bo wa nǔ xá mǐ. 6 Ényí xó e é ɖɔ é nyɔ́ nukún mǐtɔn mɛ alǒ gbɔ ɔ, mǐ ná se tónú nú Jexóva Mawu mǐtɔn e gɔ́n sɛ́ we dó wɛ mǐ ɖe é sín gbe, mɔ̌ mɛ ɔ, nǔ bǐ ná yi ganjí nú mǐ, ɖó mǐ se tónú nú Jexóva Mawu mǐtɔn sín gbe.”

7 Azǎn wǒ gúdo ɔ, Jexóva ɖɔ xó nú Jelemíi. 8 Énɛ́ ɔ, é ylɔ́ Yoxanáni Kaléa ví ɔ, gɔ́ nú ahwankpá ɔ sín gǎn lɛ́ bǐ kpó togun ɔ bǐ kpó, sín mɛ kpɛví bǐ ɔ jí káká jɛ mɛ ɖaxó bǐ ɔ jí, 9 bo ɖɔ nú yě ɖɔ: “Nǔ e Jexóva, Mawu Izlayɛ́li tɔn e gɔ́n mi sɛ́ mì dó, bónú má sa vo n’i dó ta mitɔn mɛ é ɖɔ é ɖíe: 10 ‘Ényí mi cí to élɔ́ mɛ ɔ, un ná zin mi dɛ́ ǎ, é nyɔ́ wa ɔ, un ná bló bɔ mi ná lí dǒ, un ná hɔn ɖɔ nú mi ǎ, é nyɔ́ wa ɔ, un ná tun mi, ɖó awě e un sɔ́ dó xo mi é ná vɛ́ nú mì.* 11 Ado ní ma hu mi dó Babilɔ́nu xɔ́sú e ɖi xɛsi ná wɛ mi ɖe é wú ó.’

“‘Ado ní ma hu mi dó wǔ tɔn ó,’ wɛ Jexóva ɖɔ, ‘ɖó un ɖo kpɔ́ xá mi, bo ná hwlɛ́n mi gán, lobo ná yí mi sín alɔ tɔn mɛ. 12 Un ná kú nǔbláwǔ nú mi, bɔ nǔ mitɔn ná blá wǔ n’i, lobɔ é ná lɛ́ kɔ nú mi yi to mitɔn mɛ.

13 “‘Amɔ̌, ényí mi ɖɔ: “Éǒ, mǐ ná cí to élɔ́ mɛ ǎ!” bo tlí tó nú Jexóva Mawu mitɔn, 14 bo ɖɔ: “Éǒ, é nyɔ́ wa ɔ, Ejípu to mɛ wɛ mǐ ná yi; è ná se ahwanfunfun sín xó ɖě ɖo dɔ̌n, alǒ lanzo sín nǔɖiɖɔ ǎ, xovɛ́ ka ná lɛ́ sin mǐ ǎ; fínɛ́ wɛ mǐ ná nɔ” ɔ, 15 Judáa sín mɛ e kpo lɛ́ é mi, mi ɖótó xó e Jexóva ɖɔ é. Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: “Ényí mi kán ɖ’é jí géé, bo ná yi Ejípu, bónú mi yi dɔ̌n bo ná nɔ fínɛ́* ɔ, 16 ahwan e ɖi xɛsi ná wɛ mi ɖe é ná wá gba mi ɖo dɔ̌n ɖo Ejípu to mɛ, bɔ adɔ e ɖi xɛsi ná wɛ mi ɖe é ná wá hɛn mi ɖo Ejípu, bɔ mi ná kú ɖo fínɛ́. 17 Bɔ hwǐ, adɔ, alǒ jɛmɛjí* ná hu mɛ ɖěɖěe kán ɖ’é jí bo ná yi Ejípu bo ná nɔ fínɛ́ lɛ́ é bǐ. Yě mɛ ɖě ná gán, alǒ xo gló awě e un ná sɔ́ dó xo yě é ǎ.”’

18 “Ðó nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Lěe un wa nǔ xá mɛ e nɔ nɔ Jeluzalɛ́mu lɛ́ é kpó xomɛsin kpó, kpódó adǎn kpán gbɔn é ɔ, mɔ̌ ɖokpó ɔ, ényí mi yi Ejípu ɔ, un ná wa nǔ xá mi kpó adǎn kpó, bɔ mi ná húzú nudómɛ, nǔ kiko, nǔ e xyɔ́ wǔ é kpó winnyánú kpó, bɔ mi sɔ́ ná mɔ nɔtɛn élɔ́ gbeɖé ǎ.’

19 “Judáa sín mɛ e kpo lɛ́ é mi, Jexóva ɖɔ nú mi ɖɔ mi ní ma yi Ejípu ó. Mi ɖó ná tuun ɖɔ un gba akpá nú mi égbé 20 ɖɔ nǔwanyido mitɔn lɛ́ ná dɔn kú wá nú mi, ɖó mi sɛ́ mì dó Jexóva Mawu mitɔn gɔ́n, bo ɖɔ: ‘Xo ɖɛ sɛ́ dó Jexóva Mawu mǐtɔn dó ta mǐtɔn mɛ, bo ɖɔ nǔ e Jexóva Mawu mǐtɔn ɖɔ lɛ́ é bǐ nú mǐ, énɛ́ ɔ, mǐ ná bló.’ 21 Un ɖɔ nǔ e Mawu ɖɔ é nú mi égbé, amɔ̌, mi ná se tónú nú Jexóva Mawu mitɔn sín gbe ǎ, mɔ̌ jɛ́n mi ma ná bló nǔ e é sɛ́ mì dó ɖɔ má ɖɔ nú mi lɛ́ é ɖě ǎ é nɛ́. 22 Énɛ́ wú ɔ, mi ní tuun céɖécéɖé ɖɔ hwǐ, adɔ, alǒ jɛmɛjí wɛ ná hu mi ɖo fí e mi jló ná yi nɔ é.”