Jelemíi
2 Jexóva ɖɔ xó nú mì, bo ɖɔ: 2 “Yi, bo yi ɖɔ dó mɛ e ɖo Jeluzalɛ́mu lɛ́ é sín tó mɛ ɖɔ: ‘Nǔ e Jexóva ɖɔ é ɖíe:
“Un flín lěe a zé hwiɖée jó ɖo wǐnnyáwínnyá mɛ gbɔn é ganjí,
wǎnyíyí e a ɖe xlɛ́ hwenu e a yí gbe bo ná wlí alɔ é,
lěe a xwedó mì ɖo gbětótló mɛ,
ɛɛn, ɖo ayǐkúngban e jí è ma dó nǔ dó ǎ é gbɔn é.
3 Nǔ mímɛ́ wɛ Izlayɛ́li nyí nú Jexóva, nǔkún e é ya lɛ́ é sín sínsɛ́n nukɔntɔn lɛ́.”’
‘Mɛ ɖěbǔ tɛ́n kpɔ́n bá vúnvún i ɔ, mɛ ɔ nɔ kú hwɛ.
Awě nɔ xo yě,’ wɛ Jexóva ɖɔ.”
4 Kúnkan Jakɔ́bu tɔn è, ɖǒtó xó Jexóva tɔn,
ɛɛn, togun Izlayɛ́li tɔn sín xwédo lɛ́ bǐ.
5 Nǔ e Jexóva ɖɔ é ɖíe:
“Nǔjɛdo tɛ́ tɔ́gbó mitɔn lɛ́ ka mɔ ɖo wǔ ce,
bo sɛ yi zɔ nú mì sɔmɔ̌,
lobo jɛ nǔmɛsɛn maɖótaɖé lɛ́ gúdo, bɔ yěɖésúnɔ sɔ́ wá ɖó ta ɖé ǎ?
6 Yě kan nǔ élɔ́ byɔ́ ǎ: ‘Fítɛ́ Jexóva,
Mɛ e kplá mǐ sín Ejípu to mɛ,
bo kplá mǐ gbɔn gbětótló mɛ,
gbɔn gbětótló yíkúngban e jí do gěgé ɖe é jí,
gbɔn ayǐkúngban xúxú jí, gbɔn ablu gɔngɔn mɛ,
gbɔn ayǐkúngban e jí mɛ ɖěbǔ ma nɔ gbɔn ǎ é jí,
gɔ́ nú fí e gbɛtɔ́ ɖěbǔ ma nɔ nɔ ǎ é ka ɖe?’
7 Un wá kplá mi wá ayǐkúngban e jí atínsínsɛ́ngbo ɖe é jí,
bónú mi ná ɖu atínsínsɛ́n tɔn lɛ́ kpó nǔ ɖagbe tɔn lɛ́ kpó.
Amɔ̌, mi wá ayǐkúngban ce jí bo hɛn blí;
mi bló bɔ gǔ ce húzú nǔvɛ́mɔ.
8 Vɔ̌sánúxwlémawutɔ́ lɛ́ kanbyɔ́ ɖɔ: ‘Fítɛ́ Jexóva ka ɖe?’ ǎ.
Mɛ ɖěɖěe è sɔ́ azɔ̌ d’así ná, bónú yě ná kplɔ́n Sɛ́n ɔ mɛ lɛ́ é tuun mì ǎ,
lɛ̌ngbɔ́nyitɔ́ lɛ́ fɔ́n gǔ dó jǐ ce,
gbeyíɖɔ lɛ́ wa gbeyíɖɔzɔ́ ɖo Baálu nyíkɔ mɛ,
bɔ yě xwedó nǔmɛsɛn ɖěɖěe ma sixú hɛn le ɖě wá ǎ lɛ́ é.
9 ‘Énɛ́ wú ɔ, un ná lɛ́ dɔn nǔ xá we,’ wɛ Jexóva ɖɔ,
‘bo ná dɔn nǔ xá vǐvú towe lɛ́.’
10 ‘Amɔ̌, mi yi Kitímu sín to e ɖo xutó lɛ́ é* mɛ, bo kpɔ́n.
Ɛɛn, mi sɛ́ mɛ dó Kedáa, bo gbéjé kpɔ́n kpó sɔxwixwe kpó;
mi kpɔ́n ɖɔ nǔ lěhun ɖě ko jɛ a jí.
11 Akɔta ɖě ko sɔ́ nǔ e ma nyí nǔmɛsɛn ǎ lɛ́ é dó ɖyɔ́ nǔmɛsɛn tɔn lɛ́ ná kpɔ́n a?
Amɔ̌, togun nyiɖésúnɔ tɔn sɔ́ nǔ e ma hwɛ́n nǔɖé ǎ é dó ɖyɔ́ susu ce ná.
12 Jǐnukúnsin è, kpɔ́n nǔ énɛ́ dáán, bónú é ní jí wǔ nú we;
nǔ e xyɔ́ wǔ tawun é ní zɔ́n nú a ní sísɔ́,’ wɛ Jexóva ɖɔ,
13 ‘ɖó togun ce wa nǔ nyanya we élɔ́ lɛ́:
yě jó nyɛ mɛ e nyí sin e nɔ ná gbɛ mɛ é sín jɔtɛn é dó,
bo kun sitɛ́nu yěɖésúnɔ tɔn lɛ́,
sitɛ́nu gbigba e ma sixú hɛn sin ǎ lɛ́ é.’
14 ‘Izlayɛ́li ɔ, mɛsɛntɔ́ wɛ é nyí a, alǒ kannumɔ e è ji ɖo gǎn tɔn sín xwégbe é?
Étɛ́wú è ka jó è dó bɔ è vɔ ɛ lo?
15 Kinnikínní wínnyáwínnyá lɛ́* dó gbe dó jǐ tɔn;
yě sɔ́ gbe dó jǐ.
Yě bló bɔ to tɔn húzú nǔ e xyɔ́ wǔ é.
È dó toxo tɔn lɛ́ zo, énɛ́ wɛ zɔ́n bɔ mɛ ɖě ma sɔ́ ɖ’é mɛ ǎ.
16 Mɛ e nɔ nɔ Nɔfu* kpó Tapanɛ́si kpó lɛ́ é nɔ ɖu nǔ ɖo axɔ́súgbákún e ɖo ta towe é jí.
17 É ma nyí hwiɖésúnɔ wɛ dɔn nǔ énɛ́ wá hwiɖée jí,
ɖó a jó Jexóva Mawu towe dó,
hwenu e é ɖo ali xlɛ́ we wɛ é ǎ cé?
18 Bɔ din ɔ, étɛ́wú a ka ɖo Ejípu sín ali ba wɛ,
bo ná dó nu Cixɔ́ɔ* sín sin?
Étɛ́wú a ka ɖo Asilíi sín ali ba wɛ,
bo ná dó nu Tɔsisa ɔ* sín sin?
19 Nǔ nyanya e a nɔ wa é wɛ ná dɔn tó nú we,
gbejímanɔ hwiɖésúnɔ tɔn wɛ ná gbɛ́ nǔ nú we.
Tuun, bo lɛ́ mɔ nukúnnú jɛ mɛ ɖɔ
kɔlílɛ́ sín Jexóva Mawu towe gúdo nylá tawun, bo nɔ lɛ́ ji nǔ nyanya;
a ɖó sísí e gɔ́ngɔ́n é ɖě nú mì ǎ,’ wɛ Aklúnɔ Nǔbǐwúkpétɔ́ Jexóva ahwankpá lɛ́ tɔn ɖɔ.
20 ‘Sín hwenu línlín ɖíe wɛ un gba agbanhɛnkpo towe hánnyá,
bo wɛ́n gɛdɛ towe lɛ́.
Amɔ̌, a ɖɔ: “Un ná sɛn we ǎ,”
ɖó a mlɔ́ wɛn, bo ɖo to nya wɛ
ɖo só kpɛví e yi jǐ lɛ́ é bǐ jí, bo nɔ lɛ́ wa mɔ̌ ɖo atín e vun ganjí lɛ́ é bǐ sá.
21 Vǐwuntín vɔvɔ e è sɔ́ é wɛ a nyí bɔ un tun we, kún jɔ kún kɛ́ɖɛ́ wɛ;
bɔ nɛ̌ a ka húzú vǐwuntín toɖévomɛ tɔn sín ala gblégblé lɛ́ ɖo nukɔn ce gbɔn?’
22 ‘A ná zán sóɖa dó lɛ wǔ, bo ná zán aɖǐ gěgé có,
hwɛ towe ná kpo ɖo nukɔn ce,’ wɛ Aklúnɔ Nǔbǐwúkpétɔ́ Jexóva ɖɔ.
23 Nɛ̌ a ka sixú ɖɔ: ‘Un hɛn nyiɖée blí ǎ,
un xwedó Baálu ǎ’ gbɔn?
Kpɔ́n lěe a wa nǔ gbɔn ɖo tɔdo ɔ mɛ é.
Gbějé nǔ e a wa é kpɔ́n.
A cí lǎkúnmí asi wínnyáwínnyá e afɔ yá ná,
bɔ é nɔ ɖo wezun kán wɛ yi gǔdo nukɔn ɖo ali tɔn lɛ́ jí, bo ma ɖó fí ɖé lě tawun bo xwe ǎ é ɖɔhun,
24 tócí gbě tɔn e gbětótló má dó,
bɔ é ɖo asú wán dó wɛ é ɖɔhun.
Mɛ̌ ka sixú ɖó è te hwenu e asú yíyí ɖo jlǒjló è wɛ é?
É byɔ́ ɖɔ kanlin asú e ɖo biba ɛ wɛ lɛ́ é ɖě ní jɛ tagba ǎ.
Asú yíyí hwenu tɔn su ɔ,* yě ná mɔ ɛ.
25 Ma lɔn ó, é ma nyí mɔ̌ ǎ ɔ, a táá wá zɔn afɔvɔ́,
bɔ kɔ ná xú we.
Amɔ̌, a ɖɔ: ‘Ðěwagbɛn ɖe ǎ!
Un ko yí wǎn nú jǒnɔ lɛ́,*
bɔ un ná xwedó yě.’
26 Lěe ajotɔ́ nɔ ɖu winnyá hwenu e è wlí i é gbɔn é ɖɔhun ɔ,
mɔ̌ ɖokpó ɔ, è ná dó winnyá togun Izlayɛ́li tɔn,
yědɛɛ lɛ́, axɔ́sú yětɔn lɛ́, axɔ́ví yětɔn lɛ́,
vɔ̌sánúxwlémawutɔ́ yětɔn lɛ́ kpó gbeyíɖɔ yětɔn lɛ́ kpó.
27 Yě ɖɔ nú atín ɖɔ: ‘Hwi wɛ nyí tɔ́ ce,’
bo ɖɔ nú awǐnnya ɖɔ: ‘Hwi wɛ ji mì.’
Amɔ̌ nyɛ ɔ, yě dó gǔdo mì, yě kpan nukɔn mì ǎ.
Bɔ hwenu e awě ná xo yě é ɔ, yě ná ɖɔ:
‘Sí te, bo hwlɛ́n mǐ!’
28 Din ɔ, fítɛ́ nǔmɛsɛn e a bló nú hwiɖée lɛ́ é ka ɖe?
Yě ní sí te, ényí yě sixú hwlɛ́n we ɖo awěxomɛ hwenu ɔ nɛ́,
Judáa è, ɖó nǔmɛsɛn towe lɛ́ wá sukpɔ́ hú toxo towe lɛ́.
29 ‘Étɛ́wú mi ka nɔ ɖo nǔ dɔn xá mì wɛ?
Étɛ́wú mi mɛ bǐ ka fɔ́n gǔ dó jǐ ce?’ wɛ Jexóva ɖɔ.
30 Un xo vǐ mitɔn lɛ́ dó wǔvɔ́.
Yě yí gbe nú tó e un dɔn nú yě é ɖě ǎ;
hwǐ miɖésúnɔ tɔn vúnvún gbeyíɖɔ mitɔn lɛ́,
kinnikínní e ɖo adǎn jí é ɖɔhun.
31 Jijimɛ élɔ́ è, miɖésúnɔ ní gbéjé xó Jexóva tɔn kpɔ́n.
Gbětótló wɛ un húzú nú Izlayɛ́li a,
alǒ to e mɛ ablu gɔngɔn dó ɖe tawun é?
Étɛ́wú mɛ élɔ́ lɛ́, énɛ́ wɛ nyí togun ce, ka ɖɔ: ‘Mǐ nɔ ɖo yiyi kpé wɛ lěe é jló mǐ gbɔn é.
Mǐ sɔ́ ná lɛ́ kɔ wá gɔ̌n towe ɖě ǎ’?
32 Ðyɔ̌vǐ ɖo alɔjí ɖé ka sixú wɔn acɔ́ɖónú tɔn lɛ́,
bɔ yawó ɖé ná wɔn anɔ̌wlínú* tɔn lɛ́ a?
É ɖo mɔ̌ có, togun ce ɖésúnɔ wɔn mì sín hwenu línlín ɖíe.
33 Nyɔ̌nu è, lěe a ná bló gbɔn bɔ súnnu ná yí wǎn nú we é bí alɔ nú we mɛ nya!
A kplɔ́n nǔnyanyawiwa sín ali lɛ́ hwiɖée.
34 Wamamɔnɔ xomɛvɔ́nɔ lɛ́ sín hun tlɛ va dó awu towe sín tó wú,
có un mɔ nú yě ɖo tíntɛ́nkpɔ́n wɛ bo ná byɔ́ xwé towe gbe ǎ;
hun yětɔn kpé awu towe sín tó bǐ wú.
35 Amɔ̌, a nɔ ɖɔ: ‘Xomɛvɔ́nɔ wɛ nú mì.
É ɖo wɛn ɖɔ é sɔ́ sin xomɛ dó mì ǎ.’
Din ɔ, un ná ɖó hwɛ nú we,
ɖó a ɖɔ: ‘Un hu hwɛ ǎ.’
36 Étɛ́wú fí ɖokpó ma nɔ towe ma ka nɔ ɖɔ nǔɖé nú we ǎ?
Winnyá ná hu we ɖó Ejípu lɔ wú,
lěe winnyá hu we ɖó Asilíi wú gbɔn é ɖɔhun.
37 Ðó hwɛjijɔ énɛ́ lɔmɔ̌ wú ɔ, a ná kplá así ta bo ná tɔ́n,
ɖó Jexóva gbɛ́ mɛ ɖěɖěe wú a gán jɛ lɛ́ é;
yě ná d’alɔ ɖěbǔ we ǎ.”