Jelemíi

40 Jexóva ɖɔ xó nú Jelemíi hwenu e sɔ́ja e nɔ cɔ́ axɔ́sú ɔ lɛ́ é sín gǎn Nɛbuzaladáni jó è, bɔ é gosín Hlǎma gúdo é. Wlɔ wɛ Nɛbuzaladáni dó alɔ n’i bo kplá ɛ yi fínɛ́, bɔ é ɖo Jeluzalɛ́mu kpó Judáa kpó sín kannumɔ e è kplá xwe Babilɔ́nu lɛ́ é mɛ. 2 Énɛ́ ɔ, sɔ́ja e nɔ cɔ́ axɔ́sú ɔ lɛ́ é sín gǎn kplá Jelemíi jɛ kɛ́n ɖokpó, bo ɖɔ n’i ɖɔ: “Jexóva Mawu towe ko ɖɔ awě e xo nɔtɛn élɔ́ é xó ɖ’ayǐ, 3 bɔ Jexóva bló bɔ é jɛnu, lěe é ko ɖɔ gbɔn é, ɖó mi hu hwɛ dó Jexóva, bo se tónú nú xó tɔn ǎ wútu. Nǔ e wú nǔ énɛ́ xá mi é nɛ́. 4 Égbé din ɔ, un ɖo wlɔ e ɖo alɔ towe é ɖe síin wɛ. Ényí é nyɔ́ nukún towe mɛ ɖɔ a ní xwedó mì yi Babilɔ́nu hǔn, wǎ mǐ ní yi, énɛ́ ɔ, un ná kpé nukún dó wǔ we. Amɔ̌, ényí é ma jló we nú a ná xwedó mì yi Babilɔ́nu ǎ hǔn, ma wá ó. Kpɔ́n! To ɔ bǐ wɛ ɖo nukɔn towe. Yi fí ɖěbǔ e jló we é.”

5 Ðó Jelemíi ɖo nǔ xo kpɔ́n wɛ dó kɔlílɛ́ wú wútu ɔ, Nɛbuzaladáni ɖɔ n’i ɖɔ: “Lɛ̌ kɔ yi Gedalíya Axikámu ví, Cafáni vívú e Babilɔ́nu xɔ́sú ɔ sɔ́ ɖó toxo Judáa tɔn lɛ́ nu é gɔ́n, bo nɔ gɔ̌n tɔn ɖo togun ɔ tɛ́ntin, alǒ yi fí ɖěbǔ e jló we é.”

Énɛ́ ɔ, sɔ́ja e nɔ cɔ́ axɔ́sú ɔ lɛ́ é sín gǎn ná ɛ nǔɖuɖu kpɛɖé kpó nǔníná ɖé kpó, bo jó è. 6 Énɛ́ ɔ, Jelemíi yi Gedalíya Axikámu ví ɔ gɔ́n ɖo Misípa, bo nɔ gɔ̌n tɔn ɖo togun e è jó dó nyi to ɔ mɛ é mɛ.

7 Nukɔnmɛ ɔ, ahwangán e ɖo gle ɔ mɛ lɛ́ é bǐ kpó sɔ́ja yětɔn lɛ́ kpó se ɖɔ Babilɔ́nu xɔ́sú ɔ sɔ́ Gedalíya Axikámu ví ɔ ɖó to ɔ nu, bo lɛ́ sɔ́ ɛ ɖó súnnu, nyɔ̌nu kpó vǐ kpó, éé nyí wamamɔnɔ bo ɖo to ɔ mɛ bɔ è ma kplá yi Babilɔ́nu ǎ lɛ́ é nu. 8 Énɛ́ ɔ, yě wá Gedalíya gɔ́n ɖo Misípa. Yě wɛ nyí Isimayɛ́li Nɛtaníya ví ɔ, Kaléa ví Yoxanáni kpó Jonatáan kpó, Seláya Tanxumɛ́ti ví ɔ, Efáyi Nɛtófanu ɔ sín vǐ lɛ́ kpó Yezaníya Maakátinu ɔ sín vǐ kpó; yě kpó sɔ́ja yětɔn lɛ́ kpó. 9 Gedalíya Axikámu ví, Cafáni vívú ɔ dó akpá nú yě kpó sɔ́ja yětɔn lɛ́ kpó, bo xwlé nǔ d’é jí ɖɔ: “Mi ma ɖi xɛsi dó Kaludéenu lɛ́ sinsɛn wú ó. Mi nɔ to ɔ mɛ, bo sɛn Babilɔ́nu xɔ́sú ɔ, énɛ́ ɔ, nǔ bǐ ná yi ganjí nú mi. 10 Nyɛ ɔ, un ná cí Misípa bo ná sɔ́ afɔ mitɔn ɖó te ɖo Kaludéenu e ná wá mǐ gɔ́n lɛ́ é gɔ́n.* Amɔ̌, mi ɖó ná xo vɛ̌ɛn, alǔun mɛ sín atínsínsɛ́n lɛ́ kpó ami kpó kplé, bo ná bɛ́ yě dó agbanxɔ mitɔn lɛ́ mɛ, bo ná jɛ toxo e mi yí lɛ́ é mɛ.”

11 Bɔ Jwifu e ɖo Mɔwábu, Amumɔ́ɔ kpó Edɔ́mu kpó lɛ́ é bǐ, gɔ́ nú mɛ ɖěɖěe ɖo to ɖěvo lɛ́ mɛ lɛ́ é bǐ se ɖɔ Babilɔ́nu xɔ́sú ɔ jó mɛ kpɛɖé dó nyi Judáa, bo sɔ́ Gedalíya, Axikámu ví, Cafáni vívú ɔ ɖó yě nu. 12 Énɛ́ ɔ, Jwifu lɛ́ bǐ jɛ kɔ lɛ́ sín fí e è fúnfún yě kpé gbɔn lɛ́ é bǐ jí, bo wá Judáa to mɛ, ɖo Gedalíya gɔ́n ɖo Misípa. Bɔ yě xo vɛ̌ɛn kpó alǔun mɛ sín atínsínsɛ́n lɛ́ kpó kplé kɔn nyi kpɔ́.

13 Yoxanáni Kaléa ví ɔ kpó ahwangán e ɖo gle ɔ mɛ lɛ́ é bǐ kpó wá Gedalíya gɔ́n ɖo Misípa. 14 Yě ɖɔ n’i ɖɔ: “A tuun ɖɔ Baalísi Amumɔ́ɔ ví lɛ́ xɔ́sú ɔ sɛ́ Isimayɛ́li Nɛtaníya ví ɔ dó ɖɔ é ní hu we a?” Amɔ̌, Gedalíya Axikámu ví ɔ ɖi xó yětɔn ǎ.

15 Énɛ́ ɔ, Yoxanáni Kaléa ví ɔ ɖɔ nú Gedalíya ɖo nǔglɔ́ ɖo Misípa ɖɔ: “Un jló ná yi hu Isimayɛ́li Nɛtaníya ví ɔ; mɛ ɖěbǔ ná tuun ǎ. Mǐ ɖó ná jó è dó bɔ é ná hu we ǎ. É ma nyí mɔ̌ ǎ ɔ, togun Judáa tɔn e xo yěɖée kplé dó gɔ̌n towe é bǐ ná gba kpé, bɔ mɛ e kpo ɖo Judáa lɛ́ é ná dɔn.” 16 Amɔ̌, Gedalíya Axikámu ví ɔ ɖɔ nú Yoxanáni Kaléa ví ɔ ɖɔ: “Ma wa mɔ̌ ó, ɖó nǔ e ɖɔ dó Isimayɛ́li wú wɛ a ɖe é nyí nǔgbó ǎ.”