Jelemíi

34 Hwenu e Babilɔ́nu xɔ́sú Nabukodonɔzɔ́ɔ,* ahwankpá tɔn lɛ́ bǐ, axɔ́súɖuto ayǐkúngban jí tɔn e ɖo acɛ tɔn glɔ́ lɛ́ é bǐ kpó togun lɛ́ bǐ kpó ɖo ahwan fun xá Jeluzalɛ́mu kpó toxo tɔn lɛ́ bǐ kpó wɛ é ɔ, xó e Jexóva ɖɔ nú Jelemíi é ɖíe:

2 “Nǔ e Jexóva, Mawu Izlayɛ́li tɔn ɖɔ é ɖíe: ‘Yi, bo ɖɔ xó nú Judáa xɔ́sú Sedesiyási; ɖɔ n’i ɖɔ: “Nǔ e Jexóva ɖɔ é ɖíe: ‘Un ná jó toxo élɔ́ dó nyi Babilɔ́nu xɔ́sú ɔ sín alɔ mɛ, bɔ é ná sɔ́ myɔ dó fyɔ́ ɛ. 3 A ná sún gló è ǎ, ɖó è ná wlí we jɛ́n wɛ, bo ná sɔ́ we dó alɔ mɛ n’i. A ná mɔ Babilɔ́nu xɔ́sú ɔ tlɔlɔ, bɔ hwi kpó é kpó ná kpé nu bo ɖɔ xó, lobɔ a ná yi Babilɔ́nu.’ 4 É ɖo mɔ̌ có, Judáa xɔ́sú Sedesiyási è, ɖǒtó xó e Jexóva ɖɔ é: ‘Nǔ e Jexóva ɖɔ dó wǔtu towe é ɖíe: “A ná kú hwǐ kú ǎ. 5 A ná kú ma mɔ wǔvɛ́, bɔ è ná dó nǔhwɛ́nkún zo dó ɖi we, lěe è bló gbɔn nú tɔ́gbó towe e nyí axɔ́sú jɛ nukɔn nú we lɛ́ é, bɔ è ná ná alě, bo ná ɖɔ: ‘Áo, gǎn mǐtɔn è!’ Ðó ‘nyi wɛ ɖɔ xó,’ wɛ Jexóva ɖɔ.”’”’”

6 Énɛ́ gúdo ɔ, gbeyíɖɔ Jelemíi ɖɔ xó énɛ́ lɛ́ bǐ nú Judáa xɔ́sú Sedesiyási ɖo Jeluzalɛ́mu, 7 hwenu e Babilɔ́nu xɔ́sú ɔ sín ahwankpá lɛ́ ɖo ahwan fun xá Jeluzalɛ́mu kpó toxo Judáa tɔn e kpo lɛ́ é bǐ kpó wɛ é, énɛ́ wɛ nyí xá Lakíci kpó Azéka kpó; ɖó toxo énɛ́ lɛ́ kɛ́ɖɛ́ wɛ nyí toxo e è mɛ ahohó lɛ́ lɛ̌ dó, bɔ yě kpo ɖo toxo Judáa tɔn lɛ́ mɛ é.

8 Jexóva ɖɔ xó nú Jelemíi, hwenu e axɔ́sú Sedesiyási jɛ akɔ xá togun e ɖo Jeluzalɛ́mu lɛ́ é bǐ, ɖɔ yě ná ɖe kannumɔ lɛ́ nyi te é gúdo é. 9 Mɛ ɖokpó ɖokpó ɖó ná ɖe kannumɔ tɔn Eblée lɛ́ nyi te, súnnu kpó nyɔ̌nu kpó, bɔ mɔ̌ mɛ ɔ, mɛ ɖěbǔ sɔ́ ná sɔ́ Jwifu hǎtɔ́ tɔn dó ɖó kannumɔ ǎ. 10 Énɛ́ ɔ, axɔ́ví lɛ́ bǐ kpó togun ɔ bǐ kpó se tónú. Yě jɛ akɔ ɖɔ mɛ bǐ ɖó ná ɖe kannumɔ súnnu kpó nyɔ̌nu kpó nyi te, bo kún sɔ́ ná sɔ́ yě dó ɖó kannumɔ ɖě ó. Yě se tónú, bo jó kannumɔ lɛ́ dó bɔ yě yi. 11 É ɖo mɔ̌ có, nukɔnmɛ ɔ, yě lɛ́ kɔ nú kannumɔ súnnu kpó nyɔ̌nu kpó e yě jó lɛ́ é, bo lɛ́ sɔ́ yě dó ɖó kannumɔ gǎnnugǎnnu. 12 Énɛ́ wú ɔ, Jexóva ɖɔ xó nú Jelemíi; xó e Jexóva ɖɔ é ɖíe:

13 “Nǔ e Jexóva, Mawu Izlayɛ́li tɔn ɖɔ é ɖíe: ‘Un jɛ akɔ ɖokpó xá tɔ́gbó mitɔn lɛ́ gbe e gbe un ɖe yě tɔ́n sín Ejípu to mɛ, sín to e mɛ yě nyí kannumɔ ɖe é, bo ɖɔ: 14 “Ðo xwe tɛ́nwe sín vivɔnu ɔ, mi mɛ ɖokpó ɖokpó ɖó ná jó nɔví mitɔn Eblée e è sa nú mi, bɔ é w’azɔ̌ nú mi nú xwe ayizɛ́n é.” Amɔ̌, tɔ́gbó mitɔn lɛ́ ɖótó mì, alǒ tɛ́ tó ǎ. 15 Bɔ agaɖanu din ɔ,* miɖésúnɔ lɛ́ kɔ bo wa nǔ e sɔgbe ɖo nukún ce mɛ é, énɛ́ wɛ nyí ɖɔ, mi ɖɔ ɖɔ émí ná jó kannumɔ émítɔn lɛ́, bɔ mi jɛ akɔ ɖo nukɔn ce, ɖo xwé e wú nyǐkɔ ce ɖe é gbe. 16 Amɔ̌, mi lɛ́ kɔ, bo hɛn nyǐkɔ ce blí, énɛ́ wɛ nyí ɖɔ, mi lɛ́ kɔ nú kannumɔ mitɔn súnnu kpó nyɔ̌nu kpó ɖěɖěe mi jó sɔgbe xá jlǒ* yětɔn lɛ́ é, bo lɛ́ sɔ́ yě dó ɖó kannumɔ gǎnnugǎnnu.’

17 “Énɛ́ wú ɔ, nǔ e Jexóva ɖɔ é ɖíe: ‘Mi se tónú nú mì hwenu e mi ɖɔ ɖɔ mi mɛ ɖokpó ɖokpó ná jó nɔví mitɔn, alǒ hǎgbɛ́ mitɔn e nyí kannumɔ é ǎ. Énɛ́ wú ɔ, un ná jó kan mi,’ wɛ Jexóva ɖɔ, ‘hwenu e hwǐ, jɛmɛjí* kpó adɔ kpó ná hu mi é, bɔ un ná bló bɔ mi ná húzú nǔ e xyɔ́ wǔ é nú axɔ́súɖuto ayǐkúngban jí tɔn lɛ́ bǐ. 18 Nǔ e ná gbo mɛ e gba akɔjijɛ ce lɛ́ é, énɛ́ wɛ nyí mɛ e má nyibúví ɖó we, bo gbɔn tɛ́ntin tɔn dó jɛ akɔ ɖo nukɔn ce, bo ma ka sɔ́ wa nǔ sɔgbe xá ǎ lɛ́ é ɖíe, 19 ɛɛn, nǔ e ná gbo axɔ́ví Judáa tɔn lɛ́, axɔ́ví Jeluzalɛ́mu tɔn lɛ́, axɔ́súzɔ́watɔ́ hɔnmɛ tɔn lɛ́, vɔ̌sánúxwlémawutɔ́ lɛ́ kpó mɛ e ɖo to ɔ mɛ, bo gbɔn nyibúví e è má ɖó we é tɛ́ntin lɛ́ é bǐ kpó é ɖíe: 20 un ná jó yě dó nyi alɔ mɛ nú kɛntɔ́ yětɔn lɛ́ kpó mɛ e ɖo biba ná hu yě wɛ lɛ́ é* kpó, bɔ cyɔ yětɔn lɛ́ ná húzú nǔɖuɖu nú xɛ e ɖo jǐnukúnsin lɛ́ é kpó kanlin e ɖo ayǐkúngban jí lɛ́ é kpó. 21 Bɔ un ná jó Judáa xɔ́sú Sedesiyási kpó axɔ́ví tɔn lɛ́ kpó nyi alɔ mɛ nú kɛntɔ́ yětɔn lɛ́ kpó mɛ e ɖo biba ná hu yě wɛ lɛ́ é* kpó sín alɔ mɛ, bo ná jó yě dó nyi Babilɔ́nu xɔ́sú ɔ sín ahwankpá e ɖo gǔdofɔ dó wɛ lɛ́ é sín alɔ mɛ.’

22 “‘Éɖíe, un ná ɖe gbe,’ wɛ Jexóva ɖɔ, ‘bo ná kplá yě lɛ́ kɔ wá toxo élɔ́ mɛ, bɔ yě ná tɔ́n ahwan toxo ɔ, yí, bo ná sɔ́ myɔ dó fyɔ́; un ná bló bɔ toxo Judáa tɔn lɛ́ ná jɛ vɔ̌, bɔ mɛ ɖě sɔ́ ná nɔ yě mɛ ǎ.’”