Jelemíi

35 Jexóva ɖɔ xó nú Jelemíi ɖo Judáa xɔ́sú Yexoyakímu Joziyási ví ɔ hwenu, bo ɖɔ: 2 “Yi Hlekábu ví lɛ́ xwé, bo ɖɔ xó xá yě; kplá yě byɔ́ xwé Jexóva tɔn gbe, bónú mi byɔ́ xɔ e mɛ è nɔ ɖu nǔ ɖe lɛ́ é ɖokpó* mɛ; énɛ́ gúdo hǔn, xwlé vɛ̌ɛn yě.”

3 Énɛ́ ɔ, un kplá Yaazaníya Jelemíi ví, Habasiníya vívú ɔ, nɔví tɔn súnnu lɛ́, vǐ tɔn lɛ́ bǐ kpó xwédo Hlekábu ví lɛ́ tɔn blěbú kpó 4 byɔ́ xwé Jexóva tɔn gbe. Un kplá yě yi xɔ e mɛ mɛsɛntɔ́ Mawu nǔgbó ɔ tɔn Hanáa, éé nyí Yigidalíya ví é sín vǐ lɛ́ nɔ ɖu nǔ ɖe é mɛ; xɔ énɛ́ ɖo xɔ e mɛ axɔ́ví lɛ́ nɔ ɖu nǔ ɖe, bɔ é ɖo aga nú xɔ e mɛ hɔnjínɔtɔ́ Maaséya Calúmu ví ɔ nɔ ɖu nǔ ɖe é kpá. 5 Énɛ́ gúdo ɔ, un fɔ kɔ́fu kpó gannú kpó e mɛ vɛ̌ɛn gɔ́ é ɖó súnnu e ɖo xwédo Hlekábu ví lɛ́ tɔn mɛ lɛ́ é nukɔn, bo ɖɔ nú yě ɖɔ: “Mi nu vɛ̌ɛn.”

6 Amɔ̌, yě ɖɔ: “Mǐ ná nu vɛ̌ɛn ǎ, ɖó tɔ́gbó mǐtɔn Jonadábu Hlekábu ví ɔ ɖe gbe élɔ́ nú mǐ: ‘Mi kpó vǐ mitɔn lɛ́ kpó ɖě ɖó ná nu vɛ̌ɛn gbeɖé ǎ. 7 Mi ɖó ná gbá xwé, dó nǔkún, tun atín, alǒ ɖó vǐwungbo ǎ. É nyɔ́ wa ɔ, goxɔ lɛ́ mɛ wɛ mi ɖó ná nɔ nɔ hwebǐnu, énɛ́ ɔ, mi ná dɔ́ ji ɖo to e mɛ mi nyí jǒnɔ ɖe é mɛ.’ 8 Énɛ́ wú ɔ, mǐ kpo ɖo tónú se nú gbe e Jonadábu, tɔ́gbó mǐtɔn Hlekábu ví ɔ ɖe nú mǐ lɛ́ é bǐ wɛ, bo nɔ nu vɛ̌ɛn ɖě gbeɖé ǎ, mǐ kpó asi mǐtɔn lɛ́ kpó, gɔ́ nú vǐ súnnu mǐtɔn lɛ́ kpó vǐ nyɔ̌nu mǐtɔn lɛ́ kpó. 9 Mǐ sá xwé bo nɔ gbe ǎ, mɔ̌ jɛ́n mǐ ma ɖó vǐwungbo, gle, kabǐ nǔkún ǎ é nɛ́. 10 Mǐ kpo ɖo goxɔ lɛ́ mɛ nɔ wɛ, bo kpo ɖo tónú se nú nǔ e tɔ́gbó mǐtɔn Jonadábu ɖe gbe tɔn nú mǐ lɛ́ é bǐ wɛ. 11 Amɔ̌, hwenu e Babilɔ́nu xɔ́sú Nabukodonɔzɔ́ɔ* wá tɔ́n ahwan to ɔ é ɔ, mǐ ɖɔ: ‘Mi wá, mi nú mǐ ní yi Jeluzalɛ́mu bá dó gló ahwankpá Kaludéenu lɛ́ kpó Silíinu lɛ́ kpó tɔn,’ bɔ din ɔ, mǐ ɖo Jeluzalɛ́mu.”

12 Jexóva ɖɔ xó nú Jelemíi, bo ɖɔ: 13 “Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Mi yi, bo ɖɔ nú togun Judáa tɔn kpó mɛ e nɔ nɔ Jeluzalɛ́mu lɛ́ é kpó ɖɔ: “Un nɔ dó wǔsyɛ́n lanmɛ nú mi hwebǐnu ɖɔ mi ní se tónú nú xó ce lɛ́ ǎ cé?” wɛ Jexóva ɖɔ. 14 “Jonadábu Hlekábu ví ɔ ɖe gbe nú kúnkan tɔn lɛ́ ɖɔ yě ní ma nu vɛ̌ɛn ó, bɔ yě xwedó xó tɔn, bo nɔ nu vɛ̌ɛn ǎ káká jɛ égbé, bɔ mɔ̌ mɛ ɔ, yě se tónú nú gbe e tɔ́gbó yětɔn ɖe nú yě é. Nyɛ ka ɖɔ xó nú mi azɔn gěgé,* é ɖo mɔ̌ có, mi se tónú nú mì ǎ. 15 Un nɔ fɔ́n bo nɔ ɖo mɛsɛntɔ́ ce gbeyíɖɔ lɛ́ bǐ sɛ́ dó mi wɛ, un sɛ́ yě dó azɔn gěgé,* bo nɔ ɖɔ: ‘Mi lɛ́ kɔ, mi kɛnklɛ́n, mi mɛ ɖokpó ɖokpó ní jó ali nyanya e jí é ɖe é dó, bo wa nǔ e sɔgbe é! Mi ma xwedó mawu ɖěvo lɛ́, bo sɛn yě ó. Énɛ́ ɔ, mi ná kpo ɖo to e un ná mi kpó tɔ́gbó mitɔn lɛ́ kpó é mɛ nɔ wɛ.’ Amɔ̌, mi tɛ́ tó, alǒ ɖótó mì ǎ. 16 Kúnkan Jonadábu Hlekábu ví ɔ tɔn lɛ́ xwedó gbe e tɔ́gbó yětɔn ɖe nú yě é, togun élɔ́ ka ɖótó nyɛ ǎ.”’”

17 “Énɛ́ wú ɔ, nǔ e Jexóva, Mawu ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Awěxomɛ e sín akpá un gba nú Judáa kpó mɛ e nɔ nɔ Jeluzalɛ́mu lɛ́ é bǐ kpó é bǐ ɔ, un ná sɔ́ dó xo yě, ɖó un ɖɔ xó nú yě, yě ka ɖótó mì ǎ, un nɔ fɔ́n bo nɔ ɖo yě ylɔ́ wɛ, yě ka sɔ ǎ.’”

18 Jelemíi ɖɔ nú xwédo Hlekábu ví lɛ́ tɔn ɖɔ: “Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Ðó mi se tónú nú gbe e tɔ́gbó mitɔn Jonadábu ɖe nú mi é, bo kpo ɖo gbeɖiɖe tɔn lɛ́ bǐ xwedó wɛ, bo nɔ wa nǔ e sín gbe é ɖe nú mi lɛ́ é bǐ pɛ́pɛ́pɛ́ wútu ɔ, 19 nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: “Kúnkan Jonadábu Hlekábu ví ɔ tɔn e ná wa sinsɛnzɔ́ ɖo nukɔn ce é ná hán gbeɖé ǎ.”’”