Jelemíi

32 Ðo axɔ́súɖuɖu Judáa xɔ́sú Sedesiyási tɔn sín xwe wǒgɔ́ ɔ mɛ, énɛ́ wɛ nyí ɖo axɔ́súɖuɖu Nabukodonɔzɔ́ɔ* tɔn sín xwe 18gɔ́ ɔ mɛ ɔ, Jexóva ɖɔ xó nú Jelemíi. 2 Ðo hwe énɛ́ nu ɔ, Babilɔ́nu xɔ́sú ɔ sín ahwankpá lɛ́ ján go dó Jeluzalɛ́mu, bɔ gbeyíɖɔ Jelemíi ɖo glɔ̌nglɔ́n jí ɖo Judáa xɔ́sú ɔ sín xwégbe,* ɖo Sɔ́ja e nɔ cɔ́ axɔ́sú ɔ lɛ́ é sín kɔ́xota. 3 Ðó Judáa xɔ́sú Sedesiyási wɛ glɔ́n ɛ, bo ɖɔ: “Étɛ́wú a ka ɖo gbeyíɖɔzɔ́ wa wɛ gbɔn mɔ̌? A ɖɔ: ‘Nǔ e Jexóva ɖɔ é ɖíe: “Un ná jó toxo élɔ́ nyi alɔ mɛ nú Babilɔ́nu xɔ́sú ɔ, bɔ é ná yí, 4 lobɔ Judáa xɔ́sú Sedesiyási ná xo gló Kaludéenu lɛ́ ǎ, ɖó é ɖo wɛn ɖɔ è ná jó è dó nyi alɔ mɛ nú Babilɔ́nu xɔ́sú ɔ, bɔ é ná mɔ ɛ tlɔlɔ lobɔ yě ná kpé nu bo ɖɔ xó.”’ 5 ‘É ná kplá Sedesiyási yi Babilɔ́nu bɔ é ná nɔ fínɛ́, káká jɛ hwenu e un ná sɔ́ ayi ɖó jǐ tɔn é,’ wɛ Jexóva ɖɔ. ‘Mi fɔ́n bo ɖo ahwan fun xá Kaludéenu lɛ́ wɛ có, é ná kpa mi ǎ.’”

6 Jelemíi ɖɔ: “Jexóva ɖɔ nú mì ɖɔ: 7 ‘Tɔ́ towe nɔví Calúmu ví Hanamɛ́li ná wá mɔ we ɖo fí, bo ná ɖɔ: “Xɔ gle ce e ɖo Anatɔ́ti é, ɖó hwi wɛ nyí mɛ nukɔntɔn e ɖó acɛ bo ná vɔ́ xɔ é.”’”

8 Tɔ́ ce nɔví ví Hanamɛ́li wá mɔ mì lěe Jexóva ɖɔ gbɔn é ɖo Sɔ́ja e nɔ cɔ́ axɔ́sú ɔ lɛ́ é sín kɔ́xota, bo ɖɔ nú mì ɖɔ: “Kɛnklɛ́n xɔ gle ce e ɖo Anatɔ́ti ɖo Bɛnjamɛ́ɛ sín to mɛ é, ɖó a ɖó acɛ bo ná vɔ́ xɔ, lobɔ é ná nyí towe. Xɔ gle ɔ.” Ée é ɖɔ mɔ̌ é ɔ, un mɔ ɖɔ gbeta e kɔn Jexóva wá é nɛ́.

9 Énɛ́ ɔ, un xɔ gle ɔ ɖo tɔ́ ce nɔví ví Hanamɛ́li sí ɖo Anatɔ́ti. Un sú axɔ́ ɛ, un sú síklu* tɛ́nwe kpó kpatágankwɛ́ wǒ kpó. 10 Énɛ́ gúdo ɔ, un bló glexixɔwéma ɖokpó bo ɖó wuntun lobo ylɔ́ kúnnuɖetɔ́ lɛ́, bɔ un da akwɛ́ ɔ ɖo gan jí. 11 Un sɔ́ glexixɔwéma ɔ, énɛ́ wɛ nyí ée è ɖó wuntun sɔgbe xá sɛ́n ɔ kpó gbetakɛ́n lɛ́ kpó é, gɔ́ nú ée è ma ɖó wuntun ǎ é. 12 Un bɛ́ yě nú Balúki éé nyí Maxiséya ví Nɛlíya vívú é ɖo tɔ́ ce nɔví ví Hanamɛ́li kpó kúnnuɖetɔ́ ɖěɖěe d’alɔ glexixɔwéma ɔ mɛ lɛ́ é kpó, kpódó Jwifu ɖěɖěe ɖo ayǐjínjɔ́n ɖo Sɔ́ja e nɔ cɔ́ axɔ́sú ɔ lɛ́ é sín kɔ́xota lɛ́ é bǐ kpán nukúnmɛ.

13 Un ɖe gbe nú Balúki ɖo nukún yětɔn mɛ ɖɔ: 14 “Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Yǐ glexixɔwéma élɔ́ lɛ́, ée è ɖó wuntun é kpó ée è ma ɖó wuntun ǎ é kpó, bo bɛ́ yě dó kozɛ́n ɖokpó mɛ bónú yě ní dó sixú nɔ ayǐ nú hwenu línlín.’ 15 Ðó nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘È ná lɛ́ vɔ́ xwé lɛ́, gle lɛ́ kpó vǐwungbo lɛ́ kpó xɔ ɖo to élɔ́ mɛ.’”

16 Ée un sɔ́ glexixɔwéma ɔ jó nú Balúki Nɛlíya ví ɔ gúdo é ɔ, un xo ɖɛ sɛ́ dó Jexóva ɖɔ: 17 “Áo, Aklúnɔ Nǔbǐwúkpétɔ́ Jexóva! Éɖíe! A zán hlɔ̌nhlɔ́n towe ɖaxó ɔ kpó alɔ towe e ɖo dlɛ̌ndlɛ́n é kpó dó bló jǐnukúnsin kpó ayǐkúngban kpó. Nǔ ɖěbǔ ɖe bo nɔ jí wǔ nú we dín ǎ. 18 A nɔ ɖe wǎnyíyí e ma nɔ sɛ do ǎ é xlɛ́ mɛ afatɔ́n, bo ka nɔ sú nǔwanyido tɔ́ lɛ́ tɔn sín axɔ́ vǐ yětɔn lɛ́; hwi wɛ nyí Mawu nǔgbó ɔ, Mɛ e d’agba, bo ɖó hlɔ̌nhlɔ́n bɔ nyǐkɔ tɔn nɔ nyí Jexóva ahwankpá lɛ́ tɔn é. 19 Wěɖexámɛ towe* jí wǔ, bɔ nǔwiwa towe lɛ́ d’agba; nukún towe lɛ́ nɔ mɔ nǔ e gbɛtɔ́ lɛ́ nɔ wa lɛ́ é bǐ, bɔ a nɔ sú axɔ́ mɛ ɖokpó ɖokpó sɔgbe xá nǔwalɔ mɛ ɔ tɔn kpó nǔwiwa mɛ ɔ tɔn kpó. 20 A bló nǔdabaɖa lɛ́ kpó nǔjíwǔ lɛ́ kpó ɖo Ejípu to mɛ, bɔ è tuun káká jɛ égbé, bɔ mɔ̌ mɛ ɔ, a bló bɔ è tuun nyǐkɔ towe ɖo Izlayɛ́li, bo lɛ́ tuun ɖo gbɛtɔ́ lɛ́ tɛ́ntin, lěe é ɖe gbɔn égbé é. 21 A kplá togun towe Izlayɛ́li tɔ́n sín Ejípu to mɛ, gbɔn wuntun lɛ́, nǔjíwǔ lɛ́, alɔ towe hlɔ̌nhlɔ́nnɔ ɔ, alɔ towe e ɖo dlɛ̌ndlɛ́n jí é kpó nǔdabaɖa lɛ́ kpó gblamɛ.

22 “É wá yá é ɔ, a ná to e a xwlé nǔ ɖɔ émí ná ná tɔ́gbó yětɔn lɛ́ é yě; to e mɛ anɔ̌sin kpó wǐin kpó nɔ sa tɔ ɖe é. 23 Bɔ yě wá to ɔ mɛ bo yí, amɔ̌, yě se tónú nú gbe towe, alǒ xwedó sɛ́n towe ǎ. Yě wa nǔ e a ɖe gbe nú yě ɖɔ yě ní wa lɛ́ é kwín ɖokpó ǎ, káká bɔ a bló bɔ awě élɔ́ lɛ́ bǐ xo yě. 24 Éɖíe! Súnnu lɛ́ wá toxo ɔ mɛ, bo mɛ ahohó lɛ́ lɛ̌ dó toxo ɔ dó ján go dó bo ná mɔ tɛn dó yí, bɔ ɖó hwǐ ɔ, adɔ ɔ kpó jɛmɛjí* ɔ kpó wútu ɔ, é ɖo wɛn ɖɔ toxo ɔ ná j’ayǐ jɛ Kaludéenu e ɖo ahwan fun xá ɛ wɛ lɛ́ é sín alɔ mɛ; nǔ e a ɖɔ é bǐ wɛ jɛnu lěe mɔ gbɔn wɛ a ɖe é. 25 Amɔ̌, Aklúnɔ Nǔbǐwúkpétɔ́ Jexóva, é ɖo wɛn ɖɔ è ná jó toxo ɔ nyi Kaludéenu lɛ́ sín alɔ mɛ có, a ɖɔ nú mì ɖɔ: ‘Sɔ́ akwɛ́ dó xɔ gle ɔ, bo ylɔ́ kúnnuɖetɔ́ lɛ́.’”

26 Énɛ́ ɔ, Jexóva ɖɔ nú Jelemíi ɖɔ: 27 “Éɖíe! Nyɛ wɛ nyí Jexóva, Mawu gbɛtɔ́* lɛ́ bǐ tɔn. Nǔ ɖě ɖe bo jí wǔ nú mì dín wɛ a? 28 Énɛ́ wú ɔ, nǔ e Jexóva ɖɔ é ɖíe: ‘Un ná jó toxo élɔ́ nú Kaludéenu lɛ́, bo ná jó dó nyi Babilɔ́nu xɔ́sú Nabukodonɔzɔ́ɔ* sín alɔ mɛ, bɔ é ná yí. 29 Bɔ Kaludéenu e ɖo ahwan tɔ́n toxo élɔ́ wɛ lɛ́ é ná byɔ́ toxo élɔ́ mɛ, bo ná dó è zo lobo ná fyɔ́ ɛ, yě ná wa nǔ ɖokpó ɔ nú xwé ɖěɖěe sín xɔ ta togun ɔ nɔ bo sá vɔ̌ nú Baálu lobo kɔn nǔníná vɛ̌ɛn tɔn lɛ́ kɔn nyi ayǐ nú mawu ɖěvo lɛ́ dó dó xomɛsin nú mì lɛ́ é.’

30 “‘Ðó nǔ e nylá nukún ce mɛ lɛ́ é kɛ́ɖɛ́ wɛ togun Izlayɛ́li tɔn kpó Judáa tɔn kpó nɔ wa sín wǐnnyáwínnyá mɛ yětɔn; togun Izlayɛ́li tɔn fɔ́n bo ɖo xomɛsin dó nú mì wɛ gbɔn alɔ yětɔn núwiwa lɛ́ gblamɛ,’ wɛ Jexóva ɖɔ. 31 ‘Ðó toxo élɔ́ ɔ, sín hwenu e è ɖó ayǐ é káká jɛ égbé ɔ, é nyí nǔɖéwanú zɛ é ná dó xomɛsin nú mì, bo fɔ́n adǎn dó jǐ nú mì wú ǎ, énɛ́ wú wɛ è ɖó ná ɖe è sín nukún ce mɛ, 32 ɖó nǔ nyanya e togun Izlayɛ́li tɔn kpó Judáa tɔn kpó wa dó dó xomɛsin nú mì lɛ́ é bǐ wútu, yědɛɛ lɛ́, axɔ́sú yětɔn lɛ́, axɔ́ví yětɔn lɛ́, vɔ̌sánúxwlémawutɔ́ yětɔn lɛ́, gbeyíɖɔ yětɔn lɛ́, gɔ́ nú súnnu Judáa tɔn lɛ́ kpó mɛ e nɔ nɔ Jeluzalɛ́mu lɛ́ é kpó. 33 Yě nɔ fɔ́n bo nɔ ɖo gǔdo dó mì wɛ, yě wá gɔ̌n ce ǎ; un tɛ́n kpɔ́n bo kplɔ́n nǔ yě azɔn gěgé* có, yě mɛ ɖěbǔ ɖótó alǒ yí kplɔ́n ǎ. 34 Yě bɛ́ bǒcyɔ yětɔn e xyɔ́ wǔ lɛ́ é ɖó xwé e wú nyǐkɔ ce ɖe é gbe, bo ná mɔ tɛn dó hɛn blí. 35 Gɔ́ ná ɔ, yě sɔ́ nǔ nú nɔtɛn ɖeɖóvo Baálu tɔn lɛ́ ɖo Vǐ súnnu Hinnɔ́ɔ tɔn sín tɔdo* mɛ, bo ná mɔ tɛn dó dó vǐ súnnu yětɔn lɛ́ kpó vǐ nyɔ̌nu yětɔn lɛ́ kpó zo* nú Mɔlɛ́ki dó dɔn Judáa dó hwɛhuhu mɛ; nǔɖé wɛ bɔ un ɖe gbe tɔn nú yě ǎ, é ka lɛ́ wá ayi mɛ nú mì* kpɔ́n ɖɔ yě ní dó nǔvɛ́mɔ mɔ̌hun sin ǎ.’

36 “Énɛ́ wú ɔ, nǔ e Jexóva Mawu Izlayɛ́li tɔn ɖɔ dó toxo élɔ́ e mi ɖɔ ɖɔ è ná jó dó nyi alɔ mɛ nú Babilɔ́nu xɔ́sú ɔ, gbɔn hwǐ, adɔ kpó jɛmɛjí kpó gblamɛ é wú é ɖíe: 37 ‘Un ná xo yě kplé sín to ɖěɖěe mɛ un ɖo xomɛsin jí, bo ɖo adǎn jí lobo ɖo xomɛsin ɖaxó jí bo fúnfún yě kpé gbɔn lɛ́ é bǐ mɛ; un ná lɛ́ kɔ nú yě wá nɔtɛn élɔ́ bɔ yě ná nɔ ayijayǐ mɛ. 38 Yě ná nyí togun ce, bɔ un ná nyí Mawu yětɔn. 39 Un ná bló bɔ yě ná ɖó ayi ɖokpó, bo ná nɔ lɛ́ xwedó ali ɖokpó, bo ná dó sixú nɔ ɖó sísí e gɔ́ngɔ́n e nú mì hwebǐnu, nú ɖagbe yěɖésúnɔ kpó vǐ yětɔn lɛ́ kpó tɔn. 40 Un ná jɛ akɔ mavɔmavɔ xá yě ɖɔ un kún ná gɔn ɖagbe wa nú yě gbeɖé ó; un ná sɔ́ dó ayi yětɔn mɛ, bɔ yě ná nɔ ɖó sísí e gɔ́ngɔ́n é nú mì, énɛ́ ɔ, yě ná lɛ́ kɔ sín gǔdo ce ǎ. 41 Un ná ɖú agbojlaka ɖó yě wú, bo ná wa ɖagbe nú yě, lobo ná dó yě do ganjí ɖo to élɔ́ mɛ, kpó ayi ce bǐ kpó, kpódó lǐndɔ̌n* ce bǐ kpán.’”

42 “Ðó nǔ e Jexóva ɖɔ é ɖíe: ‘Un sɔ́ awě ɖaxó élɔ́ bǐ dó xo togun élɔ́, mɔ̌ ɖokpó ɔ, un ná wa nǔ ɖagbe e sín akpá un dó nú yě lɛ́ é bǐ nú yě. 43 Mi nɔ ɖɔ dó to élɔ́ wú ɖɔ: “To e jɛ vɔ̌ bɔ gbɛtɔ́ kpó kanlin kpó ɖě ma ɖ’é mɛ ǎ é ɖé wɛ, bɔ è jó dó nyi Kaludéenu lɛ́ sín alɔ mɛ,” é ɖo mɔ̌ có, è ná lɛ́ xɔ gle ɖo to élɔ́ mɛ.’

44 “‘È ná sɔ́ akwɛ́ dó xɔ gle, è ná bló glexixɔwéma bo ná ɖó wuntun lobo ná ylɔ́ kúnnuɖetɔ́ lɛ́ ɖo Bɛnjamɛ́ɛ sín to mɛ, ɖo xá e lɛ́ lɛ̌ dó Jeluzalɛ́mu lɛ́ é mɛ, ɖo toxo Judáa tɔn lɛ́, toxo e ɖo sókan mɛ lɛ́ é, toxo e ɖo tɔdo mɛ lɛ́ é kpó toxo e ɖo tofɔligbé lɛ́ é kpó mɛ, ɖó un ná lɛ́ kɔ nú mɛ yětɔn e yi kannumɔgbénu lɛ́ é,’ wɛ Jexóva ɖɔ.”