Jelemíi

36 Din ɔ, ɖo axɔ́súɖuɖu Judáa xɔ́sú Yexoyakímu Joziyási ví ɔ tɔn sín xwe ɛnɛgɔ́ ɔ mɛ ɔ, Jexóva ɖɔ xó élɔ́ nú Jelemíi: 2 “Sɔ́ wěma mlámlá ɖokpó, bo wlán xó e un ko ɖɔ nú we dó Izlayɛ́li, Judáa kpó akɔta lɛ́ bǐ kpó wú, sín azǎn nukɔntɔn e gbe un ɖɔ xó nú we ɖo Joziyási hwenu é káká jɛ égbé é bǐ d’é jí. 3 Vlafo hwenu e mɛ ɖěɖěe ɖo akɔta Judáa tɔn mɛ lɛ́ é ná se awě e un lin ná sɔ́ dó xo yě lɛ́ é bǐ é ɔ, yě sixú lɛ́ kɔ sín ali nyanya yětɔn lɛ́ jí, bónú má dó sixú sɔ́ nǔwanyido yětɔn kpó hwɛ yětɔn kpó kɛ yě.”

4 Énɛ́ ɔ, Jelemíi ylɔ́ Balúki Nɛlíya ví ɔ, bo ɖɔ xó e Jexóva ko ɖɔ n’i lɛ́ é bǐ n’i, bɔ Balúki wlán dó wěma mlámlá ɔ jí. 5 Énɛ́ gúdo ɔ, Jelemíi ɖɔ nú Balúki ɖɔ: “È yí gbe bónú má byɔ́ xwé Jexóva tɔn gbe ǎ. 6 Énɛ́ wú ɔ, hwi wɛ ɖó ná xa xó Jexóva tɔn e a se ɖo nu ce, bo wlán dó wěma mlámlá ɔ jí é d’aga. Xa xó énɛ́ lɛ́ dó togun ɔ tó mɛ, ɖo xwé Jexóva tɔn gbe ɖo nubláblázángbe; mɔ̌ mɛ ɔ, a ná xa xó énɛ́ lɛ́ nú Judáanu e gosín toxo yětɔn lɛ́ mɛ, bo wá fínɛ́ lɛ́ é. 7 Vlafo vosisa yětɔn ná hun káká yi Jexóva gɔ́n, bɔ yě mɛ ɖokpó ɖokpó ná lɛ́ kɔ sín ali nyanya yětɔn lɛ́ jí, ɖó xomɛ e Jexóva sin dó togun énɛ́ é kpó adǎn e jí é ɖe ɖó togun énɛ́ wú é kpó syɛ́n.”

8 Énɛ́ ɔ, Balúki Nɛlíya ví ɔ wa nǔ e gbeyíɖɔ Jelemíi ɖe gbe tɔn n’i lɛ́ é bǐ; é xa xó Jexóva tɔn e ɖo wěma mlámlá ɔ mɛ lɛ́ é d’aga ɖo xwé Jexóva tɔn gbe.

9 Din ɔ, ɖo axɔ́súɖuɖu Judáa xɔ́sú Yexoyakímu Joziyási ví ɔ tɔn sín xwe atɔ́ɔ́ngɔ́ ɔ mɛ, ɖo sun tɛ́nnɛgɔ́ ɔ mɛ ɔ, è jlá ɖɔ togun Jeluzalɛ́mu tɔn ɔ bǐ kpó mɛ e ɖo toxo Judáa tɔn lɛ́ mɛ, bo wá Jeluzalɛ́mu lɛ́ é bǐ kpó ɖó ná blá nu ɖo Jexóva nukɔn. 10 Énɛ́ ɔ, Balúki xa xó Jelemíi tɔn e ɖo wěma mlámlá ɔ mɛ lɛ́ é d’aga, dó togun ɔ bǐ sín tó mɛ ɖo xwé Jexóva tɔn gbe, ɖo Gemalíya Cafáni nǔvɔ́wlántɔ́ ɔ sín vǐ sín xɔ* mɛ, ɖo kɔ́xota aga tɔn e ɖo xwé Jexóva tɔn sín hɔntogbó yɔ̌yɔ́ ɔ sín alihɛ́nnu é.

11 Hwenu e Mikáya Gemalíya ví, Cafáni vívú ɔ se xó Jexóva tɔn e ɖo wěma mlámlá ɔ mɛ lɛ́ é bǐ é ɔ, 12 é jɛ te yi axɔ́sú ɔ sín xwégbe* ɖo wěgbójínɔtɔ́ ɔ sín xɔ mɛ. Axɔ́ví lɛ́* bǐ ɖo ayǐjínjɔ́n ɖo fínɛ́: Elicáma wěgbójínɔtɔ́ ɔ, Deláya Cemáya ví ɔ, Ɛlunatáni Akubɔ́ɔ ví ɔ, Gemalíya Cafáni ví ɔ, Sedesiyási Hananíya ví ɔ kpó axɔ́ví ɖěvo lɛ́ bǐ kpó. 13 Mikáya ɖɔ nǔ e é se hwenu e Balúki xa wěma mlámlá ɔ dó togun ɔ tó mɛ é bǐ nú yě.

14 Énɛ́ ɔ, axɔ́ví lɛ́ bǐ sɛ́ Yexúdi Nɛtaníya ví, Cɛlɛmíya vívú, Kúci vivú vívú ɔ dó Balúki, bo ɖɔ: “Sɔ́ wěma mlámlá e a xa dó togun ɔ tó mɛ é, bo wá.” Balúki Nɛlíya ví ɔ sɔ́ wěma mlámlá ɔ, bo yi yě gɔ́n. 15 Yě ɖɔ n’i ɖɔ: “Kɛnklɛ́n jínjɔ́n ayǐ, bo xa d’aga nú mǐ.” Énɛ́ ɔ, Balúki xa nú yě.

16 Tlóló e yě se xó énɛ́ lɛ́ bǐ é ɔ, yě kpɔ́n yěɖée lɛ́ kpó adohu adohu kpó, bo ɖɔ nú Balúki ɖɔ: “Mǐ ɖó ná ɖɔ xó énɛ́ lɛ́ bǐ nú axɔ́sú ɔ.” 17 Bɔ yě kanbyɔ́ Balúki ɖɔ: “Kɛnklɛ́n, ɖɔ nú mǐ, nɛ̌ a ka wlán xó énɛ́ lɛ́ bǐ gbɔn? Jelemíi wɛ ɖɔ hwi ní wlán nǔ énɛ́ lɛ́ bǐ a?” 18 Balúki yí gbe nú yě ɖɔ: “Éyɛ́ wɛ ɖɔ xó énɛ́ lɛ́ bǐ nú mì, bɔ un wlán kpó wěmasin kpó dó wěma mlámlá élɔ́ mɛ.” 19 Axɔ́ví lɛ́ ɖɔ nú Balúki ɖɔ: “Hwi kpó Jelemíi kpó ní yi hwlá miɖée, bo ma lɔn nú mɛ ɖěbǔ ní tuun fí e mi ɖe é ó.”

20 Énɛ́ ɔ, yě yi axɔ́sú ɔ gɔ́n ɖo kɔ́xota ɔ, bo sɔ́ wěma mlámlá ɔ ɖó Elicáma wěgbójínɔtɔ́ ɔ sín xɔ mɛ, lobo ɖɔ nǔ e yě se lɛ́ é bǐ nú axɔ́sú ɔ.

21 Énɛ́ ɔ, axɔ́sú ɔ sɛ́ Yexúdi dó ɖɔ é ní yi sɔ́ wěma mlámlá ɔ, bɔ é yi sɔ́ ɖo Elicáma wěgbójínɔtɔ́ ɔ sín xɔ mɛ. Yexúdi jɛ wěma mlámlá ɔ xa jí dó axɔ́sú ɔ kpó axɔ́ví e ɖo te ɖo axɔ́sú ɔ kpá lɛ́ é bǐ kpó tó mɛ. 22 Axɔ́sú ɔ ɖo ayǐjínjɔ́n ɖo xwé e gbe é nɔ nɔ ɖo avivɔhwenu é ɖo sun tɛ́nnɛgɔ́ ɔ* mɛ, bɔ adogwle e mɛ myɔ ɖo jiji ɖe wɛ é ɖokpó ɖo nukɔn tɔn. 23 Ényí Yexúdi xa akpáxwé atɔn, alǒ ɛnɛ gúdo ɔ, axɔ́sú ɔ nɔ sɔ́ wěgbójínɔtɔ́ ɔ sín jivǐ dó sɛ́n akpáxwé énɛ́, bo nɔ nyi dó myɔ e ɖo jiji wɛ ɖo adogwle ɔ mɛ é mɛ, káká bɔ wěma mlámlá ɔ blěbú ji kɛn ɖo adogwle ɔ mɛ. 24 Ado hu yě ɖěbǔ ǎ; axɔ́sú ɔ alǒ mɛsɛntɔ́ tɔn e se xó énɛ́ lɛ́ é ɖěbǔ vún awu dó kɔ nú yěɖée ǎ. 25 Ɛlunatáni, Deláya kpó Gemalíya kpó sa vo nú axɔ́sú ɔ ɖɔ é ní ma dó wěma mlámlá ɔ zo ó có, é ka ɖótó yě ǎ. 26 Gɔ́ ná ɔ, axɔ́sú ɔ ɖe gbe nú axɔ́sú ɔ sín vǐ Yelaximeɛ́li, Seláya Azliɛ́li ví ɔ kpó Cɛlɛmíya Abudeɛ́li ví ɔ kpó ɖɔ yě ní wlí Balúki wěgbójínɔtɔ́ ɔ kpó Jelemíi gbeyíɖɔ ɔ kpó, amɔ̌, Jexóva sɔ́ yě hwlá.

27 Ée axɔ́sú ɔ dó wěma mlámlá e mɛ xó e Jelemíi ɖɔ bɔ Balúki wlán lɛ́ é ɖe é zo gúdo é ɔ, Jexóva lɛ́ ɖɔ xó nú Jelemíi, bo ɖɔ: 28 “Sɔ́ wěma mlámlá ɖěvo, bo wlán xó ɖokpó ɔ e ɖo wěma mlámlá nukɔntɔn e Judáa xɔ́sú Yexoyakímu dó zo é jí lɛ́ é bǐ d’é jí. 29 Bɔ a ɖó ná ɖɔ dó Judáa xɔ́sú Yexoyakímu wú ɖɔ: ‘Nǔ e Jexóva ɖɔ é ɖíe: “A dó wěma mlámlá élɔ́ zo, bo ɖɔ: ‘Étɛ́wú a ka wlán d’é jí ɖɔ: “É ɖo wɛn ɖɔ Babilɔ́nu xɔ́sú ɔ ná wá, bo ná sú kún dó nú to élɔ́, lobo ná ɖe gbɛtɔ́ kpó kanlin kpó bǐ sín mɛ”?’ 30 Énɛ́ wú ɔ, nǔ e Jexóva ɖɔ dó Judáa xɔ́sú Yexoyakímu wú é ɖíe: ‘Mɛ ɖěbǔ ná gosín kúnkan tɔn mɛ bo ná jínjɔ́n axɔ́súzinkpo Davídi tɔn jí ǎ, bɔ è ná jó cyɔ tɔn dó nyi yǒzo nu ɖo kéze, bo ná jó dó nyi fífá nu ɖo zǎnmɛ. 31 Un ná byɔ́ é kpó kúnkan tɔn lɛ́ kpó, kpódó mɛsɛntɔ́ tɔn lɛ́ kpán ɖɔ yě ní ɖó nǔwanyido yětɔn sín gbe; awě e un ɖɔ un ná sɔ́ dó xo yě lɛ́ é bǐ ɔ, un ná sɔ́ dó xo yě, bo ná lɛ́ sɔ́ dó xo mɛ e nɔ nɔ Jeluzalɛ́mu lɛ́ é kpó súnnu Judáa tɔn lɛ́ kpó, ɖó yě ɖótó mì ǎ wútu.’”’”

32 Énɛ́ ɔ, Jelemíi sɔ́ wěma mlámlá ɖěvo, bo sɔ́ jó nú Balúki Nɛlíya ví wěgbójínɔtɔ́ ɔ, bɔ Jelemíi ɖɔ xó e ɖo wěma mlámlá e Judáa xɔ́sú Yexoyakímu dó zo lɛ́ é jí é n’i, bɔ é wlán d’é jí. Bɔ è gɔ́ xó mɔ̌hun gěgé ɖěvo lɛ́ ná.