Jelemíi

41 Ðo sun tɛ́nwegɔ́ ɔ mɛ ɔ, Isimayɛ́li Nɛtaníya ví, Elicáma vívú e jɔ ɖo axɔ́sú kún* mɛ, bo lɛ́ ɖo axɔ́sú ɔ sín mɛ nukúnɖéjí lɛ́ mɛ é wá Gedalíya Axikámu ví ɔ gɔ́n ɖo Misípa; é kpó súnnu wǒ ɖěvo lɛ́ kpó. Ée yě ɖo nǔ ɖu ɖó kpɔ́ wɛ ɖo Misípa é ɔ, 2 Isimayɛ́li Nɛtaníya ví ɔ kpó súnnu wǒ e zɔn xá ɛ lɛ́ é kpó sí te, bo hu Gedalíya Axikámu ví, Cafáni vívú ɔ kpó hwǐ kpó. Mɔ̌ mɛ ɔ, é hu mɛ e Babilɔ́nu xɔ́sú ɔ sɔ́ ɖó to ɔ nu é. 3 Isimayɛ́li lɛ́ hu Jwifu e ɖo kpɔ́ xá Gedalíya ɖo Misípa lɛ́ é bǐ, gɔ́ nú sɔ́ja Kaludéenu e ɖo fínɛ́ lɛ́ é.

4 È hu Gedalíya é ɔ, ayǐhɔ́ngbe tɔn cóbɔ mɛɖé ná tuun ɔ, 5 mɛ 80 gosín Sikɛ́mu, Silóo kpó Samalíi kpó wá. Yě xwlɛ́ atán, awu yětɔn lɛ́ vún, yě já wǔtu nú yěɖée, bo hɛn nǔníná jinukún tɔn lɛ́ kpó zǎlínkpɔ́n wěwé kpó wá xwé Jexóva tɔn gbe. 6 Énɛ́ ɔ, Isimayɛ́li Nɛtaníya ví ɔ tɔ́n sín Misípa bo ná yi kpé yě; é ɖo avǐ ya dó ali wɛ. Ée é xo go yě é ɔ, é ɖɔ nú yě ɖɔ: “Mi wá kpɔ́n Gedalíya Axikámu ví ɔ.” 7 Amɔ̌, ée yě wá toxo ɔ mɛ é ɔ, Isimayɛ́li Nɛtaníya ví ɔ kpó mɛ tɔn lɛ́ kpó hu yě, bo bɛ́ yě dó sitɛ́nu ɖokpó mɛ.

8 Amɔ̌, súnnu wǒ ɖo yě mɛ, bo ɖɔ nú Isimayɛ́li ɖɔ: “Ma hu mǐ ó, ɖó mǐ sɔ́ blěe, ɔ́ji, ami kpó wǐin kpó hwlá dó gle ɔ mɛ. Énɛ́ ɔ, é sɔ́ hu yě, gɔ́ nú nɔví yětɔn lɛ́ ǎ. 9 Isimayɛ́li bɛ́ cyɔ mɛ ɖěɖěe é hu lɛ́ é tɔn dó sitɛ́nu ɖaxó e axɔ́sú Asa kun ɖó Izlayɛ́li xɔ́sú Baeca wú é mɛ. Sitɛ́nu énɛ́ mɛ wɛ Isimayɛ́li Nɛtaníya ví ɔ bɛ́ mɛ e é hu lɛ́ é sín cyɔ dó bɔ é gɔ́.

10 Isimayɛ́li wlí mɛ e kpo ɖo Misípa lɛ́ é bǐ sín kannumɔ, káká jɛ axɔ́sú ɔ sín vǐ nyɔ̌nu lɛ́ kpó mɛ e è jó dó nyi Misípa, bɔ sɔ́ja e nɔ cɔ́ axɔ́sú ɔ lɛ́ é sín gǎn Nɛbuzaladáni wlí dó gankpá Gedalíya Axikámu ví ɔ tɔn mɛ lɛ́ é bǐ kpó jí. Isimayɛ́li Nɛtaníya ví ɔ wlí yě dó gan mɛ, bo sɔ́ ali ɖidó Amumɔ́ɔ ví lɛ́ to mɛ.

11 Ée Yoxanáni Kaléa ví ɔ kpó ahwangán e ɖo kpɔ́ xá ɛ lɛ́ é bǐ kpó se nǔ baɖabaɖa e Isimayɛ́li Nɛtaníya ví ɔ dó sin lɛ́ é bǐ é ɔ, 12 yě kplá sɔ́ja lɛ́ bǐ, bo tɔ́n, bo ná yi fun ahwan xá Isimayɛ́li Nɛtaníya ví ɔ; yě mɔ ɛ ɖo tɔsisa ɖaxó lɛ́* tó ɖo Gabawɔ́ɔn.

13 Mɛ e sín kannumɔ Isimayɛ́li wlí lɛ́ é j’awǎ, hwenu e yě mɔ Yoxanáni Kaléa ví ɔ, bɔ ahwangán lɛ́ bǐ ɖo kpɔ́ xá ɛ é. 14 Énɛ́ ɔ, mɛ e sín kannumɔ Isimayɛ́li wlí ɖo Misípa lɛ́ é bǐ lɛ́ kɔ, bo xwedó Yoxanáni Kaléa ví ɔ. 15 Amɔ̌, Isimayɛ́li Nɛtaníya ví ɔ kpó mɛ tɔn tántɔn kpó sún gló Yoxanáni, bo yi Amumɔ́ɔ ví lɛ́ sín to mɛ.

16 Yoxanáni Kaléa ví ɔ kpó ahwangán e ɖo kpɔ́ xá ɛ lɛ́ é bǐ kpó kplá mɛ e kpo lɛ́ é sín Misípa, énɛ́ wɛ nyí yě mɛ ɖěɖěe è hwlɛ́n sín Isimayɛ́li Nɛtaníya ví ɔ sín alɔ mɛ, hwenu e Isimayɛ́li hu Gedalíya Axikámu ví ɔ gúdo é. Yě kplá súnnu lɛ́, sɔ́ja lɛ́, nyɔ̌nu lɛ́, vǐ lɛ́ kpó axɔ́súzɔ́watɔ́ hɔnmɛ tɔn lɛ́ kpó sín Gabawɔ́ɔn. 17 Énɛ́ ɔ, yě ɖidó bo nɔ te ɖo nɔtɛn Kimuxámu tɔn ɖo Bɛteleyɛ́mu kpá, ɖó yě ɖo linlin wɛ bo ná yi Ejípu 18 ɖó Kaludéenu lɛ́ wútu. Yě ɖo xɛsi ɖi nú yě wɛ, ɖó Isimayɛ́li Nɛtaníya ví ɔ hu Gedalíya Axikámu ví e Babilɔ́nu xɔ́sú ɔ sɔ́ ɖó to ɔ nu é wútu.