Jelemíi
39 Ðo axɔ́súɖuɖu Judáa xɔ́sú Sedesiyási tɔn sín xwe tɛ́nnɛgɔ́ ɔ mɛ, ɖo sun wǒgɔ́ ɔ mɛ ɔ, Babilɔ́nu xɔ́sú Nabukodonɔzɔ́ɔ* kpó ahwankpá tɔn bǐ kpó wá Jeluzalɛ́mu, bo ján go dó è.
2 Ðo axɔ́súɖuɖu Sedesiyási tɔn sín xwe 11gɔ́ ɔ mɛ, ɖo sun ɛnɛgɔ́ ɔ sín azǎn tɛ́nnɛgɔ́ ɔ gbe ɔ, yě tɔ́n ahohó toxo ɔ tɔn. 3 Babilɔ́nu xɔ́sú ɔ sín axɔ́ví lɛ́ bǐ byɔ́ toxo ɔ mɛ, bo jínjɔ́n hɔntogbó tɛ́ntinmɛ tɔn ɔ ta, yě wɛ nyí: Nɛɛgáli-Salɛsɛ́ɛ Samugáa ɔ, Nɛbu-Saasekímu Hlabusalísi ɔ,* Nɛɛgáli-Salɛsɛ́ɛ Hlabumági ɔ,* gɔ́ nú Babilɔ́nu xɔ́sú ɔ sín axɔ́ví e kpo lɛ́ é bǐ.
4 Ée Judáa xɔ́sú Sedesiyási kpó sɔ́ja tɔn lɛ́ bǐ kpó mɔ yě é ɔ, yě dɔn zǎn dó wǔ, bo gbɔn axɔ́sú ɔ sín jikpá mɛ, lobo hɔn tɔ́n sín toxo ɔ mɛ, yě gbɔn hɔntogbó e ɖo ahohó we lɛ́ tɛ́ntin é nu, lobo sɔ́ Alába sín ali ɔ ɖidó. 5 Amɔ̌, ahwankpá Kaludéenu lɛ́ tɔn kán wezun jɛ yě gúdo, bo xwedó Sedesiyási wú ɖo gbětótló Jelíko tɔn mɛ. Yě wlí i, bo kplá ɛ yi Babilɔ́nu xɔ́sú Nabukodonɔzɔ́ɔ* gɔ́n ɖo Hlibla ɖo Hamáti to mɛ, bɔ é ɖó hwɛ n’i ɖo fínɛ́. 6 Babilɔ́nu xɔ́sú ɔ ɖe gbe bɔ è hu Sedesiyási sín vǐ lɛ́ ɖo nukún éɖésúnɔ* tɔn mɛ ɖo Hlibla fínɛ́. Babilɔ́nu xɔ́sú ɔ lɛ́ ɖe gbe bɔ è hu mɛ nukúnɖéjí Judáa tɔn lɛ́ bǐ. 7 Énɛ́ gúdo ɔ, é tɔ́n nukún Sedesiyási, bo wá sɔ́ ganvɔwlɔ dó blá ɛ, bá dó kplá ɛ yi Babilɔ́nu.
8 Énɛ́ gúdo ɔ, Kaludéenu lɛ́ dó axɔ́sú ɔ sín xwé* kpó togun ɔ sín xwé lɛ́ kpó zo, bo mu ahohó Jeluzalɛ́mu tɔn lɛ́. 9 Sɔ́ja e nɔ cɔ́ axɔ́sú ɔ lɛ́ é sín gǎn Nɛbuzaladáni kplá togun ɔ sín mɛ e kpo bɔ è jó dó nyi toxo ɔ mɛ lɛ́ é, mɛ e ko hɔn yi su i lɛ́ é kpó mɛ e kpo lɛ́ é bǐ kpó yi kannumɔgbénu ɖo Babilɔ́nu.
10 Amɔ̌, sɔ́ja e nɔ cɔ́ axɔ́sú ɔ lɛ́ é sín gǎn Nɛbuzaladáni jó Judáanu e jɛ hɛ̌n klókló lɛ́ é, ɛɛn, mɛ ɖěɖěe ma ɖó nǔtí ǎ lɛ́ é ɖé lɛ́ dó nyi to ɔ mɛ. Ðo gbe énɛ́ gbe ɔ, é lɛ́ ná yě vǐwungbo, bo lɛ́ ná yě gle bónú yě ná nɔ w’azɔ̌ ɖ’é mɛ.*
11 Énɛ́ gúdo ɔ, Babilɔ́nu xɔ́sú Nabukodonɔzɔ́ɔ* ɖe gbe élɔ́ lɛ́ nú sɔ́ja e nɔ cɔ́ axɔ́sú ɔ lɛ́ é sín gǎn Nɛbuzaladáni dó Jelemíi wú: 12 “Kplá ɛ, bo kpé nukún dó wǔ tɔn; ma wa nǔ nyanya ɖě n’i ó, é byɔ́ nǔ ɖěbǔ we hǔn, nǎ ɛ.”
13 Énɛ́ ɔ, sɔ́ja e nɔ cɔ́ axɔ́sú ɔ lɛ́ é sín gǎn Nɛbuzaladáni, Nɛbucazibáni Hlabusalísi ɔ,* Nɛɛgáli-Salɛsɛ́ɛ Hlabumági ɔ* kpó súnnu nukúnɖéjí Babilɔ́nu xɔ́sú ɔ tɔn lɛ́ bǐ kpó sɛ́ mɛ dó, 14 bɔ è yi kplá Jelemíi sín Sɔ́ja e nɔ cɔ́ axɔ́sú ɔ lɛ́ é sín kɔ́xota, bo sɔ́ ɛ dó alɔ mɛ nú Gedalíya Axikámu ví Cafáni vívú ɔ, bónú é ná kplá ɛ yi xwé tɔn gbe. Énɛ́ ɔ, Jelemíi nɔ togun ɔ mɛ.
15 Hwenu e Jelemíi ɖo glɔ̌nglɔ́n jí ɖo Sɔ́ja e nɔ cɔ́ axɔ́sú ɔ lɛ́ é sín kɔ́xota é ɔ, Jexóva ɖɔ n’i ɖɔ: 16 “Yi, bo ɖɔ nú Ebɛ́di-Mɛlɛ́ki, Etiopíinu ɔ ɖɔ: ‘Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Un ná bló bɔ xó e un ɖɔ dó toxo élɔ́ wú lɛ́ é ná jɛnu, awě ná xo è, é ná nyí nǔ ɖagbe ǎ; gbe énɛ́ gbe ɔ, nǔ ná nyí mɔ̌, bɔ a ná mɔ.”’
17 “‘Amɔ̌, un ná hwlɛ́n we ɖo azǎn énɛ́ gbe,’ wɛ Jexóva ɖɔ, ‘bɔ è ná jó we dó nyi mɛ e ɖi xɛsi ná wɛ a ɖe lɛ́ é lɔ mɛ ǎ.’
18 “‘Ðó é ɖo wɛn ɖɔ un ná bló bɔ a ná gán, a ná kú hwǐ kú ǎ. A ná hwlɛ́n gbɛ* hwiɖée tɔn gán,* ɖó a ɖeji dó wǔtu ce,’ wɛ Jexóva ɖɔ.”