Jelemíi
20 Din ɔ, Pacewúu, vǐ súnnu Imumɛ́ɛ tɔn, éé nyí vɔ̌sánúxwlémawutɔ́, bo lɛ́ nyí nukúnkpénǔwútɔ́ tají ɖo xwé Jexóva tɔn gbe é ɖo tó ɖó Jelemíi wɛ hwenu e é ɖo nǔ énɛ́ lɛ́ ɖɔ ɖ’ayǐ wɛ é. 2 Énɛ́ ɔ, Pacewúu dó nǔ gbeyíɖɔ Jelemíi bo sɔ́ ɛ ɖó sókpo e ɖo Bɛnjamɛ́ɛ sín hɔntogbó aga tɔn ɔ nu ɖo xwé Jexóva tɔn gbe é mɛ. 3 Amɔ̌, ayǐhɔ́ngbe tɔn e Pacewúu ɖe Jelemíi tɔ́n sín sókpo ɔ mɛ é ɔ, Jelemíi ɖɔ n’i ɖɔ:
“Jexóva ylɔ́ we ɖɔ Pacewúu ǎ, loɔ, Xɛsi lɛ́ lɛ̌ dó wɛ é ylɔ́ we ɖɔ. 4 Ðó nǔ e Jexóva ɖɔ é ɖíe: ‘Un ná bló bɔ nǔ e ná xá we é ná dó xɛsi nú hwiɖésúnɔ kpó xɔ́ntɔn towe lɛ́ bǐ kpó, bɔ kɛntɔ́ yětɔn lɛ́ ná sɔ́ hwǐ dó hu yě ɖo nukún towe mɛ; bɔ un ná jó Judáa ɔ bǐ dó alɔ mɛ nú axɔ́sú Babilɔ́nu tɔn, bɔ é ná kplá yě yi kannumɔgbénu, bo ná sɔ́ hwǐ dó hu yě. 5 Bɔ un ná ná toxo élɔ́ sín dɔkun lɛ́ bǐ, nǔɖókan tɔn lɛ́ bǐ, nǔ xɔ akwɛ́ tɔn lɛ́ bǐ, gɔ́ nú axɔ́sú Judáa tɔn lɛ́ sín dɔkun lɛ́ bǐ kɛntɔ́ yětɔn lɛ́, bɔ yě ná vɔ yě, bo ná bɛ́ yě yi kannumɔgbénu gǎnnugǎnnu. 6 Bɔ hwɛ Pacewúu kpó mɛ e nɔ nɔ xwé towe gbe lɛ́ é bǐ kpó ɔ, mi ná yi kannumɔgbénu. A ná yi Babilɔ́nu, bo kú ɖo dɔ̌n, bɔ è ná ɖi hwi kpó xɔ́ntɔn towe lɛ́ bǐ kpó ɖo dɔ̌n, ɖó a ɖó adingban nú yě ɖo gbeyíɖɔzɔ́ towe kɔn.”’
7 Jexóva è, a zán mì, ɛɛn, a zán mì.
A ɖe xlɛ́ ɖɔ émí ɖó hlɔ̌nhlɔ́n hú mì, bo ɖu ɖ’é jí.
Un húzú nǔ kiko ɖo azǎn lɛ́ bǐ jí,
mɛ bǐ nɔ cá mì ko.
8 Ðó hweɖébǔnu e un ɖɔ xó é ɔ, un ɖó ná sú xó, bo jlá ɖɔ:
“Dǎkaxixo kpó kúnsúdónúnǔ kpó!”
Xó Jexóva tɔn wá nyí nǔ e wú è nɔ zun mì, bo nɔ ɖɔ nǔyá nú mì ɖo azǎn lɛ́ bǐ jí é.
9 Énɛ́ wú ɔ, un ɖɔ: “Un sɔ́ ná ɖɔ xó tɔn ɖě ǎ,
un ka sɔ́ ná ɖɔ xó ɖo nyǐkɔ tɔn mɛ ɖě ǎ.”
Amɔ̌, é cí myɔ ɖɔhun, bo ɖo jiji wɛ ɖo ayi ce mɛ. É cí myɔ ɖo jiji wɛ, bo ɖo glɔ̌nglɔ́n jí ɖo xú ce lɛ́ mɛ ɖɔhun.
Hinhɛn tɔn ci kɔ nú mì,
un sɔ́ sixú dɛ ɖ’é nu ǎ.
10 Ðó un se yěɖɔyěɖɔ baɖabaɖa gěgé;
xɛsi ɖaxó vun blá mì.
“Mi ɖe è gba; mi nú mǐ ní ɖe è gba!”
Mɛ e nɔ ɖɔ ɖɔ émí ɖo fífá mɛ xá mì lɛ́ é bǐ nɔ ɖo ayǐjijɛ ce cɔ́ wɛ:
“Bóyá é ná wa xlonɔnú ɖé,
bɔ mǐ ná ɖu ɖo jǐ tɔn, bo ba hlɔn wǔ tɔn.”
11 Amɔ̌, Jexóva ɖo kpɔ́ xá mì ahwanfuntɔ́ e dó xɛsi é ɖɔhun.
Énɛ́ wú wɛ mɛ e ɖo ya dó nú mì wɛ lɛ́ é ná klɛ́n afɔ, yě ná ɖu ɖ’é jí ǎ.
È ná dó winnyá ɖaxó yě, ɖó é ná kpa yě ǎ.
È ná wɔn winnyá mavɔmavɔ e yě ná ɖu é ǎ.
12 Amɔ̌, Jexóva ahwankpá lɛ́ tɔn è, hwɛ ɔ, a ɖo nǔjlɔ́jlɔ́watɔ́ gbéjé kpɔ́n wɛ;
a nɔ mɔ linlin e ɖo hwlǎhwlá lɛ́ é,* bo nɔ lɛ́ mɔ ayi mɛ.
Ba hlɔn yě wú bónú má kpɔ́n,
ɖó alɔ towe mɛ wɛ un sɔ́ hwɛɖiɖɔ ce dó.
13 Mi ji han nú Jexóva! Mi kpa susu nú Jexóva!
Ðó é hwlɛ́n wamamɔnɔ* sín nǔnyanyawatɔ́ lɛ́ lɔ mɛ.
14 Heelú azǎn e gbe è ji mì é!
È ní ma kɔn nyɔ̌ná dó azǎn e gbe nɔ ce ji mì é jí ó!
15 Heelú mɛ e dó wɛn ɖagbe élɔ́ tɔ́ ce,
b’ɛ zɔ́n bɔ é ɖó awǎjijɛ ɖaxó é:
“È ji vǐ súnnu ɖokpó nú we, ɛɛn, súnnuví ɖokpó!”
16 Mɛ énɛ́ ní cí toxo ɖěɖěe sín kún Jexóva sú dó, bɔ é ma ka wá vɛ́ n’i ǎ lɛ́ é ɖɔhun.
É ní se xósúsú ɖo zǎnzǎn, bo se ahwanfunfun sín xósúsú ɖo hwemɛ.
17 Étɛ́wú é ma ka hu mì dó adɔgo mɛ,
bɔ mɔ̌ mɛ ɔ, nɔ ce ná húzú yɔdo ce,
bo ná ɖo xo tɛgbɛ ǎ?
18 Étɛ́wú un ka ɖó ná tɔ́n sín adɔgo mɛ,
bá dó mɔ adohu adohu kpó aluwɛ kpó,
bɔ gbɛzán ce ná fó kpó winnyá kpó?