Jelemíi
3 Mɛ lɛ́ nɔ kanbyɔ́ ɖɔ: “Ényí súnnu ɖé nya asi tɔn, bónú nyɔ̌nu ɔ yi, lobo yi da súnnu ɖěvo ɔ, é ɖó ná lɛ́ lɛ́ kɔ yi nyɔ̌nu énɛ́ gɔ́n wɛ a?”
To énɛ́ ná ko blí bǐ ǎ cé?
“A lɛ aga xá súnnu gěgé,
bɔ din ɔ, a ná lɛ́ kɔ wá gɔ̌n ce wɛ a?” wɛ Jexóva ɖɔ.
2 “Sɔ́ kɔ dó jǐ, bo kpɔ́n só kpɛví ɖěɖěe jí nǔɖé ma ɖe ǎ lɛ́ é.
Fítɛ́ ka kpo bɔ a ma mlɔ́ ayǐ xá súnnu ɖe ǎ?
A nɔ jínjɔ́n ayǐ ɖo ali lɛ́ tó, bo nɔ ɖo te kpɔ́n mɛ ɖěɖěe a nɔ lɛ aga xá lɛ́ é,
mɛ e nɔ ɖo yiyi kpé wɛ* ɖo gbětótló mɛ é ɖɔhun.
A nɔ ɖo to ɔ hɛn blí wɛ
kpó to e nya wɛ a ɖe é kpó, kpódó nǔnyanyawiwa towe kpán.
3 Énɛ́ wú wɛ è tɛ jǐ ɖaxó e nɔ ja xwaa é we,
bɔ xwejí ɖě sɔ́ ja ǎ.
A hɔ́n wun* nyɔ̌nu e nɔ nya to é ɖɔhun;
winnyá gbɛ́ huhu we.
4 Amɔ̌ din ɔ, a nɔ sú xó ylɔ́ mì,
bo nɔ ɖɔ: ‘Tɔ́ ce, a nyí hǎgbɛ́ ce sín wǐnnyáwínnyá mɛ ce!
5 A ná hɛn mɛ dó xomɛ káká sɔ́yi,
alǒ sin xomɛ dó mɛ tɛgbɛ wɛ a?’
Nǔ e ɖɔ wɛ a ɖe é nɛ́,
có a kpo ɖo nǔ nyanya e wú a kpé é bǐ wa wɛ.”
6 Ðo axɔ́sú Joziyási hwenu ɔ, Jexóva ɖɔ nú mì ɖɔ: “‘A ka mɔ nǔ e Izlayɛ́li gbejímanɔtɔ́ ɔ bló é a? É xá só e yi jǐ lɛ́ é bǐ jí, bo yi atín e vun ganjí lɛ́ é bǐ sá, bo ná dó nya to. 7 É wa nǔ énɛ́ lɛ́ bǐ có, un kpo ɖo ɖiɖɔ n’i wɛ ɖɔ é ní lɛ́ kɔ wá gɔ̌n ce, amɔ̌, é lɛ́ kɔ ǎ; bɔ Judáa kpo ɖo nɔví nyɔ̌nu tɔn mɛblɛ́tɔ́ énɛ́ kpɔ́n wɛ. 8 Ée un mɔ mɔ̌ é ɔ, un sɔ́ mɛgbígbɛ́wéma dó así nú Izlayɛ́li gbejímanɔtɔ́ ɔ, bo nya ɛ, ɖó afɔdógbě tɔn wútu. Amɔ̌, Judáa, nɔví nyɔ̌nu tɔn mɛblɛ́tɔ́ ɔ ɖi xɛsi ǎ; é lɔmɔ̌ tɔ́n bo yi nya to. 9 É mɔ ɖɔ to e nya wɛ émí ɖe é kún nylá ó, bo kpo ɖo to ɔ hɛn blí wɛ, lobo kpo ɖo afɔ dó gbě wɛ, gbɔn awǐnnya lɛ́ kpó atín lɛ́ kpó sinsɛn gblamɛ. 10 Nǔ énɛ́ lɛ́ bǐ jɛ có, nɔví nyɔ̌nu tɔn Judáa, mɛblɛ́tɔ́ ɔ lɛ́ kɔ wá gɔ̌n ce kpó ayi tɔn bǐ kpó ǎ, nukúnta kɛ́ɖɛ́ wɛ é wa mɔ̌ ɖe,’ wɛ Jexóva ɖɔ.”
11 Énɛ́ gúdo ɔ, Jexóva ɖɔ nú mì ɖɔ: “Izlayɛ́li gbejímanɔtɔ́ ɔ ɖe xlɛ́ ɖɔ émí* nyí nǔjlɔ́jlɔ́watɔ́ hú Judáa mɛblɛ́tɔ́ ɔ. 12 Yi, bo kpan nukɔn totaligbé, bo ɖɔ xó élɔ́ lɛ́:
“‘“Izlayɛ́li gǔfɔ́ndómawujítɔ́ è, lɛ̌ kɔ,” wɛ Jexóva ɖɔ.’ ‘“Un ná kpɔ́n we kpó xomɛsin kpó* ǎ, ɖó un ɖo gbejí,” wɛ Jexóva ɖɔ.’ ‘“Un ná hɛn we dó xomɛ káká sɔ́yi ǎ. 13 Yǐ gbe nú hwɛ towe kpowun, ɖó a fɔ́n gǔ dó Jexóva Mawu towe jí. A kpo ɖo ayǐ mlɔ́ xá* jǒnɔ lɛ́ wɛ ɖo atín e vun ganjí lɛ́ é bǐ sá, bo nɔ se tónú nú gbe ce ǎ,” wɛ Jexóva ɖɔ.’”
14 “Mi vǐ súnnu gǔfɔ́ndómawujítɔ́ lɛ́ mi, mi lɛ́ kɔ,” wɛ Jexóva ɖɔ. “Ðó un húzú gǎn mitɔn adodwé ɔ,* bɔ un ná sɔ́ mi, ɛɛn, un ná sɔ́ mɛ ɖokpó ɖo toxo ɖokpó ɖokpó mɛ, bo ná sɔ́ mɛ we ɖo xwédo ɖokpó ɖokpó mɛ, bo ná kplá mi wá Sinyɔ́ɔ. 15 Un ná ná mi lɛ̌ngbɔ́nyitɔ́ e ná wa nǔ sɔgbe xá jlǒ* ce lɛ́ é, bɔ yě ná ná nǔɖuɖu mi kpó nǔtuuntuun kpó, kpódó nukúnnúmɔjɛnǔmɛ kpán. 16 Ðo hwe énɛ́ nu ɔ, mi ná sukpɔ́ bo ná ná sínsɛ́n ɖo to ɔ mɛ,” wɛ Jexóva ɖɔ. “Yě sɔ́ ná ɖɔ: ‘Akɔjijɛgbá Jexóva tɔn!’ ɖě ǎ. É sɔ́ ná wá ayi mɛ nú mɛ ǎ, mɔ̌ jɛ́n yě ma ná flín, alǒ jɛ do tɔn ǎ é nɛ́, è ka sɔ́ ná bló ɖěvo ǎ. 17 Ðo hwe énɛ́ nu ɔ, yě ná ylɔ́ Jeluzalɛ́mu ɖɔ axɔ́súzinkpo Jexóva tɔn; bɔ è ná xo akɔta lɛ́ bǐ kplé ɖó kpɔ́ bónú yě ná kpa susu nú nyǐkɔ Jexóva tɔn ɖo Jeluzalɛ́mu, bɔ yě sɔ́ ná syɛ́n ta bo ná nɔ xwedó ayi nyanya yěɖésúnɔ tɔn ɖě ǎ.”
18 “Ðo azǎn énɛ́ lɛ́ gbe ɔ, akɔta Judáa tɔn kpó togun Izlayɛ́li tɔn kpó ná ɖi zɔnlin ɖó kpɔ́, yě ná zɔn kpɔ́ sín to e ɖo totaligbé é mɛ, bo ná yi to e un ná tɔ́gbó towe lɛ́ bɔ é nyí gǔ nú yě é mɛ. 19 Bɔ un lin nǔ gbɔn lě: ‘Xomɛ hun mì ɖɔ un sɔ́ we ɖó vǐ súnnu lɛ́ tɛ́ntin bo ná we to e nyɔ́ hú gǎn é, ɛɛn, gǔ e nyɔ́ ɖɛkpɛ hú gǎn ɖo akɔta lɛ́ tɛ́ntin é!’ Un lɛ́ lin ɖɔ a ná ylɔ́ mì ɖɔ ‘Tɔ́ ce!’ bo kún ná lɛ́ kɔ sín gǔdo ce ó. 20 ‘Nǔgbó ɔ, togun Izlayɛ́li tɔn è, lěe asi gbejímanɔtɔ́ ɖé nɔ jó asú* tɔn dó gbɔn é ɖɔhun ɔ, mɔ̌ wɛ hwi lɔ wa nǔ xá mì kpó gbejímanɔ kpó gbɔn,’ wɛ Jexóva ɖɔ.”
21 È ɖo gbe ɖé se sín só kpɛví e jí nǔɖé ma ɖe ǎ lɛ́ é jí wɛ,
avǐ e ya wɛ togun Izlayɛ́li tɔn ɖe é kpó vosisa tɔn kpó wɛ,
ɖó yě bló bɔ ali yětɔn gɔ́ndɔ́n;
yě wɔn Jexóva Mawu yětɔn.
22 “Mi vǐ súnnu gǔfɔ́ntɔ́ lɛ́ mi, mi lɛ́ kɔ.
Un ná gbɔ azɔn nú mi, bɔ mi sɔ́ ná nyí gǔfɔ́ntɔ́ ɖě ǎ.”
“Mǐ ɖíe! Mǐ wá gɔ̌n towe,
ɖó Jexóva è, hwi wɛ nyí Mawu mǐtɔn.
23 Nǔgbó ɔ, xwe e mǐ ɖu kpó zǐngídi kpó nú mawu ɖěvo lɛ́ ɖo só kpɛví lɛ́ kpó só ɖaxó lɛ́ kpó jí é ɔ, mǐɖée lɛ́ wɛ mǐ blɛ́.
Nǔgbó ɔ, Jexóva Mawu mǐtɔn wɛ ná hwlɛ́n Izlayɛ́li gán.
24 Amɔ̌, winnyánú ɔ* vɔ nǔ e tɔ́gbó mǐtɔn lɛ́ jɛ tagba bo wa sín wǐnnyáwínnyá mɛ mǐtɔn é,
lɛ̌ngbɔ́kpó yětɔn lɛ́ kpó kanlinhwan yětɔn lɛ́ kpó,
vǐ súnnu yětɔn lɛ́ kpó vǐ nyɔ̌nu yětɔn lɛ́ kpó.
25 Mi nú mǐ ní mlɔ́ winnyá mǐtɔn mɛ,
mi nú wi mǐtɔn e kɔ́n é ní cyɔ́n mǐ,
ɖó mǐ hu hwɛ dó Jexóva Mawu mǐtɔn,
mǐ kpó tɔ́gbó mǐtɔn lɛ́ kpó, sín wǐnnyáwínnyá mɛ mǐtɔn káká jɛ égbé,
bɔ mǐ se tónú nú Jexóva Mawu mǐtɔn sín gbe ǎ.”