Jelemíi
21 Jexóva ɖɔ xó nú Jelemíi hwenu e axɔ́sú Sedesiyási sɛ́ Pacewúu Malukíya ví ɔ kpó Sofoníi vɔ̌sánúxwlémawutɔ́ Maaséya ví ɔ kpó dó è ɖɔ yě ní kan nǔ élɔ́ byɔ́ ɛ é: 2 “Kɛnklɛ́n kan xó byɔ́ Jexóva dó ta mǐtɔn mɛ, ɖó Babilɔ́nu xɔ́sú Nabukodonɔzɔ́ɔ* ɖo ahwan tɔ́n mǐ wɛ. Bóyá Jexóva ná bló nǔjíwǔ tɔn lɛ́ ɖě dó ta mǐtɔn mɛ, bɔ é ná jó mǐ dó.”
3 Jelemíi ɖɔ nú yě ɖɔ: “Nǔ e mi ɖó ná ɖɔ nú Sedesiyási é ɖíe: 4 ‘Nǔ e Jexóva, Mawu Izlayɛ́li tɔn ɖɔ é ɖíe: “Un ɖo ahwanfunnú e ɖo alɔ miɖésúnɔ tɔn mɛ lɛ́ é lílɛ́ kpan nukɔn mi wɛ, ɛɛn, ɖěɖěe mi zán dó ɖo ahwan fun xá Babilɔ́nu xɔ́sú ɔ kpó Kaludéenu e ɖo ahohó ɔ gúdo bo ján go dó mi lɛ́ é kpó wɛ lɛ́ é. Bɔ un ná xo yě kplé ɖo toxo élɔ́ tɛ́ntin. 5 Nyiɖésúnɔ ná zán alɔ ce hlɔ̌nhlɔ́nnɔ ɔ kpó hlɔ̌nhlɔ́n ce ɖaxó ɔ kpó dó tɔ́n ahwan mi, kpó xomɛsin kpó, kpó adǎn kpó, kpódó xomɛsin ɖaxó kpán. 6 Un ná sú kún dó nú mɛ e ɖo toxo élɔ́ mɛ lɛ́ é, gbɛtɔ́ kpó kanlin kpó bǐ. Jɛmɛjí* ɖaxó ɖé wɛ ná hu yě.”’
7 “‘“Énɛ́ gúdo ɔ,” wɛ Jexóva ɖɔ, “un ná jó Judáa xɔ́sú Sedesiyási, mɛsɛntɔ́ tɔn lɛ́ kpó mɛ e ɖo toxo élɔ́ mɛ lɛ́ é kpó, ɛɛn, mɛ ɖěɖěe gán ɖo jɛmɛjí ɔ, hwǐ ɔ kpó adɔ ɔ kpó nu lɛ́ é, dó nyi Babilɔ́nu xɔ́sú Nabukodonɔzɔ́ɔ* sín alɔ mɛ, bo ná jó yě dó nyi kɛntɔ́ yětɔn lɛ́ sín alɔ mɛ, lobo ná jó yě dó nyi mɛ e ɖo biba ná hu yě wɛ lɛ́ é* sín alɔ mɛ. É ná sɔ́ hwǐ dó hu yě. Wǔ ná kú i ɖó yě wú ǎ, mɔ̌ jɛ́n é ma ná se wǔvɛ́ xá yě alǒ kú nǔbláwǔ ɖě nú yě ǎ é nɛ́.”’
8 “Bɔ a ɖó ná ɖɔ nú togun élɔ́ ɖɔ: ‘Nǔ e Jexóva ɖɔ é ɖíe: “Un ɖo gbɛli kpó kúli kpó sɔ́ ɖó nukɔn nú mi wɛ. 9 Mɛ e ná kpo ɖo toxo élɔ́ mɛ lɛ́ é ná kú hwǐ kú, adɔ kú, alǒ jɛmɛjí kú. Amɔ̌, mɛ ɖěbǔ e ná tɔ́n bo ná jó ta nú Kaludéenu e ján go dó mi lɛ́ é ná nɔ gbɛ; é ná hwlɛ́n gbɛ* éɖée tɔn gán.”’*
10 “‘“Ðó un húzú kpan nukɔn toxo élɔ́, bo ná sɔ́ awě dó xo è, un ɖo nǔ ɖagbe ná wa n’i wɛ ǎ,” wɛ Jexóva ɖɔ. “Un ná jó è dó nyi Babilɔ́nu xɔ́sú ɔ sín alɔ mɛ, bɔ é ná sɔ́ myɔ dó fyɔ́ ɛ.”
11 “‘Mi mɛ e nɔ nɔ axɔ́sú Judáa tɔn sín xwégbe lɛ́ é mi, mi ɖótó xó Jexóva tɔn. 12 Xwé Davídi tɔn è, nǔ e Jexóva ɖɔ é ɖíe:
“Mi ní tɛ́ dó hwɛjijɔ wú zǎnzǎn lɛ́ bǐ,
bo hwlɛ́n mɛ e sín nǔ fin wɛ è ɖe é sín mɛwlóɖutɔ́ ɔ sín alɔ mɛ.
É ma nyí mɔ̌ ǎ ɔ, é ná sín nǔ nyanya e wa wɛ mi ɖe lɛ́ é wú,
bɔ xomɛsin ce ná ji myɔ ɖɔhun,
bo ná fyɔ́ nǔ bɔ mɛ ɖěbǔ ná cí ǎ.”’
13 ‘Hwi mɛ e nɔ nɔ tɔdo mɛ* é, ɛɛn, hwi mɛ e nyí awǐnnya e ɖo ayǐkúngban jlɔ́jlɔ́ jí é,
éɖíe, un húzú kpan nukɔn we,’ wɛ Jexóva ɖɔ.
‘Mi mɛ e nɔ ɖɔ: “Mɛ̌ ka ná tɔ́n ahwan mǐ?
Mɛ̌ ka ná byɔ́ fí e mǐ nɔ nɔ lɛ́ é?” é ɔ,
14 un ná byɔ́ mi ɖɔ mi ní ɖó gbe,
sɔgbe xá nǔ e mi wa lɛ́ é,’ wɛ Jexóva ɖɔ.
‘Un ná dó zungbó tɔn zo,
bɔ é ná fyɔ́ nǔ e lɛ́ lɛ̌ dó è lɛ́ é bǐ.’”