Jelemíi
19 Nǔ e Jexóva ɖɔ é ɖíe: “Yi xɔ kozɛ́n ɖokpó ɖo zɛ̌nmɛtɔ́ gɔ́n. Kplá tomɛxó ɖé lɛ́ kpó mɛxó e ɖo vɔ̌sánúxwlémawutɔ́ lɛ́ nu lɛ́ é ɖé lɛ́ kpó, 2 bo yi Vǐ súnnu Hinnɔ́ɔ tɔn sín tɔdo mɛ, ɖo Zɛ̌nxwɛhɔntogbó ɔ sín alinu. Ðɔ xó e un ɖɔ nú we lɛ́ é ɖo fínɛ́. 3 A ná ɖɔ: ‘Axɔ́sú Judáa tɔn lɛ́ kpó mi mɛ e nɔ nɔ Jeluzalɛ́mu lɛ́ é kpó è mi, mi ɖótó xó Jexóva tɔn. Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe:
“‘“Un ná sɔ́ awě dó xo nɔtɛn élɔ́, bɔ mɛ ɖěbǔ e ná se é ɔ, é ná cí kliwun n’i.* 4 Ðó yě jó mì dó, bo bló bɔ è sɔ́ sixú tuun nɔtɛn élɔ́ ǎ wú wɛ nǔ ná nyí mɔ̌. Yě nɔ sá vɔ̌ nú mawu ɖěvo lɛ́ ɖo fínɛ́, mawu e yě kpó tɔ́gbó yětɔn lɛ́ kpó, gɔ́ nú axɔ́sú Judáa tɔn lɛ́ ma tuun ǎ lɛ́ é, bɔ yě bló bɔ xomɛvɔ́nɔ lɛ́ sín hun kpé nɔtɛn élɔ́. 5 Yě sɔ́ nǔ nú nɔtɛn ɖeɖóvo Baálu tɔn lɛ́ bo ná dó dó vǐ súnnu yětɔn lɛ́ zo ɖo myɔ mɛ nú Baálu, nǔníná e è nɔ dó blěbú tɔn zo é ɖɔhun; nǔɖé wɛ bɔ un ɖe gbe tɔn, alǒ ɖɔ ǎ, é ka tlɛ wá ayi mɛ nú mì kpɔ́n ǎ.”’*
6 “‘“Énɛ́ wú ɔ, hwe ɔ nu jawě,” wɛ Jexóva ɖɔ, “bɔ è sɔ́ ná nɔ ylɔ́ nɔtɛn élɔ́ ɖɔ Tofɛ́ti, alǒ Vǐ súnnu Hinnɔ́ɔ tɔn sín tɔdo ɖě ǎ. Loɔ, è ná nɔ ylɔ́ ɖɔ tɔdo Mɛhuhu tɔn. 7 Un ná hɛn Judáa kpó Jeluzalɛ́mu kpó sín tuto lɛ́ gblé ɖo nɔtɛn élɔ́, bo ná bló bɔ yě ná kú hwǐ kú ɖo kɛntɔ́ yětɔn lɛ́ nukɔn, ɛɛn, ɖo mɛ ɖěɖěe ɖo biba wɛ bo ná hu yě lɛ́ é* nukɔn. Bɔ un ná ná cyɔ yětɔn lɛ́ bɔ é ná nyí nǔɖuɖu nú xɛ e ɖo jǐnukúnsin lɛ́ é kpó kanlin e ɖo ayǐkúngban jí lɛ́ é kpó. 8 Un ná bló bɔ toxo élɔ́ ná húzú nǔ e xyɔ́ wǔ é, bo húzú nǔ kiko. Mɛ ɖěbǔ e ná gbɔn fínɛ́ wá yi é ná sɔ́ nukún e è nɔ sɔ́ dó kpɔ́n nǔ e xyɔ́ wǔ é ná é dó kpɔ́n ɛ, bɔ jɛmɛjí e ná wá jǐ tɔn lɛ́ é ná zɔ́n bɔ é ná húzú nǔ kiko* nú mɛ ɔ. 9 Un ná bló bɔ yě ná ɖu vǐ súnnu yětɔn lɛ́ kpó vǐ nyɔ̌nu yětɔn lɛ́ kpó sín lan, bɔ mɛ ɖokpó ɖokpó ná ɖu nɔzo tɔn sín lan, ɖó go e è ján dó yě é kpó ɖěwagbɛn e ma ɖe ǎ hwenu e kɛntɔ́ yětɔn lɛ́, ɛɛn, mɛ ɖěɖěe ɖo biba wɛ bo ná hu yě lɛ́ é* lɛ́ lɛ̌ dó yě é wú.”’
10 “Énɛ́ gúdo hǔn, gba zɛ̌n ɔ ɖo súnnu e kpó hwi kpó yi lɛ́ é nukúnmɛ, 11 bo ɖɔ nú yě ɖɔ: ‘Nǔ e Jexóva ahwankpá lɛ́ tɔn ɖɔ é ɖíe: “Lěe un ná gba togun énɛ́ kpó toxo énɛ́ kpó gbɔn é nɛ́, ɛɛn, lěe mɛɖé nɔ gba zɛ̌nmɛtɔ́ sín zɛ̌n bɔ è ma sɔ́ sixú blóɖó gbeɖé ǎ é ɖɔhun; bɔ yě ná ɖi cyɔ dó Tofɛ́ti káká bɔ tɛnmɛ ɖě sɔ́ ná kpo ǎ.”’
12 “‘Nǔ e un ná wa nú nɔtɛn énɛ́ é nɛ́,’ wɛ Jexóva ɖɔ, ‘bo ná wa nú mɛ e nɔ nɔ fínɛ́ lɛ́ é, bo ná dó bló bɔ toxo élɔ́ ná cí Tofɛ́ti ɖɔhun. 13 Xwé e ɖo Jeluzalɛ́mu lɛ́ é kpó axɔ́sú Judáa tɔn lɛ́ sín xwé lɛ́ kpó ná húzú nǔ blíblí nɔtɛn élɔ́ ɖɔhun, énɛ́ wɛ nyí Tofɛ́ti, ɛɛn, xwé e sín xɔ ta yě nɔ bo sá vɔ̌ nú ahwankpá jǐxwé tɔn lɛ́ ɖe lɛ́ é bǐ kpó fí e yě kɔn nǔníná vɛ̌ɛn tɔn lɛ́ kɔn nyi ayǐ nú mawu ɖěvo lɛ́ ɖe lɛ́ é kpó.’”
14 Ée Jelemíi lɛ́ kɔ sín Tofɛ́ti, fí e Jexóva sɛ́ ɛ dó ɖɔ é ní wa gbeyíɖɔzɔ́ ɖe é ɔ, é nɔ te ɖo xwé Jexóva tɔn sín kɔ́xota bo ɖɔ nú togun ɔ bǐ ɖɔ: 15 “Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Un ná sɔ́ awě e xó un ɖɔ dó toxo élɔ́ kpó gletoxo tɔn lɛ́ bǐ kpó wú é dó xo yě, ɖó yě gbɛ́ kpó ta syɛ́nsyɛ́n kpó ɖɔ émí kún ná se tónú nú xó ce lɛ́ ó.’”