Jelemíi
33 Jexóva ɖɔ xó nú Jelemíi azɔn wegɔ́ ɔ, hwenu e é kpo ɖo glɔ̌nglɔ́n jí ɖo Sɔ́ja e nɔ cɔ́ axɔ́sú ɔ lɛ́ é sín kɔ́xota é, bo ɖɔ: 2 “Nǔ e Jexóva, mɛ e bló ayǐkúngban ɔ é, ɛɛn, Jexóva, mɛ e bló è, bo dó è do nyi dodónu syɛ́nsyɛ́n jí, bɔ nyǐkɔ tɔn nyí Jexóva é ɖɔ é ɖíe: 3 ‘Ylɔ̌ mì, énɛ́ ɔ, un ná sɔ nú we, bo ná ɖo gbesisɔmɛ bo ná ɖɔ nǔ ɖaxó kpó nǔ e mɛ è ma mɔ nukúnnú jɛ ǎ, bɔ a ma tuun ǎ lɛ́ é kpó nú we.’
4 “Ðó Jexóva, Mawu Izlayɛ́li tɔn ɖɔ xó dó toxo élɔ́ sín xwé lɛ́ kpó Judáa xɔ́sú lɛ́ sín xwé lɛ́ kpó, ɖěɖěe mɛ lɛ́ mu zin dɛ́, bo ná dó nya xɛ ɖo yěɖée jí sín ahohó e è mɛ lɛ́ lɛ̌ dó toxo ɔ dó ján go dó è lɛ́ é kpó hwǐ ɔ kpó sí é wú; 5 é lɛ́ ɖɔ xó dó mɛ ɖěɖěe jawě bo ná tɔ́n ahwan Kaludéenu lɛ́, bo bló bɔ mɛ e un ɖo xomɛsin kpó adǎn kpó jí bo hu lɛ́ é sín cyɔ kpé nɔtɛn élɔ́ lɛ́ é, ɛɛn, mɛ ɖěɖěe é sín nǔnyanyawiwa yětɔn wú, bɔ un hwlá nukúnmɛ ce dó toxo élɔ́ é lɛ́ é wú; nǔ e é ɖɔ é ɖíe: 6 ‘Un ná bló bɔ é ná lɛ́ jɛ ganjí, bo ná ɖó lanmɛ syɛ́n hunsin ɖagbe, lobɔ un ná gbɔ azɔn nú mɛ lɛ́, bo ná ná yě fífá kpó ayijayǐ* kpó bɔ é ná túnflá. 7 Un ná kplá Judáa sín mɛ e ɖo kannumɔgbénu lɛ́ é kpó Izlayɛ́li sín mɛ e ɖo kannumɔgbénu lɛ́ é kpó lɛ́ kɔ, bo ná bló bɔ yě ná lí dǒ lěe un bló gbɔn ɖo bǐbɛ́mɛ é. 8 Un ná lɛ yě wé sín hwɛ e yě nɔ dó yěɖée ɖó hwɛ e yě hu dó mì lɛ́ é wú é bǐ mɛ, un ná sɔ́ hwɛ e yě hu dó mì lɛ́ é kpó nǔ e yě wa nyi do dó mì lɛ́ é kpó bǐ kɛ yě. 9 Bɔ toxo ɔ ná húzú agbojlaka ɖúɖú sín nyǐkɔ ɖé, susu kpikpa ɖé kpó nǔ e nyɔ́ ɖɛkpɛ é ɖé kpó nú mì ɖo akɔta ayǐkúngban ɔ jí tɔn ɖěɖěe ná se nǔ ɖagbe e un wa nú yě lɛ́ é bǐ sín xó lɛ́ é bǐ nukɔn, bɔ xɛsi ná jɛ yě jí, bɔ yě ná sísɔ́ ɖó nǔ ɖagbe e un ná wa n’i lɛ́ é bǐ kpó fífá e un ná ná ɛ é kpó wútu.’”
10 “Nǔ e Jexóva ɖɔ é ɖíe: ‘Ðo nɔtɛn élɔ́ e mi ná ɖɔ ɖɔ é jɛ vɔ̌, bɔ gbɛtɔ́, alǒ kanlinhwan ɖě ma ɖe ǎ, ɖo toxo Judáa tɔn lɛ́ mɛ é kpó toxomɛli Jeluzalɛ́mu tɔn e jɛ vɔ̌, bɔ gbɛtɔ́, alǒ toví, alǒ kanlinhwan ɖě ma ɖe ǎ lɛ́ é jí kpó ɔ, è ná lɛ́ se 11 agbojlaka ɖúɖú sín gbe, awǎjijɛ sín xósúsú, asisúnɔ sín gbe, yawó sín gbe kpó mɛ e ɖo xó élɔ́ ɖɔ wɛ lɛ́ é sín gbe kpó: “Mi dó kú nú Jexóva ahwankpá lɛ́ tɔn, ɖó Jexóva nyɔ́; wǎnyíyí tɔn e ma nɔ sɛ do ǎ é ɖo te káká sɔ́yi!”’
“‘Yě ná hɛn nǔníná kúdídó tɔn lɛ́ wá xwé Jexóva tɔn gbe, ɖó un ná kplá to ɔ mɛ nu e ɖo kannumɔgbénu lɛ́ é lɛ́ kɔ, bɔ yě ná wá cí lěe yě ɖe gbɔn ɖo bǐbɛ́mɛ é,’ wɛ Jexóva ɖɔ.”
12 “Nǔ e Jexóva ahwankpá lɛ́ tɔn ɖɔ é ɖíe: ‘Ðo to élɔ́ e jɛ vɔ̌, bɔ gbɛtɔ́, alǒ kanlinhwan ma ɖ’é mɛ ǎ é kpó toxo tɔn lɛ́ bǐ kpó mɛ ɔ, è ná lɛ́ wá mɔ amagbo e mɛ lɛ̌ngbɔ́nyitɔ́ lɛ́ ná nɔ kplá lɛ̌ngbɔ́hwan yětɔn lɛ́ wá, bɔ yě ná gbɔjɛ ɖe lɛ́ é.’
13 “‘Ðo toxo e ɖo sókan mɛ lɛ́ é mɛ, ɖo toxo e ɖo tɔdo mɛ lɛ́ é mɛ, ɖo toxo e ɖo tofɔligbé lɛ́ é mɛ, ɖo Bɛnjamɛ́ɛ sín to mɛ, ɖo xá e lɛ́ lɛ̌ dó Jeluzalɛ́mu lɛ́ é mɛ kpó toxo Judáa tɔn lɛ́ mɛ kpó ɔ, lɛ̌ngbɔ́nyitɔ́ lɛ́ ná lɛ́ wá xa lɛ̌ngbɔ́ yětɔn lɛ́,’ wɛ Jexóva ɖɔ.”
14 “‘Éɖíe! Hwe ɔ nu jawě,’ wɛ Jexóva ɖɔ, ‘bɔ un ná ɖe akpá ɖagbe ɖagbe e un dó nú togun Izlayɛ́li tɔn kpó akɔta Judáa tɔn kpó é. 15 Ðo azǎn énɛ́ lɛ́ gbe, ɖo hwe énɛ́ nu ɔ, un ná bló bɔ nǔjlɔ́jlɔ́watɔ́ ɖokpó ná tɔ́n kun* ɖo kúnkan Davídi tɔn mɛ; é ná bló bɔ hwɛjijɔ kpó nǔjlɔ́jlɔ́wiwa kpó ná tíin ɖo to ɔ mɛ. 16 Ðo azǎn énɛ́ lɛ́ gbe ɔ, è ná hwlɛ́n Judáa gán, bɔ Jeluzalɛ́mu ná nɔ ayijayǐ mɛ. Lěe è ná nɔ ylɔ́ ɛ gbɔn é ɖíe: Jexóva gɔ́n wɛ nǔjlɔ́jlɔ́wiwa mǐtɔn gosín.’”
17 “Ðó nǔ e Jexóva ɖɔ é ɖíe: ‘Súnnu e ná gosín kúnkan Davídi tɔn mɛ, bo ná jínjɔ́n togun Izlayɛ́li tɔn sín axɔ́súzinkpo jí é ná hán gbeɖé ǎ, 18 mɔ̌ jɛ́n mɛ e ná nɔ te ɖo nukɔn ce bo ná xwlé nǔníná e è nɔ dó blěbú tɔn zo lɛ́ é Mawu, bo ná dó nǔníná jinukún tɔn lɛ́ zo, lobo ná xwlé vɔ̌sánú lɛ́ Mawu é ma ná hán gbeɖé ɖo Levíi ví vɔ̌sánúxwlémawutɔ́ lɛ́ mɛ ǎ é nɛ́.’”
19 Jexóva lɛ́ ɖɔ xó nú Jelemíi, bo ɖɔ: 20 “Nǔ e Jexóva ɖɔ é ɖíe: ‘Ényí mi sixú gba akɔjijɛ ce e kunkplá kéze é kpó akɔjijɛ ce e kunkplá zǎn é kpó, bo bló bɔ ayǐ gɔn hǐnhɔ́n, bɔ zǎn gɔn kúkú ɖo hwe yětɔn nu ɔ, 21 hwe énɛ́ nu jɛ́n akɔ e un jɛ xá mɛsɛntɔ́ ce Davídi é sixú gba, bɔ é ná ɖó vǐ súnnu e ná nyí axɔ́sú ɖo axɔ́súzinkpo tɔn jí bo ná kp’acɛ é ǎ, bɔ nǔ ɖokpó ɔ ná lɛ́ jɛ dó akɔ e un jɛ xá Levíi ví vɔ̌sánúxwlémawutɔ́, éé nyí mɛsɛntɔ́ ce lɛ́ é wú. 22 Lěe è ma sixú xa ahwankpá jǐxwé tɔn lɛ́ ǎ, bo ma sixú jlɛ́ kɔ́ e ɖo xutó é ǎ gbɔn é ɔ, mɔ̌ ɖokpó ɔ, un ná bló bɔ mɛsɛntɔ́ ce Davídi sín kúnkan kpó Levíi ví e ɖo sinsɛnzɔ́ wa nú mì wɛ lɛ́ é kpó ná sukpɔ́.’”
23 Jexóva lɛ́vɔ́ ɖɔ xó nú Jelemíi, bo ɖɔ: 24 “A ɖó ayi wú ɖɔ togun élɔ́ nɔ ɖɔ: ‘Jexóva ná gbɛ́ xwédo we e é sɔ́ lɛ́ é’ ǎ cé? Yě ɖo nǔ wa xá togun ce wɛ kpó mɛmasí kpó, bo sɔ́ nɔ kpɔ́n yě dó mɔ akɔta ǎ.
25 “Nǔ e Jexóva ɖɔ é ɖíe: ‘Lěe un bló bɔ akɔjijɛ ce e kunkplá kéze kpó zǎn kpó é, gɔ́ nú sɛ́n e kunkplá jǐnukúnsin kpó ayǐkúngban kpó é lí dǒ gbɔn é ɔ, 26 mɔ̌ ɖokpó ɔ, un ná gbɛ́ kúnkan Jakɔ́bu tɔn kpó mɛsɛntɔ́ ce Davídi sín kúnkan kpó gbeɖé ǎ, bɔ un ná sɔ́ mɛ e ná kp’acɛ dó kúnkan Ablaxámu tɔn, Izáki tɔn kpó Jakɔ́bu tɔn kpó nu lɛ́ é ɖo kúnkan tɔn mɛ. Ðó un ná bló bɔ mɛ tɔn e yi kannumɔgbénu lɛ́ é ná lɛ́ kɔ, bɔ un ná kú nǔbláwǔ nú yě.’”