Jelemíi
22 Nǔ e Jexóva ɖɔ é ɖíe: “Jɛ te yi Judáa xɔ́sú ɔ sín xwégbe,* bo dó wɛn élɔ́. 2 A ɖó ná ɖɔ: ‘Axɔ́sú Judáa tɔn è, hwi mɛ e jínjɔ́n axɔ́súzinkpo Davídi tɔn jí é, ɖǒtó xó Jexóva tɔn, hwi kpó mɛsɛntɔ́ towe lɛ́ kpó, kpódó togun towe kpán, mi mɛ ɖěɖěe nɔ gbɔn hɔntogbó élɔ́ lɛ́ nu byɔ́ toxo ɔ mɛ lɛ́ é. 3 Nǔ e Jexóva ɖɔ é ɖíe: “Mi jɛ hun dó hwɛjijɔ kpó nǔjlɔ́jlɔ́wiwa kpó jí. Mi hwlɛ́n mɛ e sín nǔ fin wɛ è ɖe é sín mɛwlóɖutɔ́ ɔ sín alɔ mɛ. Mi ma xo dǎka toɖévomɛnu ɖěbǔ wú ó, mi ma wa nyanya nú tɔ́cyɔvǐ,* alǒ asúkúsi ɖěbǔ ó. Mi ma kɔn xomɛvɔ́nɔ ɖěbǔ sín hun kɔn nyi ayǐ ɖo nɔtɛn élɔ́ ó. 4 Ðó ényí mi xwedó xó élɔ́ tɛ́nwín lɛnwín ɔ, axɔ́sú e nɔ jínjɔ́n axɔ́súzinkpo Davídi tɔn jí lɛ́ é ná gbɔn hɔntogbó xwé élɔ́ tɔn lɛ́ nu byɔ́ mɛ, bo ná zɔn kɛkɛ́ví lɛ́ mɛ, lobo ná xá sɔ́ lɛ́, yě kpó mɛsɛntɔ́ yětɔn lɛ́ kpó, kpódó togun yětɔn kpán.”’
5 “‘Amɔ̌, ényí mi ma se tónú nú xó élɔ́ lɛ́ ǎ ɔ, un xwlé nyiɖée,’ wɛ Jexóva ɖɔ, ‘ɖɔ xwé élɔ́ ná húzú nɔtɛn e sú dó é.’
6 “Ðó nǔ e Jexóva ɖɔ dó axɔ́sú Judáa tɔn sín xwé wú é ɖíe:
‘Galádi ɖɔhun wɛ a cí nú mì,
Libáan sín ahɔn mɛ ɖɔhun wɛ a cí.
Amɔ̌, un ná bló bɔ a ná húzú gbětótló;
mɛ ɖěbǔ ná nɔ toxo towe lɛ́ ɖě mɛ ǎ.
7 Un ná sɛ́ kúnsúdónúnǔtɔ́ lɛ́ dó we,
mɛ ɖokpó ɖokpó kpó alyánnú tɔn lɛ́ kpó.
Yě ná gbo sɛ́dlutín towe ɖagbe ɖagbe lɛ́,
bo ná dó yě zo ɖo myɔ mɛ.
8 “‘Bɔ akɔta gěgé ná gbɔn toxo élɔ́ mɛ, bo ná ɖɔ nú yěɖée ɖɔ: “Étɛ́wú Jexóva ka wa lě nú toxo ɖaxó élɔ́?” 9 Bɔ yě ná yí gbe ɖɔ: “Ðó yě jó akɔjijɛ Jexóva Mawu yětɔn tɔn dó, bo ɖe kɔ́ nú mawu ɖěvo lɛ́, lobo sɛn yě wútu wɛ.”’
10 Mi ma ya mɛ e kú é sín avǐ ó,
mi ma se wǔvɛ́ dó ta tɔn mɛ ó.
É nyɔ́ wa ɔ, mi ya avǐ ɖaxó dó mɛ e xwe kannumɔgbénu é tamɛ,
ɖó é sɔ́ ná lɛ́ kɔ bo ná mɔ to e mɛ è ji i ɖe é ǎ.
11 “Ðó nǔ e Jexóva ɖɔ dó Joziyási ví Calúmu,* éé nyí Judáa xɔ́sú, bo ɖo acɛ kpa wɛ ɖo tɔ́ tɔn Joziyási tɛnmɛ, lobo gosín nɔtɛn élɔ́ é wú é ɖíe: ‘É sɔ́ ná lɛ́ kɔ wá fínɛ́ ǎ. 12 Ðó é ná kú ɖo fí e è kplá ɛ yi kannumɔgbénu ɖe é, bɔ é sɔ́ ná mɔ to élɔ́ ɖě ǎ.’
13 Heelú mɛ e nɔ gbá xwé tɔn nǔjlɔ́jlɔ́wiwa mɛvo,
bo nɔ gbá xɔ tɔn e ɖo síngbó jí lɛ́ é hwɛjijɔ mɛvo,
bo nɔ bló bɔ nɔzo tɔn nɔ w’azɔ̌ n’i vɔ̌nu,
bɔ é nɔ gbɛ́ axɔ́ tɔn sú i é;
14 mɛ e nɔ ɖɔ xó élɔ́ é: ‘Un ná gbá xwé ɖaxó ɖokpó,
bɔ xɔ e ɖo síngbó jí bo gbló tawun lɛ́ é ná ɖ’é mɛ.
Un ná dó flɛtɛ́li lɛ́ ná,
bo ná bú sɛ́dlutín dó, lobo ná sá nǔ vɔvɔ dó.’
15 A ná kpo ɖo acɛ kpa wɛ ɖó a nɔ zán sɛ́dlutín hú mɛ ɖěvo lɛ́ wútu wɛ a?
Tɔ́ towe lɔ ɖu nǔ bo nu ahan,
có é bló bɔ hwɛjijɔ kpó nǔjlɔ́jlɔ́wiwa kpó tíin.
Bɔ nǔ bǐ yi n’i ganjí.
16 É jɛ hun dó acɛ e mɛ e ɖo wǔvɛ́ se wɛ é kpó wamamɔnɔ kpó ɖó é jí,
bɔ mɔ̌ mɛ ɔ, nǔ bǐ yi ganjí.
‘Nǔ e è ní tuun mì sín tínmɛ nyí é nɛ́ ǎ cé?’ wɛ Jexóva ɖɔ.
17 ‘Amɔ̌, afu kɛ́ɖɛ́ jí wɛ nukún towe lɛ́ kpó ayi towe kpó nɔ ɖe,
bo nɔ ɖo xomɛvɔ́nɔ sín hun kinkɔn nyi ayǐ jí,
lobo nɔ ɖo ahizi kpó mɛwlóɖu kpó jí.’
18 “Énɛ́ wú ɔ, nǔ e Jexóva ɖɔ dó Judáa xɔ́sú Yexoyakímu, Joziyási ví ɔ wú é ɖíe:
‘Yě ná ná alě dó ta tɔn mɛ ɖɔ:
“Áo, nɔví súnnu ce! Áo, nɔví nyɔ̌nu ce!” ǎ.
Yě ná ná alě dó ta tɔn mɛ ɖɔ:
“Áo, gǎn è! Áo, sísíjɛxá!” ǎ.
19 Lěe è nɔ ɖi tócí gbɔn é wɛ è ná ɖi i gbɔn,
è ná dɔn ɛ tɔ́n, bo ná sɔ́ ɛ nyi gbě,
ɖo hɔntogbó Jeluzalɛ́mu tɔn lɛ́ gúdo.’
20 Yi Libáan só jí, bo sú xó,
zě gbe dó jǐ ɖo Basáni,
sú xó sín Abalímu,
ɖó xɔnnɔ towe e a yí wǎn ná ɖésú lɛ́ é bǐ sín kún wɛ è ko sú dó.
21 Un ɖɔ xó nú we hwenu e a mɔ ɖɔ émí ɖo ayijayǐ mɛ é.
Amɔ̌, a ɖɔ: ‘Un ná se tónú ǎ.’
Lěe a wa nǔ gbɔn sín wǐnnyáwínnyá mɛ towe é nɛ́,
a se tónú nú gbe ce ǎ.
22 Jɔhɔn ná fúnfún lɛ̌ngbɔ́nyitɔ́ towe lɛ́,
bɔ xɔnnɔ towe e a yí wǎn ná ɖésú lɛ́ é ná yi kannumɔgbénu.
Énɛ́ ɔ, è ná dó winnyá we, bɔ wi towe ná kɔ́n ɖó awě e ná xo we lɛ́ é bǐ wútu.
23 Hwi mɛ e nɔ nɔ Libáan,
bo wa xwé nyi sɛ́dlutín lɛ́ tɛ́ntin é,
a ná wɛn azɔn hwenu e wǔvɛ́ lɛ́ ná wá jǐ towe é,
bo ná se wǔvɛ́ nyɔ̌nu e ɖo ajidonu é ɖɔhun!”
24 “‘Un ɖo gbɛ jɛ́n wɛ ɔ,’ wɛ Jexóva ɖɔ, ‘ényí hwɛ Koníya,* Judáa xɔ́sú Yexoyakímu ví ɔ tlɛ nyí alɔkɛ́ e è nɔ ɖó wuntun nǔ ná é ɖo ɖisílɔ ce wú ɔ, un ná ɖe we sín fínɛ́! 25 Un ná jó we dó nyi alɔ mɛ nú mɛ e ɖo biba ná hu we wɛ lɛ́ é,* bo ná jó we dó nyi alɔ mɛ nú mɛ e ɖi xɛsi ná wɛ a ɖe lɛ́ é, un ná jó we dó nyi alɔ mɛ nú Babilɔ́nu xɔ́sú Nabukodonɔzɔ́ɔ,* bo ná jó we dó nyi alɔ mɛ nú Kaludéenu lɛ́. 26 Un ná nyi hwi kpó nɔ towe e ji we é kpó dó to e mɛ è ma ji mi ɖe ǎ é mɛ, bɔ mi ná kú jɛ fínɛ́. 27 Bɔ mi ná lɛ́ kɔ wá to e nɔ jló mi é mɛ gbeɖé ǎ.
28 Nya Koníya élɔ́ ɔ, zɛ̌n gbigba e è gbɛ́ wǎn ná é,
alǒ zɛ̌n e mɛ ɖěbǔ ma ba ǎ é kpowun wɛ é nyí a?
Étɛ́wú è ka nyi é kpó kúnkan tɔn lɛ́ kpó dó kɔ́mɛ,
bo nyi yě dó to e mɛ yě ma tuun ǎ é?’
29 Ayǐkúngban* è, ayǐkúngban, ayǐkúngban, ɖǒtó xó Jexóva tɔn.
30 Nǔ e Jexóva ɖɔ é ɖíe:
‘Wlǎn ɖ’ayǐ ɖɔ nya élɔ́ kún ɖó vǐ ɖě ó,
ɖɔ é kún ná mɔ nǔ ɖě sín nu ɖo gbɛhwenu tɔn* ó,
ɖó axɔ́súzinkpo Davídi tɔn jí jínjɔ́n jínjɔ́n kpó acɛ kpikpa ɖo Judáa kpó
ná kpa kúnkan tɔn lɛ́ ɖě ǎ.’”