Jelemíi

37 Axɔ́sú Sedesiyási Joziyási ví ɔ jɛ acɛ kpa jí dó Koníya* Yexoyakímu ví ɔ tɛnmɛ, ɖó Babilɔ́nu xɔ́sú Nabukodonɔzɔ́ɔ* sɔ́ ɛ axɔ́sú ɖo Judáa to mɛ. 2 Amɔ̌, é kpó mɛsɛntɔ́ tɔn lɛ́ kpó, kpó mɛ e ɖo to ɔ mɛ lɛ́ é kpó ɖótó xó e Jexóva ɖɔ gbɔn gbeyíɖɔ Jelemíi jí lɛ́ é ǎ.

3 Bɔ axɔ́sú Sedesiyási sɛ́ Yexukáli Cɛlɛmíya ví ɔ kpó Sofoníi Maaséya vɔ̌sánúxwlémawutɔ́ ɔ sín vǐ kpó dó gbeyíɖɔ Jelemíi, bo ɖɔ: “Kɛnklɛ́n, xo ɖɛ sɛ́ dó Jexóva Mawu mǐtɔn dó ta mǐtɔn mɛ.” 4 Jelemíi vo bo nɔ ɖo yiyi wɛ, bo nɔ ɖo wǐwá wɛ ɖo togun ɔ tɛ́ntin, ɖó è ko wlí i dó gankpá mɛ hwenɛ́nu ǎ. 5 Din ɔ, ahwankpá Falawɔ́ɔn tɔn gosín Ejípu jawě, bɔ Kaludéenu e ján go dó Jeluzalɛ́mu lɛ́ é se. Énɛ́ wú ɔ, Kaludéenu lɛ́ dó gǔdofɔ. 6 Énɛ́ gúdo ɔ, Jexóva ɖɔ xó nú gbeyíɖɔ Jelemíi, bo ɖɔ: 7 “Nǔ e Jexóva, Mawu Izlayɛ́li tɔn ɖɔ é ɖíe: ‘Nǔ e mi ɖó ná ɖɔ nú Judáa xɔ́sú e sɛ́ mi dó ɖɔ mi ní wá kan nǔ byɔ́ mì é ɖíe: “Ahwankpá Falawɔ́ɔn tɔn e ja alɔ dó mi gbé é ná lɛ́ kɔ yi to tɔn mɛ, ɖo Ejípu. 8 Bɔ Kaludéenu lɛ́ ná lɛ́ kɔ wá, ná tɔ́n ahwan toxo élɔ́, bo ná yí, lobo sɔ́ myɔ dó fyɔ́.” 9 Nǔ e Jexóva ɖɔ é ɖíe: “Mi ma blɛ́ miɖée bo ɖɔ: ‘É ɖo wɛn ɖɔ Kaludéenu lɛ́ ná lɛ́ kɔ sín mǐ gúdo’ ó, ɖó yě ná lɛ́ kɔ ǎ. 10 Ényí mi tlɛ ɖu ɖo ahwankpá Kaludéenu lɛ́ tɔn e wá tɔ́n ahwan mi é blěbú jí, bɔ mɛ yětɔn e gblé wǔ lɛ́ é kɛ́ɖɛ́ jɛ́n kpo ɔ, yě ná lɛ́ sí te sín goxɔ yětɔn lɛ́ mɛ, bo ná sɔ́ myɔ dó fyɔ́ toxo élɔ́.”’”

11 Hwenu e ahwankpá Kaludéenu lɛ́ tɔn jó Jeluzalɛ́mu dó, ɖó ahwankpá Falawɔ́ɔn tɔn wútu é ɔ, 12 Jelemíi tɔ́n sín Jeluzalɛ́mu, bo ná yi Bɛnjamɛ́ɛ yíkúngban jí, bo ná yí kanta tɔn ɖo togun tɔn mɛ. 13 Amɔ̌, hwenu e gbeyíɖɔ Jelemíi jɛ Bɛnjamɛ́ɛ hɔntogbó ɔ ta é ɔ, Yilíya Cɛlɛmíya ví, Hananíya vívú, éé ɖo nǔcɔ́tɔ́ lɛ́ nu é wlí i, bo ɖɔ: “A hɔn xwe Kaludéenu lɛ́ gɔ́n!” 14 Jelemíi ka ɖɔ: “Adingban wɛ! Un hɔn xwe Kaludéenu lɛ́ gɔ́n ǎ.” Amɔ̌, é ɖótó Jelemíi ǎ. Énɛ́ ɔ, Yilíya wlí Jelemíi, bo kplá ɛ yi jó nú axɔ́ví lɛ́. 15 Axɔ́ví lɛ́ sin xomɛ dó Jelemíi syɛ́nsyɛ́n, bo xo è, lobo sú i dó gan mɛ* ɖo Yexonatáni wěgbójínɔtɔ́ ɔ sín xwé e è sɔ́ dó húzú gankpá é gbe. 16 È sɔ́ Jelemíi dó gankpá do glɔ́ tɔn ɖé mɛ,* ɖo gankpá ɔ sín xɔ kpɛví lɛ́ ɖokpó mɛ, bɔ é nɔ fínɛ́ xɔ azǎn gěgé.

17 Axɔ́sú Sedesiyási sɛ́ wɛn dó è bɔ é wá, bɔ axɔ́sú ɔ kan nǔ byɔ́ ɛ ɖo nǔglɔ́ ɖo xwé tɔn gbe.* É kanbyɔ́ ɖɔ: “Jexóva ɖɔ xó ɖě ǎ é?” Jelemíi ɖɔ: “Ɛɛn, é ɖɔ xó!” Bɔ é ɖɔ gɔ́ ná ɖɔ: “È ná jó we dó nyi alɔ mɛ nú Babilɔ́nu xɔ́sú ɔ!”

18 Jelemíi lɛ́ ɖɔ nú axɔ́sú Sedesiyási ɖɔ: “Hwɛ tɛ́ un ka hu dó hwi kpó mɛsɛntɔ́ towe lɛ́ kpó, kpódó togun élɔ́ kpán, bɔ mi sú mì dó gankpá mɛ? 19 Din ɔ, fítɛ́ gbeyíɖɔ e wa gbeyíɖɔzɔ́ dó ta mitɔn mɛ bo ɖɔ: ‘Babilɔ́nu xɔ́sú ɔ ná wá tɔ́n ahwan mi kpó to élɔ́ kpó ǎ’ lɛ́ é ka ɖe? 20 Aklúnɔ ce axɔ́sú è, din ɔ, kɛnklɛ́n, ɖǒtó. Kɛnklɛ́n bo ɖótó vo e sa nú we wɛ un ɖe é. Ma lɛ́ kɔ nú mì yi Yexonatáni wěgbójínɔtɔ́ ɔ sín xwégbe ó, é ma nyí mɔ̌ ǎ ɔ, un ná kú ɖo fínɛ́.” 21 Énɛ́ ɔ, axɔ́sú Sedesiyási ɖe gbe ɖɔ è ní sú Jelemíi dó gankpá mɛ ɖo Sɔ́ja e nɔ cɔ́ axɔ́sú ɔ lɛ́ é sín kɔ́xota, bo nɔ hɛn wɔ̌xúxú tobotobo wá n’i sín wɔ̌xúxúɖatɔ́ lɛ́ sín toxomɛli jí, káká jɛ hwenu e wɔ̌xúxú lɛ́ bǐ ná vɔ ɖo toxo ɔ mɛ é. Énɛ́ ɔ, Jelemíi cí Sɔ́ja e nɔ cɔ́ axɔ́sú ɔ lɛ́ é sín kɔ́xota.